Roma 15 - Fana Ngbangɔ 1987

Ale e li ye mɛ ndode bɛ afɔ̃ e

¹ E mɛ e kpengba na ya lo yengɔ lo tɛ Nzapa ko, ale e ndoza azi mɛ ta adɛ akpengba na ya ni ma. Ale ta e ndoli nga ye mɛ ndode bɛ e nvɛni ma.

² Ale zo kɔi kɔi na popo tɛ e ali ye ya bɛ fɔ̃ ni ade, aza fɔ̃ lo, akpengba nga na lo yengɔ tɛ lo.

³ Ta sanga ma, ta Kristo agi ndo ye mɛ ndode bɛ lo nvɛni ma. Ló mɛ ndo asi na lo ko, adu nga ma se mɛ asu na ni ka ya Buku tɛ Nzapa ya: “Gu mɛ ndo azi ndoguru na mɔ Nzapa ko, gu ni aminya na li mbi.”

⁴ Atɛnɛ zu mɛ asu ka ya Buku tɛ Nzapa gã ko, asu ni ya, tɛnɛ ni aha e na ló, wadila e lɛndɛrɛ Nzapa. Ta sanga ma, atɛnɛ ti ya Buku tɛ Nzapa ndosa nguru bɛ zo, ko atɛnɛ ni ndoli nga ya, zo agbe bɛ lo.

⁵ Nzapa mɛ ndosa nguru bɛ azi, lo mɛ lo ndoli nga ya, azi agbe bɛ la ko, lo li bɛ ya, nyɔ ĩ na nyɔ afɔ̃ ĩ ase kɔi, nga ma se mɛ Yezo Kristo aye na ni ma ke!

⁶ Lo li bɛ ya, ĩ du nga so, wadila ĩ zu ĩ gonda Nzapa mɛ To Gbia tɛ e Yezo Kristo na nyɔ ĩ kɔi ma ke!

Azi mɛ ta Ayuda ma agonda Nzapa

⁷ Na lo ni ko, ale ĩ ndoyamba afɔ̃ ĩ, nga ma se mɛ ndo Yezo Kristo ayamba na ĩ. Ale ĩ ndoyamba la, wadila azi agonda Nzapa.

⁸ Ta sanga ma, mbi pa hɛ̃ ĩ ti biani ya, Yezo Kristo aga ndo ati wa lingɔ kwa hɛ̃ e Ayuda ya, kapa mɛ ndo Nzapa ako hɛ̃ akɔzo akotara e ati na seni. Ko na lo ni ko, lo ndofa ya, ta Nzapa ndoweza kapa mɛ lo ndoko ma.

⁹ Lo ga ndo nga ya, azi mɛ ta Ayuda ma agonda Nzapa na lo ti nzɔ̃ bɛ mɛ Nzapa ndoli hɛ̃ la, nga ma se mɛ asu na ni ka ya Buku tɛ Nzapa ya: “Nda mɛ mbi na gondangɔ mɔ na popo tɛ azi mɛ ta Ayuda ma, Ko mbi nga na yengɔ bia hɛ̃ mɔ la.”

¹⁰ Asu nga ka ya Buku tɛ Nzapa ya: “Ĩ azi mɛ ta ĩ Ayuda ma ko, Ale ĩ saba ndoni kɔi na azi mɛ Nzapa asara la akpã azi tɛ lo!”

¹¹ Asu nga na ndo mɛ ndɛ̃ ya: “Ĩ azi zu mɛ ta ĩ Ayuda ma ko, Ale ĩ gonda Gbia Nzapa. Wa azi zu agonda bɛ lo ma ke!”

¹² Ezai apa ndo nga ya: “Mbanga tara Izai aga gbanda So lɛngɔ gbia na ndo azi mɛ ta Ayuda ma, Ko ala lɛndɛrɛ gbanda lo.”

¹³ Nzapa mɛ ndoli ya, e lɛndɛrɛ ni ko, lo li bɛ ya, bɛ ĩ ade zɔgɔrɔ ma ke! Lo li bɛ nga ya, ĩ lua bɛ pii aɔ ndoni, na lo mɛ ya, ĩ ye lo tɛ lo ma ke! Lo li bɛ so ya, na lo nguru tɛ Tɔrɔ Santo ko, ĩ lɛndɛrɛ lo kpengbani ma ke!

Polo atɛnɛ tɛnɛ ti kwa mɛ lo li

¹⁴ Aya bua, tɛ mbi ko, mbi hĩnga nzɔ̃ni ya, ĩ ndoli anzɔ̃ ye sĩ. Mbi hĩnga ya, ĩ hĩnga alo zu mɛ ĩ lengbi ti hĩngangɔ ni. Mbi hĩnga nga ya, ĩ lengbi nga ti wangɔ afɔ̃ ĩ.

¹⁵ Abɛ nga so, na ambanga ndo ti ya mbɛti olo ko, mbi su tɛnɛ da na kpengba bɛ ya, mbi da bɛ ĩ na tɛnɛ mɛ ndo ĩ ma uzu. Mbi su tɛnɛ ni nga so na lo ti nzɔ̃ bɛ mɛ Nzapa ali hɛ̃ mbi,

¹⁶ ya mbi du wa kwa tɛ Yezo Kristo, ko mbi za nga azi mɛ ta Ayuda ma. Mbi hɛ̃ tɛrɛ mbi zu hɛ̃ Nzapa so hangɔ Nzɔ̃ Pa tɛ lo ya, azi mɛ ta Ayuda ma ati azi tɛ Nzapa na nguru tɛ Tɔrɔ Santo, ati nga ma ye mɛ alu na Nzapa, ko andode nga bɛ lo.

