Matie 1 - Fana Ngbangɔ 1987

Akotara Yezo

¹ Ĩ ba ili akotara Yezo Kristo mɛ tara Davidi, Davidi mɛ tara Abrahama lo mɛ:

² Abrahama adú Izaki, Izaki adú Yakobo, Yakobo adú Yuda na ayata Yuda.

³ Yuda adú Farɛsi na Zara (ta la la Tamara). Farɛsi adú Ɛsrɔmɛ. Ɛsrɔmɛ adú Arama.

⁴ Arama adú Aminadaba, Aminadaba adú Nasɔna, Nasɔna adú Salmona,

⁵ Salmona adú Boazɛ (ta Boazɛ la Rahaba). Boazɛ adú Obɛdɛ (ta Obɛdɛ la Ruti), Obɛdɛ adú Izai,

⁶ Izai adú gbia Davidi. Davidi adú Salomɔ (ta Salomɔ ndo la ya Uri).

⁷ Salomɔ adú Roboama, Roboama adú Abia, Abia adú Asafɛ,

⁸ Asafɛ adú Yozafata, Yozafata adú Yorama, Yorama adú Oziasi,

⁹ Oziasi adú Yoatama, Yoatama adú Akazɛ, Akazɛ adú Ezekiasi,

¹⁰ Ezekiasi adú Manase, Manase adú Amona, Amona adú Yoziasi,

¹¹ Yoziasi adú Yekoniasi na ayata lo, na ngoi mɛ ndo agbɔ̃nɔ awa Izrayɛlɛ agwe na la ka Babilɔnɛ.

¹² Ngoi mɛ ndo agbɔ̃nɔ awa Izrayɛlɛ agwe na la ka Babilɔnɛ ko, Yekoniasi adú Salatiɛlɛ, Salatiɛlɛ adú Zorobabɛlɛ,

¹³ Zorobabɛlɛ adú Abiudu, Abiudu adú Eliakimi, Eliakimi adú Azɔrɔ,

¹⁴ Azɔrɔ adú Sadɔkɛ, Sadɔkɛ adú Akimi, Akimi adú Eliudu,

¹⁵ Eliudu adú Eleazarɛ, Eleazarɛ adú Matanɛ, Matanɛ adú Yakobo,

¹⁶ Yakobo adú Yozɛfu mɛ kɔ Maria, Maria mɛ ta Yezo, Yezo mɛ andoili lo ya Mɛsia.

¹⁷ Tongɔ ka ndo Abrahama singɔ ka ndo Davidi ko, ale tɛ azi ndo kwɛ zu sui kɔi ndoni siɔ. Tongɔ ka ndo Davidi singɔ na ngoi mɛ ndo agbɔ̃nɔ na awa Izrayɛlɛ, agwe na la ka Babilɔnɛ ko, ale tɛ azi ndo sui kɔi ndoni siɔ. Ko tongɔ na ngoi ni ko, singɔ na ngoi mɛ adú na Mɛsia ko, ale tɛ azi ndo nga sui kɔi ndoni siɔ.

Maria adú Yezo Kristo

¹⁸ Ĩ ma se mɛ ndo adú na Yezo Kristo lo mɛ. Yozɛfu agbe ndo lo tɛ Maria mɛ wa dúngɔ Yezo. Kanda uzu ti ala dungbingɔ ko, Maria apia ndo amɛ ngɔ na lo nguru tɛ Tɔrɔ Santo.

¹⁹ Yozɛfu mɛ agbe lo tɛ Maria ko, lo ndo bɛta zo. Ngoi mɛ ndo Yozɛfu ĩ hũ ya, Maria apia amɛ ngɔ ko, ta lo ye ndo singɔ na lo ni yango ma. Lo ye ndo ziangɔ Maria na gbɛ mbingo.

²⁰ Ngoi mɛ ndo lo ndobinga bɛ lo so ko, lo hũ suma, ko na ya suma ni ko, angelo tɛ Gbia asi gbɛlɛ lo, apa hɛ̃ lo ya: “Yozɛfu, tara Davidi, ta mbɛtɔ ti dungɔ na Maria agbɔ̃ mɔ ma, ta sanga ma, lo mɛ ngɔ ni na lo nguru tɛ Tɔrɔ Santo.

²¹ Lo na dúngɔ nyi kɔli, ko mɔ na dingɔ ili nyi ni ya Yezo, ta sanga ma, lo gbanda la lo so azi tɛ lo na ya asiɔ ye tɛ la.”

²² Ló ni ko zu asi ya, tɛnɛ mɛ ndo Gbia Nzapa akpã na nyɔ awa pangɔ nyɔ lo, la ala tɛnɛ ati na seni. Tɛnɛ ni lo mɛ:

²³ “Wali mɛ ade li lo ngbɔ̃ amɛ gbanda ngɔ, lo dú gbanda nyi kɔli, Ko adi gbanda ili nyi ni ya, Emanuɛlɛ.” (Nda ili ni ko la: “Nzapa ndodu ndoni kɔi na e.”)

²⁴ Ngoi mɛ Yozɛfu ĩ zara lɛ lo ko, lo li bo nga ma se ko angelo tɛ Gbia ahɛ̃ na nyɔ hɛ̃ lo, lo mu ya lo Maria, lo kpã ka nyɔ da tɛ lo.

²⁵ Kanda ta ala du ndo ti kɔli na wali ma, ngbĩi ngoi mɛ Maria adú na nyi lo, la Yozɛfu adi ili nyi ni ya, Yezo.