Suma 19 - Fana Ngbangɔ 1987

¹ So pɛni, mbi ma ye ka ndozu nga ma legɔ̃ azi butu butu, ala ndopa na kɔngɔ ya: “Ĩ gonda Nzapa! Lo Wa songɔ azi, ndima na nguru adu na lo tɛ lo!

² Ngbanga mɛ lo ndofa ndodu na seni mbiri mbiri! Ta sanga ma, lo fa ngbanga, lo bi li wali ngbabo mɛ ndo agbɛ̃ azi ti le sese na lingɔ siɔ ye ti kamɛnɛ tɛ lo. Nzapa ahɛ̃ lo etumbu, na lo mɛ ya, lo kpɔ ndo awa kwa tɛ Nzapa.”

³ Azi mɛ fɛrɛ mbi ma legɔ̃ la ka yayu ati pa ya: “Ĩ gonda Nzapa! Guru ti wá mɛ ndogbi Babilɔnɛ mɛ kota kɔdɔrɔ, ndogundu ka lɛ ndozu tuleee tuleee ti buai.”

⁴ Akangba sui sɛ ndoni siɔ, na asa siɔ mɛ lɛ la ngɛ̃ akuku na li kuni la, avɔrɔ Nzapa mɛ adu so ndo ngɛndɛ gbia. Ala pa ya: “Seni la! Ĩ gonda Nzapa!”

Yenga tɛ Nyi Ngasã Ngbaga mɛ adu na wali

⁵ Mbi ma legɔ̃ zo ka tɛrɛ ngɛndɛ gbia apa ya: “Ĩ awa kwa tɛ Nzapa zu, na ĩ azi mɛ ĩ ndokpe lo, ĩ mɛ akota azi nga na ĩ mɛ ambumbusɛ azi, ĩ gonda Nzapa tɛ e!”

⁶ Mbi ti ma ye nga ma legɔ̃ azi butu butu so ndotɛnɛ tenɛ. Tɛnɛ ni ndogɔ̃ wooo nga ma gigi ti sɔrɔ ti ngu mɛ ndoti. Tɛnɛ ni ndogɔ̃ nga ma kpengba ngu mɛ ndokini. Mbi ma la so ndotɛnɛ ya: “Ĩ gonda Nzapa! Ta sanga ma, Gbia Nzapa tɛ e mɛ lombe ato nda lɛngɔ gbia!

⁷ É saba, é du na dengɔ bɛ, é gonda lo! Ta sanga ma, ngoi tɛ Nyi Ngasã Ngbaga ti dungɔ na wali alengbi we, ya lo alɛkɛ nga tɛrɛ lo wɛ.

⁸ Ahɛ̃ ndo lege hɛ̃ ya lo ya, lo yu kpɔ̃ bɔngɔ mɛ ndosũ, bɔngɔ mɛ ta bi tɛrɛ ni ma.” (Bɔngɔ ni ndofa kwa mɛ ndo azi tɛ Nzapa ali na seni.)

⁹ Angelo apa hɛ̃ mbi ya, mbi su tɛnɛ mɛ ni tɛnɛ. Tɛnɛ ni lo mɛ: “Dengɔ bɛ ati na azi mɛ ndo aili la ya, ala ga atɛ yenga tɛ Nyi Ngasã Ngbaga mɛ adu na wali.” Angelo apa nga hɛ̃ mbi ya: “Tɛnɛ ni adu bɛta tɛnɛ mɛ Nzapa atɛnɛ.”

¹⁰ Lo ĩ tɛnɛ so ko, mbi kuku gbɛlɛ lo ya mbi vɔrɔ lo, lo pa nga hɛ̃ mbi ya, ta mbi vɔrɔ ni ma. Ni nga wa kwa tɛ Nzapa nga ma mbi na afɔ̃ mbi mɛ ndo abata bɛta tɛnɛ mɛ ndo Yezo afa na la. Lo pa nga hɛ̃ mbi ya, ale mbi vɔrɔ bo Nzapa. Bɛta tɛnɛ mɛ ndo Yezo afa na azi ko, bɛta tɛnɛ ni ahɛ̃ nguru hɛ̃ awa pangɔ nyɔ Nzapa, la ala ndopa ni.

