Roma 12 - Fana Ngbangɔ 1987

Fana du tɛ awa Kristo

¹ Aya bua, nga ma la Nzapa ama vundu tɛ e sĩ ko, mbi gbɔ̃ gɛrɛ ĩ ya, ĩ du bo azi tɛ Nzapa, ĩ ka tɛrɛ ĩ zu hɛ̃ lo, nga ma sa mɛ ahɛ̃ ya, aho alu na lo, kanda tɛ ĩ ko, ĩ ngbã le ĩ ngɛ̃. Se ĩ ka tɛrɛ ĩ hɛ̃ lo nga so, wa bɛ lo ade na lo ni. Ĩ ba se beta vɔrɔngɔ Nzapa mɛ ale ĩ ndovɔrɔ na lo la.

² Ta ĩ mu se du tɛ azi ti lɛ sese olo ma, kanda ale ĩ zi lege hɛ̃ Nzapa ya, lo hɛ̃ ĩ fana kɔdɛ, lo gbinyangbi nga du tɛ ĩ, wadila ĩ hĩnga aye mɛ lo ndoye ya ĩ li. Aye ni lo mɛ: ye mɛ nzɔ̃ni, ye mɛ ndode bɛ lo, nga na ye mɛ bɛtani.

³ Na lo ti nguru kwa mɛ Nzapa ahɛ̃ mbi na nzɔ̃ bɛ tɛ lo ko, mbi na pangɔ hɛ̃ ĩ zu ya, ta ĩ mu tɛrɛ ĩ aɔ ndoni ma. Kanda ale ĩ du na kɔdɛ mɛ nzɔ̃ni. Ale zo kɔi kɔi na popo tɛ ĩ akpã nga lɛ lo ndo nguru kwa mɛ Nzapa ahɛ̃ lo, wadila lo hĩnga du tɛ lo.

⁴ Tɛrɛ zo bo kɔi, kanda apɛnzɛ tɛrɛ zo da sĩni, ko kwa tɛ la zu ndɛ̃ ndɛ̃ ndɛ̃.

⁵ Se mɛ nga abɛ e du sĩni ko, e bo kɔi, na lo mɛ ya, e na Kristo e ti bo kɔi la. Ko e awa Kristo zu e bombi tɛrɛ e kɔi nga ma apɛnzɛ ngbonga tɛrɛ zo kɔi.

⁶ E na nguru kwa ndɛ̃ ndɛ̃ ndɛ̃, nga ma se mɛ Nzapa ahɛ̃ ni hɛ̃ e na lo ti nzɔ̃ bɛ tɛ lo, ko ale zo kɔi kɔi amu nguru kwa ni ali na kwa. Zo ko la na nguru kwa ti pangɔ nyɔ Nzapa ko, ale lo pa ni na se ko la lo ye na lo tɛ Nzapa.

⁷ Zo ko la na nguru kwa ti lingɔ kwa hɛ̃ afɔ̃ lo ko, ale lo li ni hɛ̃ la. Zo ko la na nguru kwa ti hangɔ afɔ̃ lo na lo ko, ale lo ha la na ni.

⁸ Zo ko la na nguru kwa ti sangɔ nguru bɛ afɔ̃ lo ko, ale lo sa nguru bɛ la. Zo ko la na nguru kwa ti kangɔ aye tɛ lo na kaye hɛ̃ afɔ̃ lo ko, ale lo ka ni na bɛ lo kɔi. Zo ko la na nguru kwa ti lɛngɔ gbia ko, ale lo hɛ̃ tɛrɛ lo na ya kwa ni. Zo ko la na nguru kwa ti zangɔ awa pɛnɔ ko, ale lo za la na dengɔ bɛ.

⁹ Ale ĩ ye afɔ̃ ĩ na bɛ ĩ kɔi, ĩ kɛ̃ ye mɛ siɔni, ĩ ye ye mɛ nzɔ̃ni.

¹⁰ Ale ĩ yengbi nga ma se tɛ zo na nyita lo, ĩ tɔndɔ afɔ̃ ĩ sĩ nvɛni.

¹¹ Ale ta ĩ du awa ndɛkɔ ma, kanda ale ĩ li kwa kpuru kpuru, ĩ li kwa hɛ̃ Gbia Yezo na bɛ ĩ kɔi.

¹² Ale ĩ du na dengɔ bɛ, na lo mɛ ya, ĩ ndolɛndɛrɛ Nzapa. Ale ĩ gbe bɛ ĩ na ya apɛnɔ mɛ ĩ ndohũ, ĩ sambela Nzapa ngoi zu.

¹³ Ale ĩ za ayata ĩ awa Kristo mɛ ta ala na ye ma, ko azi mɛ ndosi ka tɛ ĩ ko, ĩ yamba la nzɔ̃ni.

¹⁴ Ale ĩ hũnda Nzapa ya, lo sunu azi mɛ ndohɛ̃ ĩ pɛnɔ. Ĩ hũnda lo ya, lo sunu la, kanda ta ĩ hũnda lo ya, lo zónga la ma.

¹⁵ Azi ko la ndosaba ko, ĩ na la ĩ saba. Azi ko la ndoto to ko, ĩ na la to to.

¹⁶ Ĩ na afɔ̃ ĩ awa Kristo ĩ du na nzɔ̃ mangbingɔ. Ta ĩ yakɛ tɛrɛ ĩ ma, kanda ale ĩ ye lingɔ akwa mɛ mbumbusɛni. Ta ĩ mu tɛrɛ ĩ ya, ĩ awa ndara ma.

¹⁷ Se afɔ̃ ĩ ali ĩ siɔni ko, ta ĩ li nga la siɔni ma. Ale ĩ gi kɔdɛ ya, ĩ li nzɔ̃ ye na gbɛlɛ azi zu.

¹⁸ Ĩ li ye zu mɛ ĩ lengbi ti lingɔ ya, ĩ na azi zu ĩ du na mangbingɔ.

¹⁹ Ayata mbi ti kpɔ̃ bɛ mbi, ta ĩ nvɛni ĩ gɛ̃ kula ma, kanda ĩ zi lege hɛ̃ Nzapa ya, lo li ngɔnzɔ tɛ lo hɛ̃ asiɔ azi, ta sanga ma, asu ka ya Buku tɛ Nzapa ya: “Mbi Gbia Nzapa gbanda la mbi gɛ̃ kula, mbi nga gbanda la mbi hɛ̃ etumbu hɛ̃ azi.”

²⁰ Ko asu nga ka ya Buku tɛ Nzapa ya: “Se gwɛ̃ agbɔ̃ wa kɛ̃ngɔ mɔ ko, hɛ̃ lo ye lo tɛ, se gwɛ̃ ngu agbɔ̃ nga lo ko, hɛ̃ lo ngu lo nyɔ. Ta sanga ma, se mɔ li so ko, mɔ sa kamɛnɛ lɛ lo sĩ nvɛni.”

²¹ Ta mɔ ye ya, siɔ ye ako ndo mɔ ma. Kanda ale mɔ li nzɔ̃ ye, wa mɔ nwɔ siɔ ye.