Roma 2 - Fana Ngbangɔ 1987

Nzapa afa gbanda ngbanga tɛ azi na seni

¹ Mɔ zo ko la mɔ ndofa ngbanga tɛ afɔ̃ mɔ, bɛ se mɔ du na ko, ta Nzapa azia gbanda fangɔ ngbanga bingɔ li mɔ ma. Ta sanga ma, ngoi mɛ mɔ ndofa ngbanga tɛ afɔ̃ mɔ, ko mɔ ti ndoli bo gi tɛrɛ asiɔ ye mɛ ala ndoli nga ko, alengbi ya, mɔ fa ngbanga ni mɔ bi li mɔ nvɛni.

² E hĩnga ya, Nzapa ndoli ye na seni, la lo ndofa ngbanga tɛ azi mɛ ndoli gi tɛrɛ asiɔ ye ko.

³ Mɔ zo ko la mɔ ndofa ngbanga tɛ afɔ̃ mɔ mɛ ndoli asiɔ ye mɛ mɔ nvɛni mɔ ndoli nga ko, ta mɔ da bɛ mɔ ya, Nzapa azia gbanda fangɔ ngbanga, bingɔ li mɔ ma.

⁴ Ale ta mɔ zo mɔ samana na kota nzɔ̃ bɛ, na yɔngɔrɔ bɛ, nga na vundu mɛ Nzapa na ni na lo tɛ mɔ ma. Wa hĩnga ya, lo ndoli nzɔ̃ bɛ ni hɛ̃ mɔ ya, mɔ gbinya bɛ mɔ!

⁵ Kanda mɔ wa kpengba li, ko mɔ kɛ̃ gbinyangɔ bɛ mɔ. Na lo ni ko, adu nga ma mɔ ndohũnda Nzapa ya, na la ko gbanda lo de na ngɔnzɔ tɛ lo na ndo azi, lo fa nga na ngbanga tɛ la na seni ko, lo hɛ̃ mɔ etumbu mɛ kotani buai.

⁶ Ko na lá ni gbanda ko, lo hɛ̃ gbanda zo kɔi kɔi mbana gɛrɛ lo, alengbi na kwa mɛ lo li.

⁷ Azi ko la ndohɛ̃ tɛrɛ la so lingɔ nzɔ̃ ye, ndogi nga ya, Nzapa ahɛ̃ ani ndima, agonda ani, ahɛ̃ nga ani du mɛ ta ndowɛ ma ko, Nzapa ahɛ̃ gbanda la du ti kaka.

⁸ Azi ko la ndosaba tɛrɛ lo, ndokɛ̃ tɔndɔngɔ beta lo tɛ lo, ndoye bo lingɔ ye mɛ siɔni ko, ngɔnzɔ agbɔ̃ gbanda Nzapa hɛ̃ la, lo fa nga gbanda ngbanga lo bi li la.

⁹ Azi zu ko la ndoli siɔ ye ko, ala hũ gbanda pɛnɔ sĩ. Ayuda ahũ gbanda pɛnɔ uzu, wa azi mɛ ta Ayuda ma ahũ tɛ la pɛnɔ ni gesi.

¹⁰ Kanda azi zu ko la ndoli nzɔ̃ ye ko, Nzapa ahɛ̃ la gbanda ndima, lo gonda gbanda la, lo li nga gbanda ya, bɛ la adu piini. Lo li gbanda ni hɛ̃ Ayuda uzu, wa lo li nga hɛ̃ azi mɛ ta Ayuda ma gesi.

¹¹ Ta sanga ma, azi zu ka lɛ Nzapa bo kwɛ kɔi.

¹² Azi zu mɛ ta Ayuda ma, ta ala hĩnga nga ndia mɛ ndo Nzapa alu hɛ̃ Mɔizɛ ma, la ala ndoli siɔ ye ko, ala yu ndo we la, ko ta Nzapa afa gbanda ngbanga tɛ la na se nyɔ ndia ni ko ma. Kanda tɛ Ayuda zu ko la ahĩnga ndia ni, se ala li siɔ ye ko, Nzapa afa gbanda ngbanga tɛ la na se nyɔ ndia ni.

¹³ Ta sanga ma, azi mɛ Nzapa ndomu la ka lɛ lo ya, ala abɛta azi ko, ta ala ndoma bo tɛnɛ ti ndia na ma la kɔi ma, kanda ala ndotɔndɔ nga ndia.

