Roma 8 - Fana Ngbangɔ 1987

Bɛta du mɛ Tɔrɔ Santo ndohɛ azi

¹ Ko na olo ko, ta Nzapa ti ndofa ngbanga abi li azi mɛ ala na Yezo Kristo ati bo kɔi ma.

² Ta sanga ma, nguru tɛ Tɔrɔ Santo mɛ ndohɛ̃ zo bɛta du ti ndo Yezo Kristo ahã mbi na ya siɔ ye, ahã nga mbi na ya kwá, abi bɔrɔ tɛrɛ mbi.

³ Ta ndia tɛ Mɔizɛ alengbi ndo ti hãngɔ e azi na ya siɔ ye zingɔ ma, na lo mɛ ya, bɛ e adu woni. Kanda Nzapa ahã e na ya ni azi na ngoi mɛ ndo lo to Nyi lo nvɛni. Nyi lo amu ndo tɛrɛ zo nga ma se tɛ e mɛ awa lingɔ siɔ ye, ya ni hã siɔ ye tɛ e ni zi. Nzapa aminya ndo siɔ ye tɛ e azi na li Yezo, lo fa ndo nga ngbanga lo bi li lo.

⁴ Lo li ndo so ya, e tɔndɔ ndia tɛ ni, ta sanga ma, ta e ti ndoli ye na se gwɛ̃ ti tɛrɛ e azi ma, kanda e ndoli ye na se nyɔ Tɔrɔ Santo.

⁵ Ta sanga ma, azi ko la ndoli ye na se gwɛ̃ ti tɛrɛ la ko, ala ndokpã bɛ la bo na ndo ye mɛ gwɛ̃ ti tɛrɛ la aye. Kanda azi ko la ndoli ye na se nyɔ Tɔrɔ Santo ko, ala ndokpã bɛ la bo na ndo ye mɛ Tɔrɔ Santo aye.

⁶ Se zo akpã bɛ lo bo na ndo ye mɛ gwɛ̃ ti tɛrɛ lo aye ko, ye ni abi lo ya kwá. Kanda se zo akpã bɛ lo bo na ndo ye mɛ Tɔrɔ Santo aye ko, ye ni ahɛ̃ lo bɛta du, ko ali nga ya, bɛ lo adu piini.

⁷ Azi ko la ndokpã bɛ la bo na ndo ye mɛ gwɛ̃ ti tɛrɛ la ndoye ko, ala du awa kɛ̃ngɔ Nzapa. Ta ala ndotɔndɔ ndia tɛ Nzapa ma, ta ala lengbi bɛ nga ti tɔndɔngɔ ndia ni ma.

⁸ Azi ko la ndoli ye na se gwɛ̃ ti tɛrɛ la ko, ta bɛ Nzapa ndode na lo tɛ la ma.

⁹ Kanda tɛ ĩ ko, ta ĩ ndoli ye na se gwɛ̃ ti tɛrɛ ĩ ma, ĩ ndoli ye na se nyɔ Tɔrɔ Santo, na lo mɛ ya, Tɔrɔ Santo tɛ Nzapa na ya tɛrɛ ĩ. Zo ko la ta na Tɔrɔ tɛ Yezo Kristo na ya tɛrɛ lo ma ko, ta lo nga zo tɛ Yezo Kristo ma.

¹⁰ Se Yezo Kristo adu na ya bɛ ĩ ko, Tɔrɔ tɛ lo ahɛ̃ ĩ bɛta du, na lo mɛ ya, Nzapa amu ĩ ka lɛ lo ya, ĩ abɛta azi. Ko abɛ nga se tɛrɛ ĩ akpi gbanda na lo ti siɔ ye tɛ ĩ ko, ĩ lua beta du wɛ.

¹¹ Se Tɔrɔ Santo tɛ Nzapa mɛ ndo aso Yezo Kristo na pɛ kwa adu na ya tɛrɛ ĩ, wa Nzapa aso nga gbanda tɛrɛ ĩ na pɛ kwa. Lo li gbanda so na nguru tɛ Tɔrɔ Santo tɛ lo mɛ na ya tɛrɛ ĩ.

¹² Aya bua, na lo ni ko, ale e ndoli ye na se nyɔ Tɔrɔ Santo. Kanda ale ta e ndoli ye na se gwɛ̃ ti tɛrɛ e ma.

