Suma 20 - Fana Ngbangɔ 1987

Abi Satana bɔlɔkɔ buru koto kɔi

¹ So pɛni, mbi hũ angelo mɛ ndɛ̃ alo ka ndozu azu. Lo gbɔ̃ nyi kɛrɛrɛ ti zingɔ na nyɔ du mɛ lipi lipi so ti lo, lo gbɔ̃ kota nzingiri so ti lo.

² Lo gbɔ̃ nga sa ti kpɛnɛ mɛ nga ma ngunde. Sa ni ko adu ngbɔ ti gã, adu Zabulu bere Satana. Angelo agbe lo na nzingiri ya, lo ngbã so ya ni buru koto kɔi.

³ La angelo abi lo ka ya du mɛ lipi lipi. Lo to nyɔ du ni na ta kɛrɛrɛ, lo minya nyɔ du ni na ndã ya, so Satana alo kai asi, ahanda azi ti lɛ sese. Ko ale Satana angbã bo kai nga ka buru koto kɔi alengbi hĩ wadila. So pɛni, ale azi lo, kanda ta lo na ningangɔ ngoi yɔngɔrɔni ma.

⁴ So pɛni, mbi hũ nga angɛndɛ gbia na azi so ndo ni dunga. Nzapa ahɛ̃ azi ni ko nguru ya, ala fa ngbanga tɛ azi. Mbi hũ nga atɔrɔ tɛrɛ azi mɛ ndo afara gɔ̃ la, na lo mɛ ya, ala pa ndo tɛnɛ tɛ Nzapa, apa nga bɛta tɛnɛ mɛ Yezo afa na la. Ta ala vɔrɔ ndo sa ni, bere ngbilondo tɛ sa ni ma. Ta asu ndo ili sa ni na ndo lɛ la, bere na ndo ti la ma. Ala so na pɛ kwá, ko ala na Yezo Kristo ale gbia buru koto kɔi.

⁵ (Adu akɔzo azi mɛ aso na pɛ kwá. Wa tɛ ambanga azi mɛ ndo akpili ko, ala ku nga ka buru koto kɔi alengbi hĩ wadila ala so.)

⁶ Dengɔ bɛ, na nzɔ̃ lo ati na azi ko gbanda aso kɔzoni! Ta ala ti kpili gbanda kwá ti se ma. Ala du gbanda awa lungɔ Nzapa na ye, ala lu nga gbanda Yezo Kristo na ye, ala na Yezo alɛ nga gbanda gbia buru koto kɔi.

Nzapa anwɔ Satana

⁷ Ngoi ko gbanda buru koto kɔi alengbi ko, azi Satana ka bɔlɔkɔ, ko lo lo ka ya du lo si,

⁸ wa lo nɔ lo handa azi mɛ agundu na lɛ sese zu. Andoili sese mɛ ala gwe da ya, Gɔgɛ na Magɔgɛ. Lo na bombingɔ la ndoni kɔi ya, ani nɔ, ani tiri azi tɛ Nzapa na to. Azi mɛ gbanda lo bombi la adu gbanda ma wo ma, nga ma mbutu ti nyɔ ngu.

⁹ Lo ĩ bombi la we ko, mbi hũ ala hã nɔ, agwe na lɛ sese zu. Ala ka ngbo tɛ azi tɛ Nzapa kɛrɛrɛ, ala ka nga kɔdɔrɔ ti kpɔ̃ bɛ Nzapa kɛrɛrɛ. Mbi hũ wá alo ka ndozu azu, agbi azi ko zu.

¹⁰ Agbɔ̃ Satana mɛ ndo wa handangɔ la, abi lo ka ya wá mɛ lɛ ni kotani nga ma lɛ kpo. Ko wá ni adu nwa tɛnɛ la ndoza. Amu sa ti kpɛnɛ, na wa pangɔ nyɔ Nzapa na nvɛnɛ, asa nga la ka ya wá ni ko. Ala na hũngɔ pɛnɔ bi na lá, buru na buru.

Nzapa afa gbanda ngbanga tɛ azi zu

¹¹ So pɛni, mbi hũ kota mbufu ngɛndɛ gbia, na zo so ndo ni du. Sese na ndozu akpɛ so gbɛlɛ zo ni ko aɔ, amina.

¹² Mbi hũ akota azi na ambumbusɛ azi mɛ ndo akpili, ala longa so gbɛlɛ ngɛndɛ gbia ni. Mbi hũ azizi ya abuku, azi nga ya buku mɛ ndɛ̃ mɛ asuru na ili azi mɛ alua du ti kaka. Nzapa afa ngbanga tɛ awa kwáni na se ye mɛ ndo ala li, nga ma se mɛ asu na ni ka ya abuku ni ko,

¹³ Azi mɛ ndo akpili ka ya ngu, alo ka ya ngu asi. Awa kwáni mɛ ndo ka ndo tɛ la, alo nga kai asi.

¹⁴ La mbi hũ agbɔ̃ kwá, amu nga ndo tɛ lo, asa la ka ya wá mɛ lɛ ni kotani nga ma lɛ kpo. Lɛ wá ni ko adu ndo mɛ gbanda azi akpili kwá ti sɛ da.

¹⁵ Zo ko ndo la ta asu ili lo ka ya buku mɛ asuru na ili azi mɛ alua du ti kaka ma ko, abi lo gbanda ka ya wá ni ko.