Matie 26 - Fana Ngbangɔ 1987

Agbia agbe lingo ti hongɔ Yezo

¹ Ngoi mɛ Yezo ĩ ha azi na atenɛ ko zu wɛ ko, lo pa hɛ̃ ava lo ya:

² “Ĩ hĩnga ya, angbã bi se, wa yenga ti Lipandasi tɛ e ati, ko mbanga zo na kangɔ mbi Nyi Zo ya, aho mbi ka ndo krusi.”

³ La agbia tɛ awa lungɔ Nzapa na ye, na akangba ti kɔdɔrɔ, abombi tɛrɛ la ka ya da tɛ Kaifa mɛ kota gbia tɛ awa lungɔ Nzapa na ye.

⁴ Ala mangbi, nyɔ la ase kɔi ya, ani gbɔ̃ Yezo na gbɛ mbingo, ani ho lo.

⁵ Ala mangbi ka popo tɛ la ya: “Ale ta e gbɔ̃ lo na ngoi ti yenga ma, se e li so ko, azi atɔmbɔkɔ.”

Mbanga zo wali kɔi akĩkĩ yɔmbɔ na li Yezo

⁶ Ngoi mɛ ndo Yezo ka kɔdɔrɔ mɛ ili ni la Betania ko, lo ndo ka ya da tɛ Simɔ mɛ ndiba tɛ lo awɛ.

⁷ Zo wali kɔi aga ka tɛ Yezo na mbenda so ti lo. Alɛkɛ mbenda ni na tɛ́nɛ mɛ ili ni la albatrɛ. Ko yɔrnbɔ ti kota faranga asĩ ya mbenda ni mɛkɛ̃. Ngoi mɛ Yezo so ndotɛ ye ko, zo wali ko ako nyɔ mbenda ni, akĩkĩ yɔmbɔ na li Yezo.

⁸ Ava Yezo ĩ hũ so ko, ngɔnzɔ agbɔ̃ la, ko ala so ndotɛnɛ ka popo tɛ la ya: “Nda gbɛ̃ngɔ yɔmbɔ ni nɛ?

⁹ Ale amu yɔmbɔ ni, avɔ̃ na kota faranga, ko amu faranga ni, akangbi na awa yɛle!”

¹⁰ Yezo ama tɛnɛ ko ala tɛnɛ, la lo pa hɛ̃ la ya: “I zia giangɔ bɛ zo wali olo mɛ. Ye mɛ lo li tɛrɛ mbi, adu nzɔ̃ni.

¹¹ Ta sanga ma, ĩ na awa yɛlɛ na dungɔ ndoni kɔi ngoi zu, kanda tɛ mbi ko, ta mbi na ngbãngɔ so tɔ̃nda ĩ ngoi zu ma.

¹² Yɔmbɔ mɛ zo wali olo akĩkĩ na tɛrɛ mbi ko, adu nga ma se mɛ azi na kĩkĩngɔ na yɔmbɔ natɛrɛ mbi, uzu ti ala hɔngɔ kinda tɛ mbi.

¹³ Mbi pa hɛ̃ ĩ ti bɛta tɛnɛ ya, na ndo kwɛ zu mɛ gbanda azi apa Nzɔ Pa tɛ Nzapa da ge lɛ sese ko, apa nga gbanda pa ti ye mɛ zo wali olo ali, ko ta bɛ azi ali nga gbanda na lo ma.”

Yudasi aye kangɔ Yezo bɛ agbia

¹⁴ Ava Yezo adu sui kɔi ndoni se. Ko mbanga va lo mɛ ili lo la Yudasi Iskariɔtɛ, anɔ ka tɛ agbia tɛ awa lungɔ Nzapa na ye,

¹⁵ ahũnda la ya: “Se mbi ka Yezo hɛ̃ ĩ ko, ye mɛ ĩ na hɛngɔ mbi nɛ?” Ala ĩ ma so ko, ala dikɔ faranga sui ta, ahɛ̃ lo.

¹⁶ Bo na ngoi ni ko la Yudasi ato nda gingɔ nzɔ̃ ngoi ya, ni ka Yezo hɛ̃ la.

