Suma 18 - Fana Ngbangɔ 1987

Nzapa ahɛ etumbu bɛ awa Babilɔnɛ

¹ So pɛni, mbi hũ angelo mɛ ndɛ̃ alo ka ndozu azu ge tise. Lo na nguru ma wo ma, ndima ti tɛrɛ lo asũ nga ma lá, alengbi na lɛ sese kwɛ zu.

² Lo dɛ kɔngɔ kpengbani ya: “Babilɔnɛ mɛ kota kɔdɔrɔ ati wɛ oo! Babilɔnɛ ati wɛ oo! Babilɔnɛ ati kɔdɔrɔ tɛ azabulu, kɔdɔrɔ mɛ asiɔ tɔrɔ ndɛ̃ ndɛ̃ ndɛ̃ zu ndobere da, kɔdɔrɔ mɛ asiɔ ahũ ndɛ̃ ndɛ̃ ndɛ̃ zu ndodu da, adu ahũ mɛ bɛ azi akɛ̃ la.

³ Asiɔ ye ti kamɛnɛ tɛ lo mɛ ndo lo ndoli, ko andogbɔ̃ lo nga ma kana ko, lo ha ndo na azi mɛ ndɛ̃, ala ali ni! Agbia ti lɛ sese ahɛ̃ ndo tɛrɛ la na lingɔ asiɔ ye ti kamɛnɛ ndoni kɔi na awa Babilɔnɛ! Ko azi ti lɛ sese mɛ awa dɛngɔ buze ati ndo awa nwa na lo ti anzɔ̃nzɔ̃ ye ti Babilɔnɛ mɛ se zo ahũ ko, ta lo gbe bɛ lo ma.”

⁴ Lo ĩ tɛnɛ so wɛ ko, mbi ma nga legɔ̃ zo mɛ ndɛ̃ adu ka ndozu so ndopa ya: “Azi tɛ mbi, ĩ lo ka popo tɛ la ĩ si, so ĩ li asiɔ tɛ la, so ĩ hũ nga apɛnɔ mɛ Nzapa na hɛ̃ngɔ la.

⁵ Ta sanga ma, asiɔ ye tɛ awa Babilɔnɛ abombi tɛrɛ la ndoni ndoni ngbĩi asi ka ndozu, la Nzapa ada bɛ lo na asiɔ kwa mɛ ndo ala li.

⁶ Ae, ahɛ̃ bɛ la pɛnɔ, nga ma se mɛ ndo ala hɛ̃ na pɛnɔ hɛ̃ ĩ ma ke! Ye ko ndo ala li tɛrɛ ĩ ko, ali bɛ nga ni fani se na tɛrɛ la, aɔ omɛ ndo ala li tɛrɛ ĩ ma ke! Ala hɛ̃ ĩ ndo kana mɛ asɔ ĩ nyɔ, ko ahɛ̃ bɛ nga la kana mɛ asɔ fani sɛ aɔ omɛ ndo ala hɛ̃ ĩ, wa ala nyɔ ma ke!

⁷ Ahɛ̃ bɛ la pɛnɔ, na vundu alengbi na ndima, nga na anzɔ̃nzɔ̃ ye mɛ ndo ala na ni ma ke! Ala ndopa ka ya bɛ la ya, ani du so kɔdɔrɔ ni ko nga ma awe gbia, ta ani awe muã ma, ta ani lɛ nga gbanda muã ma.

⁸ Nda mɛ apɛnɔ olo zu na sangɔ na ndo awa Babilɔnɛ bo lá kɔi la. Apɛnɔ ni lo mɛ: nga na gbɔ̃nɔngɔ la, ala na lɛngɔ muã, gwɛ̃ na yangɔ ka tɛ la, wá na gbingɔ nga kɔdɔrɔ tɛ la. Ta sanga ma, Gbia Nzapa mɛ wa fangɔ ngbanga tɛ la, ko lo lombe.”

⁹ Agbia ti lɛ sese ana lo ahɛ̃ ndo tɛrɛ la so lingɔ asiɔ ye ti kamɛnɛ, nga so gingɔ anzɔ̃nzɔ̃ ye. Ko na ngoi mɛ gbanda agbia ni ahũ guru ti wá mɛ ndogbi Babilɔnɛ, so ndosi tuleee tuleee ko, ala to gbanda to, ala dema nga gbanda so kɔdɔrɔ ni.

¹⁰ Ala longa gbanda ka yɔngɔrɔni, na lo ti mbɛtɔ ti pɛnɔ mɛ gbanda awa Babilɔnɛ na hũngɔ, ko ala pa gbanda ya: “Oo vundu ee! Oo vundu ee! Oo Babilɔnɛ mɛ kota kɔdɔrɔ, lo mɛ nga kpengbani ee! Babilɔnɛ agbi bo na ya saa kɔi gɛgɛrɛ oo!”

¹¹ Azi ti lɛ sese mɛ awa dɛngɔ buze ato to, adema nga so Babilɔnɛ, na lo mɛ ya, ta zo kɔi ti Babilɔnɛ na vɔ̃ngɔ aye ti buze tɛ la fani mɛ ndɛ̃ ma. Aye mɛ ndo ala ndoka lo mɛ:

¹² wɔrɔ, nwa, tɛnɛ ti kota ngere, alenge, akpɔ̃ bɔngɔ, abɔngɔ mɛ tɛrɛ ni na popo tɛ bengbani na bolo, na abɔngɔ mɛ bengbani nga ma mɛnɛ, abɔngɔ mɛ ili ni la sua. Ala ndoka lɛ akɛkɛ kɔndɛ kɔndɛ mɛ hũngɔ ni adu kpengbani, na lɛ aye kɔndɛ kɔndɛ mɛ alɛkɛ na tɛ̃ doli, na akɛkɛ ti kota ngere, na nvale, na nwa nga na tɛ́nɛ ti kota ngere.

