Suma 21 - Fana Ngbangɔ 1987

Fana ndozu na fana sese

¹ So pɛni, mbi hũ fana ndozu na fana sese. Ndozu ti uzu na sese ti uzu amina ndo wɛ, ta kota ngu ti dɛ nga ndo da ma.

² Mbi hũ kɔdɔrɔ tɛ Nzapa, adu fana Yeruzalɛmɛ mɛ alo ka tɛ Nzapa ka ndozu, azu ge tise. Nzapa alɛkɛ kɔdɔrɔ ni nzɔ̃ni, nga ma wali mɛ afua tɛrɛ lo so gwengɔ ka tɛ kɔ lo.

³ Mbi ma legɔ̃ zo ka tɛrɛ ngɛndɛ gbia atɛnɛ tɛnɛ na kɔngɔ ya: “Na olo ko, Nzapa adu kɔdɔrɔ na popo tɛ azi! Lo na dungɔ ndoni kɔi na la, ala nga na dungɔ azi tɛ lo. Nzapa nvɛni na dungɔ ndoni kɔi na la, lo na dungɔ Nzapa tɛ la.

⁴ Lo mbo gbanda ngulɛ zu ka lɛ la lo zi. Ta azi ti kpili gbanda ma, ta azi ti lɛ gbanda muã ma, ta azi ti dema gbanda tɛrɛ la ma, ta azi ti hũ nga gbanda pɛnɔ ma. Angbina ye amina nga gbanda.”

⁵ La zo mɛ adu so ndo ngɛndɛ gbia apa ya: “Na olo ko, mbi li aye zu fanani.” Lo pa hɛ̃ mbi ya: “Su tɛnɛ mɛ, ta sanga ma, tɛnɛ ni adu bɛta tɛnɛ, adu nga tɛnɛ mɛ zo alengbi ti kpãngɔ bɛ lo ndo ni.”

⁶ Lo ti pa nga ya: “Awe! Mbi wa li ni, mbi nga wa nda ni, mbi wa tongɔ nda aye zu, mbi nga wa kɔngɔ nda aye zu. Zo ko gwɛ̃ ngu agbɔ̃ lo ko, mbi hɛ̃ lo ngu gɛgɛrɛ, lo nyɔ. Ngu ti li ngu mɛ ndohɛ̃ zo bɛta du.

⁷ Zo ko agbe bɛ lo na ya pɛnɔ, anwɔ ni ko, mbi hɛ̃ lo anzɔ̃ lo ni ko. Mbi na dungɔ Nzapa tɛ lo, ko lo nga na dungɔ nyi mbi.

⁸ Wa adu tɛ azi mɛ ta ala na mimi bɛ ma, na azi mɛ akɛ̃ tɛnɛ tɛ Nzapa, na azi mɛ siɔ ye ako ndo bɛ la, na awa hongɔ azi, na awa lingɔ siɔ ye ti kamɛnɛ, na awa biando, na awa vɔrɔngɔ angbilondo, nga na awa nvɛnɛ zu ko, asa gbanda la ka ya wá mɛ lɛ ni kotani nga ma lɛ kpo. Ko wá ni adu nwa tɛ́nɛ la ndoza da. Adu ndo ti kwá ti sɛ.”

Fana Yeruzalɛmɛ

⁹ Na popo tɛ aangelo mbara mbara mɛ ndo agbɔ̃nɔ kangu mbara mbara so ti la, na andangba pɛnɔ mbara mbara mɛ asĩsĩ ya ni ko, angelo kɔi aga apa hɛ̃ mbi ya, mbi ga, ni fa mbi na wali mɛ Nyi Ngasã Ngbaga na dungɔ na lo.

¹⁰ Tɔrɔ Santo asa tɛrɛ mbi, la angelo ayɔ mbi, anɔ na ni ka bɛ li hɔtɔ mɛ ganguruni. Lo fa mbi na Yeruzalɛmɛ, bɛta kɔdɔrɔ mɛ alo ka ndozu ka tɛ Nzapa, la azu ge tise.

¹¹ Ndima tɛ Nzapa ndosũ ka ya kɔdɔrɔ ni ko. Kɔdɔrɔ ni ndosũ nga ma tɛ́nɛ ti kota ngere, andosũ nga ma tɛnɛ mɛ ili ni la yaspɛ, ko se mɔ ba ni ko, mɔ hũ ndo ka pɛ ni nga ma se mɛ mɔ lengbi ti hũngɔ ndo ko tɛ́nɛ mɛ ili ni la kristalɛ.

¹² Akpɔ kota gbágbá ti briki aka na kɔdɔrɔ ni kɛrɛrɛ, gbágbá ni ganguruni. Nyɔ ngise da sui kɔi ndoni sɛ. Aangelo sui kɔi ndoni sɛ alengbi na nyɔ ngise ni kɔi kɔi so batangɔ ni. Asuru ili ale tɛ awa Izrayɛlɛ sui kɔi ndoni sɛ alengbi na nyɔ ni kɔi kɔi zu.

¹³ Katɛ gbágbá ni siɔ, ko katɛ ni kɔi kɔi na nyɔ ngise ota. Nyɔ ngise ota aba tɔ, ota aba do, ota aba banga, ota mɛ ndɛ̃ aba mbongo.

¹⁴ Awa gu gɛrɛ gbágbá ni na ndo tɛnɛ sui kɔi ndoni sɛ. Asuru ili awa pangɔ kwa tɛ Nyi Ngasã Ngbaga sui kɔi ndoni sɛ na ndo tɛnɛ ni kɔi kɔi zu.

