Roma 11 - Fana Ngbangɔ 1987

Ta Nzapa akɛ awa Izrayɛlɛ ma

¹ Wa mbi hũnda ya, Nzapa akɛ̃ azi tɛ lo awa Izrayɛlɛ? Ipɔ, ta seni la ma! Ta sanga ma, mbi nvɛni nga wa Izrayɛlɛ, mbi tara Abrahama, mbi nga ale tɛ Benzami.

² Ta Nzapa akɛ̃ azi tɛ lo mɛ ndo lo pia lo sara la gã lo kpã ya, ala du azi tɛ ni ma. Biani, ĩ hĩnga tɛnɛ mɛ asu ka ya Buku tɛ Nzapa, na lo tɛ Elia mɛ ndo adema tɛrɛ lo hɛ̃ Nzapa na lo tɛ awa Izrayɛlɛ ya:

³ “Gbia, awa Izrayɛlɛ akpɔ awa pangɔ nyɔ mɔ, ala gbɛ̃gbɛ̃ nga amɛsa mɛ e ndolu ye ndo ni hɛ̃ mɔ. Mbi ngbã bo mbi kɔi, ko ala ndogingisa ya, ani ho nga mbi.”

⁴ Ko tɛnɛ mɛ ndo Nzapa agbinya hɛ̃ lo nɛ? Nzapa agbinya ndo hɛ̃ lo ya: “Azi koto mbara mbara mɛ ta avɔrɔ ngbilondo tɛ nzapa mɛ ili lo la Bale ma ko, mbi bata la na lo tɛ mbi.”

⁵ Se mɛ nga na olo, awa Izrayɛlɛ mɛ Nzapa asara la na nzɔ̃ be tɛ lo akpã azi tɛ lo, ko ala ngbã bo yakere gɛgɛrɛ la.

⁶ Lo sara la na lo ti nzɔ̃ bɛ tɛ lo, kanda ta lo sara la na lo ti kwa mɛ ala li ma. Se adu ya, lo sara la na lo ti kwa mɛ ala li ko, ale ta nzɔ̃ bɛ tɛ lo adu nzɔ̃ bɛ ma.

⁷ Wa tɛnɛ mɛ e ti e tɛnɛ nɛ? Ta awa Izrayɛlɛ alua ye mɛ ndo ala ndogi ma. Bo azi yakere mɛ ndo Nzapa asara la akpã la alua ye ni ko, ko azi mɛ ndɛ̃ ali ndo kpengba li,

⁸ nga ma se mɛ asu na ni ka ya Buku tɛ Nzapa ya: “Ato ndo gã, ngbĩi asi na lá olo ko, Nzapa ali ya, kɔde tɛ la ati gɛgɛrɛ, lo vĩ lɛ la, lo hinya nga do ma la.”

⁹ Davidi apa ndo nga ya: “Yenga tɛ la adu bɛ nga ma sɔ̃ mɛ ndogbɔ̃ sa, Wadila ala sa tise, ko Nzapa ahɛ̃ la etumbu ma ke!

¹⁰ Lɛ la aoro bɛ wadila tɛ la na hũngɔ ndo awe ma ke! Mɔ hɛ̃ bɛ la pɛnɔ ngoi zu, Wadila gwɛ̃ lo ni aha ya la faaa ma ke!”

¹¹ Wa mbi hũnda ya, ngoi mɛ ndo Ayuda ata li gɛrɛ la, asa tise ko, ala ngbã ndo tise buai? Ipɔ, ta seni la ma! Kanda na lo ti siɔ ye tɛ la ko, Nzapa aso azi mɛ ndɛ̃ ya, Ayuda ali sɔbɛrɛ hɛ̃ la.

¹² Na lo ti siɔ ye tɛ Ayuda ko, azi ti lɛ sese alua anzɔ̃ lo. Nzapa ali ndo anzɔ̃ lo hɛ̃ azi mɛ ta Ayuda ma, na ngoi mɛ ndo Ayuda akɛ̃ mangɔ nyɔ lo. Ko ngoi mɛ gbanda Ayuda zu adiri aga ka tɛ Nzapa ko, Nzapa ahɛ̃ gbanda anzɔ̃ lo hɛ̃ azi mɛ ta Ayuda ma aɔ nyɔ kpɔ ni.

