Roma 14 - Fana Ngbangɔ 1987

Ta ĩ fa ngbanga tɛ afɔ̃ ĩ ma

¹ Zo ko la ta lo yengɔ lo tɛ Yezo ali bɛ lo kpa ma ko, ale ĩ yamba lo, ta ĩ di lo na ya dangɔ bɛ mɛ lo na ni ma.

² E mu nga ma ya, mbanga zo aye ya, ni lengbi ti tɛngɔ ye zu, ko zo mɛ ndɛ̃ mɛ ta lo yengɔ lo tɛ Yezo ali bɛ lo kpa ma, aye tɛ lo ya, ta ni lengbi ti tɛngɔ sa ma.

³ Zo ko la ndotɛ ye zu ko, ale ta lo samana na zo ko la akɛ̃ tɛngɔ ambanga tɛ ma. Ko zo ko la ta ndotɛ ye zu ma ko, ale ta lo fa ngbanga tɛ zo ko la ndotɛ ye zu ma, na lo mɛ ya, Nzapa ayamba nga wa tɛngɔ ye zu.

⁴ Mɔ mɛ mɔ ndofa ngbanga tɛ wa kwa tɛ fɔ̃ mɔ ko, mɔ tɛ mɔ na? Se wa kwa tɛ fɔ̃ mɔ ali kwa tɛ lo siɔni, bere se lo li ni nzɔ̃ni ko, aba bo gbia tɛ lo kɔi. Ko wa kwa ni bo na lingɔ ni nzɔ̃ni, ta sanga ma, Gbia na nguru ti zangɔ lo ya, ta lo li ni siɔni ma.

⁵ Mbanga zo ndoda bɛ lo ya, ambanga bi adu ngbondoni aɔ abi mɛ ndɛ̃, ko zo mɛ ndɛ̃ ndoda tɛ lo bɛ lo ya, abi zu bo kwɛ kɔi. Ko ale zo kɔi kɔi ahĩnga bo ya, dangɔ bɛ tɛ ni adu nzɔ̃ni.

⁶ Zo ko la ndoda bɛ lo ya, ambanga bi adu ngbondoni aɔ abi mɛ ndɛ̃ ko, zo ni ko ndoli so, so gondangɔ Gbia Nzapa. Zo ko la ndotɛ ye zu ko, zo ni ko ndoli so, so gondangɔ Gbia Nzapa, ta sanga ma, lo ndohɛ̃ sia kɔli hɛ̃ Nzapa na lo ti tɛ mɛ lo ndotɛ. Zo ko la akɛ̃ tɛngɔ ye zu ko, zo ni ko ndoli so, so gondangɔ Gbia Nzapa, ko lo ndohɛ̃ nga sia kɔli hɛ̃ Nzapa.

⁷ Ta zo kɔi na popo tɛ e ndodu lɛ lo ngɛ̃ na lo tɛ lo nvɛni ma, ta zo kɔi na popo tɛ e ndokpi nga kwa na lo tɛ lo nvɛni ma.

⁸ Dungɔ lɛ ngɛ̃ mɛ e ndodu ko, e ndodu so gondangɔ Gbia Yezo, ko kwá mɛ e ndokpili ko, e ndokpili so gondangɔ Gbia Yezo. Wa se e du lɛ e ngɛ̃, bere se e kpili ko, e bo azi tɛ Gbia Yezo.

⁹ Ta sanga ma, Yezo Kristo akpi ndo, ko lo so ya, ni du Gbia tɛ awa kwáni nga na tɛ azi mɛ ade lɛ la ngɛ̃.

¹⁰ Wa mɔ, ta mɔ fa ngbanga tɛ nyita mɔ wa Kristo ma! Na mɔ nga, ta mɔ samana na nyita mɔ wa Kristo ma! E zu e si gbanda ka gbɛlɛ Nzapa ya, lo fa ngbanga tɛ e.

¹¹ Ta sanga ma, asu ka ya Buku tɛ Nzapa ya, Nzapa apa ya: “Ti beta tɛnɛ ko, azi zu aga gbanda akuku gbɛlɛ mbi Gbia Nzapa so gondangɔ mbi. Ko ala zu apa gbanda yango ya, mbi Nzapa.”