¹⁵ Angelo mɛ ndotɛnɛ tɛnɛ hɛ̃ mbi agbɔ̃ kɛkɛ mɛ alɛkɛ na wɔrɔ so ti lo. Adu kɛkɛ mɛ andoha na ye. Lo nɔ so hangɔ na fana kɔdɔrɔ ti Yeruzalɛmɛ, hangɔ anyɔ ngise ni, nga na gbágbá ni.

¹⁶ Katɛ kɔdɔrɔ ni siɔ, ko yɔngɔ ni zu bo kwɛ kɔi. Angelo amu kɛkɛ tɛ lo mɛ andoha na ye, aha na mbanga katɛ fana kɔdɔrɔ ni. Katɛ ni ayɔ kilomɛtrɛ koto sɛ na ndoni kilomɛtrɛ ngbangbo sɛ. Ko yɔngɔ ti akatɛ ni zu nga na ti ndozu bo kwɛ kɔi. Lo ĩ ha nga longɔ tise gwengɔ ndozu ko, yɔngɔ ni alengbi na katɛ ni kɔi kɔi.

¹⁷ Angelo aha nga gbágbá ni. Lo ĩ ha longɔ tise gwengɔ ndozu ko, alengbi na mɛtrɛ sui mbara mbara ndoni sɛ, adu se mɛ azi ndoha na ye la.

¹⁸ Awá gbágbá ni zu na tɛ́nɛ mɛ ili ni la yaspɛ. Awá kɔdɔrɔ ni nvɛni na bɛta wɔrɔ mɛ tɛrɛ ni nga ma lɛ tala tala.

¹⁹ Afua ndo atɛ̃nɛ mɛ awa na ngu gɛrɛ gbágbá ti kɔdɔrɔ ni na anzɔ̃nzɔ̃ tɛ́nɛ ti kota ngere ndɛ̃ ndɛ̃ ndɛ̃. Tɛ́nɛ ti uzu mɛ awa na gu gɛrɛ gbágbá ni, ili ni la yaspɛ, tɛrɛ ni nga ma lɛ tala tala. Tɛ́nɛ ti sɛ, ili ni la safirɛ, tɛrɛ ni bolo. Tɛ́nɛ ti ta, ili ni la agatɛ, tɛrɛ ni nga ma tɛrɛ konga. Tɛ́nɛ ti siɔ, ili ni la emɛrodɛ, tɛrɛ ni nga ma ngu ngunza.

²⁰ Tɛ́nɛ ti kɔ̃, ili ni la onikisi, tɛrɛ ni nga ma sese. Tɛ́nɛ ti mana, ili ni la sardoanɛ, tɛrɛ ni bengbani nga ma kpɔ̃. Tɛ́nɛ ti mbara mbara, ili ni la krizolitɛ, tɛrɛ ni nga ma gangba. Tɛ́nɛ ti miambe, ili ni la berilɛ, tɛrɛ ni nga ma tɛrɛ kúlúngú. Tɛ́nɛ ti gumbaya, ili ni la topazɛ, tɛrɛ ni nga ma gangba. Tɛ́nɛ ti sui kɔi, ili ni la krizoprazɛ, tɛrɛ ni peɛɛ. Tɛ́nɛ ti sui kɔi ndoni kɔi, ili ni la turkoazɛ, tɛrɛ ni nga ma tɛrɛ zeka. Tɛ́nɛ ti sui kɔi ndoni se, ili ni la ametistɛ, tɛrɛ ni nga ma tɛrɛ tɛtɛ.

²¹ Nyɔ gbágbá ni sui kɔi ndoni se. Alɛkɛ nyɔ ngise ni kɔi kɔi na tɛ́nɛ ti kota ngere mɛ ili ni la pɛrlɛ. Alɛkɛ alege ti kɔdɔrɔ ni na bɛta wɔrɔ mɛ se mɔ ba ni ko, mɔ hũ ndo ka pɛ ni.

²² Ta mbi hũ da Nzapa na ya kɔdɔrɔ ni ma, ta sanga ma, Gbia Nzapa mɛ lombe, na Nyi Ngasã Ngbaga, la adu da Nzapa ti kɔdɔrɔ ni.

²³ Ta kɔdɔrɔ ni na gwe ti lá bere na gwɛ̃ ti nzẽ, ya asũ da ma. Ta sanga ma, ndima tɛ Nzapa ndosũ na ya kɔdɔrɔ ni, ko Nyi Ngasã Ngbaga ndovuru tɛ lo na ndo.

²⁴ Kai ko, azi ti le sese adɔ gbanda nɔ na ya vuru ndo. Agbia ti lɛ sese anɔ gbanda na nwa tɛ la kai.

²⁵ Anyɔ ngise ni angbã gbanda ngoi zu gapoo, ta avĩ ni gbanda ma, ta sanga ma, ta bi avu gbanda kai ma.

²⁶ Azi ti lɛ sese aga gbanda kai na nwa nga na ndima tɛ la.

²⁷ Ta ye kɔi ti bi, bere zo kɔi mɛ ahɛ̃ tɛrɛ lo na lingɔ siɔ ye, bere ahɛ̃ nga tɛrɛ lo so pangɔ nvɛnɛ ali gbanda kai ma, wenge bo azi mɛ asu ili la na ya buku mɛ asuru na ili azi mɛ alua du ti kaka. Buku ni adu tɛ Nyi Ngasã Ngbaga.