Matie 7 - Fana Ngbangɔ 1987

Ta ĩ fa ngbanga tɛ afɔ̃ ĩ ma

¹ Yezo apa ya: “Ta ĩ fa ngbanga tɛ afɔ̃ ĩ ma, so Nzapa afa nga ngbanga tɛ ĩ.

² Ta sanga ma, se ko la ĩ ndofa na ngbanga tɛ azi mɛ ndɛ̃ ko, se mɛ nga gbanda Nzapa afa na ngbanga tɛ ĩ la. Ko ye mɛ lo na hɛ̃ngɔ ĩ ko, lo na hangɔ na ye mɛ ndo ĩ hɛ̃ afɔ̃ ĩ.

³ Mɔ ndoba bo nyi sã pele mɛ ati lɛ nyita mɔ, wa ta mɔ ndohũ ponzo kɛkɛ mɛ ati lɛ mɔ ma ya nɛ?

⁴ Mɔ mɛ ta mɔ ndohũ bɛ ponzo kɛkɛ mɛ ati lɛ mɔ ma ko, ta mɔ pa hɛ̃ nyita mɔ ya: ‘Zia mbi hã ponzo kɛkɛ ko lɛ mɔ, mbi zi ma.’

⁵ Wa poroso, ponzo kɛkɛ mɛ ati lɛ mɔ ko, hã ni uzu mɔ zi, mɔ hũ ndo nzɔ̃ni, wa se mɛ mɔ hã nyi sã pele mɛ ati lɛ nyita mɔ, mɔ zi la.

⁶ “Ta ĩ hɛ̃ ye mɛ santo hɛ̃ ambo ma, so ala sana tɛrɛ la, atɛrɛkɛ ĩ. Ta ĩ sa nga lenge tɛ ĩ na gbɛlɛ akɔsɔ ma, so ala dɔdɔrɔ ni.”

Yɔngɔ ye ka ti Nzapa

⁷ Yezo apa ya: “Ĩ yɔ ye, wa Nzapa ahɛ̃ ĩ, ĩ gi ye, ko ĩ lua ni, ĩ gɔngɔ nyɔ ngise, wa Nzapa azi ni hɛ̃ ĩ.

⁸ Ta sanga ma, zo zu ko la ayɔ ye ko, Nzapa ahɛ̃ ni hɛ̃ lo, zo zu ko la agi ye ko, lo lua ni, ko zo zu ko la agɔngɔ nyɔ ngise ko, Nzapa azi ni hɛ̃ lo.

⁹ Na popo tɛ ĩ, zo mɛ se nyi lo ayɔ mapa ti lo ko, lo mu tɛnɛ, lo hɛ̃ lo na?

¹⁰ Bere se nyi lo ayɔ susu ti lo ko, lo gbɔ̃ ngbɔ, lo hɛ̃ lo na? Ta zo mi da ma!

¹¹ Singa na ĩ mɛ asiɔ azi, ĩ ndohɛ̃ anzɔ̃ ye hɛ̃ aya ĩ, o singa na To ĩ mɛ ka yayu ma! Lo na hɛ̃ngɔ anzɔ̃ ye hɛ̃ azi ko la ndoyɔ ye ti lo!

¹² “Ye kwɛ zu mɛ ĩ ndoye ya, azi ali tɛrɛ ĩ ko, ĩ li nga bo gi tɛrɛ ye ni ko na tɛrɛ la, na lo mɛ ya, se mɛ ndia tɛ Mɔizɛ, nga na se mɛ buku tɛ awa pangɔ nyɔ Nzapa apa na ni la.”

Nyɔ ngise mɛ pitoto

¹³ Yezo apa ya: “Ale ĩ li ti nyɔ ngise mɛ pitoto! Ta sanga ma, nyɔ ngise ko la gbangabu ko, adu woni ya zo aɔ ti da, ko lo mu lege mɛ ndoto zo ka lifɛlo, ko azi gba la ndoɔ ti da.

¹⁴ Kanda nyɔ ngise ko la pitoto ko, adu kpengbani ya, zo aɔ ti da, ko lo lua bɛta du. Azi mɛ ndoɔ ti da ko, ta ala gba ma.”