Yezo na ava lo atɛ yenga ti Lipandasi

¹⁷ Kɔzo bi ti yenga ti mapa mɛ ta yɔrɔ ti susungɔ na ni da ma alengbi. Ko ava Yezo aga ahũnda lo ya: “Ndo mɛ mɔ ye ya, e tɔ hɛ̃ mɔ tɛ ti yenga da wa?”

¹⁸ La Yezo agbinya hɛ̃ la ya: “Ĩ nɔ ka lɛ kɔdɔrɔ, ka tɛ mbanga zo kɔi, ĩ pa hɛ̃ lo ya, Wa hangɔ lo tɛ Nzapa apa ya, ngoi tɛ ni alengbi wɛ, ko ni ye ya, ni na ava ni, ani tɛ yenga ge ya da tɛ mɔ.”

¹⁹ Ava Yezo anɔ, ali bo nga ma se mɛ Yezo apa na ni hɛ̃ la, ala tɔ tɛ ti yenga ti Lipandasi so ndo ko.

²⁰ Ndɔ ĩ de ko, Yezo na ava lo sui kɔi ndoni sɛ, ato nda tɛngɔ ye.

²¹ Ngoi mɛ ala so ndotɛ ye ko, Yezo apa hɛ̃ ava lo ya: “Mbi pa hɛ̃ ĩ ti bɛta tɛnɛ ya, zo kɔi so popo tɛ ĩ na kangɔ mbi hɛ̃ awa kɛ̃ngɔ mbi.”

²² Ava lo ĩ ma so ko, vundu agbɔ̃ la ma wo ma, zo kɔi kɔi ahũnda lo ya: “Gbia, adu mbi? Gbia, adu mbi?”

²³ La Yezo agbinya hɛ̃ la ya: “Zo ko la mbi na lo, e ndotɛ ye na olo na ya sɛmbɛ kɔi ko, wa kangɔ mbi la.

²⁴ Biani, mbi Nyi Zo, mbi na kpingɔ nga ma se mɛ Buku tɛ Nzapa apa na ni na lo tɛ mbi. Kanda siɔ lo na tingɔ na wa kangɔ mbi! Nzɔ̃ni ale ta adú ndo lo ma.”

²⁵ Yudasi mɛ wa kangɔ Yezo ahũnda nga Yezo ya: “Wa hangɔ lo tɛ Nzapa, adu mbi?” La Yezo agbinya hɛ̃ lo ya: “Tɛnɛ ni la mɔ tɛnɛ.”

Tɛ tɛ Gbia

²⁶ Ngoi mɛ ala so ndotɛ ye ko, Yezo amu mapa, lo ĩ hɛ̃ sia kɔli hɛ̃ Nzapa wɛ ko, lo kongbi ya ni, lo kangbi na ava lo, lo pa hɛ̃ la ya: “Ĩ mu mapa olo ĩ tɛ, tɛrɛ mbi la.”

²⁷ So pɛni, lo mu kangu mɛ vinɔ ya ni, lo ĩ hɛ̃ sia kɔli hɛ̃ Nzapa wɛ ko, lo hɛ̃ ni hɛ̃ ava lo, lo pa hɛ̃ la ya: “Ĩ zu ĩ nyɔ ni.

²⁸ Ta sanga ma, vinɔ olo adu mɛnɛ tɛrɛ mbi mɛ asa so azi gba. Mɛnɛ ni afa ngbanga mɛ Nzapa na azi agbe ya, Nzapa aka lɛ lo ndo siɔ ye tɛ la.

²⁹ Mbi pa hɛ̃ ĩ ya, ta mbi ti nyɔ vinɔ olo fani mɛ ndɛ̃ ma, nga ka lá mɛ mbi na ĩ, e na nyɔngɔ fana vinɔ ka Kɔdɔrɔ Gbia tɛ To mbi, wadila.”

³⁰ La Yezo na ava lo aye bia ti yenga, so pɛni, ala gwe ka ndo hɔtɔ ti Olivie.

Yezo apa ya Petro na bɛrɛngɔ lo tɛ ni

³¹ Ngoi mɛ ala ĩ si ka ndo hɔtɔ ko, Yezo apa hɛ̃ ava lo ya: “Na bi olo ko, ĩ zu ĩ dɔ ndɛ mbi, ĩ zia. Ta sanga ma, Buku tɛ Nzapa apa ya: ‘Mbi ho gbanda wa batangɔ angasã ngbaga, ko angasã ngbaga ni na li nɔ tɛ la zu na ngbãngɔ wawa.’

