Roma 16 - Fana Ngbangɔ 1987

Polo abala azi ndɛ ndĩ ndɛ

¹ Mbi Pa hɛ̃ ĩ ya, nyita e wa Kristo ti wali mɛ ili lo la Fobe ko, lo beta zo. Lo ndoli kwa tɛ Nzapa ka kɔdɔrɔ ti Sanserea.

² Ngoi mɛ gbanda lo si ka tɛ ĩ ko, í yamba lo, na lo mɛ ya, lo zo tɛ Gbia. Ale ĩ yamba lo nga ma se mɛ azi tɛ Nzapa alengbi ti yambangɔ na afɔ̃ la, ĩ za lo na ye zu mɛ lo zanga. Ta sanga ma, lo za ndo azi gba, lo za ndo nga mbi nvɛni.

³ Ĩ bala hɛ̃ mbi Prisiyɛ na kɔ lo Akilasi. Mbi na la e ndoli ndo kwa hɛ̃ Yezo Kristo.

⁴ Kwá alu ndo la na ngoi mɛ ndo ala so mbi. Ta bo mbi kɔi la mbi ndohɛ̃ la sia kɔli ma, kanda awa Kristo zu mɛ ta Ayuda ma ndohɛ̃ nga la sia kɔli.

⁵ Ĩ bala nga hɛ̃ mbi awa Kristo mɛ ndobombi tɛrɛ la ka ya da tɛ Prisiyɛ na Akilasi so vɔrɔngɔ Nzapa. Ĩ bala hɛ̃ mbi Epainɛtɛ, kwa mbi ti kpɔ̃ bɛ mbi mɛ ndo aye lo tɛ Yezo Kristo kɔzoni ka sese ti Azia.

⁶ Ĩ bala hɛ̃ mbi Maria mɛ ndo ali hɛ̃ ĩ kwa sĩ.

⁷ Ĩ bala hɛ̃ mbi Andronikusí na Yuniasi mɛ asongo mbi, mbi na la ndo ka ya bɔlɔkɔ. Na popo tɛ awa pangɔ kwa tɛ Yezo ko, andogonda la sĩ, ala ti ndo nga awa Kristo uzu tɛ mbi.

⁸ Ĩ bala hɛ̃ mbi Ampliatusi, kwa mbi ti kpɔ̃ bɛ mbi mɛ e na lo e du azi tɛ Gbia.

⁹ Ĩ bala hɛ̃ mbi Urbano mɛ e na lo e ndoli kwa tɛ Yezo Kristo. Ĩ bala nga hɛ̃ mbi Stakisi mɛ nga kwa mbi ti kpɔ̃ bɛ mbi.

¹⁰ Ĩ bala hɛ̃ mbi Apɛlɛsi mɛ ndo afa ya, ni beta zo tɛ Yezo Kristo. Ĩ bala hɛ̃ mbi azi ti nda se wa tɛ Aristobulɛ.

¹¹ Ĩ bala hɛ̃ mbi songo mbi Erodiona. Azi mɛ aye lo tɛ Gbia, ala ndodu nga ka nda se wa tɛ Narsisɛ ko, ĩ bala la hɛ̃ mbi.

¹² Ĩ bala hɛ̃ mbi Trifɛnɛ na Trifozɛ mɛ ndoli kwa hɛ̃ Gbia, ĩ bala hɛ̃ mbi Pɛrzidɛ, kwa mbi ti wali mɛ mbi ndoye lo sĩ, lo ndoli ndo kwa hɛ̃ Gbia sĩ.

¹³ Ĩ bala hɛ̃ mbi Rufusi mɛ lo kpengba wa kwa tɛ Gbia, ĩ bala ta lo mɛ mbi ndomu lo nga ma ta mbi.

¹⁴ Ĩ bala hɛ̃ mbi Asinkritɛ, na Elegona, na Ɛrmɛsi, na Patrobasi, na Ɛrmasi, nga na ayata e awa Kristo mɛ ndɛ̃ mɛ ana la ndodu ndoni kɔi.

