Marko 6 - Fana Ngbangɔ 1987

Ta azi ti Nazarɛtɛ aye lo tɛ Yezo ma

¹ Yezo na ava lo alo so ndo ko, agwe ka kɔdɔrɔ ti Nazarɛtɛ mɛ ndo lo mai da.

² Ĩ da na lá ti wɔngɔ tɛrɛ ko, lo to nda hangɔ azi na tɛnɛ tɛ Nzapa ka ya da sambela. Azi gba mɛ ama tɛnɛ tɛ lo abema sĩ. Ala so ndopa ya: “Oko alo wa? Lo lua ndara olo so wa? Zo mɛ ahɛ̃ lo kɔdɛ ti lingɔ na aye ti kpɛnɛ olo na?

³ Lo mɛ wa surungɔ kpongbo, lo mɛ nga nyi Maria, ayata lo ti kɔli la Zaki, Yozɛ, Yudɛ nga na Simɔ, ayata lo mɛ awe ndodu nga so popo tɛ e ko, ta lo lo ma?” Ko alo ni ko zu agbanzi azi ti kɔdɔrɔ ni na yengɔ lo tɛ Yezo.

⁴ La Yezo apa hɛ̃ la ya: “Na ndo kwe ko, andotɔndɔ wa pangɔ nyɔ Nzapa, wenge bo azi ti kɔdɔrɔ mɛ adú lo da, na asongo lo, nga na nda se wa tɛ lo.”

⁵ Ta Yezo ali ndo ye ti kpɛnɛ kɔi kai ma, kɔtɛ ye mɛ ndo lo li bo la lo kpã ti lo na ndo ambanga awa ngã, la tɛrɛ la ahã wee!

⁶ Ko Yezo abema sĩ, na lo mɛ ya, ta ala ye lo tɛ lo ma. So pɛni, Yezo anɔ ka ndo akɔdɔrɔ mɛ ndũ na Nazarɛtɛ, lo ha azi na lo tɛ Nzapa.

Yezo ato ava lo na kwa

⁷ La lo ili ava lo sui kɔi ndoni se ya, ni to la na kwa, ko ala gwe sɛ sɛ. Lo hɛ̃ la nguru ya, ala toma asiɔ tɔrɔ na ya tɛrɛ azi,

⁸ lo hɛ̃ nga la nyɔ ya: “Ta ĩ mu ye kɔi ĩ gwe na ni fɔnɔ ma, ale ĩ mu bo ngómbé kɔi. Ta ĩ mu tɛ, na bozo, nga na faranga ma.

⁹ Ĩ yu pɔrɔ, ta ĩ mu nga mbanga ndozu bɔngɔ mɛ ndɛ̃ ma.”

¹⁰ La lo pa nga hɛ̃ la ya: “Ngoi mɛ se ĩ si na ya kɔdɔrɔ kɔi ko, ale ĩ la bo na ya da mɛ azi na hɛ̃ngɔ ĩ, ngbĩi nga ka ngoi ti gwengɔ tɛ ĩ alengbi, wa ĩ gwe.

¹¹ Se azi ti mbanga kɔdɔrɔ kɔi akɛ̃ yambangɔ ĩ, bere akɛ̃ ntangɔ tɛnɛ tɛ ĩ ko, ĩ goro sese ti pɔrɔ tɛ ĩ, so tisangɔ la ya, siɔ ye tɛ la angbã na li la nvɛni. Ko ĩ hã nɔ ndo ko ĩ ɔ.”

¹² La ava Yezo aɔ so pangɔ lo tɛ Nzapa hɛ̃ azi ya, ale ala gbinya be la.

¹³ Ko ala toma ndo asiɔ tɔrɔ ma wo ma na ya tɛrɛ azi, ala hĩni ndo kpɔ̃ na tɛrɛ awa ngã, ko tɛrɛ la ahã wee!

Erodɛ aho Yoanɛ wa bɛngɔ batisimɔ

¹⁴ Na ngoi ko ndo ko, gbia Erodɛ ama pa tɛ Yezo, na lo mɛ ya, pa ili Yezo alengbi na ndo kwɛ. Ambanga azi ndopa ya: “Yoanɛ mɛ wa hɛ̃ngɔ batisimɔ aso na pɛ kwa! Nda mɛ lo lua nguru ti lingɔ na aye li kpɛnɛ la.”

