Suma 17 - Fana Ngbangɔ 1987

Matɔ tɛ wali ngbabo

¹ Na popo tɛ aangelo mbara mbara mɛ agbɔ̃nɔ akangu so ti la ko, angelo kɔi aga apa hɛ̃ mbi ya: “Ga, mbi fa mɔ na se mɛ Nzapa na hɛ̃ngɔ na etumbu hɛ̃ ngbabo. Ngbabo ni adu kɔdɔrɔ mɛ adu na ndo mɛ ngu da zababa.

² Agbia ti lɛ sese ana ngbabo ni ali ndo aye ti kamɛnɛ. Azi ti lɛ sese ali ndo aye ti kamɛnɛ so ya kɔdɔrɔ ni, ko ye ti kamɛnɛ ni agbɔ̃nɔ ndo la nga ma kana.”

³ So pɛni, Tɔrɔ Santo asa tɛrɛ mbi, la angelo ko ayɔ mbi, agwe na mbi ka bɛ ndo. Ngoi mɛ mbi si kai ko, mbi hũ zo wali kɔi adu ndo sa. Tɛrɛ sa ni bengbani, li lo mbara mbara, nza li lo sui kɔi. Ili mɛ ndoguru Nzapa amu tɛrɛ sa ni zu.

⁴ Zo wali ni ayu tɛ lo bengba bɔngɔ mɛ nga ma mɛnɛ. Afua lo na anzinzina ye nzɛngbɛ nzɛngbɛ mɛ alɛkɛ na wɔrɔ, na tɛ́nɛ ti kota ngere, nga na alenge. Lo gbɔ̃ kangu mɛ alɛkɛ na wɔrɔ so ti lo, ko asiɔ ye ti kamɛnɛ, na pite mɛ ndo lo ndoli asĩ ya kangu ni mɛkɛ̃.

⁵ Asu tɛnɛ mɛ ta zo ahĩnga nda ni ma so ndo lɛ lo. Tɛnɛ ni lo mɛ: “Babilɔnɛ kota kɔdɔrɔ, ta angbabo, ta asiɔ ye ti kamɛnɛ ti lɛ sese.”

⁶ Mbi hũ zo wali ni anyɔ mɛnɛ tɛrɛ azi tɛ Nzapa mɛ ndo akpɔ la, na lo mɛ ya, ala ndo atemwɛ tɛ Yezo, ko mɛnɛ ni agbɔ̃ ndo zo wali ni ko nga ma kana. Ngoi mɛ mbi hũ zo wali ni ko, mbi bema sĩ nvɛni.

⁷ La angelo ahũnda mbi ya: “Mɔ bema ya nɛ? Sa ko li lo mbara mbara, nza li lo sui kɔi, la lo yɔ wali ko, mbi na pangɔ hɛ̃ mɔ nda lo tɛ lo, nga na nda lo tɛ zo wali ni. Ta azi ahĩnga lo tɛ la ma.

⁸ Wa ma nda ni lo mɛ: sa ko mɔ hũ ko, ndo gã ko, lo ndo lɛ lo ngɛ̃, kanda na olo mɛ ko, ta lo ti dɛ lɛ lo ngɛ̃ ma. Wa angbã yakere ko, lo lo ka ya du mɛ lipi lipi, lo si. Ngoi mɛ lo na singɔ ko, Nzapa na bingɔ lo ka lifɛlo. Azi ti lɛ sese mɛ ndo ta asu ili la ka ya Buku mɛ asuru na ili azi mɛ alua du ti kaka, na ngoi mɛ ndo Nzapa ato nda lingɔ sese ma ko, ala na hũngɔ lo. Ala nga na bemangɔ, na lo mɛ ya, sa ni ko ndo uzu lɛ lo ngɛ̃, kanda na olo mɛ ko, ta lo ti dɛ lɛ lo ngɛ̃ ma, lo na singɔ fani mɛ ndɛ̃.

⁹ “Ale zo adu na kɔdɛ nga na ndara, wa lo hĩnga nda tɛnɛ olo mɛ. Li sa ko mbara mbara adu ahɔtɔ mbara mbara mɛ zo wali ko adu da. Li sa ko mbara mbara adu nga agbia mbara mbara.

¹⁰ Na popo tɛ agbia ni ko, agbia okɔ̃ ale ndo gbia we, bo kɔi la ndole gbia na olo mɛ, ko ta omɛ ndɛ̃ kɔi ade aga ma. Ngoi mɛ lo na gangɔ ko, lo na lɛngɔ gbia bo ngoi yakere.

¹¹ Sa mɛ ndo gã lɛ lo ngɛ̃, kanda na olo mɛ ta lo ti dɛ lɛ lo ngɛ̃ ma ko, lo tɛ lo gbia ti miambe, lo nga na popo tɛ agbia ni ko mbara mbara. Ngoi mɛ lo na singɔ ko, Nzapa na bingɔ lo ka lifɛlo.

¹² “Nza li sa sui kɔi mɛ mɔ hũ ko, adu agbia sui kɔi mɛ ta ala dɛ to nda lɛngɔ gbia tɛ la ma. Ala na luangɔ nguru so lɛngɔ gbia, ko ala na sa ni ko na lɛngɔ gbia bo na ya saa kɔi gɛgɛrɛ.

¹³ Dangɔ bɛ tɛ agbia ko sui kɔi zu adu bo kɔi, ala na hɛ̃ngɔ nguru tɛ la hɛ̃ sa ni ko, ala nga na ziangɔ ló gbia tɛ la hɛ̃ lo.

¹⁴ Agbia ni ko na Nyi Ngasã Ngbaga na tiringɔ to, ko Nyi Ngasã Ngbaga na nwɔngɔ la, na lo mɛ ya, lo Gbia tɛ agbia. Nyi Ngasã Ngbaga ana ava lo na nwɔngɔ agbia ni ko. Ava lo ni adu azi mɛ ndo Nzapa aili la, asara nga la akpã azi tɛ lo, ala ye lo tɛ lo bɛ la kɔi.”

¹⁵ Angelo apa nga hɛ̃ mbi ya: “Ngu ko la mɔ hũ ngbabo adu da ko, adu azi ti lɛ sese butu butu, azi mɛ ndotɛnɛ yanga ndɛ̃ ndɛ̃ ndɛ̃.

¹⁶ Nza li sa sui kɔi mɛ mɔ hũ ko, adu agbia sui kɔi. Ko bɛ agbia ni ko sui kɔi, nga na bɛ sa ni nvɛni na kɛ̃ngɔ ngbabo ko ka ka ka. Ala na kpatangɔ aye tɛ lo zu, hãnangɔ abɔngɔ tɛrɛ lo, ziangɔ lo ndumbu. Ala na tɛngɔ mi tɛrɛ lo, ko ala na zɔngɔ tanga tɛrɛ lo ka ya wá.

¹⁷ Ta sanga ma, ye mɛ Nzapa asepara lingɔ ko, lo sa kɔdɛ ni ka bɛ agbia ko sui kɔi ya, ala mangbi, ko ala zia nguru gbia tɛ la hɛ̃ sa ni ko, ko sa ni ale gbia ngbĩi nga ka atɛnɛ tɛ Nzapa ati na seni.

¹⁸ “Wa zo wali ko la mɔ hũ lo ko, lo du kota kɔdɔrɔ mɛ ako ndo agbia ti lɛ sese zu.”