Roma 1 - Fana Ngbangɔ 1987

Balangɔ

¹ Mbi Polo, wa kwa tɛ Yezo Kristo la mbi to mbɛti olo hɛ̃ ĩ awa Kristo ti Roma. Nzapa aili mbi ya, mbi du wa pangɔ kwa tɛ ni, lo sara nga mbi lo kpa ya, mbi pa Nzɔ̃ Pa tɛ ni hɛ̃ azi.

² Nzapa ako ndo kapa ti Nzɔ̃ Pa ni gã, ko awa pangɔ nyɔ lo asu ndo ni ka ya Buku tɛ lo.

³ Nzɔ̃ Pa ni adu na lo tɛ Nyi lo Yezo Kristo mɛ Gbia tɛ e. Lo mu ndo tɛrɛ zo, lo ndo tara gbia Davidi.

⁴ Ngoi mɛ ndo Nzapa aso lo na pɛ kwá ko, Nzapa afa na nguru tɛ Tɔrɔ Santo ya, lo Nyi ni.

⁵ Na lo tɛ Yezo Kristo la Nzapa ali nzɔ̃ bɛ hɛ̃ mbi, akpã mbi wa pangɔ kwa tɛ Yezo Kristo, akpã nga mbi ya, mbi pa kwa ni hɛ̃ azi ti lɛ sese zu, wadila ala ye lo tɛ Yezo, ala ma nga nyɔ lo, wa se mɛ Yezo Kristo alua ndima la.

⁶ Ĩ awa Roma, ĩ mɛ Nzapa aili ĩ ya, ĩ du azi tɛ Yezo Kristo ko, ĩ nga na popo tɛ azi ni ko.

⁷ Mbi to mbɛti olo hɛ̃ ĩ awa Kristo ti Roma, ĩ zu mɛ Nzapa aye ĩ, ĩ mɛ Nzapa aili nga ĩ ya, ĩ du azi tɛ ni. Mbi bala ĩ. To e Nzapa na Gbia Yezo Kristo ali bɛ nzɔ̃ be hɛ̃ ĩ, ali bɛ nga ya, bɛ ĩ adu pii ma ke!

Polo aye gwengɔ bangɔ awa Kristo ti Roma

⁸ Uzu ti tongɔ nda tɛnɛ tɛ mbi ko, mbi hɛ̃ sia kɔli ti ndo Yezo Kristo hɛ̃ To mbi Nzapa na lo tɛ ĩ zu. Ta sanga ma, na lɛ sese zu ko, azi ndopa lo ti lo yengɔ tɛ ĩ.

^9-10 Ko Nzapa ahĩnga ya, tɛnɛ mɛ mbi ndotɛnɛ ko, adu biani. Lo hĩnga ya, na ngoi zu mɛ mbi ndosambela ni ko, mbi ndoda bɛ mbi na ĩ. Mbi ndohũnda lo ya, se bɛ lo aye ko, lo hɛ̃ mbi lege ho lo mɛ, mbi m ka tɛ ĩ. Lo la Nzapa mɛ mbi ndoli kwa ti pangɔ Nzɔ̃ Pa tɛ Nyi lo na bɛ mbi kɔi.

¹¹ Ta mbi ye nɔngɔ ka tɛ ĩ sanga ma, adu na lo mɛ ya, mbi ndosepara sĩ ya, mbi ga mbi ba ĩ, wadila ĩ lua nguru kwa tɛ Tɔrɔ Santo, wa ĩ kpengba.

¹² Mbi separa pangɔ ya, mbi na singɔ ka tɛ ĩ, wadila e sangbi nguru bɛ e. Ĩ sa nguru bɛ mbi na lo ti lo yengɔ tɛ ĩ, ko mbi sa nga nguru bɛ ĩ na lo ti lo yengɔ tɛ mbi.

¹³ Aya bua, mbi ye ya ĩ hĩnga ya, mbi ndosepara ndo fani sĩni ya, mbi ga ka tɛ ĩ, kanda ato ndo gã, ngbĩi asi na olo ko, ta mbi dɛ mbi lua lege ma. Mbi ndosepara ya, lɛ kwa tɛ mbi asi nga ka tɛ ĩ yango, nga ma se mɛ asi na ni ka tɛ azi ti sese mɛ ndɛ̃.

¹⁴ Ta sanga ma, mbi na sende li mbi, sende ni adu ya, ale mbi nɔ mbi pa Nzɔ̃ Pa hɛ̃ azi zu: azi mɛ lɛ la azi, na azi mɛ ta lɛ la ade azi ma, azi mɛ ahĩnga mbɛti, na ala mɛ ta ahĩnga mbɛti ma.

¹⁵ Nda mɛ mbi separa nga pangɔ Nzɔ̃ Pa ni hɛ̃ ĩ awa Roma la.

Nguru mɛ Nzɔ̃ Pa na ni

¹⁶ Mbi ndopa Nzɔ̃ Pa tɛ Yezo Kristo na gwalo. Nzɔ̃ Pa ni na nguru tɛ Nzapa, ko nguru ni ndoso azi zu mɛ aye lo tɛ Yezo Kristo. Ayuda la aso uzu, wa azi mɛ ta Ayuda ma aso tɛ la gesi.

¹⁷ Ta sanga ma, Nzɔ̃ Pa ndofa se mɛ Nzapa ndomu na azi ka lɛ lo ya, ala abɛta azi. Ĩ ba seni lo mɛ: ale azi aye bo lo tɛ Yezo Kristo, nga ma se mɛ Buku tɛ Nzapa apa na ni ya: “Zo ko la Nzapa amu lo ka lɛ lo ya, lo beta zo, na lo mɛ ya, lo ye lo tɛ Nzapa ko, zo mɛ gbanda alua beta du la.”

