Suma 22 - Fana Ngbangɔ 1987

¹ Angelo ko afa nga mbi na ngu mɛ ndohɛ̃ zo bɛta du. Le ngu ni ndosũ bai bai nga ma lɛ tala tala. Ngu ni ndosi na ya ngɛndɛ gbia tɛ Nzapa na tɛ Nyi Ngasã Ngbaga.

² Ngu ni ndosua na bɛ lege mɛ aɔ na ya kɔdɔrɔ ni. Alulu akɛkɛ mɛ ndohɛ̃ zo bɛta du na tɛrɛ lege ni mbage na mbage. Akɛkɛ ni ndole fani sui kɔi ndoni sɛ na ya buru kɔi, fani kɔi na ya nzɛ̃ kɔi. Kugbe ni adu yɔrɔ mɛ andosara na awa ngã ti lɛ sese.

³ Ta ye kɔi mɛ Nzapa azonga ni adu gbanda so ya kɔdɔrɔ ni ko ma. Nzapa na Nyi Ngasã Ngbaga adunga gbanda na ndo ngɛndɛ gbia tɛ la so ya kɔdɔrɔ ni, ko awa kwa tɛ Nzapa avɔrɔ gbanda Nzapa.

⁴ Ala hũ gbanda lo na lɛ la, asu nga gbanda ili lo na ndo lɛ la.

⁵ Ta bi ti vu gbanda ma. Ta ala ti du gbanda na gwɛ̃ ti mɔinda, bere na gwɛ̃ ti lá ma, na lo mɛ ya, lá tɛ la gbanda la ndima tɛ Gbia Nzapa, ko ala lɛ gbanda gbia buru na buru.

Gangɔ tɛ Yezo

⁶ So pɛni, angelo apa hɛ̃ mbi ya: “Tɛnɛ olo adu beta tɛnɛ, adu nga tɛnɛ mɛ zo alengbi ti kpãngɔ bɛ lo ndo ni. Gbia Nzapa mɛ wa hɛ̃ngɔ Tɔrɔ Santo tɛ lo hɛ̃ awa pangɔ nyɔ lo, ato angelo tɛ lo ya, lo fa awa kwa tɛ ni na alo mɛ na singɔ bo lo mɛ.”

⁷ La Yezo apa ya: “Ma hĩ, angbã yakere mbi ga! Dengɔ bɛ ati na azi ko la atɔndɔ tɛnɛ mɛ alo ka nyɔ Nzapa, la asu na ya buku olo mɛ.”

⁸ Mbi Yoanɛ, mbi ma ndo tɛnɛ ni, mbi hũ nga ndo alo ni na lɛ mbi. Ko ngoi mɛ ndo mbi ma ni, mbi hũ nga ni wɛ ko, mbi kuku ndo so gbɛlɛ angelo mɛ afa mbi na aye ni ko, ya mbi vɔrɔ lo.

⁹ Ko lo pa hɛ̃ mbi ya, ta mbi vɔrɔ ni ma! Ni nga wa kwa tɛ Nzapa nga ma mbi na afɔ̃ mbi mɛ awa pangɔ nyɔ Nzapa, nga na azi zu mɛ ndotɔndɔ tɛnɛ mɛ asu na ya buku olo mɛ. Ale mbi vɔrɔ bo Nzapa!

¹⁰ Lo pa nga hɛ̃ mbi ya, tɛnɛ mɛ alo ka nyɔ Nzapa la mbi su na ya buku olo mɛ ko, ta mbi bata ni ka ya bɛ mbi ma, ale mbi pa ni. Ta sanga ma, ngoi ti singɔ tɛ aye ni ko zu adoli wɛ.

¹¹ Zo ko la wa lingɔ siɔ ye, ali bo siɔ ye tɛ lo! Zo ko la se li ye tɛ lo siɔni, lo du bo na se siɔ li ye tɛ lo ni! Zo ko la lo zo tɛ Nzapa, lo du bo zo tɛ Nzapa!

¹² La Yezo apa ya: “Ma hĩ, angbã yakere mbi ga. Mbi na gangɔ na mbana gɛrɛ, ko mbi na hɛ̃ngɔ ni hɛ̃ zo kɔi kɔi na se kwa tɛ lo mɛ lo li.

¹³ Mbi wa li ni, mbi nga wa nda ni, mbi wa tongɔ nda ye, mbi nga wa kɔngɔ nda ye, mbi wa kɔzo, mbi nga wa gesi.”

¹⁴ Dengɔ bɛ ati na azi ko la akpo abɔngɔ tɛ la, ala lengbi ti ɔngɔ ti nyɔ ngise, lingɔ ka ya kɔdɔrɔ na lo ni. Ala lengbi ti tɛngɔ le kɛkɛ mɛ ndohɛ̃ zo bɛta du.

¹⁵ Azi mɛ gbanda angbã ka pɛ gbágbá mɛ aka kɔdɔrɔ ni lo mɛ: azi mɛ asiɔ ye ako ndo bɛ la, awa biando, awa lingɔ siɔ ye ti kamɛnɛ, awa kpɔngɔ azi, awa vɔrɔngɔ angbilondo, awa nvɛnɛ mɛ ahɛ̃ tɛrɛ la so pangɔ nvɛnɛ nga so lingɔ kwa ti nvɛnɛ!

¹⁶ “Mbi Yezo, mbi to angelo tɛ mbi ya, lo pa tɛnɛ olo zu hɛ̃ ĩ azi ti Eklezia. Mbi lo na nda se wa tɛ Davidi, mbi tara lo mɛ ndo ĩ ma ya, mbi na gangɔ. Mbi nga ma tongolo mɛ ndosũ na nyɔ ndã.”

¹⁷ La Tɔrɔ Santo ana wali tɛ Nyi Ngasã Ngbaga apa ya: “Ga!” Zo ko la ama tɛnɛ ni ko, ale lo pa nga ya: “Ga!” Zo ko la gwɛ̃ ngu agbɔ̃ lo ko, ale lo ga lo nyɔ ni. Zo ko la aye nyɔngɔ ngu mɛ ndohɛ̃ zo bɛta du ko, lo lua ni gɛgɛrɛ.

Yoanɛ akɔ nda tɛnɛ tɛ lo

¹⁸ Tɛnɛ mɛ alo ka nyɔ Nzapa, la mbi Yoanɛ mbi su na ya buku olo, azi zu ko la ama ni ko, mbi tisa la ya: se zo akpã tɛnɛ mɛ ndɛ̃ na ndo ni ko, Nzapa akpã nga gbanda apɛnɔ mɛ mbi su na ya buku olo na ndo etumbu tɛ lo.

¹⁹ Wa se zo ahã mbanga tɛnɛ ni azi ko, Nzapa agbanzi nga gbanda lo na lingɔ ka Kɔdɔrɔ Santo tɛ lo, ta lo tɛ gbanda le kɛkɛ mɛ ndohɛ̃ zo bɛta du ma. Adu tɛnɛ ti le kɛkɛ, na tɛnɛ ti Kɔdɔrɔ mɛ mbi su na ya buku olo.

²⁰ Yezo mɛ apa ya, tɛnɛ olo adu bɛta tɛnɛ ko, lo pa nga ya: “Seni la, angbã yakere mbi ga!” Ae! Adu bɛ seni la ma ke! Gbia Yezo, ga!

²¹ Gbia Yezo ali bɛ nzɔ̃ bɛ hɛ̃ ĩ zu ma ke!