Suma 13 - Fana Ngbangɔ 1987

Asa osɛ

¹ So pɛni, mbi hũ sa mɛ ndɛ̃ alo ka ya kota ngu asi. Nza li lo sui kɔi, li lo mbara mbara, kpɔtɔ ti gbia alengbi na nza li ni kɔi kɔi zu. Asu siɔ tɛnɛ ti gurungɔ na Nzapa na tɛrɛ nza li lo ni kɔi kɔi zu.

² Sa mɛ mbi hũ akpa zɛ̃, gɛrɛ lo nga ma gɛrɛ hɔbu, nyɔ lo nga ma nyɔ bamara. Sa ti kpɛnɛ mɛ nga ma ngunde ahɛ̃ nguru tɛ lo nvɛni hɛ̃ sa mɛ alo ka ya kota ngu asi. Sa ti kpɛnɛ ahɛ̃ ngɛndɛ gbia tɛ lo hɛ̃ sa ni ko, ahɛ̃ nga ló gbia tɛ lo hɛ̃ lo.

³ Mbanga li sa ni ma bere ade ndo ni na kã ya aho lo, kanda kã ni amu. Azi ti le sese zu ĩ hũ so ko, ala gonda sa ni ma wo ma, ko ala na lo aɔ ndoni kɔi.

⁴ Azi zu avɔrɔ sa ti kpɛnɛ, na lo mɛ ya, lo hɛ̃ nguru tɛ lo hɛ̃ sa mɛ alo ka ya kota ngu asi. Ala vɔrɔ nga sa mɛ alo ka ya kota ngu asi, ala so ndopa ya: “Zo mɛ na nguru alengbi na sa olo na? Zo mɛ alengbi ti tiringɔ lo na to na?”

⁵ Ahɛ̃ lege hɛ̃ sa ni ya, lo tɛnɛ tɛnɛ ti baba, lo guru nga Nzapa. Ahɛ̃ lo lege ya, lo li ye na se bɛ lo na ya nzɛ̃ sui siɔ ndoni se.

⁶ Sa ko aguru Nzapa, asamana na ili lo, nga na ndo tɛ lo. Lo guru nga azi zu mɛ ka yayu.

⁷ Ahɛ̃ nga lo lege ya, lo tiri to na azi tɛ Nzapa, ko lo nwɔ nga la. Ahɛ̃ lo nguru ti lɛngɔ gbia na ndo azi ti ale zu, ti sese zu, nga na ti yanga kɔdɔrɔ zu.

⁸ Azi ti le sese zu na vɔrɔngɔ lo, wenge bo azi mɛ asuru ili la ka ya buku mɛ asuru na ili azi ko la alua du ti kaka. Asuru ndo ili azi ni ka ya buku uzu ti Nzapa lingɔ sese. Buku ni adu tɛ Nyi Ngasã Ngbaga mɛ ndo aho lo.

⁹ “Azi ko la ma la da ko, ale ala ma tɛnɛ mɛ nzɔ̃ni!

¹⁰ Zo ko la Nzapa anɛ ya, abi gbanda lo bɔlɔkɔ ko, abi nga bo gbanda lo bɔlɔkɔ biani. Zo ko la Nzapa anɛ ya, aho gbanda lo na zabe ko, aho nga bo lo na zabe. Ĩ ba nda mɛ ale azi tɛ Nzapa ndogbe bɛ la, ko ala ngba bo na yengɔ lo tɛ Nzapa la.”

¹¹ So pɛni, mbi hũ sa ti sɛ alo ka gbɛ sese asi. Nza li lo sɛ nga ma nza li nyi ngasã ngbaga. Lo ndotɛnɛ tɛnɛ nga ma sa ti kpɛnɛ mɛ nga ma ngunde.

¹² Lo na nguru zu ti lingɔ ye nga ma se tɛ sa ti kɔi, ko lo ndoli aye ni so gbɛlɛ sa ti kɔi. Sa ti sɛ ahɛ̃ nyɔ hɛ̃ azi ti lɛ sese na aye zu ya, ala vɔrɔ sa ti kɔi mɛ ndo adɛ li lo na kã ya aho lo, la kã ni amu.

¹³ Sa olo ti sɛ ndoli ndo akokɛnɛ ye ti kpɛnɛ, lo ĩ li ko, wá alo ka ndozu, azu ge lɛ sese, azi zu ahũ ni.

¹⁴ Ahɛ̃ lo lege ya, lo li aye ti kpɛnɛ na gbɛlɛ sa ti kɔi, lo handa azi ti lɛ sese, ko ala ti na siɔ ye. Lo pa hɛ̃ azi ti lɛ sese ya, ala lɛkɛ ngbilondo, ko ala gonda na sa mɛ ndo ade li lo na zabe, la ta lo kpi ma.

¹⁵ Ahɛ̃ sa ti sɛ nguru ya, lo ulu mbo ali ya tɛrɛ ngbilondo mɛ alɛkɛ nga ma sa ti kɔi. Lo ulu mbo ni ya, ngbilondo ni adu lɛ lo ngɛ̃, atɛnɛ tɛnɛ, akpɔ nga azi zu mɛ akɛ̃ vɔrɔngɔ lo.

¹⁶ Sa ti sɛ ahɛ̃ nyɔ hɛ̃ ambumbusɛ azi na akota azi, ahɛ̃ nyɔ hɛ̃ awa nwa na awa yɛlɛ, ahɛ̃ nga nyɔ hɛ̃ ambɛ na abɔrɔ ya, aminya ye na ndo kɔti ti la nga na ndo lɛ la zu.

¹⁷ Zo ko la ta aminya ye ni ko na ndo ti lo ma ko, ta lo lengbi ti vɔ̃ngɔ ye, bere kangɔ ye ma. Ye mɛ ndo aminya na ndo ti azi ni ko, adu ili sa ti sɛ, bere sifelo mɛ alengbi na ili sa ni.

¹⁸ Tɛnɛ olo adu tɛnɛ ti ndara. Ale zo adu na kɔdɛ, wa lo hĩnga nda sifelo mɛ alengbi na ili sa ni. Ta sanga ma, sifelo ni alengbi na ili zo. Sifelo ni adu ngbangbo mana na ndoni sui mana ndoni mana (666).