Suma 2 - Fana Ngbangɔ 1987

Kwa mɛ Yezo ato hɛ awa Eklezia ti Efɛzɛ

¹ “Su tɛnɛ olo mɔ to hɛ̃ angelo mɛ ndobata awa Eklezia ti Efɛzɛ. Tɛnɛ ni alo ka nyɔ zo mɛ agbɔ̃ atongolo mbara mbara na kɔti ti lo, zo ni ndodɔ nɔ na popo ti gɛrɛ wá mbara mbara mɛ alɛkɛ na wɔrɔ. Zo ni ko apa ya,

² ni hĩnga ye zu mɛ ĩ li, ni hĩnga ya, ĩ ndoli kwa kpuru kpuru, ĩ ndogbe nga bɛ ĩ na ya pɛnɔ. Ni hĩnga ya, ĩ kɛ̃ batangɔ asiɔ azi so popo tɛ ĩ. Ĩ tara bɛ azi mɛ ndomu tɛrɛ la ya, ani awa pangɔ kwa tɛ ni, kanda ta ala awa pangɔ kwa tɛ ni ma, ko ĩ hũ ya, ala du awa nvɛnɛ.

³ Ni hĩnga nga ya, ĩ ndogbe bɛ ĩ na ya pɛnɔ mɛ ĩ ndohũ na lo tɛ ni, ko ta ĩ nzɛ̃ ma.

⁴ Wa ĩ ba siɔ ye tɛ ĩ kɔi mɛ ni kɛ̃ lo mɛ: ta ĩ ti dɛ ĩ ye ni nga ma se ti uzu ma.

⁵ Wa ale ĩ da bɛ ĩ na ndo ko ndo ĩ da, uzu ti ĩ tingɔ awa lingɔ siɔ ye, ko ĩ gbinya bɛ ĩ, ĩ li ye nga ma se ko ndo ĩ da uzu. Se ta ĩ gbinya bɛ ĩ ma ko, ni ga ka tɛ ĩ, ni hã gɛrɛ wá tɛ ĩ na ndo mɛ akpã na ni.

⁶ Wa ĩ ba nzɔ̃ ye mɛ ni gonda ĩ na lo ni lo mɛ: Ĩ kɛ̃ ye mɛ ava Nikola ndoli, nga ma se mɛ ni kɛ̃ na ni.

⁷ “Zo ko la ma lo adu da ko, ale lo ma tɛnɛ mɛ Tɔrɔ Santo atɛnɛ hɛ̃ awa Eklezia! Azi ko la agbe bɛ la na ya apɛnɔ, anwɔ ni ko, gbanda ko, ni hɛ̃ la lege, ala tɛ le kɛkɛ mɛ ka lɛ yaka tɛ Nzapa. Adu le kɛkɛ mɛ ndohɛ̃ zo bɛta du.”

Kwa mɛ Yezo ato hɛ awa Eklezia ti Simirnɛ

⁸ “Su tɛnɛ olo mɔ to hɛ̃ angelo mɛ ndobata awa Eklezia ti Simirnɛ. Tɛnɛ ni alo ka nyɔ wa tongɔ nda aye zu, lo mɛ nga wa kɔngɔ nda aye zu, lo kpi ndo, lo so na pe kwa. Zo ni ko apa ya,

⁹ ni hĩnga apɛnɔ tɛ ĩ, nga na yɛlɛ tɛ ĩ, kanda ti biani ko, ĩ du awa bɛta nwa. Ni hĩnga nga ló mɛ azi ndokara na ili ĩ. Azi ni ko ndomu tɛrɛ la ya, ani Ayuda, kanda ta ala Ayuda ma, ala azi ti li nɔ tɛ Satana.

¹⁰ Ta ĩ du na mbɛtɔ na lo pɛnɔ mɛ ĩ na hũngɔ ma. Wa í ma la: Satana na sangɔ ambanga azi na popo tɛ ĩ bɔlɔkɔ so tarangɔ bɛ ĩ, ĩ na hũngɔ pɛnɔ bi sui kɔi. Ko ĩ ye bo lo tɛ ni bɛ ĩ kɔi nga ka ĩ kpili. Ni hɛ̃ ĩ gbanda mbana gɛrɛ ĩ, mbana gɛrɛ ni adu du ti kaka.

¹¹ “Zo ko la ma lo adu da ko, ale lo ma tɛnɛ mɛ Tɔrɔ Santo atɛnɛ hɛ̃ awa Eklezia! Azi ko la agbe bɛ la na ya apɛnɔ, anwɔ ni ko, ta ala kpili gbanda kwá ti sɛ ma.”

Kwa mɛ Yezo ato hĩ awa Eklezia ti Pɛrgamɛ

¹² “Su tɛnɛ olo mɔ to hɛ̃ angelo mɛ ndobata awa Eklezia ti Pɛrgamɛ. Tɛnɛ ni alo ka nyɔ zo mɛ lɛ zabe tɛ lo ndoɔ̃ mbage na mbage. Zo ni ko apa ya,

¹³ ni hĩnga ndo mɛ ĩ ndodu da. Ĩ ndodu na ndo mɛ Satana ndole gbia da. Ĩ gbɔ̃ lo tɛ ni ka ka ka. Abɛ na ngoi ko ndo azi aho na Antipasi mɛ bɛta temwɛ tɛ ni, ka tɛ ĩ mɛ Satana ndodu da ko, ĩ gbɔ̃ ndo lo tɛ ni ka ka ka. Ta ĩ zia yengɔ lo tɛ ni ma.

