Marko 5 - Fana Ngbangɔ 1987

Yezo atoma siɔ tɔrɔ na ya tɛrɛ kɔli kɔi

¹ Yezo na ava lo ĩ si ka mbage nyɔ kpo ti Galilea, ka sese ti Gerasa we ko,

² lo lo ka ya ngɔ, lo ko gegi. Bo na ngoi ni ko, kɔli kɔi alo ka ndo asɛnde anɔ ka tɛ lo.

³ Kɔli ni ko na asiɔ tɔrɔ na ya tɛrɛ lo, ko lo ndodu na ndo asɛndɛ. Abɛ nga se zo amu ngo nwa ya, ni gbɔ lo, ni gbe na lo ko, lo ha gba.

⁴ Fani sĩni ko, azi ndogbe ti lo na gɛrɛ lo na ngo nwa so batangɔ lo, ko lo ndokara ni zu. Ta zo mɛ na nguru ti gbɔ̃ngɔ lo kpãngɔ ndoni kɔi da ma.

⁵ Ngoi zu, bi na lá, lo ndofɔnɔ na ndo asɛndɛ, nga na ndo ahɔtɔ, ko lo so ndodɛrɛ kɔngɔ. Lo ndolɔ nga atɛ̃nɛ, lo fara na tɛrɛ lo na kã.

⁶ Lo ĩ hũ Yezo ka yɔngɔrɔni ko, lo kpɛ lo nɔ, lo kuku gbɛlɛ lo,

⁷ lo dɛ kɔngɔ kpengbani ya: “Yezo Nyi Nzapa mɛ ka yayu, ye mɛ mɔ ye lingɔ na mbi nɛ? Mbi dema tɛrɛ mbi hɛ̃ mɔ na ili Nzapa, ta mɔ gia mbi ma!”

⁸ (Lo tɛnɛ so, ta sanga ma, Yezo ahɛ̃ ndo nyɔ hɛ̃ lo ya, siɔ tɔrɔ alo ka ya tɛrɛ lo asi.)

⁹ Ko Yezo ahũnda kɔli ko ya: “Ili mɔ na?” Lo gbinya hɛ̃ lo ya: “Ili mbi la ‘Ngbunguma’, na lo mɛ ya, e ma wo ma.”

¹⁰ La lo lamana tɛrɛ lo hɛ̃ Yezo ya: “Ta mɔ to asiɔ tɔrɔ mɛ ya tɛrɛ mbi ka pɛ sese ti Gerasa ma.”

¹¹ Akɔsɔ ma wo ma ndo so ndo ko, so ndotɛ ndo na tɛrɛ hɔtɔ.

¹² La asiɔ tɔrɔ mɛ na ya tɛrɛ kɔli ko ahũnda Yezo ya: “Se mɔ ye ko, mɔ to e, é nɔ, é li ya tɛrɛ akɔsɔ ko!”

¹³ Yezo aye da, la asiɔ tɔrɔ ko alo ka ya tɛrɛ kɔli ko asi, anɔ ali na ya tɛrɛ akɔsɔ ni ko. Akɔsɔ ko zu alo ka bɛ li hɔtɔ, akpɛlɛ, agwe asa ka ya ngu, akpili. Ala ndo nga ma koto sɛ.

¹⁴ Awa batangɔ akɔsɔ akpɛlɛ, agwe apa pa ni hɛ̃ azi mɛ ka kɔdɔrɔ, apa nga hɛ̃ ala mɛ ndola ka gbɛ yaka. Ko azi anɔ so bangɔ lo mɛ fɛrɛ asi.

¹⁵ La ala nɔ ka tɔ̃nda Yezo, ala hũ nga kɔli mɛ ndo na asiɔ tɔrɔ ma wo ma tɛrɛ lo, adu tise na bɔngɔ tɛrɛ lo, kɔdɛ tɛ lo ati nga nzɔ̃ni. Ala ĩ hũ so ko, mbɛtɔ agbɔ̃ la.

¹⁶ Ye mɛ ndo ali kɔli mɛ na asiɔ tɔrɔ ya tɛrɛ lo, ali nga akɔsɔ ko, azi mɛ ndo ahũ ni zu, apa hɛ̃ azi mɛ ndo ta da ma.

¹⁷ Azi ko zu anɛ hɛ̃ Yezo ya, lo zia sese tɛ ani, lo gwe ka sese mɛ ndɛ̃. La Yezo aye.

¹⁸ Ngoi mɛ Yezo anɔ ya, ni ko ya ngɔ ko, kɔli mɛ ndo na asiɔ tɔrɔ ya tɛrɛ lo ahũnda lo ya, ni na lo ani ngba ndoni kɔi.

¹⁹ La Yezo akɛ̃, apa hɛ̃ kɔli ko ya: “Diri ka tɛ asongo mɔ, mɔ pa hɛ̃ la lo zu mɛ Gbia Nzapa ali tɛrɛ mɔ na nzɔ̃ bɛ tɛ lo.”

²⁰ La kɔli ko agwe, lo ĩ si ka sese mɛ ili ni la “Kɔdɔrɔ Sui Kɔi” ko, lo to nda pangɔ pa ti ye kwɛ mɛ Yezo ali tɛrɛ lo. Ngoi mɛ azi zu ĩ ma so ko, ala bema ma ya ma.

Yezo asara nyi Yairo nga na wali mɛ na nga ti mɛnɛ

²¹ Yezo afa ngu na ngɔ, adiri ka mbage kpo. Ngoi mɛ lo ĩ si na nyɔ tungu ko, azi butu butu abombi tɛrɛ la so tɔ̃nda lo.

