Roma 3 - Fana Ngbangɔ 1987

¹ Wa ye mɛ Ayuda aɔ na azi mɛ ta Ayuda ma nɛ? Ko nda fangɔ ganza nga nɛ?

² Ayuda aɔ azi mɛ ta Ayuda ma na lege sĩni. Ti uzu, Nzapa azia ndo tɛnɛ tɛ lo na yamba ti Ayuda.

³ Wa nga ma la ambanga Ayuda aweza tɛnɛ ni ko, tɛnɛ mɛ e ti e tɛnɛ ndo ko nɛ? Oko afa ya, Nzapa nga na wezangɔ kapa mɛ ndo lo ko hɛ̃ la?

⁴ Ipɔ, ta seni la ma! Bɛ se azi zu adu awa nvɛnɛ ko, Nzapa alengbi tɛ lo ti lingɔ ye na seni, nga ma se mɛ asu na ni ka ya Buku tɛ lo ya: “Ale azi ahĩnga ya, tɛnɛ mɛ mɔ Nzapa, mɔ ndotɛnɛ ko, adu beta tɛnɛ. Ko se adu ya, atɛnɛ ngbanga tɛ mɔ ko, ale mɔ longa na ngbanga ni.”

⁵ Tɛnɛ mɛ mbi na tɛnɛngɔ ko, adu tɛnɛ mɛ azi ndotɛnɛ. Tɛnɛ ni lo mɛ: se adu ya, siɔ ye mɛ e ndoli afa ya, Nzapa ndoli ye na seni ko, tɛnɛ mɛ e ti e tɛnɛ ndo ko nɛ? E lengbi ti pangɔ ya, ta Nzapa ndoli ye na seni ma, na lo mɛ ya, lo ndohɛ̃ e etumbu?

⁶ Ipɔ, ta seni la ma! Ta sanga ma, se adu ya, ta Nzapa ndoli ye na seni ma ko, ale ta lo lengbi nga ti fangɔ ngbanga tɛ azi ti le sese ma.

⁷ Wa se siɔ ye mɛ e ndoli afa yango ya, Nzapa ndoli ye na seni, ko se azi agonda Nzapa na lo ni ko, nda mɛ Nzapa alengbi ti fangɔ ngbanga bingɔ li e ya, e awa lingɔ siɔ ye nɛ?

⁸ Nda mɛ ta e lengbi ti nɛngɔ ya: “E li siɔ ye, wadila ahũ ya, Nzapa nzɔ̃ni” ma nɛ? Ko ambanga azi mɛ aye karangɔ ló na ili mbi ndopa ya, mbi ndotɛnɛ gi tɛrɛ tɛnɛ ni ko. Ngbanga mɛ gbanda Nzapa afa abi li la, alengbi gbanda na la.

Ta bɛta zo kɔi dazu ma

⁹ E Ayuda e ɔ azi mɛ ta Ayuda ma? Ipɔ, ta seni la ma! Mbi pia fɛre mbi fa ya, e Ayuda na azi mɛ ta Ayuda ma e du kwe zu ambɛ ti siɔ ye.

¹⁰ Asu ka ya Buku tɛ Nzapa ya: “Ta bɛta zo dazu ma, ta bɛ zo kɔi da ma.

¹¹ Ta zo kɔi mɛ ahĩnga bɛta lo tɛ Nzapa dazu ma, Ta zo kɔi mɛ ndogi nga lege tɛ Nzapa dazu ma.

¹² Azi zu ayu lege tɛ Nzapa, ala zu agere. Ta zo mɛ wa lingɔ nzɔ̃ ye da ma, ta bɛ zo kɔi da ma.

¹³ Nyɔ la nga ma du sende mɛ angbã gaponi. Ala ndotɛnɛ tɛnɛ ti handangɔ na azi. Tɛnɛ mɛ ndolo ka nyɔ la ndosi ko, adu nga ma ngɔnzɔ tɛ ngbɔ.

¹⁴ Ala ndoguru azi sĩ.

¹⁵ Ti la ndoyapu na kpɔngɔ azi,

¹⁶ Na ndo kwɛ mɛ ala ndoɔ da ko, ala ndogbɛ̃gbɛ̃ azi, Ala ndohɛ̃ nga la pɛnɔ.

¹⁷ Ta ala ndodu na mangbingɔ na azi ma.

¹⁸ Ta ala ndokpɛ Nzapa be gbɔ ma.”

