Roma 7 - Fana Ngbangɔ 1987

Ta ndia adɛ na nguru ndo e ma

¹ Aya bua, ĩ pia ĩ hĩnga tɛnɛ mɛ mbi na tɛnɛngɔ hɛ̃ ĩ nzɔ̃ni, ta sanga ma, ĩ hĩnga ndia. Ndia ndodu na nguru na ndo zo bo na ngoi mɛ zo adɛ lɛ lo ngɛ̃.

² E mu nga ma ya, wali adu na kɔli. Ko ndia apa ya, na ngoi ko la kɔ lo adɛ lɛ lo ngɛ̃ ko, ta lo lengbi ti dungɔ na kɔli mɛ ndɛ̃ ma. Kanda se kɔ lo akpi hĩ, wa lo lengbi ti dungɔ na kɔli mɛ ndɛ̃.

³ Wa na ngoi ko la kɔ lo adɛ lɛ lo ngɛ̃, se lo du na kɔli mɛ ndɛ̃ ko, afa ya, lo ti kɔmbɛ. Kanda se kɔ lo akpi ko, ta ndia ti dɛ na nguru ndo lo ma, lo lengbi ti dungɔ na kɔli mɛ ndɛ̃, ko ta oko afa ya, lo ti kɔmbɛ ma.

⁴ Aya bua, se tɛ ĩ nga la. Ta ndia tɛ Mɔizɛ ti dɛ na nguru ndo ĩ ma. Adu nga ma ĩ kpili wɛ, na lo mɛ ya, ngoi mɛ ndo Yezo Kristo akpi ko, ĩ na lo ĩ kpili ndo kɔi. Na olo ko, ĩ ti azi tɛ Yezo Kristo mɛ ndo Nzapa aso lo na pɛ kwá, ya e na ĩ e li kwa mɛ nzɔ̃ni hɛ̃ Nzapa.

⁵ Ngoi mɛ ndo e ndodu nga ma se tɛ azi ti lɛ sese ko, e ndo na asiɔ gwɛ̃ ge gbe tɛrɛ e. Ndia ahɛ̃ ndo nguru hɛ̃ asiɔ gwɛ̃ ni, ko asiɔ gwɛ̃ ni ndoto e na ya kwá.

⁶ E ndo ambɛ ti tɔndɔngɔ ndia tɛ Mɔizɛ, kanda na olo ko, adu nga ma e kpili wɛ, ko ta e ti de ambɛ ti ndia ma. Na lo ni ko, ta e lengbi ti lingɔ kwa hɛ̃ Nzapa nga ma se ti ngbinani mɛ asu ka ya ndia ma, kanda ale e li kwa hɛ̃ lo nga ma se ti fanani mɛ Tɔrɔ Santo aha na e.

Gwɛ ti lingɔ siɔ ye

⁷ Wa tɛnɛ mɛ e ti e tɛnɛ nɛ? Ndia tɛ Mɔizɛ adu siɔ ye? Ipɔ, ta seni la ma! Kanda mbi hĩnga siɔ ye bo na lo ti ndia. Se ta ndia apa ndo ya: “Ta mɔ du na gwɛ̃ ye ma” ko, ale ta mbi hĩnga ya, dungɔ na gwɛ̃ ye adu siɔ ye ma.

⁸ Na lo ti ndia la gwɛ̃ siɔ ye agbɔ̃ mbi, ato mbi ya, mbi du na gwɛ̃ ye ndɛ̃ ndɛ̃ ndɛ̃. Se ta ndia adu ndo da ma ko, ale ta gwɛ̃ siɔ ye adu na nguru ndo zo ma.

⁹ Ndo gã ko, ta mbi hĩnga ndo ndia ma, ko mbi ndodu ndo nzɔ̃ du. Ko ngoi mɛ mbi hĩnga ndia ko, gwɛ̃ siɔ ye agbɔ̃ mbi,

¹⁰ aho mbi. Nzapa alu ndo ndia ya, e lua beta du na lo ni, kanda tɛ mbi ko, abi mbi ya kwá.

