Suma 15 - Fana Ngbangɔ 1987

Aangelo na andangba pɛnɔ

¹ So pɛni, mbi hũ kota kukuna ye ti bemangɔ mɛ ndɛ̃ asi lɔ ka lɛ ndozu: adu aangelo mbara mbara la agbɔ̃nɔ apɛnɔ mbara mbara so ti la. Adu andangba pɛnɔ mɛ azi na hũngɔ, ta sanga ma, adu apɛnɔ mɛ Nzapa na hɛ̃ngɔ hɛ̃ azi, wa lo kɔ na nda ngɔnzɔ tɛ lo.

² So pɛni, mbi hũ ye nga ma kota ngu mɛ lɛ ni ndosũ bai bai nga ma tala tala, ko wá so ndoza nga so lɛ ngu ni. Mbi hũ nga azi mɛ ndo anwɔ sa mɛ alo ka ya kota ngu asi. Adu ala mɛ akɛ̃ vɔrɔngɔ ngbilondo tɛ sa ni ko, akɛ̃ nga luangɔ sifelo mɛ alengbi na ili lo. Ala longa so nyɔ kota ngu mɛ ndosũ bai bai nga ma tala tala. Mbi hũ akundi mɛ ndo Nzapa akangbi na la so ti la.

³ Ala ndoye bia tɛ Mɔizɛ mɛ wa kwa tɛ Nzapa, bia ni ko adu nga tɛ Nyi Ngasã Ngbaga. Bia ni lo mɛ: “Gbia Nzapa mɔ lombe, Aye mɛ mɔ li adu akokɛnɛ ye ti bemangɔ! Mɔ Gbia ti ndo azi ti lɛ sese zu, Aye mɛ mɔ ndoli ndodu na Seni, ndodu nga bɛtani!

⁴ Gbia, zo mɛ ta alengbi ti kpɛngɔ mɔ ma na? Zo mɛ alengbi ti kɛ̃ngɔ ya, ta ni gonda mɔ ma na? Ta sanga ma, bo mɔ kɔi la santo. Azi ti lɛ sese zu aga gbanda, awo tɛrɛ la tise so vɔrɔngɔ mɔ, Ta sanga ma, abɛta kwa mɛ mɔ li asi yango ngbɛ̃.”

⁵ So pɛni, mbi hũ nyɔ kota da Nzapa adu ka yayu azi Ka ya ni ko, mbi hũ gofa ti tandi mɛ andofa ya, Nzapa ndodu ndoni kɔi na azi.

⁶ Aangelo mbara mbara mɛ agbɔ̃nɔ nga apɛnɔ mbara mbara so ti la, alo ka ya kota da Nzapa ni asi. Ala yuyu akpɔ̃ bɔngɔ mɛ mbufuni pa pa pa, ala gbɛlɛ gba mɛ alɛkɛ na wɔrɔ na li bɛ la.

⁷ Mbanga sa kɔi na popo tɛ asa mɛ lɛ la ngɛ̃ akangbi aangelo ko mbara mbara na akangu mbara mbara mɛ alɛkɛ na wɔrɔ. Akangu ni asĩsĩ na ngɔnzɔ tɛ Nzapa. Nzapa mɛ ndodu lɛ lo ngɛ̃ buru na buru.

⁸ Guru agundu, amu ya kota da Nzapa na lo ti ndima na nguru tɛ Nzapa. Ta zo alengbi ti lingɔ ka ya kota da Nzapa ma, nga ka nda apɛnɔ mbara mbara mɛ aangelo aga na ni akɔ hĩ wadila.