Suma 14 - Fana Ngbangɔ 1987

Bia tɛ azi mɛ Yezo atɔ̃ la

¹ Mbi ti ba ndo, ko mbi hũ Nyi Ngasã Ngbaga alo so ndo hɔtɔ mɛ ili ni la Siona, azi koto ngbangbo kɔi na ndoni koto sui siɔ ndoni koto siɔ (144.000). Ala longa so tɔ̃nda lo. Asu ili Nyi Ngasã Ngbaga nga na ili To lo na ndo lɛ azi ni ko.

² Mbi ma legɔ̃ zo adu ka ndozu akpale nga ma gigi ti kota sɔrɔ ti ngu, akpale nga ma kpengba ngu mɛ akini. Legɔ̃ zo ni akpale nga ma kundi.

³ Azi ko butu butu alonga so gbɛlɛ ngɛndɛ gbia tɛ Nzapa, so gbɛlɛ asa siɔ mɛ lɛ la ngɛ̃, nga so gbɛlɛ akangba, ko ala so ndoye fana bia. Ta zo mɛ ndɛ̃ ahĩnga bia ni ko ma, wenge bo azi ko koto ngbangbo kɔi na ndoni koto sui siɔ ndoni koto siɔ (144.000). Adu azi mɛ ndo Nzapa atɔ̃ la na popo tɛ azi ge lɛ sese.

⁴ Ta ala kuru ndo tɛrɛ la na awe ma, ala bata ndo tɛrɛ la nzɔ̃ni. Na ndo zu mɛ ndo Nyi Ngasã Ngbaga ndonɔ da ko, ala ndonɔ ndo ndali lo. Nzapa atɔ̃ ndo la na popo tɛ azi ya, ala du nga ma akɔzo tɛ mɛ alu na ni, alu nga na Nyi Ngasã Ngbaga.

⁵ Ta ama ndo tɛnɛ ti nvɛnɛ bɛ kɔi na nyɔ azi ni ko ma, ta ala li ndo nga siɔ ye bɛ kɔi ma.

Aangelo ota

⁶ Mbi hũ angelo mɛ ndɛ̃ so ndoɔ ka lɛ ndozu yanga yenge. Lo ndoɔ so pangɔ hɛ̃ azi ti lɛ sese Nzɔ̃ Pa mɛ ndongbã kaka. Lo ndoɔ so pangɔ Nzɔ̃ Pa ni hɛ̃ azi ti lɛ sese zu, ti ale zu, nga na ti yanga kɔdɔrɔ zu.

⁷ Angelo ni apa na kɔngɔ ya: “Ale ĩ kpɛ Nzapa, ĩ gonda nga lo! Ta sanga ma, ngoi tɛ lo ti fangɔ ngbanga tɛ azi alengbi wɛ. Ale ĩ vɔrɔ lo mɛ lo li ndozu, na sese, na ngu, nga na ali ngu!”

⁸ Angelo ti sɛ aga pɛko angelo ko ti uzu, atɛnɛ tɛnɛ ya: “Babilɔnɛ ati wɛ, Babilɔnɛ mɛ kota kɔdɔrɔ ati wɛ! Asiɔ ye ti kamenɛ tɛ lo mɛ ndo lo ndoli, andogbɔ̃ lo nga ma kana ko, lo ha ndo na azi mɛ ndɛ̃ zu, ala li nga ni!”

⁹ Angelo ti ta aga pɛko aangelo ko sɛ mɛ aga uzu, atɛnɛ tɛnɛ na kɔngɔ ya: “Zo ko la avɔrɔ sa mɛ alo ka ya ngu asi, avɔrɔ nga ngbilondo tɛ lo, ko se asu ili sa ni na ndo lɛ zo ni, bere na ndo ti zo ni ko,

¹⁰ zo ni ko nvɛni na nyɔngɔ vinɔ ti siɔ ngɔnzɔ tɛ Nzapa mɛ Nzapa asa na ya kangu! Ta ye mɛ ndɛ̃ kɔi ti nzɔ̃ni na ya vinɔ ti ngɔnzɔ ni ma. Azi zu ko la ali aye ni ko, ala hũ gbanda pɛnɔ ka ya wá, nga ka ya nwa tɛnɛ, na gbɛlɛ aangelo nga na gbɛlɛ Nyi Ngasã Ngbaga.

