Matie 21 - Fana Ngbangɔ 1987

Yezo asi ka kɔdɔrɔ ti Yeruzalɛmɛ

¹ Ngoi mɛ Yezo na ava lo ĩ doli na Yeruzalɛmɛ, ka kɔdɔrɔ mɛ ili ni Bɛtɛfaze ko, ala si na ndo hɔtɔ mɛ ili ni la Olivie. La Yezo ato ava lo sɛ na kwa ka gbɛlɛ lo ya:

² “Ĩ nɔ ka kɔdɔrɔ ko la ka gbɛlɛ ĩ. Bo na ngoi mɛ ĩ si kai ko, ĩ na hũngɔ ta punda mɛ agbe lo na nyi lo na gu kɛkɛ. Ĩ zara la, ĩ ga na ni hɛ̃ mbi.

³ Wa se zo atɛnɛ hɛ̃ ĩ tɛnɛ ko, í gbinya ya: ‘Gbia tɛ e aye kongɔ ndo ni.’ Ko bo na ngoi ni ko, lo na ziangɔ la hɛ̃ ĩ, ko ĩ ga na la.”

⁴ Lo ni ko asi ndo ya, tɛnɛ mɛ ndo wa pangɔ nyɔ Nzapa atɛnɛ ati na seni. Tɛnɛ ni lo mɛ:

⁵ “Ĩ pa hɛ̃ azi ti kɔdɔrɔ ti Siona ya: Ĩ ba Gbia tɛ ĩ la ndoga ka tɛ ĩ, Lo ma ndo ta punda, na ndo nyi punda, Lo du dede zo sĩ.”

⁶ La ava Yezo agwe, ali ye na se nyɔ mɛ fɛrɛ Yezo ahɛ̃ la.

⁷ Ala mu ta punda na nyi ni, anɔ na ni hɛ̃ Yezo, ala u akota bɔngɔ tɛ la na ndo la, la Yezo ako ndo ni.

⁸ Azi gba ahãna akota bɔngɔ tɛ la aga na ni, agbala na ndo lege, ambanga mɛ ndɛ̃ afara ambambu kɛkɛ, aga na ni asa ndo lege ya, lo ɔ ti ndo ni.

⁹ Azi butu butu mɛ ndodɔ nɔ gbɛlɛ Yezo, nga na ala mɛ ndoga pɛko lo adɛrɛ kɔngɔ ya: “E gonda Tara Davidi! Gbia Nzapa asunu bɛ zo ko la tɛrɛ gangɔ na ili lo Nzapa ma ke! É gonda Nzapa mɛ ka yayu!”

¹⁰ Yezo ĩ si ka Yeruzalɛmɛ ko, azi zu atɔmbɔkɔ. Ala ndohũnda ndo ya: “Kɔli ko na?”

¹¹ Azi ko butu butu agbinya hɛ̃ la ya: “Yezo wa pangɔ nyɔ Nzapa, lo mɛ nga wa Nazarɛtɛ la, Nazarɛtɛ mɛ ka sese ti Galilea.”

Yezo ali ka ya kota da Nzapa

¹² Yezo ĩ li ka ya kota da Nzapa, lo ĩ hũ awa kangɔ ye, na awa vɔ̃ngɔ ye ko, lo toma la. Lo tukia mɛsa tɛ awa tongbingɔ faranga, na kiti tɛ awa kangɔ ambipa.

¹³ Ko lo pa hɛ̃ la ya: “Buku tɛ Nzapa apa ya: ‘Azi na pangɔ ya, da tɛ mbi Nzapa, adu da mɛ azi na sambelangɔ mbi da.’ Kanda tɛ ĩ ko, ĩ gbinya ni ati nga ma do tɛ́nɛ mɛ awa nzĩ ndobere da!”

¹⁴ Awa ziba na awa nzɛ̃ anɔ ka tɛ Yezo ka ya kota da Nzapa, lo sara la.

¹⁵ Agbia tɛ awa lungɔ Nzapa na ye, nga na awa hangɔ ndia atɔmbɔkɔ. Ta sanga ma, ala hũ aye ti bemangɔ mɛ lo ndoli, ala ma nga ayangambi so ndodɛrɛ kɔngɔ ka ya kota da Nzapa ya: “E gonda Tara Davidi!”

¹⁶ Ala hũnda Yezo ya: “Mɔ ma tɛnɛ mɛ ala ndotɛnɛ?” Yezo agbinya hɛ̃ la ya: “Ĩi, mbi ma ni. Ko ta ĩ dɛ ĩ di mbɛti mɛ asu ka ya Buku tɛ Nzapa ma? Mbɛti ni lo mɛ: ‘Mɔ li ya ayangambi na apɛsɛ aya agonda mɔ.’ ”

¹⁷ So pɛni, lo dɔ la lo zia, lo lo so ya kɔdɔrɔ ko lo si, lo gwe ka Betania. Lo ĩ si kai ko, lo la so ndo ko.

Yezo azonga kɛkr ntɛ ili ni la figie

¹⁸ Ĩ la bu nda ĩ de, na ngoi mɛ Yezo so ndodiri ka Yeruzalɛmɛ ko, gwɛ̃ agbɔ̃ lo.

