Roma 6 - Fana Ngbangɔ 1987

E na Yezo e so kɔi

¹ Wa tɛnɛ mɛ e ti e tɛnɛ nɛ? Ale e ngbã bo na lingɔ siɔ ye, ya Nzapa ali nzɔ̃ bɛ gba hɛ̃ e?

² Ipɔ, ta seni la ma! E du nga ma awa kwáni mɛ tɛ la na lingɔ siɔ ye awɛ, ko kɔdɛ mɛ e ti e ngbã bo na lingɔ siɔ ye nɛ?

³ Ngoi mɛ ndo e zu e mu batisimɔ ko, e na Yezo Kristo e ti bo kɔi. Alengbi ya, e na lo e kpili ndo kɔi. Ta ĩ hĩnga so ma?

⁴ Batisimɔ mɛ e mu ko, adu nga ma e na lo e kpili, ahɔ nga e na lo kɔi ya, To e Nzapa aso nga e na pɛ kwá, nga ma se mɛ ndo lo so na Yezo Kristo na nguru tɛ lo ti ndima. Lo so ndo e ya, e mu sé du mɛ fanani.

⁵ Oko la e kpili nga ma Yezo Kristo, ko na lo ni e na lo e ti bo kɔi ko, Nzapa aso gbanda e, nga ma se mɛ ndo lo so na Yezo Kristo.

⁶ E hĩnga nzɔ̃ni ya, ngoi mɛ ndo Yezo Kristo akpi ka ndo krusi ko, du tɛ e ti gã akpi nga ya, siɔ gwɛ̃ ti tɛrɛ e akpi, ko ta e ti e du ambɛ ti lingɔ siɔ ye ma.

⁷ Ta sanga ma, zo ko la akpi wɛ ko, ta siɔ ye ti dɛ na nguru ndo lo ma.

⁸ Nga ma la e na Yezo e kpili kɔi ko, e hĩnga ya, e na lo e ti du nga gbanda lɛ e ngɛ̃.

⁹ Ta sanga ma, e hĩnga nga ya, Yezo Kristo aso na pɛ kwá, ko ta lo ti kpi gbanda ma. Ta kwá ti dɛ na nguru ndo lo ma.

¹⁰ Lo kpi ndo bo fani kɔi ti buai, so hãngɔ siɔ ye tɛ e azi, ko nga ma la lo ndodu lɛ lo ngɛ̃ na olo ko, lo ndodu lɛ lo ngɛ̃ ni so gondangɔ Nzapa.

¹¹ Se tɛ ĩ nga la. Ale ĩ mu tɛrɛ ĩ nga ma awa kwáni mɛ tɛ la na lingɔ siɔ ye awɛ, ko í mu nga tɛrɛ ĩ nga ma azi mɛ ndodu lɛ la ngɛ̃ so gondangɔ Nzapa, na lo mɛ ya, ĩ na Yezo Kristo ĩ ti bo kɔi.

¹² Na lo ni ko, ta ĩ ti ye ya, siɔ ye adu na nguru ndo ĩ, ko ĩ ye lo hɛ̃ gwɛ̃ ti tɛrɛ ĩ mɛ gbanda akpi ma.

¹³ Ta ĩ mu apɛnzɛ tɛrɛ ĩ ndɛ̃ ndɛ̃ ndɛ̃ ĩ li na siɔ ye ma. Kanda ale ĩ hɛ̃ tɛrɛ ĩ hɛ̃ Nzapa, na lo mɛ ya, ĩ du azi mɛ ĩ so na pɛ kwá, ko í hɛ̃ lo apɛnzɛ tɛrɛ ĩ zu so lingɔ na ye mɛ bɛtani.

¹⁴ Ta siɔ ye na nguru ndo ĩ ma, na lo mɛ ya, ta ĩ na gbe ti ndia ma, kanda ĩ du azi mɛ Nzapa ali nzɔ̃ bɛ hɛ̃ ĩ.

Ale ĩ li bɛta kwa

¹⁵ Wa sia? Nga ma la e du azi mɛ Nzapa ali nzɔ̃ bɛ hɛ̃ e, ta e nga na gbe ti ndia ma ko, e lengbi ti lingɔ siɔ ye? Ipɔ, ta seni la ma!

¹⁶ Ĩ hĩnga nzɔ̃ni ya, se ĩ hɛ̃ tɛrɛ ĩ hɛ̃ zo ya, ĩ ma nyɔ lo ko, afa ya, ĩ ti ambɛ tɛ zo ko la ĩ ndoma nyɔ lo. Se ĩ ti ambɛ ti siɔ ye ko, siɔ ye akpɔ ĩ, bere se ĩ ma nyɔ Nzapa ko, ĩ ti ambɛ tɛ lo, wa gbanda ko, lo mu ĩ ka lɛ lo ya, ĩ abɛta azi.

¹⁷ E gonda Nzapa, ta sanga ma, ndo uzu ko, ĩ ndo ambɛ ti lingɔ siɔ ye, kanda na olo, ĩ ndoma nyɔ Nzapa na be ĩ kɔi, ko ye mɛ aha na ĩ ko, ĩ ndoli ni na seni.

¹⁸ Nzapa ahã ĩ na ya siɔ ye ni azi, abi bɔrɔ tɛrɛ ĩ, ko ĩ ti ambɛ ti lingɔ ye mɛ bɛtani.

¹⁹ Mbi ndotɛnɛ tɛnɛ hɛ̃ ĩ, nga ma se mɛ azi ndotɛnɛ na tɛnɛ, na lo mɛ ya, kɔdɛ tɛ ĩ adu woni. Ndo uzu ko, ĩ hɛ̃ ndo tɛrɛ ĩ zu nga ma ambɛ ti lingɔ ye ti kamɛnɛ, nga so lingɔ siɔ ye, ko ĩ ndodu ndo yenge yenge. Ko se mɛ nga na olo, ale ĩ hɛ̃ tɛrɛ ĩ zu nga ma ambɛ ti lingɔ abɛta kwa ya, du tɛ ĩ adu nga bɛrɛni la.

²⁰ Ngoi mɛ ndo ĩ dɛ ambɛ ti lingɔ siɔ ye ko, ta alengbi ndo ti gbɔ̃ngɔ ĩ gbɔ̃ngɔ, wa ĩ li ye mɛ bɛtani ma.

²¹ Aye mɛ ndo ĩ ndoli ko, kamɛnɛ ni ndogbɔ̃ ĩ na olo, ko ye mɛ ĩ lua da nɛ? Aye ni ko ndobi zo na ya kwá!

²² Kanda na olo ko, Nzapa ahã ĩ na ya siɔ ye azi, abi bɔrɔ tɛrɛ ĩ, ko ĩ ti ambɛ ti lingɔ kwa hɛ̃ Nzapa. Ko ye mɛ ĩ lua la, du tɛ ĩ ati bɛrɛni, ko gbanda ngbĩi ko, ĩ lua du ti kaka.

²³ Ta sanga ma, mbana gɛrɛ mɛ zo ndolua na lingɔ siɔ ye la kwá, kanda kaye mɛ Nzapa ndoka hɛ̃ azi gɛgɛrɛ la du ti kaka. Ko lo hɛ̃ e du ti kaka ni, na lo mɛ ya, e na Gbia tɛ e Yezo Kristo e ti bo kɔi.