Marko 16 - Fana Ngbangɔ 1987

Yezo aso na pɛ kwá

¹ Ngoi mɛ lá ti wɔngɔ tɛrɛ ĩ ɔ wɛ ko, Maria wa Magadala, na Maria mɛ ta Zaki, nga na Salome anɔ avɔ̃ yɔmbɔ ya, ani kĩkĩ na ndo kinda tɛ Yezo.

² Ĩ ti na lá yenga na nda perere nvɛni, ngoi mɛ lá ĩ bo za ko, ala hã nɔ anɔ ka ndo sɛndɛ.

³ Ka ta lege ko, ala so ndohũndangbi tɛrɛ la ya: “Zo mɛ ndɛ abilingi kota tɛ́nɛ mɛ ka nyɔ du sɛndɛ, abi katɛ hɛ̃ e na?”

⁴ Ala ĩ si kai ko, ala hũ abilingi kota tɛ́nɛ ni, abi katɛ wɛ.

⁵ Ala ĩ li ka ya du sɛndɛ, ala ĩ ya le la ko, ala hũ pandara kɔi adu na ndo kɔti, ayu yɔngɔrɔ bɔngɔ mɛ mbufuni pɛ pɛ pɛ, ko mbɛtɔ agbɔ̃ la.

⁶ La pandara ko apa hɛ̃ la ya: “Ĩ zia mbɛtɔ! Mbi hĩnga ya, ĩ ndogi Yezo wa Nazarɛtɛ mɛ mbandasi agɔngɔ lo ndo krusi. Lo so na pɛ kwá wɛ, ta lo so ndo mɛ ma. Ĩ ba ndo mɛ akpã kinda tɛ lo da lo mɛ.

⁷ Wa ĩ gwe na olo mɛ, ĩ pa hɛ̃ Petro na ava lo mɛ ndɛ ya, Yezo aɔ uzu tɛ la, agwe ka Galilea. Ala na hũngɔ lo kai, nga ma se ko ndo lo pa na ni hɛ̃ la.”

⁸ La awe ko alo ka ya du sende asi, akpɛlɛ, ayikɔ, ko tɛrɛ la adɔ kpa kpa kpa, mbɛtɔ agbɔ̃ la sĩ. Na lo ti mbɛtɔ ni ko, ta ala pa tɛnɛ ni hɛ̃ zo kɔi ma. [

Yezo afa tɛrɛ lo na Maria wa Magadala

⁹ Na lá yenga na nda perere nvɛni, na ngoi mɛ Yezo ĩ so na pɛ kwá wɛ ko, lo fa tɛrɛ lo uzu na Maria wa Magadala. Maria wa Magadala adu zo wali mɛ ndo Yezo atoma asiɔ tɔrɔ mbara mbara na ya tɛrɛ lo.

¹⁰ Ngoi mɛ lo hũ Yezo wɛ ko, lo nɔ so pangɔ hɛ̃ azi mɛ ndo ana Yezo ndodu ndoni kɔi. Maria ĩ si kai ko, lo tã ala na vundu, ala so ndoto to.

¹¹ Ala ĩ ma Maria ĩ nɛ ya, Yezo aso na pɛ kwá, ni hũ lo na le ni ko, ta ala ye lo ni ma.

Yezo afa tɛrɛ lo na ava lo sɛ

¹² So pɛni, Yezo afa tɛrɛ lo na se kɔdɛ mɛ ndɛ̃ na ava lo sɛ so ta lege, na ngoi mɛ ala so ndogwe ka ndo kɔdɔrɔ.

¹³ Ngoi mɛ ala ĩ diri ĩ pa lo ni hɛ̃ ava Yezo mɛ ndɛ̃ ko, ta ala ye lo ni ma.

Yezo afa tɛrɛ lo na ava lo sui kɔi ndoili kɔi

¹⁴ Ti ndangbani, Yezo afa tɛrɛ lo na ava lo sui kɔi ndoni kɔi, na ngoi mɛ ndo ala so ndotɛ ye. Ko lo bela la ya: “Nda mɛ ta ĩ ye lo tɛ mbi na bɛ ĩ kɔi ma nɛ? Azi ahũ mbi na ngoi mɛ mbi so na pɛ kwá. Ko nda mɛ ĩ li kpengba li, ta ĩ ye nga lo ni ma nɛ?”

¹⁵ So pɛni, lo pa hɛ̃ la ya: “Ale ĩ gwe ka le sese kwe, ĩ pa Nzɔ̃ Pa hɛ̃ azi zu.

¹⁶ Zo ko aye lo ni, amu nga batisimɔ ko, Nzapa aso lo. Kanda zo ko akɛ̃ lo ni ko, Nzapa na fangɔ ngbanga binga li lo.

¹⁷ Wa ĩ ba aye ti kpɛnɛ mɛ gbanda azi mɛ na yengɔ lo tɛ mbi na lingɔ lo mɛ: ala na tomangɔ asiɔ tɔrɔ na ya tɛrɛ azi na ili mbi, ala na tɛnɛngɔ ayanga mɛ ndɛ̃ mɛ ta ĩ hĩnga ma.

¹⁸ Se ala gbɔ̃ ngbɔ, bere ala nyɔ siɔ yɔrɔ na ya ye ti nyɔngɔ wawa ko, ta ye kɔi na lingɔ la ma. Ala na kpãngɔ ti la na ndo awa nga, ko tɛrɛ la na hãngɔ zu.”

Yezo adiri ka tɛ Nzapa

¹⁹ Gbia Yezo ĩ tɛnɛ tɛnɛ hɛ̃ la so wɛ ko, Nzapa aya lo ya, lo ma ka yayu, lo du na ndo kɔti ti ni.

²⁰ La ava Yezo agwe ti pangɔ Nzɔ̃ Pa hɛ̃ azi na ndo kwɛ zu. Gbia Yezo na la ndoli ndo kwa ndoni kɔi. Na lo ti aye ti kpɛnɛ mɛ ala ndoli ko, lo fa hɛ̃ azi ya, Nzɔ̃ Pa mɛ ava ni ndoha adu beta lo.]