¹⁵ Ambanga ndopa ya: “Elia la.” Kanda ambanga mɛ ndɛ̃ ndopa tɛ la ya: “Lo wa pangɔ nyɔ Nzapa, nga ma se tɛ alɔ lo mɛ ndɛ̃ li gã.”

¹⁶ Ngoi mɛ Erodɛ ĩ ma so ko, lo pa ya: “Adu Yoanɛ wa hɛ̃ngɔ batisimɔ la! Mbi hɛ̃ ndo nyɔ, afa li lo, ko lo la lo so na pɛ kwa!”

^17-19 Erodɛ amu ndo Erodiadɛ mɛ ya nyita lo Filipo adu na ni. Na lo ni la Yoanɛ abela Erodɛ ya: “Ta mɔ lengbi li dungɔ na ya nyita mɔ ma, ta sanga ma, nyita mɔ adɛ le lo ngɛ̃!” Erodiadɛ ĩ ma so ko, ngɔnzɔ agbɔ lo hɛ̃ Yoanɛ. La lo wa Erodɛ ya, lo gbɔ̃ Yoanɛ. Ko Erodɛ ahɛ̃ nyɔ ya, agbɔ̃ Yoanɛ, la azi agbɔ̃ Yoanɛ, agbe lo, abi lo bɔlɔkɔ. Erodiadɛ asepara ndo ya, aho lo hɛ̃ ni, ko ta kɔdɛ ni da ma,

²⁰ na lo mɛ ya, Erodɛ ndokpɛ ndo Yoanɛ sĩ, ta sanga ma, lo hĩnga ndo ya, Yoanɛ adu beta nzɔ̃ zo. Ko lo ndobata nga ndo Yoanɛ. Ngoi mɛ Erodɛ ĩ ma belangɔ tɛ Yoanɛ ko, ta bɛ lo ade ma, kanda lo ndoye ndo mangɔ tɛnɛ tɛ Yoanɛ sĩ.

²¹ Na lá mɛ ndo Erodɛ ali na yenga ti lá mɛ adu na lo ko, Erodiadɛ alua nzɔ̃ ngoi ti hongɔ Yoanɛ. Erodɛ aili akota gbia tɛ leta tɛ lo, na agbia tɛ aturugu, nga na akokɛnɛ azi ti Galilea kwɛ zu ya, ala ga atɛ ye.

²² Nyi Erodiadɛ ti wali ali ya da ti yenga ni, ato nda dɔngɔ dɔ. Be Erodɛ na bɛ azi mɛ ndo lo ili la ade sĩ. Ko Erodɛ apa hɛ̃ nyi wali ko ya: “Hũnda mbi na ye mɛ bɛ mɔ aye, mbi na hɛ̃ngɔ ni hɛ̃ mɔ.”

²³ Lo nyɔ ngɛ hɛ̃ lo ya: “Sereka, ye mɛ mɔ na hũndangɔ mbi na lo ni ko, mbi na hɛ̃ngɔ mɔ. Bɛ se mɔ hũnda mbi ya, mbi kangbi ya kɔdɔrɔ tɛ mbi na ndo bɛ ni, wa mbi hɛ̃ mɔ mbage ni kɔi ko, mbi na hɛ̃ngɔ mɔ.”

²⁴ Ngoi mɛ nyi wali ko ĩ ma so ko, lo si, lo nɔ, lo hũnda ta lo ya: “Ye mɛ mbi lengbi ti hũndangɔ ka ti Erodɛ nɛ?” Ta lo agbinya hɛ̃ lo ya: “Hũnda lo ya, afa li Yoanɛ, ahɛ̃ mɔ.”

²⁵ Nyi wali ko adiri hiɔ ka tɛ gbia Erodɛ, apa hɛ̃ lo ya: “Mbi ye ya, mɔ fa li Yoanɛ, mɔ kpa ya sɛmbɛ, mɔ hɛ̃ mbi bo na olo mɛ!”

²⁶ Ngoi mɛ Erodɛ ĩ ma so ko, vundu agbɔ̃ lo sĩ. Ta lo ye kɛ̃ngɔ hɛ̃ nyi wali ko ma, na lo ti ngɛ mɛ fɛrɛ lo nyɔ na gbɛlɛ azi mɛ lo ili la.

