Roma 9 - Fana Ngbangɔ 1987

Nzapa ana azi mɛ lo sara la lo kpa

¹ Tɛnɛ mɛ mbi na tɛnɛngɔ hɛ̃ ĩ ko, adu beta tɛnɛ, na lo mɛ ya, mbi zo tɛ Kristo, ko ta tɛnɛ tɛ mbi adu nvɛnɛ ma. Kɔdɛ tɛ mbi mɛ Tɔrɔ Santo gbia ni ndofa nga na mbi ya, tɛnɛ ni adu beta tɛnɛ.

² Kota vundu agbɔ̃ mbi sĩ, ko bɛ mbi ndosɔ nga ngoi zu.

³ Se adu ya alengbi ko, mbi ndosepara ya, Nzapa azonga mbi nvɛni, akangbi nga popo tɛ mbi na Yezo, wa mbi za ayata mbi mɛ e na la ale kɔi.

⁴ Ala du atara Yakobo. Nzapa asara ndo la akpa ya, ala du aya ni, lo fa ndo nga la na ndima tɛ lo. Lo na la agbe ndo ngbangɔ, lo lu ndo ndia hɛ̃ la, lo fa la na lege ti vɔrɔngɔ lo, lo ko ndo nga kapa hɛ̃ la.

⁵ Ala ndo atara akɔzo akotara e. Kristo mɛ ndo amu tɛrɛ zo ko, lo ndo ale tɛ la, lo Gbia ti ndo aye zu, lo nga Nzapa. E gonda lo buru na buru! Seni la.

⁶ Ta mbi ye pangɔ ya, Nzapa aweza kapa mɛ ndo lo ko ma. Ti biani, ta atara Yakobo zu adu abɛta azi tɛ Nzapa ma.

⁷ Ko ta atara Abrahama zu adu nga abɛta atara Abrahama ma, ta sanga ma, Nzapa apa ndo hɛ̃ Abrahama ya: “Bo atara nyi mɔ Izaki gbanda la ati abɛta atara mɔ.”

⁸ Oko afa ya, aya mɛ ndo Abrahama adú la ko, ta ala zu la aya Nzapa ma. Kanda abɛta aya Nzapa bo la ala mɛ ndo adú la na se kapa mɛ ndo Nzapa ako.

⁹ Ta sanga ma, Nzapa ako ndo kapa ni ya: “Ngoi mɛ gbanda bi mɛ mbi ko alengbi ko, mbi ga, wa Sara adú nyi kɔli.”

¹⁰ Ko ta kɔtɛ ni bo la ma, se tɛ Rebeka ndo nga la. Aya lo ti kɔli sɛ ndo angbɔ, to la ndo bo kɔi la kotara e Izaki.

^11-12 Abɛ ta Rebeka ade ndo adú aya lo ma, abɛ nga ta aya lo ni ade ndo ali anzɔ̃ ye bere asiɔ ye ma ko, Nzapa apa ndo hɛ̃ Rebeka ya: “Kɔzo nyi mɔ adu gbanda wa lingɔ kwa hɛ̃ ngambi lo.” Nzapa apa ndo so, so fangɔ ya, ni ndosara zo na popo tɛ afɔ̃ lo nga ma se mɛ bɛ ni aye, ko ta ni ndosara zo na lo ti kwa tɛ lo ma, kanda ni ndosara zo mɛ ni ili lo.

¹³ Nzapa asara ndo ngambi nga ma se mɛ asu na ni ka ya Buku tɛ lo Nzapa ya: “Bɛ mbi aye Yakobo, ko bɛ mbi akɛ̃ Ezau.”

¹⁴ Wa tɛnɛ mɛ e ti e tɛnɛ nɛ? E lengbi ti tɛnɛngɔ ya, ta Nzapa ndoli ye na seni ma? Ipɔ, ta seni la ma!

¹⁵ Ta sanga ma, lo pa ndo hɛ̃ Mɔizɛ ya: “Mbi na mangɔ vundu hɛ̃ zo mɛ mbi ye mangɔ vundu hɛ̃ lo, mbi nga na lingɔ nzɔ̃ bɛ hɛ̃ zo mɛ mbi ye lingɔ nzɔ̃ bɛ hɛ̃ lo.”

¹⁶ Wa se Nzapa asara zo akpa ko, ta adu na lo ti ye mɛ zo ni aye, bere na lo ti ye mɛ zo ni ali ma, kanda adu bo na lo ti vundu mɛ Nzapa ama hɛ̃ lo.

¹⁷ Asu ka ya Buku tɛ Nzapa ya, Nzapa apa hɛ̃ gbia ti Egipito ya: “Mbi kpa mɔ gbia ya, mbi fa nguru tɛ mbi ti ndo mɔ, wadila ili mbi alengbi na le sese zu.”

¹⁸ Afa ya, Nzapa ndoma vundu hɛ̃ zo mɛ lo ye mangɔ vundu tɛ lo, ko lo ndokpengba nga na li zo mɛ lo ye kpengbangɔ na li lo.

Ngɔnzɔ tɛ Nzapa na vundu tɛ lo

¹⁹ Bere mbanga zo na hũndangɔ mbi ya: “Se adu ya, Nzapa ndosara zo mɛ bɛ lo aye ko, nda mɛ lo ti ndobela azi nɛ? Ta sanga ma, ta zo alengbi ti kɛ̃ngɔ lo mɛ Nzapa aye ma!”

