Roma 4 - Fana Ngbangɔ 1987

Nda mɛ ndo Nzapa amu Abrahama ka lɛ lo ya lo bɛta zo

¹ Wa tɛnɛ mɛ e ti e tɛnɛ na lo tɛ kotara e Abrahama nɛ? Ye mɛ ndo lo lua so le sese olo nɛ?

² Se adu ya, Nzapa amu ndo Abrahama ya, lo bɛta zo na lo ti anzɔ̃ ye mɛ ndo Abrahama ali ko, ale Abrahama agonda ndo tɛrɛ lo na lo ni. Kanda ta lo lengbi ndo ti gondangɔ tɛrɛ lo na gbɛlɛ Nzapa ma.

³ Buku tɛ Nzapa apa ya: “Abrahama aye ndo lo tɛ Nzapa, ko na lo ni ko, Nzapa amu ndo lo ka lɛ lo ya, lo bɛta zo.”

⁴ Zo ko ndoli kwa ko, ale afuta lo na lo ti kwa mɛ lo li. Nwa ko la afuta na lo ko, ta adu ya, ahɛ̃ ni hɛ̃ lo gɛgɛrɛ ma. Kanda adu nwa mɛ ale ahɛ̃ lo.

⁵ Wa zo ko la ta ndoli kwa ma, kanda lo ye lo tɛ Nzapa mɛ ndomu asiɔ azi ka lɛ lo ya, ala abɛta azi ko, ye mɛ na singɔ na zo ni ko nɛ? Ye mɛ na singɔ na lo lo mɛ: Nzapa na mungɔ lo ya, lo bɛta zo na lo ti lo yengɔ tɛ lo.

⁶ Se tɛnɛ mɛ ndo Davidi atɛnɛ na lo tɛ azi mɛ ta Nzapa ndoba kwa mɛ ala ndoli ma la. Kanda Nzapa ndomu la ya, ala abɛta azi, ko dengɔ be ati na azi ni ko. Tɛnɛ mɛ ndo Davidi atɛnɛ lo mɛ:

⁷ “Dengɔ bɛ ati na azi ko la Nzapa aka lɛ lo ndo asiɔ ye tɛ la, Ahã nga siɔ ye tɛ la azi.

⁸ Dengɔ bɛ ati na azi ko la ta Nzapa akpã bɛ lo ndo asiɔ ye tɛ la ma!”

⁹ Dengɔ bɛ ni ko adu bo na lo tɛ azi mɛ afa la ganza? Ipɔ, dengɔ bɛ ni adu nga na lo tɛ awa popo! E pa fɛrɛ ya: “Nzapa amu ndo Abrahama ka lɛ lo ya, lo bɛta zo, na lo mɛ ya, Abrahama aye ndo lo tɛ lo.”

¹⁰ Nzapa amu ndo lo ya, lo bɛta zo, uzu ya afa lo ganza, bere na pɛ fangɔ lo ganza? Adu ndo uzu ya afa lo ganza, kanda ta adu ndo na pɛ fangɔ lo ganza ma.

¹¹ Afa ndo Abrahama ganza so fangɔ ya, Nzapa amu ndo lo ya, lo beta zo, na lo mɛ ya, lo ye ndo lo tɛ Nzapa uzu ti fangɔ lo ganza. Na lo ni ko, Abrahama adu kotara awa popo zu mɛ aye lo tɛ Nzapa, la Nzapa amu la ka le lo ya, ala abɛta azi.

¹² Lo nga kotara azi mɛ afa la ganza, azi mɛ ta ndokpã be la bo na ndo ganza mɛ afa na la ma, kanda azi mɛ ndoye lo tɛ Nzapa, nga ma se mɛ ndo kotara e Abrahama aye na lo tɛ lo, uzu ya afa lo ganza.

Nzapa ako kapa hɛ awa yengɔ lo tɛ lo

¹³ Nzapa ako ndo kapa hɛ̃ Abrahama na atara lo ya, ni na hɛ̃ngɔ la sese, ya ala ti anvɛ̃ ni. Ko ta lo ko ndo kapa ni hɛ̃ Abrahama, na lo mɛ ya, Abrahama atɔndɔ ndia ma, kanda adu na lo mɛ ya, Nzapa amu lo ka lɛ lo ya, lo bɛta zo, na lo ti lo yengɔ tɛ lo.