¹⁹ E hĩnga ya, ndia tɛ Nzapa atɛnɛ atɛnɛ ko zu hɛ̃ azi mɛ ndo Nzapa alu ndia hɛ̃ la. Nzapa ali nga so, so azi apa ya, ta ani hĩnga ndia ni ko ma. Lo li nga so ya, ngbanga mɛ gbanda ni fa ko, ati na azi ti lɛ sese zu.

²⁰ Ta sanga ma, ta Nzapa amu gbanda zo ya, lo beta zo, na lo mɛ ya, zo ni ko ali ye na se nyɔ ndia ma, kanda ndia ndofa bo zo na asiɔ ye mɛ lo ndoli.

Nzapa ndoso azi na lo ti lo yenga tɛ la

²¹ Na olo ko, Nzapa afa se mɛ lo ndomu na azi ka lɛ lo ya, ala abɛta azi, ko ta lo fa ni na lege ti ndia ma. Ko ndia tɛ Mɔizɛ na awa pangɔ nyɔ Nzapa aye ndo nga ya,

²² Nzapa ndomu azi ya, ala abɛta azi, na lo mɛ ya, ala ye lo tɛ Yezo Kristo. Ko azi zu ko ndoye lo tɛ Yezo Kristo ko, Nzapa ndomu la ya, ala abɛta azi, ta sanga ma, azi zu ka lɛ lo bo kwɛ kɔi.

²³ Azi zu ali siɔ ye, ko ta ala lengbi ti singɔ ya ndima ka tɛ Nzapa ma.

²⁴ Kanda na lo nzɔ̃ bɛ tɛ Nzapa ko, Nzapa amu la gɛgɛrɛ ya, ala abɛta azi, na lo mɛ ya, ala ye lo tɛ Yezo Kristo mɛ wa tɔ̃ngɔ la na ya siɔ ye.

²⁵ Nzapa aka ndo Yezo Kristo ya, na lo kwá tɛ lo ko, lo tiɔ sende ti siɔ ye tɛ azi mɛ aye lo tɛ lo. Wa ĩ ba se mɛ ndo Nzapa aye fangɔ ya, ni ndoli ye na Seni la. Ndo uzu ko, lo ndo na yɔngɔrɔ bɛ na ndo awa lingɔ siɔ ye, ko ta lo ndohɛ̃ ndo la etumbu ma.

²⁶ Kanda na olo, na lege ti kwá tɛ Nyi lo ko, lo fa ya ni ndoli ye na seni, ko ni mu nga azi ko la aye lo tɛ Yezo ya, ala abɛta azi.

²⁷ Na lo ni ko, nda mɛ zo alengbi ti yakɛngɔ tɛrɛ lo dazu? Ipɔ, ta nda ni dazu bɛ kɔi ma! Nda mɛ ta nda ni dazu ma nɛ? Adu na lo mɛ ya, Nzapa amu zo ya, lo bɛta zo, ta sanga ma, lo ye lo tɛ Yezo Kristo. Kanda ta lo ndomu zo ya, lo beta zo, na lo mɛ ya, lo ndotɔndɔ ndia ma. Ko ta nda mɛ zo alengbi ti yakɛngɔ na tɛrɛ lo dazu ma.

²⁸ Ta sanga ma, e hĩnga ya, Nzapa ndomu zo ya, lo beta zo, na lo mɛ ya, lo ye lo tɛ Yezo Kristo. Kanda ta adu na lo mɛ ya, lo ndotɔndɔ ndia ma.

²⁹ Nzapa adu bo Nzapa tɛ Ayuda kɔi? Azi mɛ ta Ayuda ma ko, ta lo nga Nzapa tɛ la ma? Biani, lo nga Nzapa tɛ la,

³⁰ na lo mɛ ya, Nzapa bo ngengereni kɔi. Lo mu gbanda Ayuda ya, ala abɛta azi, na lo mɛ ya, ala ye lo tɛ Yezo Kristo, ko lo mu nga gbanda azi mɛ ta Ayuda ma ya, ala abɛta azi, na lo mɛ ya, ala ye nga lo tɛ Yezo Kristo.

³¹ Ko oko afa ya, nga ma la e ye lo tɛ Yezo Kristo ko, e mu ndia nga ma gɛgɛrɛ ye? Ipɔ, ta seni la ma! Kanda e ye ya, nda ndia dazu.