Se mɛ ndo Nzapa aso na azi mɛ ta Ayuda ma

¹³ Na olo ko, mbi na pangɔ tɛnɛ hɛ̃ ĩ azi mɛ ta ĩ Ayuda ma. Mbi wa pangɔ kwa tɛ Nzapa hɛ̃ ĩ azi mɛ ta ĩ Ayuda ma. Ko mbi ndogonda tɛrɛ mbi na lo ti kwa tɛ mbi ya,

¹⁴ se alengbi ko, mbi li ya, Ayuda mɛ na ale tɛ mbi adu na sɔbɛrɛ, wadila Nzapa aso ambanga na popo tɛ la, na lo ti kwa tɛ mbi.

¹⁵ Singa na ngoi mɛ ndo Nzapa abɛ la katɛ ko, lo tongbi songo na popo tɛ lo na azi mɛ ndɛ̃, o singa na ngoi mɛ gbanda lo yamba la ma! Oko gbanda ko, azi mɛ ndo akpili adiri gbanda adu lɛ la ngɛ̃!

¹⁶ Se amu pɛnzɛ mapa, alu na Nzapa ko, tanga ni zu adu nga na lo tɛ lo. Se amu nga ambatana kɛkɛ alu na lo ko, akati ni adu nga na lo tɛ lo.

¹⁷ Ayuda adu nga ma akati kɛkɛ olivie mɛ afara asa tise. Ĩ mɛ ta ĩ Ayuda ma ko, ĩ du tɛ ĩ nga ma akati kɛkɛ olivie ti ya ndo, la afara akpã na panda Ayuda. Nzɔ̃ lo mɛ ndo ale Ayuda la alua ni ko, ĩ la ĩ ndolua ni na se lɛ la na olo.

¹⁸ Nda mɛ ale ta ĩ samana na Ayuda mɛ adu nga ma akati kɛkɛ mɛ afara asa tise ma la. Ta ĩ gonda tɛrɛ ĩ ma. Ĩ nga ma akati kɛkɛ, ta ĩ la ĩ ndokã ambatana kɛkɛ ma, ambatana kɛkɛ la ndokã ĩ.

¹⁹ Ĩ na pangɔ hɛ̃ mbi ya: “Wa afara ndo akati kɛkɛ olivie asa tise ya, akpa e na panda la mɛ.”

²⁰ Seni la, biani. Afara ndo la, na lo mɛ ya, ta ala ye ndo lo tɛ Yezo ma. Ko akpa ĩ na panda la, na lo mɛ ya, ĩ ye lo tɛ Yezo. Wa ta ĩ gonda tɛrɛ ĩ na lo ni ma! Kanda ale ĩ kpɛ Nzapa.

²¹ Ta sanga ma, singa na Ayuda mɛ adu nga ma abɛta kati kɛkɛ olivie, ko Nzapa abɛ la katɛ, o singa na ĩ ma!

²² Ĩ ba se mɛ Nzapa ndoli na nzɔ̃ bɛ hɛ̃ azi, nga na se mɛ lo ndoli na ngɔnzɔ hɛ̃ la mɛ ndɛ̃ lo mɛ: lo ndoli ngɔnzɔ hɛ̃ azi mɛ adɔ lege tɛ lo azia, ko lo ndoli nzɔ̃ bɛ hɛ̃ ĩ. Ko ale ĩ ngba bo na lingɔ ye mɛ ndode bɛ lo. Ta so ma ko, lo bɛ nga gbanda ĩ katɛ nga ma se tɛ Ayuda.

²³ Wa se Ayuda aye lo tɛ Yezo ko, Nzapa adiri amu la akpã na panda la ti uzu. Ta sanga ma, Nzapa na nguru ti diringɔ kpãngɔ la na panda la.

