Suma 11 - Fana Ngbangɔ 1987

Ateniwɛ osɛ

¹ So pɛni, amu kɛkɛ mɛ nga ma mɛtrɛ ti hangɔ na ye, ahɛ̃ mbi. Apa hɛ̃ mbi ya, mbi lo, mbi mu mɛtrɛ ni, mbi nɔ mbi ha na kota da Nzapa, mbi ha nga na mɛsa ti lungɔ Nzapa na ye, ko mbi dikɔ nga azi mɛ ndovɔrɔ Nzapa ka ya da ni.

² Wa ta mbi ha ya gbágbá ni ma, mbi zia ni. Ta sanga ma, ahɛ̃ ni hɛ̃ apaganɔ. Ala na mungɔ nzɛ̃ sui siɔ ndoni sɛ, dɔrɔngɔ gbágbá ni na gɛrɛ la.

³ Lo pa ya, ni na tongɔ atemwɛ tɛ ni osɛ mɛ ayu kunyɛ so fangɔ ya, ani na muã. Ala na mungɔ nzɛ̃ sui siɔ ndoni sɛ so pangɔ tɛnɛ tɛ Nzapa hɛ̃ azi.

⁴ Atemwɛ ni ko sɛ adu nga ma akɛkɛ sɛ mɛ andoili ya olivie, ala nga ma amɔinda sɛ mɛ ndodu so gbɛlɛ Gbia Nzapa mɛ ndole gbia na ndo azi ti le sese.

⁵ Se azi aye lingɔ atemwɛ ni siɔni ko, wá alo ka yanga la asi, akpɔ awa kɛ̃ngɔ la. Se mɛ nga ala lengbi ti hongɔ azi mɛ aye lingɔ la siɔni la.

⁶ Na ya bi mɛ ala ndopa na tɛnɛ tɛ Nzapa ko, ala na nguru ti gbanzingɔ lɛ ndozu ya, ta ngu ani ma. Ala nga na nguru ti gbinyangbingɔ ngu ya ati mɛnɛ. Ala nga na nguru ti hɛ̃ngɔ lɛ apɛnɔ ndɛ̃ ndɛ̃ ndɛ̃ hɛ̃ azi ti lɛ sese, ko ala na lingɔ ni fani sĩni, nga ma se mɛ bɛ la aye.

⁷ Ngoi ko la ala na kɔngɔ nda pangɔ tɛnɛ tɛ Nzapa ko, sa kɔi na longɔ ka ya du mɛ lipi lipi singɔ, tiringɔ la na to. Sa ni na nwɔngɔ la, kpɔngɔ la.

⁸ Kinda tɛ la na ngbãngɔ so bɛ lege na ya kɔdɔrɔ, na ndo mɛ ndo agɔngɔ na Gbia tɛ la Yezo ndo krusi. Andoili kɔdɔrɔ ni ko na matɔ ya, Sɔdɔmɛ bere Egipito.

⁹ Azi ti lɛ sese zu, na ti ale zu, na ti yanga kɔdɔrɔ zu na bangɔ akinda tɛ la na ya bi ta na ndambu. Azi na kɛ̃ngɔ ya, ta ahɔ akinda ni ma.

¹⁰ Bɛ azi ti lɛ sese na dengɔ na lo kwá mɛ azi ko sɛ akpili. Ala na sabangɔ, ala nga na tongɔ gburu hɛ̃ afɔ̃ la, afɔ̃ la ato nga gburu hɛ̃ la. Ala na lingɔ so, na lo mɛ ya, awa pangɔ nyɔ Nzapa ko sɛ agia ndo ya li azi ma wo ma mɛ na lɛ sese na lo tɛnɛ tɛ Nzapa.

¹¹ Ĩ la so pɛ kwá tɛ la bi ta na ndambu ko, Nzapa aulu mbo tɛ lo, ali na ya tɛrɛ la, ala so, ko mbɛtɔ agbɔ̃ azi zu mɛ ahũ la.

¹² La awa pangɔ nyɔ Nzapa ko sɛ ama legɔ̃ zo mɛ adu ka yayu, atɛnɛ tɛnɛ na kɔngɔ hɛ̃ la ya: “Ĩ ma ge!” La ala ma ka yayu na ya da baba, ko na ngoi mɛ ala so ndoma ko, awa kɛ̃ngɔ la so ndoba la.

¹³ Bo na ngoi ni ko la sese ayingi gbu gbu gbu, kɔdɔrɔ akangbi sui kɔi, ko mbanga kɔi agbɛ̃, azi koto mbara mbara akpili na lo ti sese mɛ ayingi. Mbɛtɔ agbɔ̃ ambanga azi sĩ, ko ala so ndogonda Nzapa mɛ ka yayu.

¹⁴ Pɛnɔ ti sɛ aɔ we, wa ĩ du na kpengba le! Angbã yakere pɛnɔ ti ta aga.

Mbana ti mbara mbara akpale

¹⁵ So pɛni, angelo ti mbara mbara aulu mbana. Mbi ma legɔ̃ azi ma wo ma adu ka ndozu atɛnɛ tɛnɛ na kɔngɔ ya: “Gbia Nzapa tɛ e, na Mɛsia mɛ lo sunu lo, ala to nda lɛngɔ gbia na olo na ndo azi ti lɛ sese. Nzapa na lɛngɔ gbia na ndo la buru na buru!”

¹⁶ Akangba sui sɛ ndoni siɔ mɛ adunga na ndo ngɛndɛ gbia tɛ la so gbɛlɛ Nzapa, awo tise lɛbɛ lɛbɛ, atolo lɛ la tise, avɔrɔ Nzapa ya:

¹⁷ “Gbia Nzapa, mɔ lombe, mɔ ndo da gã, mɔ nga da na olo mɛ. E hɛ̃ mɔ sia kɔli na lo ti kota nguru tɛ mɔ mɛ mɔ mu, mɔ to nda lɛngɔ na gbia.

¹⁸ Ngɔnzɔ agbɔ̃ ndo azi ti lɛ sese ma wo ma, Ko ngoi ti mɔ dengɔ ngɔnzɔ tɛ mɔ na ndo la alengbi we. Ngoi ti mɔ fangɔ ngbanga tɛ awa kwáni alengbi wɛ. Ngoi ti mɔ hɛ̃ngɔ mbana gɛrɛ hɛ̃ awa kwa tɛ mɔ mɛ awa pangɔ nyɔ mɔ alengbi wɛ. Ngoi ti mɔ hɛ̃ngɔ mbana gɛrɛ hɛ̃ azi tɛ mɔ zu mɛ ndokpe mɔ alengbi wɛ, Abɛ azi ni adu akota azi, bere ambumbusɛ azi ko, ngoi ni alengbi wɛ. Ngoi ti mɔ kpɔngɔ azi mɛ ndo akpɔ azi ti lɛ sese alengbi wɛ.”

¹⁹ Akangba ko ĩ kai ko, mbi hũ nyɔ kota da Nzapa adu ka yayu azi, ko mbi hũ sandugu kɔi ka ya kota da Nzapa ni. Adu sandugu mɛ andofa ya, Nzapa na azi tɛ lo agbe ngbanga. Bekpa ataima nzɛrrr, nzɛrrr, agbo gbáaa, gbáaa, ngu akini ngbũuu ngbũuu, sese ayingi kpu kpu kpu, ngandangombe asa gbara gbara gbara.