Suma 10 - Fana Ngbangɔ 1987

Angelo na nyi buku

¹ So pɛni, mbi hũ mbanga angelo mɛ wa nguru alo ka ndozu so ndozu ge tise. Da baba avĩ lo, kɔngɔ mɛ ndosi ka le ndozu aka li lo kɛrɛrɛ. Yangba le lo ndosũ nga ma la, gɛrɛ lo ndoza nga ma mɛngɛ wá.

² Lo gbɔ̃ nyi buku so ti lo, azi ya buku ni zingɔ. Lo kpa gɛrɛ lo ti kɔti ka lɛ kota ngu, lo kpa nga gɛrɛ lo ti ga ka lɛ sese.

³ Lo dɛ kɔngɔ kpengbani nga ma se mɛ bamara ndogburuka na ni. Lo ĩ dɛ kɔngɔ wɛ ko, ngu akini fani mbara mbara.

⁴ Ngoi mɛ ngu ni ĩ kini wɛ ko, mbi separa ya mbi su tɛnɛ ni na mbɛti, ko mbi ma legɔ̃ zo adu ka ndozu, apa hɛ̃ mbi ya, tɛnɛ ko la mbi ma na nyɔ ngu mɛ akini fani mbara mbara ko, mbi bata ni ka bɛ mbi, ta mbi su ni na mbɛti ma.

⁵ Mbi hũ angelo mɛ fɛrɛ akpa gɛrɛ lo ti kɔti ka lɛ ngu, akpã nga gɛrɛ lo ti ga ka lɛ sese, aya ti lo ti kɔti ndozu,

⁶ anyɔ ngɛ na ili Nzapa mɛ ndodu lɛ lo ngɛ̃ buru na buru, wa lingɔ ndozu na ye zu mɛ ka lɛ ni, wa lingɔ sese na ye zu mɛ ka lɛ ni, wa lingɔ nga kota ngu na aye zu mɛ ka ya ni. Angelo ni apa ya: “Ló na singɔ bo lo mɛ.

⁷ Ngoi mɛ se angelo ti mbara mbara ato nda ulungɔ mbana tɛ lo hĩ, wa Nzapa ali ye mɛ bo lo kɔi la lo hĩnga, nga ma se mɛ ndo lo pa na ni hɛ̃ awa kwa tɛ lo mɛ awa pangɔ nyɔ lo.”

⁸ So pɛni, legɔ̃ zo mɛ fɛrɛ mbi ma, adu ka ndozu ati tɛnɛ hɛ̃ mbi ya, mbi nɔ, mbi mu nyi buku ko la ya ni azi zingɔ ka ti angelo mɛ akpã gɛrɛ lo ti kɔti ka lɛ ngu, akpã nga gɛrɛ lo ti ga ka lɛ sese.

⁹ La mbi nɔ ka gbɛlɛ angelo, ko mbi hũnda lo ya, lo hɛ̃ mbi nyi buku ni. La lo gbinya hɛ̃ mbi ya, mbi mu ni, mbi tɛ, na lɔgɔmangɔ ka yanga mbi nga ma kpɔ̃ lavũ, kanda na sengɔ ka ya kundu mbi nga ma bɛngɛ.

¹⁰ La mbi mu nyi buku ni ka ti lo, mbi tɛ. Alɔgɔma yanga mbi nga ma kpɔ̃ lavũ, ko ngoi mɛ mbi mɛnɛ ni ko, ase ka ya kundu mbi nga ma bɛngɛ.

¹¹ La apa hɛ̃ mbi ya, tɛnɛ tɛ Nzapa mɛ adu na lo tɛ ale tɛ azi gba, azi mɛ ndotɛnɛ yanga ndɛ̃ ndɛ̃ ndɛ̃, nga na lo tɛ agbia ko, ale mbi ti pa ni hɛ̃ azi.