Asiɔ ye mɛ azi ndoli

¹⁸ Nzapa ndofa yango ya, ngɔnzɔ agbɔ̃ ni na lo ti asiɔ ye zu mɛ azi ndoli. Ngɔnzɔ agbɔ̃ lo, ta sanga ma, na lo siɔ ye mɛ ala ndoli ko, ala ndogbanzi azi ya, ta ala hĩnga beta lo tɛ lo ma.

¹⁹ Nzapa ahɛ̃ la etumbu, ta sanga ma, lo tɛ lo mɛ azi alengbi ti hĩngangɔ ni ko, ala hĩnga ni. Nzapa nvɛni la afa ndo ló ni na la yango.

²⁰ Ta zo ahũ Nzapa ma, kanda ato na ngoi ko ndo Nzapa ali na sese, ngbĩi asi na la olo ko, aye mɛ ndo lo li ndofa sé du tɛ lo yango. Aye ni ndofa ya, nguru tɛ lo ndongbã kaka. Ko aye ni ndofa nga ya, bo lo kɔi la Nzapa. Azi alengbi ti hĩngangɔ lo na lo ti aye mɛ lo li, ko se ala bere ka gbɛlɛ Nzapa ya, ta ani hĩnga ndo ma ko, ta lo na mangɔ la ma.

²¹ Abɛ nga ala hĩnga Nzapa ko, ta ala ndotɔndɔ lo, ndohɛ̃ nga lo sia kɔli na se mɛ alengbi ti lingɔ na ni hɛ̃ Nzapa ma. Kanda dangɔ bɛ tɛ la ati gɛgɛrɛ, ala na ya mbingo, ta ala nga na kɔdɛ ma.

²² Ala ndopa ya, ani awa ndara, kanda ala awa nyingɔ.

²³ Ala zia vɔrɔngɔ Nzapa mɛ na ndima, lo mɛ kaka, ko ala sana tɛrɛ la ndovɔrɔ angbilondo. Angbilondo ni adu angbilondo ti azi mɛ ndokpili, angbilondo ti ahũ, ti asa mɛ gɛrɛ la siɔ, nga na angbilondo ti asa mɛ ndoara arangɔ.

²⁴ Nda mɛ Nzapa azia azi ni ko ya, ala li siɔ ye na se siɔ gwɛ̃ ti bɛ la la. Na lo ni la ala ndoli ye ti kamɛnɛ tɛrɛ afɔ̃ la.

²⁵ Ala zia bɛta lo tɛ Nzapa, ko ala ti ndoye tɛnɛ ti nvɛnɛ. Ala ndovɔrɔ aye mɛ Nzapa ali, ala ndoli kwa hɛ̃ aye ni ko, ala zia nga vɔrɔngɔ Nzapa nvɛni mɛ wa lingɔ ye kwe, lo mɛ ale agonda lo ngoi zu! Seni la.

²⁶ Nda mɛ Nzapa azia la ya, ala li aye ti kamɛnɛ mɛ bɛ la aye la. Awe nvɛni ndozia fɔnɔngɔ na akɔ la, ko ala ti ndofɔnɔ na afɔ̃ la awe, ma bere afɔ̃ la ni ati akɔ la.

²⁷ Se tɛ akɔli nga la: ala ndozia fɔnɔngɔ na awe la, ko ala ndodu na kota gwɛ̃ ti fɔnɔngɔ na afɔ̃ la akɔli. Ala ndoli aye ti kamɛnɛ na afɔ̃ la akɔli. Na lo ni ko, ala nvɛni ndolua etumbu mɛ alengbi na siɔ ye tɛ la.

²⁸ Nga ma la azi ni ko akɛ̃ hĩngangɔ Nzapa ko, Nzapa azia la ya, ala ngba na siɔ kɔdɛ tɛ la, wa ala li ye mɛ ale ta ala lengbi ti lingɔ ni ma.

²⁹ Bɛ la asĩ sĩngɔ na le asiɔ ye ndɛ̃ ndɛ̃ ndɛ̃, na gwɛ̃ ye tɛ afɔ̃ la, na siɔ bɛ na ndo afɔ̃ la. Ala ndoli sɔbɛrɛ, ala ndoho afɔ̃ la, ala ndopa pa, ala ndoli poroso. Ala ndoli afɔ̃ la siɔni, ala ndofɔnɔ na ili afɔ̃ la,

³⁰ ala ndotɛnɛ tɛnɛ siɔni na ili afɔ̃ la. Ala ndokɛ̃ Nzapa ka ka ka, ala ndoguru afɔ̃ la, ala awa yakɛ, ala ndogonda tɛrɛ la, ala ndosi na fana lege ti lingɔ siɔ ye. Ta ala ndoma nga nyɔ awa dúngɔ la ma,

³¹ ta ala na kɔdɛ ma, ta ala ndoli ye na se kapa mɛ ala ndoko ma. Ta ala ndoye afɔ̃ la ma, ta ala ndoma nga vundu tɛ afɔ̃ la ma.

³² Ala hĩnga ya, ndia tɛ Nzapa apa ya, azi ko la ndoli gi tɛrɛ asiɔ ye ko la ko, ala lengbi na kwa. Ko ala ti ndokɛ̃ kia ali ni. Ta bo asiɔ ye ko la ala ndoli ma, kanda ala ndoye nga lo ti asiɔ ye ni hɛ̃ azi mɛ ndoli ni.