Suma 12 - Fana Ngbangɔ 1987

Zo wali na sa ti kpɛnɛ mɛ nga ma ngunde

¹ So pɛni mbi hũ ye ti kpɛnɛ asi ka lɛ ndozu: adu zo wali kɔi mɛ amu lá agana na tɛrɛ lo nga ma bɔngɔ. Lo lo na ndo nzɛ̃, lo yu kpɔtɔ ti gbia mɛ atongolo sui kɔi ndoni sɛ tɛrɛ ni.

² Lo mɛ ngɔ, ya lo agbɛnɛ, ko angbã yakere lo dú, la lo ndodɛrɛ kɔngɔ kauu na lo ti pɛnɔ ti gwa mɛ atɛ lo.

³ Mbi hũ ye ti kpɛnɛ mɛ ndɛ̃ asi ka lɛ ndozu: adu bengba sa ti kpɛnɛ mɛ nga ma ngunde. Li lo mbara mbara, nza li lo sui kɔi, kpɔtɔ ti gbia alengbi na li lo ni mbara mbara zu.

⁴ Atongolo abombi tɛrɛ la li nɔ ta ta ka lɛ ndozu. Sa ti kpɛnɛ ni amu sã lo, afũ na li nɔ kɔi, asa ge lɛ sese. Sa ni ko alo so gbɛlɛ zo wali mɛ gwa atɛ lo ya, bo na ngoi ko la lo dú ko, ni tɛ nyingambi ni.

⁵ Zo wali ko adú nyi kɔli, ko nyi kɔli ni na lɛngɔ gbia na nguru na ndo azi ti lɛ sese zu. Lo ĩ dú wɛ ko, amu nyingambi ni, akpã lo ka gunda ngɛndɛ gbia tɛ Nzapa.

⁶ So pɛni, zo wali ko akpɛ, agwe ka bɛ ndo, ka ndo mɛ Nzapa alɛkɛ hɛ̃ lo ya lo du kai, wa ni kã lo na tɛ na ya nzɛ̃ sui siɔ ndoni sɛ.

⁷ So pɛni, to ati ka lɛ ndozu. Mikaɛlɛ mɛ gbia tɛ aangelo, na aangelo tɛ lo abombi atiri to na sa ti kpɛnɛ mɛ nga ma ngunde na aangelo tɛ lo.

⁸ Mikaɛlɛ na aangelo tɛ lo anwɔ sa ti kpɛnɛ na aangelo tɛ lo, atoma la ya, ta ala ti ngbã ka lɛ ndozu ma.

⁹ Abi kota sa ti kpɛnɛ gegi. Lo du ngbɔ ti gã mɛ andoili lo ya Zabulu bere Satana. Lo ndohanda azi ti lɛ sese zu. Amu ndo lo na aangelo tɛ lo zu, asa la ge lɛ sese.

¹⁰ So pɛni, mbi ma legɔ̃ zo adu ka yayu atɛnɛ tɛnɛ na kɔngɔ ya: “Na olo ko, Nzapa aso e wɛ! Lo fa nguru tɛ lo ya ni Gbia. Mɛsia mɛ Nzapa asunu lo afa nga ya ni Gbia. Ta sanga ma, zo mɛ ndo ndolo ka gbɛlɛ Nzapa tɛ e bi na lá, so vɔ̃ngɔ to tɛrɛ ayata e awa Kristo ko, atoma lo ka ndozu, abi lo ka tise wɛ.

¹¹ Ayata e anwɔ ndo lo, na lo mɛ ya, Nyi Ngasã Ngbaga atɔ̃ ndo la na mɛnɛ tɛrɛ lo. Ala nwɔ nga ndo lo na lo ti bɛta tɛnɛ tɛ Nzapa mɛ ndo ala ndopa hɛ̃ azi. Ala ka ndo tɛrɛ la, ala kpili nga.

¹² Na lo ni ko, ĩ azi mɛ ka yayu, ĩ saba! Kanda kota siɔ lo ati na ĩ azi ti lɛ sese! Kota siɔ lo ati nga na aye ti ya ngu, na lo mɛ ya, Satana azu ka tɛ ĩ ka lɛ sese. Ngɔnzɔ agbɔ̃ lo sĩ, ta sanga ma, lo hĩnga ya, ngoi tɛ ni angbã bo yakere.”

¹³ Ngoi mɛ sa ti kpɛnɛ ĩ hĩnga ya, abi ni ge lɛ sese wɛ ko, lo tonda utɛngɔ zo wali mɛ ndo adú nyi kɔli.

¹⁴ La zo wali ko alua kpange ti sɛ nga ma tɛ kota ngwalo, lo kpɛ, lo gwe ka bɛ ndo, ka ndo tɛ lo mɛ Nzapa na mungɔ buru ta na nzɛ̃ mana so kãngɔ lo. Kai ko, ta ngbɔ alengbi ti gbɔ̃ngɔ lo ma.

¹⁵ La sa ti kpɛnɛ aku ngu ndali zo wali ko ya, amu ndo zababa, ko amu lo aɔ na ni.

¹⁶ Sese aza zo wali ko: ya sese asungbi kpoa, la sese anyɔ ngu mɛ sa ti kpɛnɛ aku.

¹⁷ Ngɔnzɔ agbɔ̃ sa ti kpɛnɛ gati gati hɛ̃ zo wali ko, la sa ti kpɛnɛ anɔ so tiringɔ to na atanga aale tɛ zo wali ni ko: adu azi zu mɛ ndotɔndɔ ndia tɛ Nzapa, ala mɛ aye bɛta lo mɛ ndo Yezo Kristo afa na azi.

¹⁸ Ta sa ti kpɛnɛ agbɔ̃ ndo zo wali ma, la lo lo goza goza so nyɔ kota ngu.