¹³ Ala ndoka lulumba, sambia, ayɔmbɔ kɔndɛ kɔndɛ, vinɔ, kpɔ̃, farinɛ, na le tɛ mɛ ili ni la ble. Ala ndoka abagara, angasã ngbaga, ambarata, apusu pusu mɛ ambarata ndogiɔ. Ala ndoka nga ambɛ, ala kɛ̃ ndo nga kia ndoka azi.

¹⁴ Awa dɛngɔ buze ni apa hɛ̃ Babilɔnɛ ya: “Aye mɛ ndo mɔ ndosepara luangɔ ni agbɛ̃ wɛ! Anwa tɛ mɔ zu, na anzɔ̃nzɔ̃ ye tɛ mɔ awɛ ti mɔ, ko ta mɔ ti lua gbanda ni bɛ gbɔ ma!”

¹⁵ Awa dɛngɔ buze mɛ ndo ndode buze ka Babilɔnɛ la ati awa nwa ko, ala longa gbanda ka yɔngɔrɔni, na lo ti mbɛtɔ ti pɛnɔ mɛ gbanda azi ti Babilɔnɛ na hũngɔ. Ala to gbanda to, ala dema nga gbanda so Babilɔnɛ.

¹⁶ Ala nɛ gbanda ya: “Oo vundu ee! Oo vundu mɛ ati na Babilɔnɛ mɛ kota kɔdɔrɔ ee! Babilɔnɛ mɛ ndoyu akpɔ̃ bɔngɔ mɛ bengbani nga ma mɛnɛ ee! Lo ndofua ndo tɛrɛ lo na anzinzina ye mɛ alɛkɛ na wɔrɔ, na tɛnɛ ti kota ngere, nga na lenge.

¹⁷ Nwa tɛ lo zu agbɛ̃gbɛ̃ bo na ya saa kɔi gɛgɛrɛ oo!” Agbia ti masua zu, na awa kwa ti ya ni, na awa fɔnɔ ti ya ni, nga na azi zu mɛ ndoli kwa ka le ngu so luangɔ nwa, alonga nga gbanda ka yɔngɔrɔni.

¹⁸ Ko ngoi mɛ ala ĩ hũ guru ti wá mɛ ndogbi Babilɔnɛ ĩ si tuleee tuleee ko, ala dɛrɛ kɔngɔ ya: “Ae, ta kɔdɔrɔ kɔi so lɛ sese mɛ alengbi na kɔdɔrɔ olo da ma!”

¹⁹ Ala to to, ala dema, ala gbɔ butu, asa na li la, adɛrɛ kɔngɔ ya: “Oo vundu ee! Oo vundu ee! Oo Babilɔnɛ mɛ kota kɔdɔrɔ ee! Azi zu mɛ ndo na masua so lɛ ngu, ati awa nwa na lo ti aye sĩ mɛ Babilɔnɛ na ni. Ko aye tɛ lo zu agbɛ̃gbɛ̃ bo na ya saa kɔi gɛgɛrɛ oo!”

²⁰ Ko mbi ma legɔ̃ zo apa ya: “Ĩ azi mɛ ka yayu, ale ĩ saba, na lo mɛ ya, kɔdɔrɔ ti Babilɔnɛ agbɛ̃ wɛ! Ĩ azi tɛ Nzapa, na ĩ awa pangɔ kwa tɛ Yezo, nga na ĩ awa pangɔ nyɔ Nzapa, ĩ saba! Ta sanga ma, Nzapa afa ngbanga, abi li azi ti Babilɔnɛ na lo ti siɔ ye mɛ ala li tɛrɛ ĩ!”

²¹ La angelo mɛ wa nguru amu tɛ́nɛ mɛ nga ma kota tɛ́nɛ ti nangɔ na ye, abi ka ya kota ngu gubuuu. Angelo ni apa ya: “Se mɛ nga gbanda abi na Babilɔnɛ mɛ kota kɔdɔrɔ na nguru, ko ta ati hũ ni bɛ gbɔ ma la.

²² Ta azi ti ma gbanda kundi mɛ awa dɛngɔ ni ndodɛ ma, ta azi ti ma nga gbanda awa dɛngɔ miziki ma, ta azi ti ma nga gbanda awa ulungɔ ngoli, na awa ulungɔ mbana so ya kɔdɔrɔ tɛ mɔ bɛ gbɔ ma. Ta azi ti hũ gbanda azi mɛ ndoli lɛ kwa ndɛ̃ ndɛ̃ ndɛ̃ ma. Ta azi ti ma gbanda gigi ti kpu mɛ azi ndogu na ye ma.

²³ Ta wá ti za gbanda so ya kɔdɔrɔ tɛ mɔ bɛ gbɔ ma. Ta azi ti ma gbanda legɔ̃ kɔli na ya lo ma. Azi tɛ mɔ mɛ awa dɛngɔ buze aɔ awa dɛngɔ buze ti lɛ sese mɛ ndɛ̃ zu na nwa. Na lo ti biando mɛ ndo azi tɛ mɔ ndohãna ko, ala handa ndo azi zu.

²⁴ Ahũ mɛnɛ tɛrɛ awa pangɔ nyɔ Nzapa, na tɛ azi tɛ lo, nga na tɛ azi ti le sese zu mɛ ndo akpɔ la so ya kɔdɔrɔ tɛ mɔ. Na lo ni la Nzapa ahɛ̃ etumbu hɛ̃ azi tɛ mɔ.”