Wa kpɛngɔ na mbufu mbarata

¹¹ So pɛni, mbi hũ lɛ ndozu azi, ko mbufu mbarata asi na zo so ndo lo. Ili zo ni la: “Bɔrɔ zo - Bɛta zo.” Zo ni ko ndofa ngbanga na seni, lo ndotiri nga to na seni.

¹² Lɛ lo ndoza nga ma wá mɛ ndoza lau lau. Kpɔtɔ ti gbia ma wo ma na li lo. Asu ili na tɛrɛ lo, ko ta zo kɔi ahĩnga ili ni ma, bo lo nvɛni la lo hĩnga.

¹³ Lo yu bɔngɔ mɛ mɛnɛ amu tɛrɛ ni zu. Ili lo nga la: “Tɛnɛ tɛ Nzapa.”

¹⁴ Aturugu ti yayu so pɛko lo, ala na ambufu mbarata, ala yuyu akpɔ̃ bɔngɔ mɛ mbufuni pa pa pa, abɔngɔ mɛ ta bi tɛrɛ ni ma.

¹⁵ Zabe mɛ ndoɔ̃ nga ma pepe asi so yanga lo. Adu zabe mɛ lo na nwɔngɔ na azi ti lɛ sese la. Lo na lɛngɔ gbia ndo la na nguru. Lo na dɔrɔngɔ la na gɛrɛ lo, nga ma se mɛ andodɔ na mburu ka ya ngɔ. Lo na lingɔ nga so, so fangɔ siɔ ngɔnzɔ mɛ agbɔ̃ Nzapa mɛ lombe.

¹⁶ Ili mɛ ndo asu na tɛrɛ bɔngɔ tɛ lo, nga na ndo gɛrɛ lo lo mɛ: “Gbia tɛ agbia.”

¹⁷ So pɛni, mbi hũ angelo kɔi alo ka lɛ lá. Lo dɛ kɔngɔ kpengbani hɛ̃ ahũ zu mɛ ndoɔ ka lɛ mbo ya: “Ĩ ga, ĩ bombi tɛrɛ ĩ so tɛngɔ kota yenga tɛ Nzapa.

¹⁸ Ĩ ga ĩ tɛ mi tɛrɛ agbia, na mi tɛrɛ agbia tɛ aturugu, nga na mi tɛrɛ aturugu. Ĩ ga ĩ tɛ mi tɛrɛ ambarata, nga na mi tɛrɛ awa kpɛngɔ na la. Ĩ ga ĩ tɛ mi tɛrɛ azi zu, mi tɛrɛ ambɛ na abɔrɔ, mi tɛrɛ akota azi nga na ambumbusɛ azi.”

¹⁹ So pɛni, mbi hũ sa ni na agbia ti lɛ sese, nga na aturugu tɛ la, abombi tɛrɛ la so tiringɔ to na wa kpɛngɔ na mbufu mbarata, nga so tiringɔ to na aturugu tɛ lo.

²⁰ Agbɔ̃ sa ni, agbɔ̃ nga wa pangɔ nyɔ Nzapa na nvɛnɛ mɛ ndo ndoli aye ti kpɛnɛ so gbɛlɛ sa ni. (Lo li ndo aye ti kpɛnɛ ni so handangɔ na azi. Azi ni adu azi mɛ ndo asuru ili sa ni na tɛrɛ la, ala vɔrɔ nga ngbilondo tɛ sa ni.) Ngoi mɛ ĩ gbɔ̃nɔ la ko, asa la lɛ la ngɛ̃ ka ya wá mɛ lɛ ni kotani nga ma lɛ kpo. Ko wá ni adu nwa tɛ́nɛ la ndoza.

²¹ Wa kpɛngɔ na mbufu mbarata amu zabe mɛ asi ka yanga lo, akpɔ na azi mɛ ndɛ̃. La ahũ zu adɛrɛ kinda tɛ azi ni ko atɛ.