¹¹ Guru ti wá mɛ ndohɛ̃ la pɛnɔ ndogundu buru na buru. Azi ko la avɔrɔ sa, avɔrɔ nga angbilondo tɛ lo, nga na azi mɛ asuru ili sa ni na tɛrɛ la ko, ta ala na wɔngɔ tɛrɛ la ma, ala na hũngɔ pɛnɔ bi na lá.”

¹² Ĩ ba nda mɛ ale azi tɛ Nzapa mɛ ndotɔndɔ ndia tɛ lo, ndoye nga lo tɛ Yezo na bɛ la kɔi, alengbi ti gbengɔ bɛ la na ya pɛnɔ mɛ ala ndohũ la.

¹³ So pɛni, mbi ti ma legɔ̃ zo adu ka ndozu, apa hɛ̃ mbi ya, mbi su tɛnɛ olo. Tɛnɛ ni lo mɛ: “Dengɔ bɛ ati na azi ko la ato na olo, ala ndokpili na ya kwa tɛ Gbia Nzapa!” Tɔrɔ Santo apa nga ya: “Seni la biani. Ala lengbi ti wɔngɔ tɛrɛ la na ló kpengba kwa mɛ ndo ala li, ta sanga ma, lɛ kwa mɛ ndo ala li asi yango.”

Se mɛ Nzapa na hɛ̃ngɔ na etumbu bɛ azi ti lɛ sese

¹⁴ Mbi ti ba ndo, ko mbi hũ mbufu da baba, ko mbanga ye nga ma zo adu so ndo da baba ni. Lo yu kpɔtɔ ti gbia mɛ alɛkɛ na wɔrɔ. Lo gbɔ̃ mbɛngɔ mɛ ndoɔ̃ nga ma pepe so ti lo.

¹⁵ Angelo mɛ ndɛ̃ alo ka ya kota da Nzapa asi, adɛ kɔngɔ kpengbani hɛ̃ zo mɛ adu so ndo da baba ya: “Mu mbɛngɔ tɛ mɔ, mɔ fara na tɛ, ta sanga ma, ngoi ti faranga le tɛ alengbi wɛ. Tɛ ti yaka mɛ ka lɛ sese avuru wɛ!”

¹⁶ La zo mɛ adu so ndo da baba, amu mbɛngɔ tɛ lo, afa na tɛ mɛ ka lɛ sese.

¹⁷ Angelo mɛ ndɛ̃ alo ka ya kota da Nzapa mɛ ka yayu asi. Lo nga na mbɛngɔ mɛ ndoɔ̃ nga ma pepe so ti lo.

¹⁸ Angelo mɛ ndɛ̃ alo ka tɛrɛ mɛsa ti lungɔ Nzapa na ye aga. Lo gbia ti ndo wá. Lo dɛ kɔngɔ kpengbani hɛ̃ angelo mɛ fɛrɛ na mbɛngɔ mɛ ndoɔ̃ nga ma pepe so ti lo ya: “Mu mbɛngɔ tɛ mɔ, mɔ fara na le vinɔ mɛ ka lɛ sese, ta sanga ma, le vinɔ ni avuru wɛ.”

¹⁹ Angelo ko amu mbɛngɔ tɛ lo, afara na le vinɔ mɛ ka lɛ sese, agbɔ ni, asa na ya ngɔ mɛ andokuru na vinɔ. Oko afa ngɔnzɔ mɛ na gbɔ̃ngɔ Nzapa hɛ̃ azi.

²⁰ Akuru vinɔ ni na ya ngɔ, ka pɛ kɔdɔrɔ. Na kurungɔ vinɔ ni ko, mɛnɛ la alo ka ya ngɔ asi, amu lɛ sese, alengbi na kilomɛtrɛ ngbangbo ta, gbɛ mɛnɛ ni alengbi na mɛtrɛ nga ma ge tɛ kɔi na ndambu.