Roma 13 - Fana Ngbangɔ 1987

Ale ĩ ma nyɔ agbia tɛ leta

¹ Ale zo zu abi tɛrɛ lo hɛ̃ agbia tɛ leta. Ta sanga ma, ló gbia zu alo ka tɛ Nzapa, ko Nzapa nga la ndokpã agbia.

² Na lo ni, zo ko la akɛ̃ nyɔ la ko, afa ya, lo kɛ̃ nga ló mɛ Nzapa apa. Zo ko la akɛ̃ nyɔ la ko, Nzapa afa gbanda ngbanga abi li lo.

³ Zo ko la ndoli nzɔ̃ ye ko, ta mbɛtɔ tɛ agbia tɛ leta ndogbɔ̃ lo ma, kanda zo ko la ndoli siɔ ye ko, zo mɛ mbɛtɔ tɛ agbia tɛ leta ndogbɔ̃ lo la. Se í ye ya, ta mbɛtɔ tɛ la agbɔ̃ ĩ ma ko, nzɔ̃ni ale ĩ li nzɔ̃ ye, wadila ala gonda ĩ.

⁴ Ta sanga ma, ala ndoli kwa hɛ̃ Nzapa so zangɔ ĩ ya, ĩ li nzɔ̃ ye. Wa se ĩ li siɔ ye ko, í kpɛ la, na lo mɛ ya, ta adu sanga la, ala na nguru ti hɛ̃ngɔ azi etumbu ma. Ngoi mɛ ala ndohɛ̃ azi etumbu ko, ala ndoli kwa hɛ̃ Nzapa so fangɔ ngɔnzɔ tɛ lo hɛ̃ azi mɛ ndoli siɔni.

⁵ Nda mɛ ale ĩ ndobi tɛrɛ ĩ hɛ̃ agbia tɛ leta la. Ta adu ya, ĩ bi tɛrɛ ĩ hɛ̃ la bo na lo ti kpɛngɔ ngɔnzɔ tɛ Nzapa ma, kanda adu nga na lo mɛ ya, ĩ hĩnga ka ya be ĩ ya, adu nzɔ̃ni.

⁶ Nda mɛ nga ĩ ndofuta lapo la. Ta sanga ma, awa sɔrɔngɔ lapo ndoli kwa hɛ̃ Nzapa, na ngoi mɛ ala ndosɔrɔ lapo na seni.

⁷ Ale ĩ hɛ̃ zo kɔi kɔi ye mɛ ĩ lengbi ti hɛ̃ngɔ lo: ĩ futa lapo ndɛ̃ ndɛ̃ ndɛ̃ hɛ̃ awa sɔrɔngɔ lapo, ĩ tɔndɔ azi mɛ ĩ lengbi ti tɔndɔngɔ la.

Ale ĩ ndoye afɔ̃ ĩ

⁸ Ta ĩ du na sende tɛ zo kɔi ma, kanda sende mɛ ĩ lengbi ti dungɔ na ni bo la sende ti yengɔ afɔ̃ ĩ. Zo ko la aye afɔ̃ lo ko, afa ya, lo tɔndɔ nga andia tɛ Nzapa zu la.

⁹ Ta sanga ma, andia olo mɛ anɛ ya: “Ta mɔ ti kɔmbɛ ma, ta mɔ ho zo ma, ta mɔ nzĩ ye ma, ta mɔ du na gwɛ̃ ye tɛ zo ma,” nga na andia mɛ ndɛ̃ zu abombi tɛrɛ la bo na ya ndia olo kɔi mɛ anɛ ya: “Ale mɔ ye fɔ̃ mɔ nga ma se mɛ mɔ ndoye na tɛrɛ mɔ nvɛni.”

¹⁰ Zo ko la ndoye fɔ̃ lo ko, ta lo ndoli lo siɔni ma. Ko zo ko la aye fɔ̃ lo ko, afa ya, lo tɔndɔ andia tɛ Nzapa zu.

Ĩ lɛkɛ tɛrɛ ĩ so kungɔ gangɔ tɛ Yezo

¹¹ Ale ĩ li so, na lo mɛ ya, ĩ hĩnga ngoi mɛ e na ni. Ngoi tɛ ĩ ti zingɔngɔ alengbi we. Ti biani, ngoi tɛ Nzapa ti songɔ e ada ndũ. Ta ngoi ni ti dɛ yɔngɔrɔni, nga ma na lá ko ndo e ye na lo tɛ Yezo uzu ma.

¹² Angbã yakere nyɔ ndã alengbi, ko nda ade. Wa é zia lingɔ aye mɛ azi ndoli na ya mbingo, ko é mu aye ti tiringɔ na to mɛ e lengbi ti tiringɔ na to na ya vuru ndo.

¹³ E du na se nzɔ̃ li ye, nga ma se tɛ azi mɛ ndodɔ nɔ na ya vuru ndo. Ta e tɛ ye aɔ nyɔ kpɔ̃ ni ma, ta e nyɔ kana agbɔ̃ e ma, ta e li siɔ ye ti kamɛnɛ ma, ta e li siɔ ye ma, ta e pa pa ma, ta e li nga sɔbɛrɛ hɛ̃ afɔ̃ e ma.

¹⁴ Kanda ale ĩ mu se li ye tɛ Gbia Yezo Kristo. Asiɔ ye mɛ ĩ na gwɛ̃ ti lingɔ ni ya, bɛ ĩ ade ko, ta ĩ li ni ma.