¹⁷ Nga ma la e na Yezo Kristo e ti bo kɔi ko, mbi lengbi ti gondangɔ tɛrɛ mbi na lo ti kwa mɛ mbi ndoli hɛ̃ Nzapa.

¹⁸ Se mbi ye tɛnɛngɔ tɛnɛ ko, tɛnɛ mɛ mbi lengbi ti tɛnɛngɔ bo la tɛnɛ ti kwa mɛ Yezo Kristo ali ti ndo mbi, ya mbi ili azi mɛ ta Ayuda ma ya, ala ma nyɔ Nzapa. Lo li kwa ni na lege ti tɛnɛ mɛ ndo mbi tɛnɛ, nga na lege ti ye mɛ ndo mbi li.

¹⁹ Lo li nga ni na lege ti akukuna ye, na lege ti aye ti kpɛnɛ mɛ ndo mbi li, nga na lo nguru tɛ Tɔrɔ Santo. Na lo ni la mbi pa Nzɔ̃ Pa tɛ Yezo Kristo na ndo kwe zu, ato ka Yeruzalɛmɛ ngbĩi asi ka sese ti Iliria.

²⁰ Kanda mbi ye pangɔ Nzɔ̃ Pa ni bo na ndo mɛ ta azi ade ama pa tɛ Yezo Kristo da ma. Mbi li so, ya ta zo anɛ ya, mbi wa da na ndo gu gɛrɛ da mɛ zo mɛ ndɛ̃ akpã ma,

²¹ nga ma se mɛ asu na ni ka ya Buku tɛ Nzapa ya: “Azi mɛ ndo ta apa pa tɛ lo hɛ̃ la ma ko, ala hũ gbanda lo. Azi mɛ ndo ta ama tɛnɛ tɛ lo ma ko, ala hĩnga gbanda nda tɛnɛ tɛ lo.”

Polo atɛnɛ tɛnɛ ti gwengɔ fɔnɔ ka kɔdɔrɔ ti Roma

²² Ye mɛ ndo ndogbanzi mbi fani sĩni ya, ta mbi nɔ ka tɛ ĩ ma la.

²³ Aɔ buru gba ko, mbi ndosepara ya, mbi ga mbi ba ĩ. Ko na olo ko, mbi kɔ nda kwa tɛ mbi mɛ ge lɛ sese olo,

²⁴ ko mbi ye ya, na ngoi mɛ mbi ga so gwengɔ ka sese ti Ɛspania, wa mbi ga mbi ba ĩ. Mbi ndolɛndɛrɛ ya, na ngoi mɛ mbi ga so ɔngɔ ko, mbi la ka tɛ ĩ bi yakere, wadila tɛrɛ mbi ati da, wa so pɛni, ĩ za mbi na gwengɔ fɔnɔ tɛ mbi ka Ɛspania.

²⁵ Kanda na olo ko, mbi gwe ka Yeruzalɛmɛ so zangɔ azi tɛ Nzapa mɛ kai na faranga mɛ ato hɛ̃ la.

²⁶ Ta sanga ma, awa Kristo ti Masedoanɛ na ti Grɛsɛ aye ndo ya, ani sɔrɔ faranga, ani za na awa Kristo mɛ awa yɛlɛ ka Yeruzalɛmɛ.

²⁷ Ala sɔrɔ ndo faranga ni na be la nvɛni, ko ti biani ko, ala lengbi ndo ti zangɔ awa Kristo ti Yeruzalɛmɛ na faranga ni. Ta sanga ma, awa Kristo ti Yeruzalɛmɛ mɛ awa Yuda aza ndo azi mɛ ta Ayuda ma, ya ala lua anzɔ̃ ye tɛ Nzapa. Ko ale azi mɛ ta Ayuda ma aza nga Ayuda na aye ti tise.

²⁸ Ngoi mɛ gbanda mbi kɔ nda kwa ti hɛ̃ngɔ faranga mɛ asɔrɔ hɛ̃ awa Kristo ti Yeruzalɛmɛ, wa mbi si ka tɛ ĩ na gwengɔ mbi ka Ɛspania.

²⁹ Ko mbi hĩnga ya, ngoi mɛ gbanda mbi si ka tɛ ĩ ko, Yezo Kristo asunu gbanda ĩ sĩ.

³⁰ Aya bua, na ili Gbia Yezo Kristo, nga na lo ti yengbingɔ mɛ Tɔrɔ Santo ndoli ya, e yengbi ko, mbi gbɔ̃ gɛrɛ ĩ ya, e na ĩ é sambela Nzapa ndoni kɔi na lo tɛ mbi, é sambela lo na be e kɔi,

³¹ so azi ti Yudea mɛ ta aye lo tɛ Yezo Kristo ma ahɛ̃ mbi pɛnɔ. Ale ĩ sambela nga Nzapa ya, bɛ azi tɛ lo mɛ ka Yeruzalɛmɛ ade na lo ye mɛ mbi na nɔngɔ na ni hɛ̃ la,

³² wadila se lo ye ko, mbi si ka tɛ ĩ na dengɔ bɛ, ko mbi wɔ nga tɛrɛ mbi nzɔ̃ni ka tɛ ĩ.

³³ Nzapa mɛ ndoli ya, bɛ azi adu pii ko, lo du bɛ ndoni kɔi na ĩ zu ma ke! Seni la.