²⁷ Bo na ngoi ni ko, Erodɛ aha turugu kɔi na popo tɛ awa batangɔ lo, ahɛ̃ lo nyɔ ya, lo nɔ, lo fa li Yoanɛ, lo ga na ni hɛ̃ ni. Turugu ko anɔ asi ka da bɔlɔkɔ, afa li Yoanɛ gbo,

²⁸ akpã ya sɛmbɛ, aga na ni hɛ̃ nyi wali ko, la nyi wali ko amu ahɛ̃ ta lo.

²⁹ Ngoi mɛ ava Yoanɛ ĩ ma so ko, ala nɔ amu kinda tɛ lo ahɔ.

Yezo ahɛ tɛ bi azi koto kɔ̃ ala tɛ

³⁰ Awa pangɔ kwa tɛ Yezo adiri ka tɔ̃nda lo, atɔndɔ hɛ̃ lo ye zu mɛ ala li, nga na alo zu mɛ ala ha.

³¹ Azi mɛ ndoga ka tɛ Yezo, na ala mɛ ndodiri ko, ala ma wo ma. Na lo ni ko, ta lo na ava lo alua ndo ngoi ti tɛngɔ na ye ma. Lo ĩ hũ so ko, lo pa hɛ̃ ava lo ya: “Ĩ ga, e nɔ ka bɛ ndo, ĩ wɔ tɛrɛ ĩ yakere hĩ.”

³² La ala ko ya ngɔ, agwe na kunɛ la ka bɛ ndo.

³³ Azi gba ĩ hũ la so ndoɔ ko, ala hĩnga ya, Yezo na ava lo la. La azi ko alo kɔdɔrɔ ndɛ̃ ndɛ̃ ndɛ̃, anɔ na kpɛ, asi uzu na ndo mɛ Yezo na ava lo na nɔngɔ da.

³⁴ Yezo ĩ lo ka ya ngɔ ĩ ko gegi ko, lo hũ azi butu butu, ko vundu tɛ la agbɔ̃ lo sĩ, ta sanga ma, ala da ndo nga ma angasã ngbaga mɛ ta wa batangɔ la da ma. Ko lo to nda hangɔ la na tɛnɛ tɛ Nzapa ma wo ma.

³⁵ Na ngoi ni ko, ndɔ ade. Ko ava lo ai tɛrɛ la ka tɔ̃nda lo, apa hɛ̃ lo ya: “Ndɔ ade wɛ, ko e ndo mɛ ge bɛ ndo.

³⁶ Wa pa hɛ̃ azi olo butu butu ya, ala gwe ka gbe yaka, nga ka kɔdɔrɔ mɛ na tɔ̃nda e, ko ala vɔ̃ tɛ tɛ la.”

³⁷ Yezo agbinya hɛ̃ la ya: “Ĩ nvɛni ĩ hɛ̃ la tɛ ala tɛ!” Ko ala hũnda lo ya: “Mɔ ye ya, e mu faranga ngbangbo sɛ, e nɔ e vɔ̃ na mapa, e hɛ̃ la, ala tɛ?”

³⁸ Yezo ahũnda la ya: “Ĩ na mapa kɛ̃? Ĩ nɔ ĩ ba hĩ.” Ala ĩ nɔ ĩ ba mapa ni ko, ala ga apa hɛ̃ lo ya: “E na mapa kɔ̃, na susu sɛ.”

³⁹ La Yezo ahɛ̃ nyɔ hɛ̃ ava lo ya: “Ĩ bombi azi zu, ala dunga ndo ndiri li nɔ na li nɔ.”

⁴⁰ Na popo tɛ azi mɛ adunga tise zu ko, ambanga na ya li nɔ tɛ la ngbangbo kɔi, ambanga mɛ ndɛ̃ sui kɔ̃.

⁴¹ So pɛni, lo lɔ mapa ko kɔ̃ na susu ko sɛ, lo ya lɛ lo ndozu, lo hɛ̃ sia kɔli hɛ̃ Nzapa na lo ni. So pɛni, lo kara ya mapa ni, lo hɛ̃ ava lo ya, ala kangbi na azi ko. Lo mu nga susu ko sɛ, lo hɛ̃ la, ala kangbi na azi zu.

