Roma 5 - Fana Ngbangɔ 1987

E na bɛ pii ka gbɛlɛ Nzapa

¹ Na lo ni ko, Nzapa amu e ka lɛ lo ya, e abɛta azi, na lo mɛ ya, e ye lo tɛ lo. Ko na olo ko, e na lo e ndodu na mangbingɔ, na lo ye ko la Gbia tɛ e Yezo Kristo ali tɛrɛ e.

² Yezo Kristo la azi lege ya, Nzapa ali nzɔ bɛ hɛ̃ e, na lo ti lo yengɔ tɛ e. Na olo ko, Nzapa ndoli nzɔ̃ bɛ hɛ̃ e. Ko e ndosaba, na lo mɛ ya, e ndolɛndɛrɛ ya, e nga na luangɔ ndima ka tɛ Nzapa.

³ Ta e ndosaba bo na lo ni ma, kanda abɛ nga na ya apɛnɔ mɛ e ndohũ ko, e ndosaba, ta sanga ma, e hĩnga ya, pɛnɔ ndokpengba na bɛ e.

⁴ Ko kpengba bɛ ndoli ya, e nwɔ tarangɔ bɛ, wadila e lɛndɛrɛ ye mɛ Nzapa ako kapa ni hɛ̃ e.

⁵ Ko se e lɛndɛrɛ ye ni ko, ta kamɛnɛ na gbɔ̃ngɔ e ma, ta sanga ma, Nzapa afa na e ya, ni ndoye e sĩ. Lo fa ni ti ndo Tɔrɔ Santo mɛ lo kpã na ya tɛrɛ e.

⁶ Ngoi mɛ ndo ta e de e lua nguru ma ko, Yezo Kristo akpi ndo so e asiɔ azi, na bi mɛ ndo Nzapa ako.

⁷ Adu kpengbani, ya zo aye ya, ni kpi kwá so beta zo. Zo alengbi bere ti yengɔ ya, ni kpi kwá so nzɔ̃ zo.

⁸ Ko Nzapa afa na e ya, ni ndoye e sĩ, na lo ko la, na ngoi ko ndo e dɛ awa lingɔ siɔ ye ko, Yezo Kristo akpi ndo so e.

⁹ Na lo kwá tɛ lo ko, Nzapa amu e ka lɛ lo na olo ya, e abɛta azi. Nda mɛ e hĩnga ya, Yezo Kristo aso gbanda e, so ngɔnzɔ agbɔ̃ Nzapa hɛ̃ e la.

¹⁰ E ndo awa kɛ̃ngɔ Nzapa, kanda lo tongbi ndo songo na popo tɛ e na lo, na lo kwá tɛ Nyi lo. Na lo ni ko, nga ma la lo tongbi songo na popo tɛ e na lo na olo ko, e hĩnga nzɔ̃ni ya, lo so e gbanda, na lo mɛ ya, Nyi lo aso na pɛ kwá.

¹¹ E ndosaba nga na lo tɛ Nzapa ti ndo Gbia tɛ e Yezo Kristo mɛ atongbi songo na olo na popo tɛ e na Nzapa.

Lo tɛ Adamu na Yezo Kristo

¹² Bo kɔli kɔi mɛ ili lo Adamu ndo la ato nda lingɔ siɔ ye ge lɛ sese, ko azi ndokpili na lo ti siɔ ye. Na lo ni ko, kwa ndokpɔ azi zu, na lo mɛ ya, ala zu ali siɔ ye.

¹³ Uzu ti Nzapa lungɔ ndia hɛ̃ azi ti ndo Mɔizɛ ko, siɔ ye ndo ge lɛ sese da, ko nga ma la ta ndia ndo da ma ko, ta Nzapa ndokpã ndo bɛ lo ndo asiɔ ye tɛ azi ma.

¹⁴ Kanda ato na ngoi tɛ Adamu, anɔ ngbĩi asi na ngoi tɛ Mɔizɛ, abɛ nga azi mɛ ndo ta ali siɔ ye nga ma se tɛ Adamu mɛ ndo akɛ̃ nyɔ Nzapa ma ko, kwá akpɔ ndo nga la. Adamu adu nga ma limɔ tɛ zo mɛ ndo na gangɔ.

¹⁵ Kanda ta nzɔ̃ ye mɛ Nzapa ndoli hɛ̃ azi gɛgɛrɛ alengbi na siɔ yɛ mɛ Adamu ali ma. Biani, azi gba ndokpili na lo siɔ ye tɛ zo kɔi, kanda nzɔ̃ bɛ tɛ Nzapa adu kotani buai. Ko nzɔ̃ ye mɛ ndo lo li hɛ̃ azi gba gɛgɛrɛ ti ndo zo kɔi ko, adu ngbondoni sĩ, ko zo ni la Yezo Kristo.

¹⁶ Ko nzɔ̃ ye mɛ Nzapa ndoli hɛ̃ azi ko, nda ni ndokɔ nzɔ̃ni, ko ta nzɔ̃ ye ni ndodu nga ma siɔ ye tɛ zo ko kɔi ma. Zo ko kɔi la ali ndo siɔ ye ko, Nzapa afa ndo ngbanga abi li lo na lo ni. Ko abɛ nga azi ali siɔ ye sĩ ko, Nzapa amu la ka lɛ lo ya, ala abɛta azi. Ko adu nzɔ̃ ye mɛ lo li hɛ̃ la gɛgɛrɛ.

¹⁷ Biani, zo kɔi ali ndo siɔ ye, la kwá ndokpɔ azi zu. Kanda na lo tɛ Yezo Kristo kɔi ko, e lua ye aɔ ndoni: azi zu mɛ Nzapa ndoli kota nzɔ̃ bɛ hɛ̃ la, ko lo ndomu nga la ya, ala abɛta azi ko, ala lua du ti kaka, ko ala lɛ gbanda gbia na lo tɛ Yezo Kristo.

¹⁸ Na lo ni, nga ma la Nzapa afa ngbanga abi li azi zu na lo siɔ ye mɛ ndo Adamu ali ko, se mɛ nga gbanda Nzapa azia fangɔ ngbanga tɛ azi ko zu na lo nzɔ̃ ye mɛ ndo Yezo Kristo ali, ko Nzapa ahɛ̃ la beta du la.

¹⁹ Nga ma se mɛ azi gba ati awa lingɔ siɔ ye, na lo tɛ zo kɔi mɛ ndo akɛ̃ nyɔ Nzapa ko, se mɛ nga gbanda Nzapa amu azi gba ka lɛ lo ya, ala abɛta azi, na lo tɛ zo kɔi mɛ ndo ama nyɔ Nzapa la.

²⁰ Nzapa alu ndo ndia ya, na lo ni ko, siɔ ye tɛ azi ati ma wo ma. Ko ndo ko la azi ali siɔ ye da sĩ ko, ndo mɛ nga Nzapa ali nzɔ̃ bɛ hɛ̃ azi da sĩ la.

²¹ Na lo ni ko, nga ma se mɛ ndo siɔ ye na nguru ti kpɔngɔ azi ko, se mɛ nga nzɔ̃ bɛ mɛ Nzapa ali hɛ̃ e na nguru ti lingɔ ya, Nzapa amu e ya, e abɛta azi la. Adu nga so ya e lua du ti kaka na lo ye ko la Gbia tɛ e Yezo Kristo ali tɛrɛ e.