Marko 15 - Fana Ngbangɔ 1987

Anɔ na Yezo ka gbɛlɛ Pilato

¹ Ĩ da na nda perere nvɛni ko, agbia tɛ awa lungɔ Nzapa lɔ na ye, na akangba ti kɔdɔrɔ, na awa hangɔ ndia, nga na awa fangɔ ngbanga zu, agbe lingo so fangɔ ngbanga tɛ Yezo. Ala hɛ̃ nyɔ, ko agbe Yezo, agwe na lo ka tɛ Pilato.

² La Pilato ahũnda lo ya: “Mɔ kota gbia tɛ Ayuda?” Yezo agbinya hɛ̃ lo ya: “Tɛnɛ ni la mɔ tɛnɛ.”

³ Agbia tɛ awa lungɔ Nzapa na ye ĩ ma so ko, ala vɔ̃ to ndɛ̃ ndɛ̃ ndɛ̃ tɛrɛ Yezo.

⁴ La Pilato ati hũnda lo ya: “Ta mɔ gbinya tɛnɛ kɔi ma? Ma to mɛ ala vɔ̃ tɛrɛ mɔ hĩ!”

⁵ Ko ta Yezo ati gbinya tɛnɛ kɔi ma. Pilato ĩ hũ so ko, abema sĩ.

Afa ngbanga li Yezo ya abo lo

⁶ Na ngoi yenga ti Lipandasi kɔi kɔi tɛ Ayuda ko, Pilato ndozi mbanga wa bɔlɔkɔ kɔi mɛ Ayuda aye ya azi lo.

⁷ Ko mbanga kɔli kɔi ndo ka ya bɔlɔkɔ, ili lo la Barabasi. Abi ndo lo bɔlɔkɔ ndoni kɔi na azi mɛ ndo atɔmbɔkɔ tɛrɛ leta, aho nga zo.

⁸ La azi butu butu agwe ka tɛ Pilato, ahũnda lo ya, lo li hɛ̃ ani ye mɛ lo ndoli na ngoi yenga ti Lipandasi kɔi kɔi.

⁹ Lo gbinya hɛ̃ la ya: “Ĩ ye ya, mbi zi hɛ̃ ĩ kota gbia tɛ Ayuda?”

¹⁰ Lo hũnda la so, ta sanga ma, lo hĩnga nzɔ̃ni ya, agbia tɛ awa lungɔ Nzapa na ye aga na Yezo hɛ̃ ni, na lo mɛ ya, ala ndoli sɔbɛrɛ hɛ̃ lo.

¹¹ Ko agbia tɛ awa lungɔ Nzapa na ye awa azi ya, ala pa hɛ̃ Pilato ya, adu Barabasi wa Pilato azi lo hɛ̃ ani.

¹² Pilato ati mu tɛnɛ, atɛnɛ hɛ̃ azi ya: “Wa ye mɛ ĩ ye ya, mbi li na zo mɛ ĩ ndoili lo ya, kota gbia tɛ Ayuda nɛ?”

¹³ Ala gbinya hɛ̃ lo na kɔngɔ ya: “Agɔngɔ lo ndo krusi!”

¹⁴ Pilato ahũnda la ya: “Siɔ ye mɛ lo li nɛ?” Ko ala ti adɛrɛ kɔngɔ kpengbani ya: “Agɔngɔ lo ndo krusi!”

¹⁵ Pilato aye dengɔ na bɛ azi ni ko, la lo zi Barabasi hɛ̃ la. So pɛni, lo hɛ̃ nyɔ hɛ̃ aturugu ya, ala sɔ̃ Yezo na fimbo. Ala ĩ sɔ̃ Yezo wɛ ko, Pilato aga na lo hɛ̃ la ya, ala nɔ agɔngɔ lo ndo krusi.

Aturugu abuba Yezo

¹⁶ Ambanga aturugu amu Yezo, anɔ na lo ka ya ngbo mɛ da tɛ Pilato da, ala ili aturugu zu aga.

