Matie 28 - Fana Ngbangɔ 1987

Yezo aso na pɛ kwá

¹ Ngoi mɛ wɔngɔ tɛrɛ ĩ ɔ wɛ, ĩ ti na lá yenga na nda perere ko, Maria wa Magadala, na Maria mɛ ndɛ̃ anɔ so bangɔ sɛndɛ tɛ Yezo.

² Ko bo ngoi kɔi ko, sese ayingi gbu gbu gbu. Angelo tɛ Gbia alo ka ndozu azu, anɔ abilingi kota tɛ́nɛ mɛ avĩ na nyɔ du sɛndɛ ni, abi katɛ, adu ndo ni.

³ Tɛrɛ angelo ni ndosũ ndo nga ma se mɛ bekpa ndotaima na ni nzɛrrr, bɔngɔ tɛ lo mbufuni pɛ pɛ pɛ nga ma tɛrɛ nyange.

⁴ Aturugu mɛ ndobata sɛndɛ ĩ hũ so ko, mbɛtɔ agbɔ̃ la sĩ, tɛrɛ la adɔ za za za, ala ti nga ma kinda.

⁵ Angelo apa hɛ̃ awe ko ya: “Ĩ zia mbɛtɔ. Mbi hĩnga ya, ĩ ndogi Yezo mɛ mbandasi agɔngɔ lo ndo krusi.

⁶ Ta lo so ndo mɛ ma, lo so na pɛ kwá, nga ma se ko ndo lo pa na ni. Wa í ga ĩ ba ndo mɛ mbandasi akpã na kinda tɛ lo lo mɛ.”

⁷ Awe ko ĩ ba ndo ni wɛ ko, angelo ko apa hɛ̃ la ya: “Ĩ nɔ hiɔ, ĩ pa hɛ̃ ava lo ya, lo so, ko na olo ko, lo ɔ uzu tɛ la, lo gwe ka Galilea, ko ndo mɛ ala na hũngɔ na lo la. Tɛnɛ mɛ mbi na ni ya mbi tɛnɛ hɛ̃ ĩ la.”

⁸ Awe ko adɔ sɛndɛ hiɔ azia, adiri na mbɛtɔ nga na dengɔ be sĩ. Ala kpɛlɛ, anɔ so pangɔ lo ni hɛ̃ ava Yezo.

⁹ Ngoi mɛ ala so ndogwe ko, bo ngoi kɔi ala tengbi na Yezo, la Yezo apa hɛ̃ la ya: “Mbi bala ĩ oo!” Ala i tɛrɛ la ka tɔ̃nda lo, akuku, agbɔ̃nɔ gɛrɛ lo, avɔrɔ lo.

¹⁰ La Yezo apa hɛ̃ la ya: “Ĩ zia mbɛtɔ! Ĩ nɔ, í pa hɛ̃ ayata mbi ya, ala gwe ka Galilea, ndo mɛ ala na hũngɔ na mbi da la.”

Aturugu apa lo ti ye mɛ ala hũ

¹¹ Ngoi mɛ awe ko ade so lege ko, ambanga aturugu mɛ ndobata sɛndɛ tɛ Yezo azia sɛndɛ, anɔ ka lɛ kɔdɔrɔ, akambisa atɛnɛ zu mɛ asi kai hɛ̃ agbia tɛ awa lungɔ Nzapa na ye.

¹² La agbia tɛ awa lungɔ Nzapa na ye, nga na akangba tɛ Ayuda abombi tɛrɛ la. Ala ĩ mangbi wɛ ko, ala mu faranga kpendema, ahɛ̃ aturugu ko,

¹³ apa hɛ̃ la ya: “Ĩ pa ya, ava Yezo aga na bi, anzĩ kinda tɛ lo na ngoi mɛ ĩ langana.

¹⁴ Wa se Pilato mɛ gbia tɛ leta ama lo ni ko, e na zungɔ na bɛ lo, ko e nga na lingɔ ya, ta ĩ lua tɛnɛ kɔi ma.”

¹⁵ La aturugu ko amu faranga ni, ali bo kwɛ kɔi nga ma se ko fɛrɛ apa na ni hɛ̃ la. La pa ni afɔnɔ na popo tɛ Ayuda, ko ade nga bo dɛngɔ na lá olo kpɔ.

Yezo afa tɛrɛ lo na ava lo

¹⁶ Ava Yezo sui kɔi ndoni kɔi agwe ka Galilea, ka ndo hɔtɔ mɛ Yezo afa na la.

¹⁷ Ngoi mɛ ala ĩ hũ Yezo ko, ala vɔrɔ lo. Kanda ambanga ade ndo kitɛ.

¹⁸ Yezo ai tɛrɛ lo ka tɔ̃nda la, apa hɛ̃ la ya: “Nzapa ahɛ̃ mbi nguru ya, mbi du Gbia ti ndo aye zu mɛ ka yayu, ko mbi du nga gbia ti ndo omɛ ge lɛ sese.

¹⁹ Wa ĩ gwe ka tɛ azi ti lɛ sese zu, ĩ li ya, ala ti ava mbi. Ĩ hɛ̃ la batisimɔ na ili To mbi Nzapa, na ili mbi Nyi lo, nga na ili Tɔrɔ Santo.

²⁰ Ĩ pa hɛ̃ la ya, ala tɔndɔ aye zu mɛ ndo mbi pa hɛ̃ ĩ. Wa ĩ hĩnga ya, mbi na dungɔ ndoni kɔi na ĩ ngoi zu, nga ka sese awɛ na ni.”