¹⁵ Ĩ bala hɛ̃ mbi Eilɔlɔgɛ na Yulia, na Nerea na nyita lo ti wali, na Olimpasi, nga na azi tɛ Nzapa zu mɛ ana la ndodu ndoni kɔi.

¹⁶ Ĩ balangbi nga tɛrɛ ĩ nzɔ̃ni na se tɛ awa Kristo. Azi ti Eklezia tɛ Yezo Kristo mɛ ge zu abala nga ĩ.

Polo atisa awa Kristo ti Roma ti ndangbani

¹⁷ Aya bua, mbi gbɔ̃ gɛrɛ ĩ ya, ĩ du na kpengba le na ndo azi ko la ndokɛ̃ alo mɛ ndo aha na ĩ. Na lo ni ko, ala ndokangbi popo tɛ azi, ala ndoto nga awa Kristo na siɔ lege. Ko ale ĩ du yɔngɔrɔni na la,

¹⁸ ta sanga ma, ta gi tɛrɛ azi ni ko ndoli kwa hɛ̃ Gbia tɛ e Yezo Kristo ma, kanda ala ndoli ye mɛ ndode bɛ la nvɛni! Ala ndotɛnɛ anzɔ̃nzɔ̃ tɛnɛ, ala ndokara nga azi na tɛnɛ lɛkpɛ lɛkpɛ so handangɔ azi mɛ ta lɛ la azi ma.

¹⁹ Azi zu ahĩnga ya, ĩ ndoma nyɔ Gbia. Bɛ mbi ndode sĩ na lo tɛ ĩ, ko mbi ndosepara ya, ĩ du na ndara so lingɔ nzɔ̃ ye, ko ĩ́ du nga na vuru bɛ so kɛ̃ngɔ siɔ ye.

²⁰ Nzapa mɛ ndoli ya, bɛ azi adu pii ko, lo na nwɔngɔ Satana hiɔ, kpãngɔ lo na gbe gɛrɛ ĩ. Gbia tɛ e Yezo Kristo ali bɛ nzɔ̃ bɛ hɛ̃ ĩ ma ke!

²¹ Timɔte mɛ e na lo e ndoli kwa ndoni kɔi abala ĩ. Lukiusi, na Yazona, nga na Sosipatɛrɛ mɛ asongo mbi abala nga ĩ.

²² Mbi Tɛrtiusi mɛ wa sungɔ mbɛti olo, mbi bala ĩ na ili Gbia Yezo Kristo.

²³ Gayusi mɛ mbi ndola ge tɛ lo abala ĩ. Lo la azi tɛ Nzapa zu ndobombi tɛrɛ la ka tɛ lo so vɔrɔngɔ Nzapa. Erastɛ wa batangɔ faranga ti kɔdɔrɔ, nga na nyita e Kwartusi mɛ wa Kristo abala ĩ. [

²⁴ Gbia tɛ e Yezo Kristo ali bɛ nzɔ̃ bɛ hɛ̃ ĩ zu ma ke! Seni la.]

Polo agonda Nzapa

²⁵ E gonda Nzapa! Lo na nguru ti kpengbangɔ na lo yengɔ tɛ ĩ, ko se mɛ Nzɔ̃ Pa tɛ Yezo Kristo mɛ mbi ndopa hɛ̃ azi ndopa nga na ni la. Ndo gã ko, Nzapa ahɔndɛ ndo Nzɔ̃ Pa ni na azi,

²⁶ ko na olo ko, abuku mɛ ndo awa pangɔ nyɔ Nzapa asu, afa Nzɔ̃ Pa ni yango. Ko Nzapa mɛ lo kaka ahɛ̃ nyɔ ya, apa Nzɔ̃ Pa ni hɛ̃ azi ti le sese zu, wadila ala ye lo tɛ Yezo Kristo, ko ala ma nga nyɔ mɛ ni hɛ̃.

²⁷ É gonda Nzapa mɛ bo lo kɔi la wa ndara! E gonda lo buru na buru na lo tɛ Yezo Kristo! Seni la.