¹² Na lo ni ko, zo kɔi kɔi na popo tɛ e akambisa gbanda nyɔ lo nvɛni ka gbɛlɛ Nzapa.

Ta ĩ li ya ayata ĩ awa Kristo ali siɔ ye ma

¹³ Wa e zia fangɔ ngbanga tɛ afɔ̃ e awa Kristo. Kanda ale ĩ pa ka ya bɛ ĩ ya, ta ĩ li ye ya, na lo ni ko, nyita ĩ wa Kristo ata li gɛrɛ lo, ko lo li siɔ ye ma.

¹⁴ Nga ma la mbi e na Gbia Yezo e ti bo kɔi ko, mbi hĩnga nzɔ̃ni nvɛni ya, ta mbanga tɛ kɔi mɛ siɔni da ma. Kanda se zo ada bɛ lo ya, mbanga tɛ kɔi adu siɔni, wa se lo ti tɛ ni ko, afa ya, lo li siɔni.

¹⁵ Se mɔ gia bɛ ayata mɔ awa Kristo na lo ti tɛ mɛ mɔ ndotɛ ko, afa ya, ta mɔ ti ndoye la ma. Yezo Kristo akpi ndo so la, ko ale ta mɔ li ya, ala yu ndo bo na lo ti tɛ mɛ mɔ ndotɛ ma!

¹⁶ Ye mɛ mɔ ndohũ ka lɛ mɔ ya, adu nzɔ̃ni, wa se mɔ hĩnga ya, ngoi ko la mɔ li ni, ko azi mɛ ndɛ̃ na tɛnengɔ ya, adu siɔni ko, ale mɔ zia ni.

¹⁷ Ta sanga ma, ta lo Lɛngɔ Gbia tɛ Nzapa aba tɛngɔ ye, bere nyɔngɔ ye ma, kanda aba aye mɛ Tɔrɔ Santo ndohɛ̃ e. Aye ni lo mɛ: lingɔ ye na seni, dungɔ na mangbingɔ, nga na dungɔ na dengɔ bɛ.

¹⁸ Zo ko la ndoli kwa hɛ̃ Nzapa so ko, bɛ Nzapa ndode na lo tɛ lo, ko azi ndogonda nga lo.

¹⁹ Na lo ni ko, ale e gi ye mɛ ndohɛ̃ e mangbingɔ, ndokpengba nga na lo yengɔ tɛ e awa Kristo.

²⁰ Ta mɔ gbɛ̃ kwa tɛ Nzapa na lo ti tɛ mɛ mɔ ndotɛ ma. Biani, e lengbi ti tɛngɔ ye zu, kanda adu siɔni ya, e tɛ ye mɛ alengbi ti tongɔ ayata e awa Kristo ya, ala li siɔ ye.

²¹ Ye mɛ nzɔ̃ni la, ale ta mɔ tɛ sa, bere mɔ nyɔ kana, bere mɔ li ye mɛ ndɛ̃ mɛ alengbi ti tongɔ nyita mɔ wa Kristo ya, lo li siɔ ye ma.

²² Na ndo tɛnɛ olo ko, ale mɔ bata dangɔ bɛ tɛ mɔ nvɛni ka ya bɛ mɔ, ale bo mɔ na Nzapa wa ĩ hĩnga ni. Dengɔ bɛ ati na zo ko la, na ngoi mɛ se lo ga so lingɔ ye ko, ta bɛ lo ndopa hɛ̃ lo ya, ye ni adu siɔni ma.

²³ Wa tɛ mɛ zo ndode kitɛ ni, ko lo ndoda bɛ lo ya, bere ta adu nzɔ̃ni ya, ni tɛ ma, wa se lo ti tɛ ni ko, Nzapa afa ngbanga abi li lo. Nzapa afa ngbanga abi li lo, na lo mɛ ya, ta zo ni ko atɔndɔ dangɔ bɛ tɛ lo ma. Ko ye zu mɛ zo ndoli, se zo ti dɛ kitɛ ni ko, zo ni ko ali siɔ ye wɛ la.