⁴² Ala zu atɛ ndo ni, ya la asĩsĩ.

⁴³ Tanga mapa, na tanga susu mɛ angbã asĩ gogo sui kɔi ndoni sɛ, ko ava lo amu agwe na ni.

⁴⁴ Azi mɛ ndo atɛ mapa ni ko, ala ndo akɔli koto kɔ̃.

Yezo adɔ nɔ na ndo Iɛ ngu

⁴⁵ Bo so pɛni hiɔ ko, Yezo apa hɛ̃ ava lo ya: “Ĩ ko ya ngɔ, ĩ ɔ uzu tɛ mbi, ĩ fa ngu, ĩ gwe ka kɔdɔrɔ ti Bɛtɛsaida. Wa mbi dɛ ge so pangɔ hɛ̃ azi mɛ aga butu butu ya, ala diri ka tɛ la.”

⁴⁶ Yezo ĩ hɛ̃ lege hɛ̃ azi ko wɛ ko, lo nɔ tɛ lo ka ndo hɔtɔ so santbelangɔ Nzapa.

⁴⁷ Ngoi mɛ bi ĩ vũ ko, ava lo ka ya ngɔ, ka lɛ ngu, ko Yezo angbã na kunɛ lo ka ndo gegi.

⁴⁸ Yezo ahũ ya, ava ni ahũ pɛnɔ sĩ ti gbingɔ ngɔ, na lo mɛ ya, ya ndoya, aga ti ndo la. Ĩ da na kɔzo kɔndɔ ko, lo dɔ nɔ na ndo lɛ ngu, lo nɔ ka tɛ la. Lo nɔ ya, ni ɔ la.

⁴⁹ Ngoi mɛ ava lo ĩ hũ lo so ndodɔ nɔ na ndo lɛ ngu ko, ala da bɛ la ya, nyingɔ la, ko ala to nda dɛrɛngɔ kɔngɔ.

⁵⁰ Mbɛtɔ agba la sĩ, ta sanga ma, ala zu ahũ lo so ndoga ka tɔ̃nda la. La Yezo apa hɛ̃ la hiɔ ya: “Ĩ zia mbɛtɔ, í du na kpengba bɛ, ko í hĩnga ya, mbi la!”

⁵¹ La Yezo ako ya ngɔ adu na tɔ̃nda ava lo, ko ya mɛ fɛrɛ ndoya ade ngĩ. Ko ala bema ma ya ma,

⁵² na lo mɛ ya, ta ala hĩnga nda ye ti kpenɛ mɛ Yezo ali, na ngoi mɛ lo mu mapa, lo li ni ati sĩni ma. Ye mɛ ndo lo li ko, aɔ kɔdɛ tɛ la.

Yezo asara awa nga ka lɛ sese ti Genezarɛtɛ

⁵³ Ala ĩ fa ngu ti Galilea wɛ ko, ala lo ka ya ngɔ ako, asi ka sese ti Genezarɛtɛ, ko ala mu li ngɔ tɛ la agbe so nyɔ ngu.

⁵⁴ Ngoi mɛ ala ĩ lo ka ya ngɔ ĩ ko gegi ko, azi ahĩnga ya, Yezo la.

⁵⁵ Azi ni ko aɔ na lɛ sese ti Genezarɛtɛ kwɛ zu, alɔ awa nga na ndo gbogbo tɛ la, aga na la ka tɛ Yezo, na ndo kwɛ zu mɛ ala ma ya, lo da.

⁵⁶ Na ndo kwɛ mɛ Yezo aɔ da, na ya akɔdɔrɔ, na ya akota kɔdɔrɔ, nga ka gbɛ yaka ko, azi ndoga na awa nga, akpã la ka bɛ kɔdɔrɔ. Ko ala vɔrɔ tɛrɛ la hɛ̃ Yezo ya, se lo ye ko, lo zia awa ngã ko abɔrɔ bɛ nyɔ bɔngɔ tɛ lo. La lo ye. Ko azi zu mɛ ndo abɔrɔ nyɔ bɔngɔ tɛ lo ko, tɛrɛ la ahã wee!