Suma 1 - Fana Ngbangɔ 1987

Tongɔ nda tɛnɛ

¹ Buku olo ndopa lo ti aye mɛ ndo Yezo Kristo afa na Yoanɛ na ya suma. Nzapa afa na Yezo ya, lo fa awa kwa tɛ ni na aye mɛ na singɔ bo lo mɛ. La Yezo ato angelo tɛ lo ya, lo nɔ ka tɛ wa kwa tɛ ni Yoanɛ, lo fa lo na aye ni ko.

² Yoanɛ akambisa lo ti aye zu mɛ lo hũ na le lo. Lo pa ya, aye ni adu tɛnɛ tɛ Nzapa biani, ko Yezo Kristo la temwɛ ni.

³ Dengɔ bɛ ati na zo ko la adi tɛnɛ olo. Dengɔ bɛ ati na zo ko la ama tɛnɛ ni, atɔndɔ nga ni. Ta sanga ma, ngoi ti aye ni ko singɔ adoli wɛ.

Yoanɛ abala awa Kristo ti Eklezia mbara mbara

⁴ Mbi Yoanɛ la mbi su mbɛti olo mbi to hɛ̃ awa Kristo ti Eklezia mbara mbara mɛ ka sese ti Azia. Mbi bala ĩ! Nzapa ndo da gã, lo da na olo, lo nga na gangɔ. Wa lo li bɛ hɛ̃ ĩ nzɔ̃ bɛ ma ke! Lo li bɛ nga ya, bɛ ĩ adu pii ma ke! Atɔrɔ tɛ lo mbara mbara mɛ ndolonga so gbɛlɛ ngɛndɛ gbia tɛ lo ali bɛ nzɔ̃ bɛ hɛ̃ ĩ ma ke! Ala li bɛ nga ya, bɛ ĩ adu pii ma ke!

⁵ Yezo Kristo lo bɛta temwɛ tɛ Nzapa, lo kɔzo zo mɛ ndo lo so na pɛ kwa, lo nga Gbia tɛ agbia ti le sese. Lo li bɛ nga nzɔ̃ bɛ hɛ̃ ĩ, lo li bɛ nga ya, bɛ ĩ adu pii ma ke! Bɛ lo aye e, lo kpi ndo so hãngɔ siɔ ye tɛ e zingɔ.

⁶ Lo li nga ya, e ti awa lungɔ To ni Nzapa na ye, ko ni du Gbia tɛ e. Yezo Kristo adu bɛ na ndima nga na nguru buru na buru ma ke! Seni la.

⁷ Ĩ ba lo la lo ga na ya da baba! Azi zu na hũngɔ lo, abɛ nga azi ko ndo akpɔ katɛ lo ko, ala nga na hũngɔ lo. Azi zu ti lɛ sese na demangɔ so lo. Biani, se mɛ na dungɔ na ni la! Seni la.

⁸ Gbia Nzapa mɛ Lombe, lo ndo da, lo da na olo, lo nga na gangɔ, lo pa ya, ni wa tongɔ nda aye zu, ni nga wa kɔngɔ nda aye zu.

Yoanɛ ahu Yezo na suma

⁹ Mbi Yoanɛ nyita ĩ, mbi mɛ mbi na ĩ, nga na Yezo Kristo e ti bo kɔi ko, mbi ndohũ pɛnɔ mɛ ĩ ndohũ nga. Mbi na ĩ e ndogbe be e na ya pɛnɔ ni. Mbi na ĩ e du azi ti Kɔdɔrɔ Gbia tɛ lo. Agbɔ̃ ndo mbi ato ka ya zúa ti Patimɔsi, na lo mɛ ya, mbi pa tɛnɛ tɛ Nzapa mɛ Yezo Kristo temwɛ ni.

¹⁰ Mbanga lá yenga kɔi, Tɔrɔ Santo asa tɛrɛ mbi, ko mbi hũ suma. La mbi ma legɔ̃ zo so pɛko mbi ndotɛnɛ tɛnɛ na kɔngɔ, nga ma se mɛ mbana ndokpale na ni.

¹¹ Zo ni ko apa hɛ̃ mbi ya, aye mɛ mbi ndohũ ko, mbi su na mbɛti, mbi to hɛ̃ awa Kristo ti Eklezia mbara mbara olo mɛ: Eklezia ti Efɛzɛ, ti Simirnɛ, ti Pɛrgamɛ, ti Tiatirɛ, ti Sardɛ, ti Filadɛlfia, nga na ti Laodisea.

¹² Ngoi mɛ mbi ma tɛnɛ ni ko, mbi sana tɛrɛ mbi ya, mbi ba zo mɛ atɛnɛ tɛnɛ ni hɛ̃ mbi. Ko mbi hũ gɛrɛ wá mbara mbara mɛ alɛkɛ na wɔrɔ.

¹³ Mbi hũ mbanga ye mɛ akpa zo, alo so ndo bɛ gɛrɛ wá ko mbara mbara. Zo ni ayu bɔngɔ mɛ asa ka ndo papu gɛrɛ lo, agbe gba mɛ alɛkɛ na wɔrɔ na li bɛ lo.

¹⁴ Kwa li lo mbufuni pɛ pɛ pɛ nga ma kwa tɛrɛ nyange. Ee lo ndoza nga ma wá.

¹⁵ Gɛrɛ lo ndosũ nga ma nwa mɛ ayɔrɔ ka ya wá, ati bengbani ngba ngbã ngbã. Legɔ̃ lo ndovũ nga ma gigi ti kota sɔrɔ ti ngu.

¹⁶ Lo gbɔ̃nɔ atongolo mbara mbara na kɔti ti lo. Zabe mɛ lɛ ni ndoɔ̃ mbage na mbage asi so yanga lo. Yangba lɛ lo ndosũ nga ma lá ti bɛ kɔmbitɛ.

¹⁷ Ngoi mɛ mbi hũ lo ko, mbi ti so gbɛlɛ lo nga ma zo mɛ akpi. Lo kpã kɔti ti lo ndo mbi, lo pa hɛ̃ mbi ya: “Ta mbɛtɔ agbɔ̃ mɔ ma! Mbi wa tongɔ nda aye zu, mbi nga wa kɔngɔ nda aye zu.

¹⁸ Mbi lɛ mbi ngɛ̃. Mbi kpi ndo, kanda na olo ko, mbi so, ko mbi na dungɔ lɛ mbi ngɛ̃ buru na buru. Mbi Gbia ti ndo kwá, mbi nga Gbia ti ndo mɛ awa kwáni ndodu da.

¹⁹ Wa su aye mɛ mɔ hũ. Su aye mɛ ndosi na olo mɛ, nga na aye mɛ na gangɔ gesi.

²⁰ Atongolo mbara mbara mɛ mɔ hũ mbi gbɔ̃nɔ na kɔti ti mbi, na gɛrɛ wá mbara mbara mɛ alɛkɛ na wɔrɔ ko, ma nda ni lo mɛ atongolo mbara mbara adu aangelo mɛ ndobata awa Kristo ti Eklezia mbara mbara, gɛrɛ wá mbara mbara adu awa Kristo ti Eklezia ko mbara mbara.”