Roma 10 - Fana Ngbangɔ 1987

¹ Aya bua, lo mɛ mbi Ye na bɛ mbi kɔi, ko mbi ndohũnda nga Nzapa na lo ni hɛ̃ Ayuda lo mɛ: mbi separa ya lo so la.

² Mbi hĩnga ya, ala ndoye dengɔ na bɛ Nzapa sĩ, ko ta ala hĩnga se mɛ ala lengbi ti dengɔ na bɛ lo ma.

³ Ta ala hĩnga se mɛ Nzapa ndomu na azi ka lɛ lo ya, ala abɛta azi ma, ko ala ndogi tɛ la lege tɛ la nvɛni mɛ Nzapa ndomu na azi ka lɛ lo ya, ala abɛta azi. Na lo ni ko, ala kɛ̃ se mɛ Nzapa ndomu na azi ka lɛ lo ya, ala abɛta azi.

⁴ Mbi pa so, ta sanga ma, Yezo Kristo aho nguru ti ndia tɛ Mɔizɛ ya, Nzapa amu azi zu mɛ aye lo tɛ Yezo Kristo ya, ala abɛta azi.

Nzapa ndoso azi zu mɛ aye lo tɛ Yezo

⁵ Ĩ ma tɛnɛ mɛ ndo Mɔizɛ asu na lo ti se mɛ Nzapa ndomu na zo ka lɛ lo ya, lo bɛta zo, na lo mɛ ya, zo ni ndotɔndɔ ndia lo mɛ: “Zo ko la ndotɔndɔ ndia ko, lo na luangɔ bɛta du na lo ni.”

⁶ Wa ĩ ma tɛnɛ mɛ ndo atɛnɛ na lo ti se mɛ Nzapa ndomu na zo ka lɛ lo ya, lo bɛta zo, na lo mɛ ya, zo ni ndoye lo tɛ Yezo lo mɛ: “Zia nɛngɔ ka ya bɛ mɔ ya: ‘Zo mɛ gbanda ama ka yayu na?’ ” (Alengbi ya, zo mɛ gbanda ama kai so zungɔ na Kristo ge tise na?)

⁷ “Zia nga nɛngɔ ka ya bɛ mɔ ya: ‘Zo mɛ gbanda azu ka kɔdɔrɔ tɛ awa kwáni na?’ ” (Alengbi ya, zo mɛ gbanda azu kai so mungɔ Yezo, singɔ na lo ge lɛ sese na?)

⁸ Wa tɛnɛ mɛ Buku tɛ Nzapa atɛnɛ nɛ? Buku tɛ Nzapa atɛnɛ ya: “Tɛnɛ tɛ Nzapa la tɔ̃nda mɔ, mɔ pia mɔ tɛnɛ ni na nyɔ mɔ we, mɔ kpã nga ni ka ya bɛ mɔ wɛ.” Tɛnɛ ni adu tɛnɛ ti yengɔ lo tɛ Yezo, ko tɛnɛ ni la e ndopa.

⁹ Se zo apa na nyɔ lo na gbɛlɛ azi ya, Yezo lo Gbia, ko se zo ni aye nga ka ya bɛ lo ya, Nzapa aso ndo Yezo na pɛ kwá ko, Nzapa aso gbanda zo ni ko.

¹⁰ Ta sanga ma, zo ko la aye lo tɛ Yezo ka ya bɛ lo ko, Nzapa amu lo ka lɛ lo ya, lo bɛta zo. Zo ko nga la apa lo tɛ Yezo na nyɔ lo na gbɛlɛ azi zu ko, Nzapa aso lo.

¹¹ Nga ma se mɛ asu na ni ka ya Buku tɛ Nzapa ya: “Zo ko la aye lo tɛ lo ko, ta kamɛnɛ na gbɔ̃ngɔ lo ma.”

¹² Na lo ni ko, Ayuda na azi mɛ ta Ayuda ma adu bo kwe kɔi. Gbia tɛ la zu bo kɔi, lo la lo ndoli anzɔ̃ lo hɛ̃ azi zu mɛ ndoili lo ya, lo za ani.

¹³ Nga ma se mɛ asu na ni ka ya Buku tɛ Nzapa ya: “Azi zu ko gbanda la aili Gbia ya lo za ani ko, lo so gbanda la.”

¹⁴ Se ta ala ye lo tɛ lo ma ko, kɔdɛ mɛ ala lengbi ti ilingɔ lo ya, lo za ani sia? Wa se ta ala ma pa tɛ lo ma ko, kɔdɛ mɛ ala lengbi ti yengɔ lo tɛ lo sia? Ko se ta zo apa pa tɛ lo hɛ̃ la ma ko, kɔdɛ mɛ ala lengbi ti mangɔ pa ni sia?

¹⁵ Se ta ato azi ya, ala nɔ apa pa tɛ Yezo hɛ̃ la ma ko, kɔdɛ mɛ azi ni ko alengbi ti nɔngɔ pangɔ pa ni sia? Kanda se ato azi ko, adu nga ma se mɛ asu na ni ka ya Buku tɛ Nzapa ya: “Adu dengɔ bɛ sĩ so hũngɔ azi mɛ ndoga so pangɔ nzɔ̃ pa!”

¹⁶ Ko ta azi zu aye ndo lo ti Nzɔ̃ Pa ma. Nga ma se mɛ ndo Ezai apa na ni ya: “Gbia, bo azi yakere la aye lo ti tɛnɛ tɛ mɔ mɛ e ndopa.”

¹⁷ Na lo ni ko, ale zo ama pa tɛ Yezo Kristo, wadila lo ye lo tɛ lo. Ko ale apa pa tɛ Yezo, wadila zo ama, aye nga lo tɛ lo.

¹⁸ Wa mbi ndohũnda ya: ta awa Izrayɛle ama ndo pa ni ko ma? Biani, ala ma ndo ni! Asu ka ya Buku tɛ Nzapa ya: “Ama ndo legɔ̃ awa pangɔ tɛnɛ tɛ Nzapa ka lɛ sese zu, Ko tɛnɛ tɛ la asi ndo ka nda sese gbɔ.”

¹⁹ Mbi ti mbi hũnda ya: ta awa Izrayɛlɛ ahĩnga ndo nda ni ma? Biani, ala hĩnga ndo nda ni, kanda ta ala ye ndo lo ni ma. Ĩ ma tɛnɛ mɛ ndo Mɔizɛ atɛnɛ ya, Nzapa la apa lo mɛ: “Mbi li gbanda ya, ĩ ava mbi, ĩ li sɔbɛrɛ hɛ̃ agɛgɛrɛ azi ti lɛ sese, Mbi li nga gbanda ya, ngɔnzɔ agbɔ̃ ĩ hɛ̃ azi ti sese mɛ ta ala na kɔdɛ ma.”

²⁰ Ĩ ma nga tɛnɛ mɛ ndo Ezai atɛnɛ na kpengba be ya, Nzapa la apa lo mɛ: “Azi mɛ ndo ta ndogi mbi ma ko, ala hũ mbi, Ko mbi fa tɛrɛ mbi na azi mɛ ndo ta ndoyɔ ye kɔi ti mbi ma.”

²¹ Ko na lo tɛ awa Izrayɛlɛ ko, Nzapa apa ya: “Lá kwɛ lá kwɛ ko, mbi ndopɛpɛ ti mbi hɛ̃ azi tɛ mbi so ilingɔ la ya, ala ga, ko ta ala ndoma nyɔ mbi ma, ala ndokɛ̃ nga mbi.”