¹⁴ Se adu ya, bo awa tɔndɔngɔ ndia la Nzapa ahɛ̃ la sese ya, ala ti anvɛ̃ ni ko, ale lo yengɔ tɛ azi mɛ aye lo tɛ Nzapa adu gɛgɛrɛ, ale kapa mɛ ndo Nzapa ako adu nga gɛgɛrɛ.

¹⁵ Ta sanga ma, se ta azi atɔndɔ ndia ma ko, ngɔnzɔ agbɔ̃ Nzapa na lo ni. Ko ndo ko la ta ndia dazu ma ko, ta azi alengbi nga ti bingɔ ndia ma.

¹⁶ Na lo ni, kapa mɛ ndo Nzapa ako ko, lo ko ndo ni hɛ̃ awa yengɔ lo tɛ lo. Lo ko ndo ni hɛ̃ la so fangɔ ya, ni li nzɔ̃ bɛ hɛ̃ la gɛgɛrɛ, ko kapa ni adu na lo tɛ atara Abrahama zu. Ko ta kapa ni adu bo na lo tɛ azi mɛ ndotɔndɔ ndia ma, kanda adu nga na lo tɛ azi mɛ aye lo tɛ Nzapa, nga ma se tɛ Abrahama. Abrahama adu kotara e zu,

¹⁷ nga ma se mɛ asu ka ya Buku tɛ Nzapa ya: “Mbi kpã mɔ kotara ale tɛ azi sĩni.” Abrahama adu kotara e ka lɛ Nzapa, ko Abrahama ndoye ndo lo tɛ lo. Nzapa la ndoso azi na pɛ kwa, lo nga la lo ndoli aye mɛ ndo ta da uzu ma. Lo tɛnɛ bo tɛnɛ na nyɔ lo, la aye ni ko asi.

¹⁸ Abrahama ababa ndo bo yengɔ ya, Nzapa na hɛ̃ngɔ ni nyingambi. Ko abɛ ngoi ti lo dúngɔ nyi aɔ ndo wɛ ko, lo lɛndɛrɛ ndo kapa mɛ Nzapa ako hɛ̃ lo. Ko na lo ni ko, lo ti “kotara ale tɛ azi sĩni,” nga ma se mɛ ndo Nzapa apa na ni hɛ̃ lo ya: “Atara mɔ ati gbanda sĩni.”

¹⁹ Ngoi mɛ ndo Nzapa apa tɛnɛ ni ko hɛ̃ lo ko, lo ndo na buru nga ma ngbangbo kɔi, lo hĩnga ndo ya, ni ti bange wɛ, lo hĩnga ndo nga ya, ya ni Sara adu ta ngombo, ko abɛ nga so ko, ta lo ndonzɛ̃ ndo na yengɔ ya, Nzapa na hɛ̃ngɔ ni nyingambi ma.

²⁰ Lo ndoye ndo bo lo ni, ko ta lo de ndo kitɛ ti kapa mɛ ndo Nzapa ako hɛ̃ lo ma. Kanda lo yengɔ tɛ lo asa ndo nguru be lo, ko lo ndogonda ndo Nzapa.

²¹ Lo hĩnga ndo biani ya, Nzapa alengbi ti lingɔ ya, kapa ko ndo lo ko hɛ̃ ni na tingɔ na seni.

²² Nda mɛ ndo “Nzapa amu Abrahama ka lɛ lo ya, lo beta zo, na lo ti lo yengɔ tɛ lo” la.

²³ Ko tɛnɛ mɛ asu ka ya Buku tɛ Nzapa ya: “Nzapa amu ndo Abrahama ka lɛ lo ya, lo beta zo” ko, ta asu ni bo na lo tɛ lo kɔi ma.

²⁴ Kanda asu nga ni na lo tɛ e mɛ Nzapa amu e ka lɛ lo ya, e abɛta azi, e mɛ e ye lo tɛ lo mɛ ndo lo so Gbia tɛ e Yezo Kristo na pɛ kwá.

²⁵ Nzapa aka ndo Yezo ya, lo kpi na lo ti asiɔ ye tɛ e. Ko Nzapa aso ndo lo na pɛ kwá ya, ni Nzapa ni mu e ka lɛ ni ya, e abɛta azi.