¹⁹ Lo hũ kɛkɛ mɛ ili ni la figie so tɔ̃ lege. Lo i tɛrɛ lo ka tɔ̃ ni, ko lo tã gi kugbe. La lo pa hɛ̃ kɛkɛ figie ni ya: “Ta mɔ ti le gbanda bɛ gbɔ ma!” Bo na ngoi ni ko, kɛkɛ ko aulɛ wa!

²⁰ Ava Yezo ĩ hũ so ko, ala bema sĩ, ko ala hũnda Yezo ya: “Kɔdɛ mɛ kɛkɛ figie olo aulɛ wa bo ngoi kɔi sia?”

²¹ Yezo agbinya hɛ̃ la ya: “Mbi pa hɛ̃ ĩ ti bɛta tɛnɛ ya, se ĩ ye lo tɛ Nzapa, ko se ta ĩ dɛ kitɛ ma ko, ĩ lengbi ti lingɔ ye mɛ mbi li tɛrɛ kɛkɛ olo. Ko ta ĩ lengbi ti lingɔ bo ye ko kɔi ma, kanda ĩ lengbi nga ti pangɔ hɛ̃ hɔtɔ olo ya: ‘Hã so ndo mɛ, mɔ ti ka ya kota ngu,’ ko na tingɔ nga bo na seni.

²² Se ĩ ye lo tɛ Nzapa ko, ĩ na luangɔ ye zu mɛ ĩ na yɔngɔ ti lo, na ngoi sambela.”

Zo mɛ ahɛ nyɔ bɛ Yezo ya lo li na aye na?

²³ Yezo ali ka ya kota da Nzapa, aha tɛnɛ tɛ Nzapa, la agbia tɛ awa lungɔ Nzapa na ye, nga na Ayuda mɛ akangba ti kɔdɔrɔ anɔ ka tɛ lo, ahũnda lo ya: “Mɔ lua nyɔ ti lingɔ na aye olo ka ti na? Zo mɛ ahɛ̃ mɔ nyɔ ya mɔ li na aye mɛ mɔ ndoli na?”

²⁴ Yezo agbinya hɛ̃ la ya: “Mbi nga na hũndangɔ ĩ bo na ndo kɔi. Se ĩ gbinya hɛ̃ mbi, wadila mbi di ili zo mɛ ahɛ̃ mbi nyɔ ya mbi li na aye ni.”

²⁵ La lo hũnda la ya: “Zo mɛ ndo ato Yoanɛ ya, lo hɛ̃ azi batisimɔ na? Nzapa la ato lo, bere azi la ato lo?” Ala ĩ ma so ko, ala to nda bimbingɔ tɛnɛ na popo tɛ la ya: “Se e gbinya hɛ̃ lo ya, Nzapa la ato Yoanɛ ko, lo na hũndangɔ e ya, wa ta e ye ndo lo tɛ Yoanɛ ma ya nɛ?

²⁶ Se e pa nga ya, azi la ato lo ko, adu siɔni, ko ale e kpɛ azi butu butu, ta sanga ma, azi zu aye lo tɛ Yoanɛ ya, Yoanɛ adu wa pangɔ nyɔ Nzapa.”

²⁷ La ala gbinya hɛ̃ Yezo ya: “Ta e hĩnga ma.” Ko lo pa hɛ̃ la ya: “Wa ta mbi nga na dingɔ hɛ̃ ĩ zo mɛ ahɛ̃ mbi nyɔ ya, mbi li na aye ni ma.”

Matɔ tɛ aya kɔli sɛ

²⁸ Yezo apa nga ya: “Ĩ da bɛ ĩ na lo tɛnɛ olo ya nɛ? Tɛnɛ ni lo mɛ: mbanga kɔli kɔi ndo na aya lo ti kɔli sɛ. Kɔli ko apa hɛ̃ kɔzo nyi lo ya: ‘Nyi mbi, nɔ ndɛ mɔ li kwa ka yaka vinɔ.’

²⁹ Nyi lo agbinya hɛ̃ lo ya: ‘Ta mbi ye ma.’ Kanda so pɛni ko, lo diri na nyɔ lo, ko lo nɔ ka yaka vinɔ.

³⁰ So pɛni, to aya kɔli ko apa nga bo tɛnɛ ni ko hɛ̃ nyi lo ti sɛ. Nyi lo ti sɛ agbinya hɛ̃ lo ya: ‘To mbi, mbi ye.’ Ko ta lo nɔ ma.

³¹ Ko na popo tɛ aya kɔli ko sɛ ko, zo mɛ ali ye mɛ bɛ to lo aye na?” Agbia tɛ awa lungɔ Nzapa na ye, nga na akangba ti kɔdɔrɔ agbinya ya: “Adu nyi lo ti kɔzoni.” La Yezo agbinya hɛ̃ la ya: “Mbi pa hɛ̃ ĩ ti bɛta tɛnɛ ya, awa sɔrɔngɔ lapo na awe mɛ angbabo asi gbanda uzu tɛ ĩ ka Kɔdɔrɔ Gbia tɛ Nzapa.