³² Wa na ngoi mɛ mbi na songɔ na pɛ kwá ko, mbi na ɔngɔ uzu tɛ ĩ gwengɔ ka Galilea.”

³³ Petro apa hɛ̃ lo ya: “Bɛ se ala mɛ ndɛ̃ zu adɔ mɔ azia ko, ta mbi na dɔngɔ tɛ mbi mɔ ziangɔ bɛ gbɔ ma!”

³⁴ Yezo agbinya hɛ̃ lo ya: “Mbi pa hɛ̃ mɔ ti bɛta tɛnɛ ya, ndɛ na bi olo mɛ, uzu ti kɔndɔ tongɔ mbela ko, mɔ bere ndɛ fani ta ya, ta mɔ hĩnga mbi ma.”

³⁵ Petro apa hɛ̃ lo ya: “Bɛ se adu ya, aho mbi na mɔ ndoni kɔi ko, ta mbi na bɛrɛngɔ lo tɛ mɔ bɛ gbɔ ma.” La ambanga ava Yezo mɛ ndɛ̃ zu apa nga bo so.

Yezo asambela Nzapa ka Gɛtɛsemane

³⁶ Ngoi mɛ Yezo na ava lo ĩ si na mbanga ndo kɔi mɛ ili ni la Gɛtɛsemane ko, lo pa hɛ̃ ava lo ya: “Ĩ dunga so ndo mɛ, mbi nɔ so sambelangɔ Nzapa.”

³⁷ La lo mu Petro na aya Zebedeo ti kɔli se, ala ɔ ndoni kɔi. Vundu na sasambe ato nda gbɔ̃ngɔ lo.

³⁸ Ko lo pa hɛ̃ la ya: “Vundu ti kwá mɛ mbi na kpingɔ agbɔ̃ mbi. Wa ĩ ngbã so ndo mɛ, ta ĩ la langɔ ma.”

³⁹ La Yezo anɔ ka uzu yakere, akuku, atolo lɛ lo tise, avɔrɔ To lo ya: “Baba, se alengbi ko, mɔ hã mbi na ya pɛnɔ olo mɛ mbi na hũngɔ mɔ zi. Wa ta mɔ li nga ma se mɛ bɛ mbi aye ma, kanda li nga ma se mɛ bɛ mɔ aye.”

⁴⁰ Lo ĩ sambela wɛ ko, lo diri ka tɔ̃nda ava lo, ko lo tã ala langana. Lo pa hɛ̃ Petro ya: “Petro, ta mɔ du bɛ nga lɛ mɔ ngɛ̃ na pɛ nyi ngoi yakere mɔ ba ndo ma!

⁴¹ Ale ĩ du lɛ ĩ ngɛ̃, ĩ sambela Nzapa, so Satana atara bɛ ĩ, ko ĩ ti. Bɛ zo ndoye lingɔ nzɔ̃ ye, kanda tɛrɛ lo adu woni.”

⁴² Lo diri lo nɔ, ko lo sambela ya: “Baba, se mɔ ye bo ya, pɛnɔ olo asi na mbi ko, ale mɔ li bo ye mɛ bɛ mɔ aye.”

⁴³ Lo diri ka tɔ̃nda ava lo, ko lo tã la alangana. Ala ha dungɔ lɛ la ngɛ̃ ti langɔ gba.

⁴⁴ Yezo ti zia la so ndo ko, aɔ, ko lo sambela ti fani ta bo na ngĩ lɛ tɛnɛ ko kɔi.

⁴⁵ So pɛni, lo diri ka tɔ̃nda ava lo, lo pa hɛ̃ la ya: “Ĩ dɛ bo ĩ langana, ĩ ndowɔ tɛrɛ ĩ? Wa ĩ ba saa alengbi wɛ, ko zo kɔi na kangɔ mbi Nyi Zo hɛ̃ awa lingɔ siɔ ye.

⁴⁶ Ĩ longa é gwe! Ĩ ba zo mɛ aka mbi aga wɛ.”