Kɛkɛ na le kɛkɛ

¹⁵ Yezo apa ya: “Ĩ du na kpengba lɛ na ndo awa pangɔ nyɔ Nzapa na nvɛnɛ. Ala ndoga ka tɛ ĩ nga ma angasã ngbaga, kanda ka ya bɛ la ko, ala nga ma azɛ̃.

¹⁶ Ĩ hĩnga gbanda la na se lingɔ ye tɛ la. Ta andokɔ le ndimɔ ka li kɛkɛ nza ma. Ta andokɔ nga le avoka ka li mburu ma.

¹⁷ Nzɔ̃ kɛkɛ ndohɛ̃ nzɔ̃ le kɛkɛ, siɔ kɛkɛ ndohɛ̃ nga siɔ le kɛkɛ.

¹⁸ Ta nzɔ̃ kɛkɛ alengbi ti hɛ̃ngɔ siɔ le kɛkɛ ma, ko ta siɔ kɛkɛ alengbi nga ti hɛ̃ngɔ nzɔ̃ le kɛkɛ ma.

¹⁹ Kɛkɛ zu mɛ ta ndohɛ̃ nzɔ̃ le kɛkɛ ma ko, andofa ni abi ya wá agbi.

²⁰ Se mɛ nga gbanda ĩ hĩnga na awa pangɔ nyɔ Nzapa na nvɛnɛ, na lo ti se li ye tɛ la la.”

Azi mɛ gbanda ta asi ka Kɔdɔrɔ Gbia tɛ Nzapa ma

²¹ Yezo apa ya: “Ta adu azi mɛ ndopa hɛ̃ mbi ya: ‘Gbia, Gbia,’ la asi gbanda ka Kɔdɔrɔ Gbia tɛ To mbi Nzapa ma, kanda adu bo ala mɛ ndoli yɛ mɛ bɛ lo aye la asi gbanda kai.

²² Ngoi mɛ gbanda lá ti fangɔ ngbanga alengbi ko, azi gba apa gbanda hɛ̃ mbi ya: ‘Gbia, Gbia, e pa ndo nyɔ Nzapa na nguru tɛ mɔ, e toma ndo asiɔ tɔrɔ na ya tɛrɛ azi na nguru tɛ mɔ, e li ndo nga aye ti kpɛnɛ ma wo ma na nguru tɛ mɔ!’

²³ Ko mbi pa gbanda hɛ̃ la ya: ‘Ta mbi hĩnga ĩ bɛ gbɔ ma, í ɔ lɛ mbi, ĩ du awa lingɔ siɔ ye!’ ”

Da tɛ wa ndara na da tɛ wa buba

²⁴ Yezo apa ya: “Nda mɛ zo zu ko la ndoma tɛnɛ tɛ mbi, ndoli nga tɛnɛ ni na seni ko, lo nga ma wa kɔdɛ mɛ awa da tɛ lo na ndo tɛnɛ la.

²⁵ Ngoi mɛ ngu ani gbua gbua, asĩsĩ lɛkɛ lɛkɛ, yá aya kpengbani aga ti ndo da ni ko, ta da ni abukana ma, na lo mɛ ya, awa da ni na ndo tɛnɛ.

²⁶ Kanda zo zu ko la ama tɛnɛ mɛ mbi tɛnɛ, wa ta lo li ni na seni ma ko, lo nga ma wa buba mɛ awa da tɛ lo na ya butu.

²⁷ Ngoi mɛ ngu ani gbua gbua, asĩsĩ lɛkɛ lɛkɛ, yá aya kpengbani aga ti ndo da ni ko, da ni akara lupu lupu.”

Yezo aha azi na ye nga ma se tɛ gbia

²⁸ Ngoi mɛ Yezo ĩ kɔ nda hangɔ alo ni na azi butu butu wɛ ko, ala bema sĩ na lo ti se kɔdɛ tɛ lo ti hangɔ la na ye,

²⁹ ta sanga ma, lo ha ndo la na ye ni nga ma se tɛ gbia. Ta lo ha ndo la na ni nga ma se tɛ awa hangɔ ndia ma.