Filemɔ 1 - Fana Ngbangɔ 1987

Balangɔ

¹ Mbi Polo mɛ abi mbi bɔlɔkɔ na lo tɛ Yezo Kristo, na Timɔte mɛ nyita e wa Kristo la e to mbɛti olo hɛ̃ mɔ Filemɔ. Mɔ kwa e, mɔ nga fɔ̃ e ti kwa mɛ e ndoli hɛ̃ Yezo. E bala mɔ.

² E to nga mbɛti olo hɛ̃ azi ti Eklezia mɛ ndobombi tɛrɛ la ka ya da tɛ mɔ so vɔrɔngɔ Nzapa, e to nga hɛ̃ nyita e wa Kristo ti wali mɛ ili lo Apia, na fɔ̃ e Arsipɛ mɛ e na lo e bombi e ndotiri to na lo tɛ Gbia.

³ To e Nzapa, na Gbia Yezo Kristo ali bɛ nzɔ̃ bɛ hɛ̃ ĩ, ali bɛ nga ya, bɛ ĩ adu pii ma ke!

Yengɔ mɛ Filemɔ aye na azi tɛ Nzapa

⁴ Filemɔ nyi bua, ngoi zu mɛ mbi ndoda bɛ mbi na mɔ na ya sambela tɛ mbi ko, mbi ndohɛ̃ sia kɔli hɛ̃ Nzapa na lo tɛ mɔ.

⁵ Ta sanga ma, mbi ma azi ndopa ya, mɔ ndoye azi tɛ Nzapa zu, mɔ ndoye nga lo tɛ Gbia Yezo, na bɛ mɔ kɔi.

⁶ Dangɔ bɛ tɛ mɔ na tɛ e bo kɔi, na lo mɛ ya, mɔ ye lo tɛ Yezo. Ko mbi hũnda Nzapa ya, dangɔ bɛ ni ko kɔi aza mɔ ya, mɔ hĩnga anzɔ̃ ye zu mɛ Nzapa ahɛ̃ e, na lo mɛ ya, e na Yezo Kristo e ti bo kɔi.

⁷ Nyi bua, yengɔ mɛ mɔ ndoye na azi mɛ ndɛ̃ mɛ adu azi tɛ Nzapa ko, ahɛ̃ mbi dengɔ bɛ sĩ, azu nga na bɛ mbi sĩ, ta sanga ma, mɔ sa nguru bɛ la.

Polo agbɔ̃ gɛrɛ Filemɔ ya Onezimɛ adiri ka tɛ Filemɔ

⁸ Na lo ni, nga ma la mbi wa pangɔ kwa tɛ Yezo Kristo ko, mbi lengbi ti hɛ̃ngɔ mɔ nyɔ ya, mɔ li ye mɛ mɔ lengbi ti lingɔ.

⁹ Ko abɛ nga so ko, mbi separa gbɔ̃ngɔ gɛrɛ mɔ ya, mɔ li ye ni ko, na lo mɛ ya, mɔ ndoye afɔ̃ mɔ. Mbi Polo mbi ti bange, ko na olo ko, mbi nga ge ya bɔlɔkɔ na lo tɛ Yezo Kristo.

¹⁰ Mbi gbɔ̃ gɛrɛ mɔ ya, Onezimɛ adiri ka tɛ mɔ. Lo nga ma nyi mbi mɛ mbi dú lo ge ya bɔlɔkɔ, ta sanga ma, lo ye lo tɛ Yezo Kristo na lo tɛ mbi.

¹¹ Ndo uzu ko, lo ndo zo mɛ ta kwa tɛ lo ka tɛ mɔ da ma, kanda na olo, ge tɛ mbi e na mɔ ko, lo ti zo mɛ kwa tɛ lo da.

¹² Na olo, lo mɛ nga ma pɛnzɛ tɛrɛ mbi ko, mbi diri na lo hɛ̃ mɔ.

¹³ Ngoi mɛ mbi ge ya bɔlɔkɔ na lo ti Nzɔ̃ Pa ko, mbi separa ya, mbi bata lo ge tɔ̃nda mbi, lo za mbi na se lɛ mɔ.

¹⁴ Kanda nga ma lá ta mbi dɛ mbi hũnda mɔ, mɔ ye ma ko, ta mbi ye ya, mbi bata lo ma. Ta mbi separa ya, mbi hɛ̃ mɔ nyɔ, wa mɔ li hɛ̃ mbi nzɔ̃ ye ma, kanda mbi separa ya, mɔ li ye na se bɛ mɔ.

¹⁵ Mbanga ko, Onezimɛ ahã ndo ka tɛ mɔ aɔ ti pɛ nyi ngoi ya, lo ti diri ka tɛ mɔ, wa mɔ mu lo ti buai.

¹⁶ Ta sanga ma, na olo ko, ta lo ti dɛ bo mbɛ ma, kanda lo ɔ mbɛ yɔngɔrɔni: lo ti nyita e wa Kristo ti kpɔ̃ bɛ e. Mbi ndoye lo sĩ, ko mɔ na yengɔ lo ɔngɔ ndoni, na lo mɛ ya, lo mbɛ tɛ mɔ, lo nga nyita mɔ wa Kristo.

¹⁷ Wa nga ma la mɔ hĩnga ya, mbi kwa mɔ ko, mu nga lo ka tɛ mɔ nga ma mbi la mɔ mu mbi.

¹⁸ Se adu ya, lo gbɛ̃ ye tɛ mɔ, bere lo na sende tɛ mɔ ko, minya ni na li mbi.

¹⁹ Tɛnɛ mɛ mbi nvɛni mbi su na ti mbi lo mɛ: “Mbi Polo, mbi na tiɔngɔ sende ni hɛ̃ mɔ.” (Kanda ta mbi lengbi ti dangɔ bɛ mɔ na sende tɛ mbi mɛ na li mɔ ma, ta sanga ma, du ti kaka mɛ mɔ lua ko, mɔ lua ni na lo tɛ mbi.)

²⁰ Nyi bua, ti biani, mbi gbɔ̃ gɛrɛ mɔ ya, mɔ li hɛ̃ mbi nzɔ̃ ye na lo tɛ Gbia Yezo Kristo, wa Onezimɛ adiri ka tɛ mɔ. Zu nga na bɛ mbi na lo tɛ Yezo Kristo.

²¹ Na ngoi mɛ mbi su na mbeti olo ko, mbi hĩnga nzɔ̃ni ya, mɔ na lingɔ ye mɛ mbi gbɔ̃ gɛrɛ mɔ na lo ni. Ko mbi hĩnga nga ya, mɔ na lingɔ ni ɔngɔ ndoni.

²² Wa lɛkɛ nga hɛ̃ mbi ndo ti langɔ, ta sanga ma, mbi ndolɛndɛrɛ ya, Nzapa na mangɔ sambela tɛ ĩ, ko lo na zingɔ hɛ̃ mbi lege ya, mbi diri ka tɛ ĩ.

Ndangba balangɔ

²³ Epafrasi mɛ e na lo ge ya bɔlɔkɔ na lo tɛ Yezo Kristo ko, le bala mɔ.

²⁴ Marko, na Aristarkɛ, na Demasi, nga na Luka mɛ afɔ̃ mbi ti kwa tɛ Gbia Yezo abala nga mɔ.

²⁵ Gbia Yezo ali bɛ nzɔ̃ bɛ hɛ̃ ĩ ma ke!