²⁴ Ĩ mɛ ta ĩ Ayuda ma ko, ĩ nga ma abɛta kati kɛkɛ olivie ti ya ndo mɛ afa akpã na tɛrɛ kɛkɛ olivie mɛ alu lungɔ. Ayuda adu tɛ la nga ma abɛta kati kɛkɛ olivie ko la alu lungɔ. Ko adu woni buai ka lɛ Nzapa ya, lo ti lo mu la, lo kpã na tɛrɛ kɛkɛ olivie mɛ ndo ala da uzu.

Ayuda adiri gbanda ka tɛ Nzapa

²⁵ Aya bua, mbi ye ya, ĩ hĩnga lo mɛ ta azi ahĩnga ma, so ĩ mu tɛrɛ ĩ na lo ti ndara tɛ ĩ ya, ĩ awa ndara. Lo ni lo mɛ: ambanga Ayuda ali kpengba li, wa ta kpengba li ni na ngbanga buai ma, kanda na wɛngɔ, na ngoi mɛ azi mɛ ta Ayuda ma la aye lo tɛ Yezo, alengbi kwɛ, wadila Ayuda aye lo tɛ Yezo.

²⁶ Wa ĩ ba se mɛ gbanda Nzapa aso na awa Izrayɛlɛ zu la, nga ma se mɛ asu na ni ka ya Buku tɛ Nzapa ya: “Wa songɔ azi alo gbanda ka kɔdɔrɔ ti Siona, Lo hã gbanda asiɔ ye zu mɛ atara Yakobo na ni.

²⁷ Wa ĩ ba ngbanga mɛ gbanda e na la e gbe, Na ngoi mɛ gbanda mbi hã asiɔ ye tɛ la la.”

²⁸ Oko la Ayuda akɛ̃ ndo Nzɔ̃ Pa ko, ala ti awa kɛ̃ngɔ Nzapa, wadila ĩ azi mɛ ta ĩ Ayuda ma ĩ lua nzɔ̃ lo. Kanda oko la Nzapa asara ndo la akpã azi tɛ lo ko, lo ndoye la, na lo ti kapa mɛ ndo lo ko hɛ̃ akotara la.

²⁹ Ta sanga ma, ye mɛ Nzapa ndohɛ̃ zo ko, ta lo ndodiri lo mu ni ti zo ma. Ko zo mɛ lo ili lo ko, ta lo ndobɛ nga lo katɛ ma.

³⁰ Ndo gã ko, ĩ azi mɛ ta ĩ Ayuda ma, ĩ kɛ̃ nyɔ Nzapa, ko na olo ko, Nzapa ama vundu hɛ̃ ĩ, na lo mɛ ya, Ayuda akɛ̃ nyɔ lo.

³¹ Se mɛ nga na olo, ala kɛ̃ nyɔ Nzapa ya, Nzapa ama hɛ̃ ĩ vundu la. Ko adu nga so ya, na olo ko, Nzapa alengbi nga ti mangɔ hɛ̃ la vundu.

³² La Nzapa ali ndo ya, azi ati nga ma awa bɔlɔkɔ, na lo mɛ ya, ala kɛ̃ ndo nyɔ lo. Lo li ndo so ya, ni ma vundu hɛ̃ la zu.

Ndima tɛ Nzapa adu kotani buai

³³ Nzɔ̃ be mɛ Nzapa ndoli hɛ̃ azi adu kotani buai! Lo na ndara sĩ, lo hĩnga nga ye sĩ! Ta zo kɔi alengbi ti tɔndɔngɔ nda nyɔ lo mɛ lo ndohɛ̃ ma! Ta zo kɔi ahĩnga nga nda ye mɛ lo ndoli ma!

³⁴ Nga ma se mɛ asu na ni ka ya Buku tɛ lo ya: “Ta zo kɔi ahĩnga dangɔ bɛ tɛ Gbia Nzapa ma! Ta zo kɔi alengbi ti hɛ̃ngɔ lo wangɔ ma!

³⁵ Ta zo kɔi ahɛ̃ lo ye, ya lo diri na ni hɛ̃ zo ni, Ma bere ye ni adu sende ma!”

³⁶ Ta sanga ma, lo la lo li ye zu, lo la lo ndobata ye zu, ye zu adu nga na lo tɛ lo. E gonda lo buru na buru zu! Seni la.