Aturugu agbɔ̃ Yezo

⁴⁷ Ngoi mɛ Yezo ade na tɛnɛngɔ tɛnɛ hɛ̃ ava lo ko, Yudasi apia asi. Lo du mbanga va Yezo na popo tɛ ava lo sui kɔi ndoni se. Lo ga ndoni kɔi na azi butu butu mɛ na azabe nga na akende so ti la. Adu agbia tɛ awa lungɔ Nzapa na ye, nga na akangba ti kɔdɔrɔ la ato azi ni ko.

⁴⁸ Yudasi mɛ wa kangɔ Yezo afa ndo azi ko butu butu na se kɔdɛ mɛ lo na lingɔ, wa ala hĩnga zo mɛ ala na gangɔ so gbɔ̃ngɔ lo. Kɔdɛ ni lo mɛ: lo pa ndo hɛ̃ la ya, zo ko la ni na bɔmbɔngɔ lo ko, zo mɛ ala ga so gbɔ̃ngɔ lo la, ko ale ala gbɔ̃ lo.

⁴⁹ Ngoi mɛ ala ĩ si ka ndo ni ko, Yudasi anɔ hiɔ ka tɛ Yezo, apa hɛ̃ lo ya: “Wa hangɔ lo tɛ Nzapa, mbi bala mɔ!” Lo bɔmbɔ Yezo.

⁵⁰ Yezo agbinya hɛ̃ lo ya: “Kwa mbi, li bo ye mɛ mɔ ga so lingɔ ni.” Azi ko ĩ hũ so ko, ala gbɔ̃ Yezo.

⁵¹ Na popo tɛ azi mɛ ndo ana Yezo aga ko, zo kɔi ahã zabe tɛ lo, afa na ma mbanga wa kwa tɛ kota gbia tɛ awa lungɔ Nzapa na ye.

⁵² La Yezo apa hɛ̃ va lo ni ko ya: “Diri na zabe tɛ mɔ ka ya da ni. Ta sanga ma, azi zu ko ndotiri to na zabe ko, aho nga la gbanda na zama.

⁵³ Hĩnga ya, se mbi hũnda To mbi, ko bo lo hiɔ ko, lo lengbi ti tongɔ ngbunguma li nɔ tɛ aangelo sui kɔi ndoni sɛ tɛ aturugu, ko ala za mbi.

⁵⁴ Wa se mbi li nga so ko, ta tɛnɛ mɛ asu ka ya Buku tɛ Nzapa na lo tɛ mbi ati na Seni ma. Buku tɛ Nzapa apa ya, ale alo ni ko asi na mbi.”

⁵⁵ So pɛni, Yezo apa hɛ̃ azi ko butu butu ya: “Ĩ ga na azabe na akende so gbɔ̃ngɔ mbi, ma bere mbi wa nzĩ. Lá kɔi kɔi, mbi ndodu ndo ka ya kota da Nzapa so hangɔ azi na tɛnɛ tɛ Nzapa, ko ta ĩ gbɔ̃ ndo mbi ma.

⁵⁶ Wa ale ĩ gbɔ̃ mbi, wadila tɛnɛ mɛ awa pangɔ nyɔ Nzapa asu ka ya Buku tɛ Nzapa na lo tɛ mbi ati na seni.”

Anɔ na Yezo ka gbɛlɛ awa fangɔ ngbanga

⁵⁷ Awa hangɔ ndia, na akangba ti kɔdɔrɔ abombi tɛrɛ la ka tɛ Kaifa mɛ kota gbia tɛ awa lungɔ Nzapa na ye. Ngoi mɛ ĩ gbɔ̃ Yezo ko, amu lo, anɔ̃ na lo ka gbɛlɛ la.

⁵⁸ Petro autɛ ndo la, kanda lo tɛ lo ndo ka ndani yɔngɔrɔni. Lo nɔ, lo li na ya ngbo tɛ kota gbia tɛ awa lungɔ Nzapa na ye. Lo ĩ si kai ko, lo du tise ndoni kɔi na awa batangɔ ya ngbo, ko ala so ndoku se mɛ na fangɔ na ngbanga tɛ Yezo.

^59-60 Agbia tɛ awa lungɔ Nzapa na ye, na awa fangɔ ngbanga zu agi ndo kɔdɛ ya, ani kara ló tɛrɛ Yezo, wa aho lo. Azi ma wo ma aga ndo akara ló na nvɛnɛ tɛrɛ lo, ko abɛ nga so ko, ta ala lua lo na tɛnɛ kɔi ma. So pɛni akɔli sɛ asi,

⁶¹ apa ya: “Kɔli olo apa ndo ya, ni lengbi ti karangɔ kota da Nzapa, ko ni diri ni wa ni na ya bi ta.”