²⁰ Wa mɔ zo mɛ mɔ ndokɛ̃ tɛnɛ tɛ Nzapa ko, mɔ tɛ mɔ na? Ta mɛ asɔ̃ na kpondo ko, ta ni ko ndohũnda wa sɔ̃ngɔ lo ya, mɔ sɔ̃ mbi nga so ya nɛ? Ipɔ.

²¹ Wa sɔ̃ngɔ ta alengbi ti sɔ̃ngɔ ta nga ma se mɛ bɛ lo aye: lo lengbi ti mungɔ kpondo, lo kongbi ya ni sɛ, lo mu mbanga lo sɔ̃ na nzɔ̃ ta, ko lo mu nga mbage ni, lo sɔ̃ na ta ti lingɔ na kwa ti lá kwe la kwe.

²² Wa se Nzapa ali ye nga ma se tɛ wa sɔ̃ngɔ ta ko, ta aba zo ma, aba gi lo kɔi. Lo ye fangɔ ngɔnzɔ tɛ lo na nguru tɛ lo. Na lo ni, azi mɛ ndo lo lengbi ti dengɔ ngɔnzɔ ndo la, angbã nga yakere lo kpɔ la ko, lo gbe ndo bɛ lo sĩ na lo tɛ la.

²³ Tɛ e mɛ lo ma vundu tɛ e, lo pia nga lo lɛkɛ e ya, e lua ndima ka tɛ ni ko, lo ye nga fangɔ e na kota ndima tɛ lo.

²⁴ Ta sanga ma, e du azi mɛ lo ili e ya, e du azi tɛ ni, ko ta adu bo e Ayuda kɔi la lo ili e ma, kanda lo ili nga azi mɛ ta Ayuda ma.

²⁵ Ko tɛnɛ ni la lo pa ka ya Buku mɛ ndo Ozea asu. Tɛnɛ ni lo mɛ: “Azi mɛ ndo ta ala azi tɛ mbi ma ko, Mbi ili gbanda la ya, ala azi tɛ mbi, Azi mɛ ndo ta mbi ndoye la ma ko, Mbi ili gbanda la ya, ala azi ti kpɔ̃ bɛ mbi.

²⁶ Ko ndo mɛ ndo mbi pa na tɛnɛ hɛ̃ azi da ya: ‘Ta ĩ azi tɛ mbi ma’ ko, Ndo mɛ gbanda mbi Nzapa mɛ le mbi ngɛ̃, Mbi ili na la da ya, ala aya mbi la.”

²⁷ Ezai apa ndo nga tɛnɛ na kɔngɔ na lo tɛ awa Izrayɛlɛ ya: “Abɛ awa lzrayɛlɛ abu ndo sĩ nvɛni nga ma mbutu mɛ na nyɔ ngu ko, bo azi yakere na popo tɛ la la Gbia Nzapa aso gbanda la.

²⁸ Ta sanga ma, lo na gangɔ hiɔ so fangɔ ngbanga tɛ azi ti lɛ sese zu ti buai.”

²⁹ Nga ma se mɛ ndo Ezai apa na ni gã ya: “Se ta adu ya, Gbia Nzapa mɛ lombe Azia ndo hɛ̃ e ambanga azi ti ale tɛ e ma ko, Ale e kpili ndo nga ma se tɛ Azi ti kɔdɔrɔ ti Sɔdɔmɛ na ti Gɔmɔrɔ.”

Ta Ayuda ahĩnga bɛta lege ma

³⁰ Wa tɛnɛ mɛ e ti e tɛnɛ nɛ? E lengbi ti tɛnɛngɔ ya, azi mɛ ta Ayuda ma, ta ala ndogi ndo nga kɔdɛ ya, Nzapa amu ani ka lɛ lo ya, ani abɛta azi ma ko, Nzapa amu ndo la ya, ala abɛta azi. Lo mu ndo la ya, ala abɛta azi, na lo mɛ ya, ala ye ndo lo tɛ lo.

³¹ Kanda awa Izrayɛlɛ mɛ ndo ndogi ndia kɔi ya, se ani tɔndɔ ni, wadila Nzapa amu ani ka lɛ lo ya, ani abɛta azi ko, ala ha ndo gba.

³² Nda mɛ ndo ala ha gba nɛ? Ala ha ndo gba, na lo mɛ ya, ala ndoda ndo bɛ la ya, Nzapa alengbi ti mungɔ ani ka lɛ lo ya, ani abɛta azi, na lo ti kwa tɛ ani. Kanda ta ala ndoda ndo bɛ la ya, lo lengbi ti mungɔ ani ya, ani abɛta azi, na lo ti lo yengɔ tɛ ani ma. Ala ta ndo li gɛrɛ la na “tɛnɛ mɛ ndokinda zo.”

³³ Tɛ́nɛ ni adu Yezo Kristo, ko Buku tɛ Nzapa ndopa lo ti tɛ́nɛ ni ko ya: “Ĩ ba, tɛ́nɛ mɛ azi ndota li gɛrɛ la na ni, ko andokinda la ko, Mbi kpã ni nga ma tɛ́nɛ ti nda ngɔrɔ da ka kɔdɔrɔ ti Siona. Zo ko la aye lo ti tɛ́nɛ ni ko, Ta kamɛnɛ na gbɔ̃ngɔ lo ma.”