¹⁴ Wa ĩ ba siɔ ye tɛ ĩ mɛ ni bela ĩ na lo ni lo mɛ: ka tɛ ĩ ko, ĩ na ambanga azi mɛ ndohɛ̃ tɛrɛ la na lingɔ alo mɛ ndo Balamɛ aha na azi. Balamɛ afa ndo Balakɛ na lege ti bingɔ awa Izrayɛlɛ na ya asiɔ ye. Asiɔ ye ni lo mɛ: tɛngɔ sa mɛ alu na ngbilondo, nga na lingɔ siɔ ye ti kamɛnɛ.

¹⁵ Ka tɛ ĩ nga ko, ĩ na ambanga azi mɛ ndohɛ̃ tɛrɛ la na lingɔ alo mɛ ava Nikola ndoha na azi.

¹⁶ Wa ale ĩ gbinya bɛ ĩ. Ta so ma ko, angbã yakere ni ga ka tɛ ĩ, ko ni mu zabe mɛ asi so yanga ni, ni tiri azi ni ko na to.

¹⁷ “Zo ko la ma lo adu da ko, ale lo ma tɛnɛ mɛ Tɔrɔ Santo atɛnɛ hɛ̃ awa Eklezia! “Azi ko la agbe bɛ la na ya apenɔ, anwɔ ni ko, ni hɛ̃ nga la gbanda tɛ mɛ ahɔndɛ hɔndɛngɔ, ili tɛ ni la manɛ. Ni hɛ̃ nga gbanda hɛ̃ zo kɔi kɔi na popo tɛ la nyi tɛ́nɛ mɛ mbufuni, asu fana ili na terɛ tɛnɛ ni. Ta zo mɛ ndɛ̃ ahĩnga nda ili ni ma, wenge bo zo mɛ alua ni.”

Kwa mɛ Yezo ato hɛ̃ awa Eklezia ti Tiatirɛ

¹⁸ “Su tɛnɛ olo mɔ to hɛ̃ angelo mɛ ndobata awa Eklezia ti Tiatirɛ. Tɛnɛ ni alo ka nyɔ Nyi Nzapa mɛ lɛ lo ndoza nga ma menga wá. Papu gɛrɛ lo ndosũ nga ma nwa mɛ ayo tɛre ni ati pɔlɔkɔ pɔlɔkɔ. Zo ni ko apa ya,

¹⁹ ni hĩnga ye zu mɛ ĩ ndoli, ni hĩnga yengɔ mɛ ĩ ye na afɔ̃ ĩ. Ni hĩnga ya, ĩ ndobata bo yengɔ lo tɛ ni, ĩ ndohɛ̃ tɛrɛ ĩ na ya kwa tɛ ĩ, ĩ ndogbe bɛ ĩ na ya pɛnɔ. Ni hĩnga nga ya, kwa mɛ ĩ ndoli na olo aɔ kwa mɛ ndo ĩ li uzu.

²⁰ Wa ĩ ba ye tɛ ĩ mɛ ni kɛ̃ lo mɛ: ĩ ye ló hɛ̃ zo wali mɛ ili lo la Yezabɛlɛ. Yezabɛlɛ ni ndomu tɛrɛ lo ya, ni wa pangɔ nyɔ Nzapa. Na lege ti aye mɛ lo ha na awa kwa tɛ ni Yezo ko, lo handa la ya, ala li siɔ ye ti kamɛnɛ, ala tɛ nga sa mɛ alu na ngbilondo.

²¹ Ni hɛ̃ lo ngoi ya, lo gbinya bɛ lo, ko ta lo ye ziangɔ asiɔ ye ti kamɛnɛ tɛ lo ma.

²² Nda mɛ ni na bingɔ lo na ndo tange, ko lo hũ pɛnɔ la. Akɔli ko ndo nga la ana lo ati kɔmbɛ ko, se ta ala gbinya bɛ la, azia asiɔ ye mɛ ndo ala na lo ali ma ko, ni hɛ̃ la kota pɛnɔ.

²³ So pɛni ko, ni kpɔ aya lo, wa se mɛ awa Eklezia ahĩnga ya, ni du zo mɛ ni hĩnga dangɔ bɛ tɛ azi, ni hĩnga nga ye mɛ ala na gwɛ̃ ni la. Ni futa gbanda zo kɔi kɔi na se kwa mɛ lo li.

²⁴ “Wa tɛ ĩ atanga awa Eklezia ti Tiatirɛ ko la ta ĩ hɛ̃ tɛrɛ ĩ na lo ti siɔ ye mɛ zo wali ko aha ma, ta ĩ hĩnga nga ye mɛ azi ndoili ya: ‘Sekele tɛ Satana’ ma ko, ni pa hɛ̃ ĩ ya, ta ni na kwa mɛ ndɛ̃ kɔi ti hɛ̃ngɔ hɛ̃ ĩ ma.

²⁵ Kanda ye ko la aha na ĩ ko, ĩ bata ni nzɔ̃ni nga ka lá ko gbanda ni diri ni ga.

²⁶ Azi ko la agbe bɛ la na ya apɛnɔ, anwɔ ni, ali nga ye mɛ ni ye, ali ni ngbĩi asi na lá ti kwa tɛ la ko, gbanda ko, ni kpa la agbia ya, ala lɛ gbia na ndo azi ti lɛ sese.

²⁷ Ni hɛ̃ gbanda hɛ̃ la nguru mɛ ndo ni nvɛni ni lua ka ti To ni. Ala lɛ gbanda gbia na ndo azi na nguru, ala olo gbanda ya azi ni nga ma se mɛ andoolo na ya ta.

²⁸ Ni hɛ̃ nga la gbanda tongolo mɛ ndosũ na nyɔ ndã.

²⁹ “Zo ko la ma lo adu da ko, ale lo ma tɛnɛ mɛ Tɔrɔ Santo atɛnɛ hɛ̃ awa Eklezia!”