¹³ Ta sanga ma, se ĩ li ye na se gwɛ̃ ti tɛrɛ ĩ ko, ĩ kpili gbanda. Wa na lo nguru tɛ Tɔrɔ Santo, se ĩ zia siɔ ye mɛ ĩ ndoli buai ko, gbanda ko ĩ so.

¹⁴ Azi zu mɛ Tɔrɔ Santo tɛ Nzapa ndofa la na lege ti lingɔ ye ko, ala aya Nzapa.

¹⁵ Ta sanga ma, Tɔrɔ Santo mɛ ĩ lua ko, ta lo ndobi ĩ ambɛ ma, ta lo ndoli ya mbɛtɔ ati gbɔ̃ ĩ ma. Kanda lo kpa ĩ ya, ĩ ti aya Nzapa, lo nga la lo ndozi hɛ̃ e lege ya e ili Nzapa ya: “To e!”

¹⁶ Tɔrɔ Santo tɛ Nzapa nvɛni ndopa hɛ̃ e ge ya bɛ e ya, e aya Nzapa.

¹⁷ E aya lo, na lo ni ko, e lua nga gbanda anzɔ̃ ye mɛ lo bata hɛ̃ azi tɛ lo. E na Yezo Kristo gbanda la e lua anzɔ̃ ye ni, ta sanga ma, oko la e ndohũ pɛnɔ ndoni kɔi na lo ko, e lua nga gbanda ndima ndoni kɔi ka tɛ Nzapa.

Ndima mɛ gbanda e na luangɔ

¹⁸ Mbi hũ ya, ndima mɛ gbanda Nzapa afa na azi ti ndo e ko, adu gbanda kotani aɔ pɛnɔ mɛ e ndohũ na olo mɛ.

¹⁹ Aye zu mɛ ndo Nzapa ali ndoku ngoi mɛ gbanda Nzapa afa aya lo yango. Aye ni ndoku ngoi ni ko na bɛ la fu fu.

²⁰ Ta sanga ma, aye mɛ ndo Nzapa ali nzɔ̃ni ko, ati gɛgɛrɛ. Ta aye ni ko nvɛni ndo la aye ya, ani ti gɛgɛrɛ ma, kanda Nzapa ndo la aye ya, adu nga so. Ko aye ni ko ndolɛndɛrɛ ya,

²¹ lá kɔi gbanda ko, Nzapa azi gbanda ani na ya lo mbɛ mɛ agbɛ̃ ani, ko ani ti abɔrɔ, ani lua nga ndima nga ma se tɛ aya Nzapa.

²² E hĩnga nzɔ̃ni ya, aya ndo gã, ngbĩi asi na olo ko, aye zu mɛ ndo Nzapa ali ko, aye ni ndodema tɛrɛ la na ya pɛnɔ, nga ma se mɛ wali mɛ gwa atɛ lo ndohũ na pɛnɔ.

²³ Ko ta adu bo aye ni ko kɔi la ndodema tɛrɛ la ma. Kanda e mɛ ndo e pia e lua Tɔrɔ Santo, nga ma kɔzo nzɔ̃ ye mɛ Nzapa ahɛ̃ e ko, e ndodema nga tɛrɛ e ka ya bɛ e. E ndodema tɛrɛ e so kungɔ ya, Nzapa amu e ya, e ti aya ni, ko ni so ngbonga tɛrɛ e na pɛ kwá.

²⁴ Ta sanga ma, Nzapa aso e, ko songɔ mɛ lo so na e ko, e de bo e lɛndɛre aye mɛ gbanda lo li na lo tɛ e. Se zo ahũ ye mɛ lo ndolɛndɛrɛ ko, ta lo ti lɛndɛrɛ ni ma. Ta zo ndolɛndɛrɛ ye mɛ lo hũ wɛ ma!

²⁵ Kanda se e lɛndɛrɛ ye mɛ ta e dɛ e hũ ma ko, e ku ni na yɔngɔrɔ bɛ.

²⁶ Se mɛ nga Tɔrɔ Santo ndoga so zangɔ e mɛ bɛ e woni la. Ta e hĩnga sambelangɔ Nzapa na seni ma, kanda Tɔrɔ Santo nvɛni ndosambela Nzapa na lo tɛ e. Lo ndosambela lo na lamanangɔ tɛrɛ lo, ko ta zo alengbi ti kambisangɔ tɛnɛ mɛ Tɔrɔ Santo ndotɛnɛ ma.