³² Ta sanga ma, Yoanɛ aga ndo ka tɛ ĩ so fangɔ ĩ na bɛta lege, ko ta ĩ ye ndo lo tɛ lo ma. Kanda awa sɔrɔngɔ lapo na awe mɛ angbabo aye ndo lo tɛ lo. Ĩ hũ ndo kwɛ ya, ala ye lo tɛ lo, ko ta ĩ gbinya ndo bɛ ĩ ya, ĩ ye nga lo tɛ lo ma.”

Matɔ tɛ asiɔ awa kwa ti yaka vinɔ

³³ Yezo apa ya: “Ĩ ma mbanga matɔ mɛ ndɛ̃ lo mɛ: kɔli kɔi asɛ̃ yaka alu na vinɔ. Lo kpɔ gbágbá tɛrɛ ni, lo gɛ̃ du ti gungɔ na le vinɔ ni, lo wa gbaraga mɛ ganguruni, so batangɔ na yaka ni. Ko lo mu yaka ni, lo hɛ̃ awa kwa ya, ala lɛkɛ ni, wa se ngoi ti kɔngɔ le vinɔ alengbi ko, ani kangbi ya ni. So pɛni, lo gwe fɔnɔ.

³⁴ Ngoi ti kɔngɔ le vinɔ ĩ lengbi ko, nvɛ̃ yaka ato awa kwa tɛ lo ya, ala nɔ ka tɛ awa kwa ti yaka vinɔ, ko awa kwa ti yaka vinɔ ahɛ̃ nga ni tɛ ni.

³⁵ Awa kwa tɛ nvɛ̃ yaka ĩ nɔ ĩ si kai ko, awa kwa ti yaka agbɔ̃nɔ la, asɔ̃ mbanga kɔi yombe, aho mbanga mɛ ndɛ̃, aboroka wa kwa ti ta na tɛ́nɛ.

³⁶ La nvɛ̃ yaka ato ambanga awa kwa mɛ ndɛ̃ ma wo ma, aɔ ndo ala ti uzu, ko awa kwa ti yaka ko ali la nga bo so.

³⁷ Ti kɔngɔ nda ni ko, lo ye ya ni to nyi ni hɛ̃ la, lo pa ka ya bɛ lo ya: ‘Ala na tɔndɔngɔ nyi mbi.’ La lo to lo.

³⁸ Ngoi mɛ awa kwa ti yaka ko ĩ hũ nyi nvɛ̃ yaka so ndoga ko, ala tɛnɛ na popo tɛ la ya: ‘Ĩ ba zo mɛ gbanda ati nvɛ̃ yaka lo mɛ. E nɔ, é ho lo, wadila yaka ni angbã ndũ ye tɛ e!’

³⁹ La ala gbɔ̃ lo, abi lo ka pɛ yaka, aho lo.”

⁴⁰ La Yezo ahũnda la ya: “Ngoi mɛ se nvɛ̃ yaka aga ko, ye mɛ lo na lingɔ na awa kwa ti yaka ko nɛ?”

⁴¹ Ala gbinya hɛ̃ lo ya: “Ta lo na mangɔ vundu tɛ la ma, lo na hongɔ la. Ko lo na mungɔ yaka ni, ziangɔ hɛ̃ ambanga awa kwa mɛ ndɛ̃ ya, ala lɛkɛ ni, wa se ngoi ti kɔngɔ le vinɔ alengbi ko, ala hɛ̃ nga ni tɛ ni.”

⁴² So pɛni, Yezo apa hɛ̃ la ya: “Mbi hĩnga nzɔ̃ni ya, ĩ di tɛnɛ mɛ asu ka ya Buku tɛ Nzapa. Tɛnɛ ni lo mɛ: ‘Tɛ́nɛ mɛ ndo awa wangɔ da akɛ̃, abi tise, La ati tɛ́nɛ ti nda ngɔrɔ da. Ĩ ba ye mɛ ndo Gbia Nzapa ali la, Ko e hũ ya, adu ye ti bemangɔ!’ ”

⁴³ Yezo apa nga ya: “Nda mɛ mbi pa hɛ̃ ĩ ya, ahã gbanda Kɔdɔrɔ Gbia tɛ Nzapa ka tɛ ĩ, ahɛ̃ azi mɛ sé du tɛ la alengbi na Kɔdɔrɔ ni la. [

⁴⁴ Zo ko la ati na ndo tɛ́nɛ ni ko, tɛrɛ lo na karangɔ. Wa se tɛ́nɛ ni ati ndo zo ko, aoro ya lo lupu lupu.]”

⁴⁵ Agbia tɛ awa lungɔ Nzapa na ye, na Afarizeo ama amatɔ tɛ Yezo, ko ala hĩnga ya, lo tɛnɛ tɛnɛ ni hɛ̃ ani.

⁴⁶ La ala gi kɔdɛ ya, ani gbɔ̃ lo, ko mbɛtɔ tɛ azi mɛ butu butu agbɔ̃ la, na lo mɛ ya, azi ko ndomu ndo Yezo ya, lo wa pangɔ nyɔ Nzapa.