¹⁴ Ngoi mɛ azi mɛ ndɛ̃ mɛ ta ahĩnga ndia tɛ Ayuda ma, atɔndɔ ndia ni na se bɛ la nvɛni ko, afa ya, abɛ nga ma la ta ala hĩnga ndia ni ma ko, ala lu ndia ni hɛ̃ tɛrɛ la nvɛni.

¹⁵ Oko afa nga ya, bɛ la afa la na lingɔ ye na se nyɔ ndia, ko dangɔ bɛ tɛ la ndofa nga la na ni. Ta sanga ma, na mbanga ngoi ko, ala ndoda bɛ la ya, ani li nzɔ̃ni, ko na mbanga ngoi mɛ ndɛ̃ nga ko, ala ndoda bɛ la ya, ani li siɔni.

¹⁶ Oko asi gbanda yango na lá ko gbanda Nzapa ato Yezo Kristo ya, lo fa ngbanga tɛ azi na lo ti alo zu mɛ ala hɔndɛ ka ya bɛ la, nga ma se mɛ Nzɔ̃ Pa mɛ mbi ndopa ndotɛnɛ na ni.

Ayuda abi ndia tɛ Mɔizɛ

¹⁷ Wa mɔ ndopa ya, mɔ wa Yuda, mɔ ndokpã bɛ mɔ bo na ndo ndia tɛ Mɔizɛ, mɔ ndogonda tɛrɛ mɔ ya, mɔ zo tɛ Nzapa.

¹⁸ Mɔ hĩnga ye mɛ Nzapa ndoye, ko ndia tɛ Mɔizɛ afa mɔ na lege ti hĩngangɔ ye mɛ nzɔ̃ni na omɛ siɔni.

¹⁹ Mɔ ndomu tɛrɛ mɔ ya, mɔ wa fangɔ awa ziba na lege, mɔ wa vurungɔ na ndo hɛ̃ azi mɛ ka ya mbingo.

²⁰ Mɔ wa fangɔ ye na azi mɛ ta ahĩnga ye kɔi ma, mɔ wa hangɔ lo na azi mɛ ta le la adɛ azi na lege tɛ Nzapa ma. Mɔ ndopa ya, mɔ hĩnga ye zu, na lo mɛ ya, mɔ hĩnga ndia tɛ Mɔizɛ, ndia ni afa nga mɔ na beta lo.

²¹ Wa mɔ mɛ mɔ ndoha afɔ̃ mɔ na lo ko, nda mɛ ta mɔ ndoha tɛrɛ mɔ nvɛni na ni ma nɛ?

²² Mɔ mɛ mɔ ndopa ya, ale ta azi ati kɔmbɛ ma, ko nda mɛ mɔ ndoti kɔmbɛ nɛ? Mɔ mɛ mɔ ndokɛ̃ angbilondo ka ka ka ko, nda mɛ mɔ ndonzĩ ye mɛ akpa ka ya da tɔrɔ nɛ?

²³ Mɔ ndogonda tɛrɛ mɔ ya, mɔ hĩnga ndia, kanda mɔ ndosa kamɛnɛ le Nzapa na ngoi mɛ mɔ ndobi ndia!

²⁴ Adu nga ma se mɛ asu na ni ka ya Buku tɛ Nzapa ya: “Bu tɛ ĩ Ayuda ma ko, ale ta apaganɔ ndoguru Nzapa ma.”

²⁵ Se mɔ fa ganza, mɔ tɔndɔ nga ndia ko, ganza mɛ mɔ fa adu nzɔ̃ni na lo tɛ mɔ. Kanda se mɔ bi ndia ko, adu nga ma ta mɔ fa ganza ma.

²⁶ Wa se wa popo atɔndɔ ndia ko, Nzapa na mungɔ lo nga ma lo fa ganza!

²⁷ Mɔ wa Yuda, mɔ hĩnga ndia mɛ asu ka ya mbɛti, afa nga mɔ ganza, abɛ nga so ko, wa popo mɛ ndotɔndɔ ndia afa gbanda na mɔ ya, ngbanga ati na mɔ.

^28-29 Bɛta wa Yuda la na? Beta wa Yuda adu zo mɛ lo du wa Yuda ka ya bɛ lo. Ta beta wa Yuda la zo mɛ azi ndohũ lo ya, lo wa Yuda ma. Beta fangɔ ganza adu kwa mɛ Tɔrɔ Santo ndoli ka ya bɛ zo. Ta ndia mɛ asu sungɔ ndoli ye kɔi na lo ni ma. Ta fangɔ popo la adu beta ganza ma. Nzapa la ndogonda gi tɛrɛ beta wa Yuda ni ko, kanda ta adu azi ma.