²² La mbanga gbia ti ya da sambela tɛ Ayuda kɔi mɛ ili lo la Yairo aga so ndo ko. Lo ĩ hũ Yezo ko, lo kuku gbɛlɛ lo,

²³ lo gbɔ gɛrɛ Yezo sĩ nvɛni ya: “Nyi mbi ti wali ndotiri kwa. Mbi vɔrɔ tɛrɛ mbi hɛ̃ mɔ ya, mɔ ga mɔ kpa ti mɔ ndo lo, wa tɛrɛ lo aha, ko lo du nga lɛ lo ngɛ̃!” La Yezo aye, anɔ ka tɛ lo.

²⁴ Yezo na Yairo agwe ndoni kɔi ka tɛ Yairo. Azi butu butu mɛ ndo ana la aɔ ta lege kɔi ko, ala fɔ̃fɔ̃ Yezo sĩ.

²⁵ Mbanga wali kɔi ndo nga so ndo ko, lo ndo na nga ti mɛnɛ, ko ntɛne ni ndosa ndo lo. Ko lo la ndo na nga ti mɛnɛ ni tɛrɛ lo buru sui kɔi ndoni sɛ.

²⁶ Lo hũ ndo pɛnɔ sĩ so fɔnɔngɔ ka tɛ amɔnganga ndɛ̃ ndɛ̃ ndɛ̃, ko lo gbɛ̃ ndo faranga tɛ lo zu na lo ni. Ko ta mangɔ nzɔ̃ni da ma. Nga ni ndomai bo maingɔ na tɛrɛ lo.

^27-28 Ngoi mɛ zo wali ko ama azi so ndotɛnɛ tɛnɛ tɛ Yezo ko, lo nɛ ka ya bɛ lo ya: “Se mbi bɔrɔ bɛ bɔngɔ tɛ lo ko, tɛrɛ mbi aha.” La lo ga ti pɛko Yezo na popo tɛ azi ko butu butu, lo bɔrɔ bɔngɔ tɛ Yezo.

²⁹ Bo na ngoi ni ko, mɛnɛ tɛrɛ lo afa, ko lo ma tɛrɛ lo alia wee!

³⁰ Bo na ngoi ni ko, Yezo ama na gbɛ tɛrɛ lo ya, mbanga nguru tɛ ni asi. Lo sana tɛrɛ lo na popo tɛ azi butu butu, lo hũnda la ya: “Zo mɛ abɔrɔ bɔngɔ lɛ mbi na?”

³¹ Ava lo agbinya hɛ̃ lo ya: “Ta mɔ lengbi ti hũndangɔ ya, zo mɛ abɔrɔ bɔngɔ tɛ mɔ na ma, na lo mɛ ya, azi gba ndofɔ̃fɔ̃ mɔ mbage na mbage.”

³² Ko Yezo aba ndo na tɔ̃nda lo ya, ni gi zo mɛ abɔrɔ bɔngɔ tɛ ni.

³³ Mbɛtɔ ato nda gbɔ̃ngɔ zo wali ko, na lo ti lo mɛ asi na lo. La lo nɔ lo kuku gbɛlɛ Yezo, lo pa hɛ̃ lo tɛnɛ zu na seni.

³⁴ Yezo apa hɛ̃ lo ya: “Nyi mbi, yengɔ mɛ mɔ ye na lo tɛ mbi la asara mɔ. Wa diri nzɔ̃ni, tɛrɛ mɔ aha we.”

³⁵ Kanda na ngoi ko Yezo ade na tɛnɛngɔ so ko, azi mɛ ato la na kwa, alo ka da tɛ gbia Yairo, aga apa hɛ̃ Yairo ya: “Nyi mɔ akpi we. Zia giangɔ bɛ wa hangɔ lo tɛ Nzapa!”

³⁶ Ko ta Yezo akpã bɛ lo na ndo tɛnɛ tɛ la ma. La lo nɛ hɛ̃ Yairo ya: “Ta mbɛtɔ agbɔ̃ mɔ ma, ye bo lo tɛ mbi.”

³⁷ Ko Yezo agbanzi azi ya, ta ala ga pɛko ni ma, wenge bo Petro, na Zaki, na Yoanɛ mɛ nyita Zaki.

³⁸ Ala ĩ nɔ ĩ si ka tɛ Yairo ko, Yezo ahũ azi so ndogɔ̃, so ndoto to, so ndodɛrɛ kɔngɔ.

³⁹ Lo li ya da, lo nɛ hɛ̃ azi ko ya: “Nda gɔ̃ngɔ ni nɛ? Nda to ni nga nɛ? Ta nyingambi olo akpi ma, lo Ĩa langɔ.”

⁴⁰ Azi ĩ ma so ko, ala sa na ngia gua, ae Yezo. La lo pa hɛ̃ la ya, ala zu asi gegi. Lo mu bo to nyingambi, na ta lo, nga na ava lo mɛ fɛrɛ ta, ala li ya da mɛ akpã kinda tɛ nyingambi da.

⁴¹ Yezo agbɔ̃ ti nyingambi ni, anɛ hɛ̃ lo ya: “Talita kumɛ.” Alengbi ya: “Nyi wali, mbi nɛ hɛ̃ mɔ ya, mɔ lo ndozu.”

⁴² Bo na ngoi ni ko, nyi wali ko alo ndozu, ato nda dɔngɔ nɔ. (Lo ndo na buru sui kɔi ndoni sɛ.) Azi mɛ ndo so ndo ko ĩ hũ so ko, ala bema sĩ nvɛni.

⁴³ Ko Yezo ahɛ̃ nyɔ hɛ̃ la ya, ta ala pa tɛnɛ ni hɛ̃ zo kɔi ma. Lo pa nga hɛ̃ la ya, ala hɛ̃ tɛ hɛ̃ nyingambi ni atɛ.