Suma 16 - Fana Ngbangɔ 1987

Akangu mɛ ngɔnzɔ tɛ Nzapa asĩsĩ ya ni

¹ So pɛni, mbi ma legɔ̃ zo ka ya kota da Nzapa atɛnɛ tɛnɛ na kɔngɔ. Zo ni apa hɛ̃ aangelo mbara mbara ya: “Akangu mbara mbara ko la na ngɔnzɔ tɛ Nzapa na ya ni ko, ĩ nɔ ĩ sa ni ka lɛ sese.”

² Angelo ti kɔi amu kangu tɛ lo mɛ ngɔnzɔ tɛ Nzapa ya ni, asa lɛ sese. La asiɔ kã mɛ ndosɔ ma wo ma asisi na tɛrɛ azi ti lɛ sese mɛ aminya ili sa ti kɔi na tɛrɛ la, ala mɛ avɔrɔ nga ngbilondo tɛ sa ni ko.

³ Angelo ti sɛ amu kangu tɛ lo mɛ ngɔnzɔ tɛ Nzapa ya ni, asa lɛ kota ngu. La lɛ ngu ni zu ati nga ma mɛnɛ tɛrɛ kinda. Ko aye zu mɛ lɛ la ngɛ̃ so ya ngu ni akpili.

⁴ Angelo ti ta amu kangu tɛ lo mɛ ngɔnzɔ tɛ Nzapa ya ni, asa lɛ ngu, asa nga lɛ li ngu. La ngu na li ngu agbinyangbi ati mɛnɛ.

⁵ Ko mbi ma angelo mɛ gbia ti ndo ngu zu apa ya: “Oo Nzapa, mɔ Santo! Mɔ ndo da, mɔ nga da na olo mɛ. Ngbanga mɛ mɔ fa ko, mɔ fa ni na seni.

⁶ Azi mɛ ndo akpɔ azi tɛ mɔ, akpɔ nga awa pangɔ nyɔ mɔ, mɛnɛ tɛrɛ la asa ko, na olo ko, mɔ hɛ̃ la mɛnɛ ya, ala nyɔ. Ko ala lua ye mɛ alengbi na la we!”

⁷ So pɛni, mbi ma legɔ̃ zo atɛnɛ tɛnɛ ka tɛrɛ mɛsa ti lungɔ Nzapa na ye ya: “Seni la, Gbia Nzapa mɔ lombe, ngbanga mɛ mɔ ndofa andodu na seni mbiri mbiri.”

⁸ Angelo ti siɔ amu kangu tɛ lo mɛ ngɔnzɔ tɛ Nzapa ya ni, asa lɛ lá. Lo hɛ̃ nyɔ hɛ̃ lá ya, lá azɔ tɛrɛ azi.

⁹ La lá asũ ha ha ha, azɔ tɛrɛ azi. Azi ĩ hũ so ko, ala guru Nzapa na lo ko la lo na nguru ti tongɔ hɛ̃ la gi tɛrɛ apɛnɔ ni ko. Ko ala kɛ̃ gbinyangɔ bɛ la, gondangɔ Nzapa.

¹⁰ Angelo ti kɔ̃ amu kangu tɛ lo mɛ ngɔnzɔ tɛ Nzapa ya ni, asa na ndo ngɛndɛ gbia tɛ sa ti kɔi mɛ aminya ili lo na tɛrɛ azi, la mbingo ati na ndo mɛ sa ko ndole gbia da, ko azi so ndotɛtɛrɛkɛ gu tɛ̃ la kɔrrr kɔrrr na lo ti pɛnɔ mɛ ala ndohũ.

¹¹ Ala guru Nzapa mɛ ka yayu na lo ti pɛnɔ mɛ ala ndohũ, nga na lo ti kã mɛ na tɛrɛ la. Ko ala kɛ̃ gbinyangɔ bɛ la, ziangɔ asiɔ ye tɛ la.

¹² Angelo ti mana amu kangu tɛ lo mɛ ngɔnzɔ tɛ Nzapa ya ni, asa ka le ngu mɛ ili ni la Efratɛ. Ngu ni aulɛ so zingɔ lege hɛ̃ agbia mɛ alo ka tɔ, ala ɔ.

¹³ So pɛni, mbi hũ asiɔ tɔrɔ ota mɛ nga ma adale. Kɔi asi ka yanga sa ti kpɛnɛ mɛ nga ma ngunde, kɔi asi nga ka yanga sa mɛ aminya ili lo na tɛrɛ azi, kɔi mɛ ndɛ̃ asi ka yanga wa pangɔ nyɔ Nzapa na nvɛnɛ.

¹⁴ Adu asiɔ tɔrɔ tɛ Zabulu mɛ ndoli aye ti kpɛnɛ. Asiɔ tɔrɔ ni anɔ ka tɛ agbia ti lɛ sese zu so bombingɔ la ndoni kɔi ya, na la ko gbanda Nzapa mɛ lombe aga ko, ani na lo ani tiri to.

¹⁵ Yezo apa ya: “Ĩ ma la, mbi na butangɔ ĩ nga ma se tɛ wa nzĩ! Dengɔ bɛ ati na zo ko la ta ala langɔ ma, ko abata nga bɔngɔ tɛ lo so tɛrɛ lo. Se lo li so, na ngoi ti gangɔ tɛ mbi ko, ta lo dɔ nɔ ndumbu, ko kamɛnɛ agbɔ̃ lo ma.”

¹⁶ Asiɔ tɔrɔ ni abombi agbia ti lɛ sese ka ndo mɛ andoili na yanga tɛ Ayuda ya Armagedona.

¹⁷ Angelo ti mbara mbara amu kangu tɛ lo mɛ ngɔnzɔ tɛ Nzapa ya ni, asa ka lɛ mbo. La mbi ma legɔ̃ zo atɛnɛ tɛnɛ na kɔngɔ ka ya kota da Nzapa. Legɔ̃ zo ni alo ka ndo ngɛndɛ gbia mɛ Nzapa adu da, zo ni apa ya: “Awɛ!”

¹⁸ Lo ĩ tɛnɛ so wɛ ko, bekpa ataima nzɛrrr nzɛrrr, agbo gbáaa gbáaa! Ngu akini ngbũuu ngbũuu! Sese ayingi gbu gbu gbu. Ato na ngoi ko ndo la Nzapa ali zo ko, ta sese ade ayingi kpengbani gi tɛrɛ oko ma! Yingingɔ ni aɔ maka!

¹⁹ Ya kota kɔdɔrɔ ti Babilɔnɛ akangbi ota, akɔdɔrɔ ti lɛ sese zu agbɛ̃gbɛ̃. Nzapa ada bɛ lo na Babilɔnɛ mɛ kota kɔdɔrɔ, ko lo mu kangu tɛ lo mɛ na kpengba kana ya ni, lo hɛ̃ azi ti Babilɔnɛ anyɔ. Adu kana ti siɔ ngɔnzɔ tɛ lo.

²⁰ Azúa zu amina, ta azi ti ndohũ nga ahɔtɔ ma.

²¹ Akokɛnɛ ngandangombe mɛ ndonɛ kilo sui siɔ, alo ka ndozu, asa na ndo azi ge lɛ sese. Ko azi aguru Nzapa na lo ti pɛnɔ mɛ ala hũ na lo ti ngandangombe, ta sanga ma, pɛnɔ ni adu siɔni buai.