²⁷ Ko Nzapa ndohĩnga lo mɛ ka ya bɛ azi. Lo ndohĩnga nga lo mɛ Tɔrɔ Santo aye, ta sanga ma, Tɔrɔ Santo ndosambela Nzapa na lo tɛ azi tɛ Nzapa, nga ma se mɛ Nzapa aye na ni.

²⁸ E hĩnga ya, Nzapa ndoli ya, ye zu ati nzɔ̃ni na lo tɛ azi mɛ lo ili la na se bɛ lo nvɛni, azi mɛ ndoye lo.

²⁹ Ta sanga ma, azi mɛ ndo Nzapa apia asara la akpã ya, ala du azi tɛ ni ko, lo pia ndo nga lo kpã la ya, ala ti nga ma se tɛ Nyi ni, ala ti ayata Ĩo ma wo ma, wadila Nyi ni adu kɔzo tɛ la.

³⁰ Azi mɛ Nzapa apia asara la akpã ko, Nzapa aili nga la ya, ala azi tɛ ni. Azi mɛ lo ili la ko, lo mu nga la ka le lo ya, ala abɛta azi. Azi mɛ lo mu la ya, ala abɛta azi ko, lo hɛ̃ nga la ndima ka tɛ lo.

Nzapa ndoye e sĩ

³¹ Wa tɛnɛ mɛ e ti e tɛnɛ nɛ? Nga ma la Nzapa pɛko e ko, ta zo alengbi ti lingɔ e siɔni ma!

³² Ta lo kɛ̃ ndo tongɔ hɛ̃ e Nyi lo ma, kanda lo ka ndo lo ya, lo ga lo kpi so e zu. Nzapa ahɛ̃ e Nyi lo, lo nga na hɛ̃ngɔ e ye kwe biani!

³³ Zo mɛ gbanda avɔ̃ to tɛrɛ azi mɛ ndo Nzapa asara la akpã azi tɛ lo na? Ta zo kɔi da ma, ta sanga ma, Nzapa la amu la ka lɛ lo ya, ala abɛta azi.

³⁴ Wa zo mɛ gbanda afa ngbanga abi li la na? Ta zo kɔi da ma, ta sanga ma, Yezo akpi, aso, adu ka ndo kɔti ti Nzapa, lo ndosambela nga Nzapa na lo tɛ e.

³⁵ Ta ye kɔi alengbi ti gbanzingɔ Yezo Kristo ya, lo zia yengɔ e ma! Ta bɛ pɛnɔ, bere vundu, bere pɛnɔ mɛ azi ndohɛ̃ e ma! Ta bɛ gwɛ̃, bere yɛlɛ ma. Abɛ se e du na ya kwa, bere e kpili ko, ta alengbi ti gbanzingɔ Yezo Kristo ya, Io zia yengɔ e ma!

³⁶ E ndohũ pɛnɔ, nga ma se mɛ asu na ni ka ya Buku tɛ Nzapa ya: “Na lo tɛ mɔ Nzapa ko, azi ndogi kɔdɛ lá kɔi kɔi ya, ani ho e. Ala ndomu e ka lɛ la nga ma angasã ngbaga mɛ ala ndokpɔ.”

³⁷ Kanda na ya alo olo ko, e nwɔ apɛnɔ ni ko zu, na lo tɛ Yezo mɛ ndoye e.

³⁸ Mbi hĩnga nzɔ̃ni ya, ta ye kɔi alengbi ti gbanzingɔ Nzapa ya, lo zia yengɔ e ma: abɛ aho e, abɛ e du lɛ e ngɛ̃, abɛ nga atɔrɔ mɛ na nguru, ndole nga gbia ka lɛ ndozu ko, ta ye kɔi alengbi ti gbanzingɔ Nzapa ya, lo zia yengɔ e bɛ gbɔ ma. Ta bɛ nga aye ti ngoi olo, bere aye ti ngoi mɛ na gangɔ gbanda,

³⁹ bere aye mɛ ka lɛ ndozu, bere aye mɛ ka gbe sese, bere ambanga ye mɛ ndɛ̃ mɛ Nzapa ali ma. Ta ye kɔi agbanzi gbanda Nzapa ya, lo zia yengɔ e bɛ gbɔ ma. Yengɔ mɛ lo ye na e ko, lo fa ni ti ndo Gbia tɛ e Yezo Kristo.