⁶² La kota gbia tɛ awa lungɔ Nzapa na ye alo ndozu, ahũnda Yezo ya: “Ta mɔ lengbi ti gbinyangɔ tɛnɛ bɛ kɔi ma? To mɛ azi olo ndovɔ̃ tɛrɛ mɔ nɛ?”

⁶³ Yezo akai ti ti ti. La kota gbia ko ati ahũnda lo ya: “Na ili Nzapa mɛ lɛ lo ngɛ̃, mbi hũnda mɔ ya, se mɔ du Mɛsia Nyi Nzapa ko, mɔ fa sereka.”

⁶⁴ Yezo agbinya hɛ̃ lo ya: “Tɛnɛ ni la mɔ tɛnɛ. Wa mbi pa hɛ̃ ĩ ya, na pɛ ngoi yakere ko, ĩ na hũngɔ mbi Nyi Zo, dungɔ na ndo kɔti ti Nzapa mɛ wa nguru. Ĩ na hũngɔ nga mbi na gangɔ na ya da baba ka lɛ ndozu.”

⁶⁵ Kota gbia ko ĩ ma so ko, ngɔnzɔ agbɔ̃ lo, lo suru bɔngɔ tɛ lo nvɛni, lo pa ya: “Lo guru Nzapa! Ta é ti é ma atemwɛ ma! Ĩ ma gu mɛ lo guru na Nzapa wɛ.

⁶⁶ Wa ĩ da bɛ ĩ ya nɛ?” Ala gbinya hɛ̃ lo ya: “Ngbanga ati na lo, ale aho lo.”

⁶⁷ So pɛni, ala kuku solo lɛ lo, asɔ̃nɔ lo na gɔbɔ. Ambanga azi ababa ma lo,

⁶⁸ ahũnda lo ya: “Mɛsia, di zo mɛ asɔ̃ mɔ!”

Petro abɛrɛ ya ta ni hĩnga Yezo ma

⁶⁹ Petro adu ka gegi, bo so ya ngbo ni ko. Mbanga wali kɔi mɛ wa kwa tɛ kota gbia tɛ awa lungɔ Nzapa na ye aga, apa hɛ̃ Petro ya: “Mɔ ndoɔ nga ndoni kɔi na Yezo mɛ wa Galilea.”

⁷⁰ Petro abɛrɛ na gbɛlɛ azi zu ya: “Ta mbi hĩnga tɛnɛ ko mɔ ndotɛnɛ ma.”

⁷¹ Petro ĩ bɛrɛ wɛ ko, lo hã nɔ, lo nɔ ka nyɔ gbágbá ti ya ngbo. Mbanga wa kwa mɛ ndɛ̃ ti wali ĩ hũ lo ko, apa hɛ̃ azi mɛ so ndo ko ya: “Zo olo na Yezo mɛ wa Nazarɛtɛ ndoɔ ndoni kɔi.”

⁷² Petro abɛrɛ fani mɛ ndɛ̃ ya: “Sereka, ta mbi hĩnga kɔli ko ma.”

⁷³ Ngoi ĩ ɔ so pɛni yakere ko, azi mɛ ndo so ndo ko aga, apa hɛ̃ Petro ya: “Biani, mɔ mbanga va Yezo: se tɛnɛngɔ tɛnɛ tɛ mɔ ndofa ndo mɛ mɔ lo da.”

⁷⁴ Petro apa hɛ̃ la ya: “Se mbi pa nvɛnɛ ko, ale Nzapa ahɛ̃ mbi etumbu. Sereka, ta mbi hĩnga kɔli ko ma!” Bo na ngoi ni ko la kɔndɔ ato mbela kɔkɔlia kɔɔɔ!

⁷⁵ La Petro ada bɛ lo na tɛnɛ mɛ Yezo atɛnɛ hɛ̃ lo ya: “Uzu ti kɔndɔ tongɔ mbela ko, mɔ na bɛrɛngɔ fani ta ya, ta mɔ hĩnga mbi ma.” Ko Petro alo ka ya ngbo, asi, ato to sinyɛ sinyɛ.