¹¹ Ta sanga ma, na lo ti ndia la gwɛ̃ siɔ ye agbɔ̃ mbi, ahanda mbi, aho mbi.

¹² Biani, ndia alo ka tɛ Nzapa, ndia ndofa zo na lingɔ ye na seni, ndia adu nga nzɔ̃ni.

¹³ Ko alengbi ya, na lo ti nzɔ̃ ye la mbi kpi kwá? Ipɔ, ta seni la ma! Kanda adu na lo ti lingɔ siɔ ye la mbi kpi kwá. Gwɛ̃ siɔ ye agbɔ̃ mbi na lo ti nzɔ̃ ye, ko mbi li siɔ ye, la siɔ ye aho mbi. Oko afa ya, siɔ ye adu siɔni buai. Ko na lo ti ndia ko, gwɛ̃ siɔ ye ati siɔni sĩ nvɛni.

Zo mɛ asiɔ ye ako ndo bɛ lo

¹⁴ E hĩnga ya, ndia alo ka tɛ Tɔrɔ Santo tɛ Nzapa, kanda mbi tɛ mbi gɛgɛrɛ zo, mbi ti mbɛ ti lingɔ siɔ ye.

¹⁵ Ta mbi ndohĩnga nda ye mɛ mbi ndoli ma. Ta sanga ma, ta mbi ndoli ye mɛ bɛ mbi aye lingɔ ma, kanda mbi ndoli ye mɛ bɛ mbi akɛ̃.

¹⁶ Wa se ta bɛ mbi aye ye mɛ mbi ndoli ma ko, afa ya, mbi hĩnga ya, ndia adu nzɔ̃ni.

¹⁷ Ko siɔ ye mɛ mbi ndoli ko, ta adu ya, mbi la mbi ndoli ni ma, kanda adu gwɛ̃ siɔ ye mɛ ge gbe tɛrɛ mbi la ndoto mbi ya, mbi li ni.

¹⁸ Ta sanga ma, mbi hĩnga ya, ta mbi na nzɔ̃ ye ge gbe tɛrɛ mbi ma. Mbi ndosepara lingɔ nzɔ̃ ye, ko abɛ nga so ko, ta mbi na nguru ti lingɔ ni ma.

¹⁹ Ta mbi ndoli nzɔ̃ ye mɛ mbi ye lingɔ ni ma, kanda mbi ndoli siɔ ye rnɛ bɛ mbi kɛ̃ lingɔ ni.

²⁰ Se mbi li ye mɛ ta bɛ mbi ndoye lingɔ ni ma ko, afa ya, ta mbi la mbi li ni ma, kanda adu siɔ ye mɛ ge gbe tɛrɛ mbi la ali ni.

²¹ La mbi hũ ya, ngoi mɛ mbi ndoye lingɔ nzɔ̃ ye ko, mbi ndoli bo siɔ ye.

²² Ge ya bɛ mbi nvɛni ko, bɛ mbi ndode na lo ti ndia tɛ Nzapa sĩ.

²³ Kanda mbi hũ ya, ge gbe tɛrɛ ko, gwɛ̃ ti lingɔ siɔ ye ndotiri to na dangɔ bɛ mɛ mbi na ni na ndo lingɔ nzɔ̃ ye. Gwɛ̃ ti lingɔ siɔ ye abi mbi mbɛ ti siɔ ye mɛ ge gbe tɛrɛ mbi.

^24-25 Na lo ni ko, dangɔ bɛ tɛ mbi ndoto mbi ya, mbi tɔndɔ ndia tɛ Nzapa, kanda gwɛ̃ ti tɛrɛ mbi ndoye bo ya, mbi li siɔ ye. Siɔ lo ati na mbi! Tɛrɛ mbi mɛ na gwɛ̃ ti lingɔ siɔ ye ndoto mbi ya kwá. Ko zo mɛ ahã gwɛ̃ siɔ ye ge gbe tɛrɛ mbi azi na? Nzapa la na hãngɔ ni zingɔ. Lo na hãngɔ ni na lo ye ko la Gbia tɛ e Yezo Kristo ali tɛrɛ mbi. Ko mbi gonda lo na lo ni.