¹⁷ Ala mu yɔngɔrɔ bɔngɔ mɛ bengbani ngba ngba ngba ayu na Yezo. Ala ngo nga bilo ti kĩ abi li lo nga ma se tɛ gbia.

¹⁸ So pɛni, ala to nda balangɔ lo ya: “Kota gbia tɛ Ayuda, zengba oo!”

¹⁹ Ko ala sɔ̃nɔ li lo na kɛkɛ, akuku solo tɛrɛ lo, akuku gbɛlɛ lo, awo li la tise lɛbɛ lɛbɛ.

²⁰ Ngoi mɛ ala ĩ buba lo wɛ ko, ala hã bengba bɔngɔ tɛrɛ lo, ala ti amu abɔngɔ tɛ lo nvɛni, ayu na lo. Ko ala mu lo so ya kɔdɔrɔ, asi na ni ya, ani gɔngɔ lo ndo krusi.

Agɔngɔ Yezo ndo krusi

²¹ Ngoi mɛ ala so ndogwe ko, ala tengbi na kɔli kɔi mɛ alo ka yaka so ndoga. Ili lo Simɔ, lo wa kɔdɔrɔ ti Sirɛnɛ. Lo baba tɛ Alɛkizandrɛ na Rufusi. Aturugu ahɛ̃ lo nyɔ ya, lo yɔ krusi tɛ Yezo.

²² Ala gwe na Yezo ka ndo mɛ andoili ya Gɔlgɔta, alengbi ya: “Ndo ti kpokpo li zo.”

²³ Ala ye kɛ̃ngɔ lo kana mɛ ade ya ni na yɔrɔ mɛ ili ni la mirɛ, ya lo nyɔ, ko lo kɛ̃.

²⁴ So pɛni, ala gɔngɔ lo ndo krusi. Ala to zeke so hĩngangɔ bɔngɔ mɛ zo kɔi kɔi alengbi ti luangɔ ni. La ala kangbi abɔngɔ tɛ lo na tɛrɛ la.

²⁵ Saa mɛ ala gɔngɔ na lo ndo krusi adu saa gumbaya ti nda perere.

²⁶ Mbɛti ti nda kwa tɛ lo mɛ ndo asu akpa na ta li lo na ndo krusi lo mɛ: “Kota Gbia tɛ Ayuda.”

²⁷ Aturugu agɔngɔ nga awa nzĩ se na ndo krusi mɛ ndɛ̃ osɛ, kɔi na ndo kɔti ti Yezo, kɔi na ndo ga. [

²⁸ La tɛne mɛ asu ka ya Buku tɛ Nzapa ati na seni. Tɛnɛ ni lo mɛ: “Akpa ndo lo na li nɔ tɛ asiɔ azi.”]

²⁹ Azi mɛ ndo aɔ ti ndo ko ĩ hũ lo ko, ala sɔ̃ li la, ae lo, aguru lo, apa hɛ̃ lo ya: “Ee! Mɔ la mɔ pa ndo ya, mɔ kara kota da Nzapa, ko mɔ ti wa omɛ ndɛ̃ na ya bi ta!

³⁰ So tɛrɛ mɔ nvɛni, ko mɔ lo ka ndo krusi, mɔ zu ge tise!”

³¹ Se mɛ nga agbia tɛ awa lungɔ Nzapa na ye, na awa hangɔ ndia ae na Yezo la. Ko ala so ndotɛnɛ na popo tɛ la ya: “Lo so ndo azi mɛ ndɛ̃, ko ta lo lengbi ti songɔ tɛrɛ lo nvɛni ma sia?

³² E ye ya, Mɛsia mɛ kota gbia tɛ awa Izrayɛlɛ alo bo na olo mɛ ka ndo krusi azu! Se e hũ so, wadila e ye lo tɛ lo.” Azi mɛ ndo agɔngɔ la ndo krusi so tɔ̃nda Yezo aguru nga lo.

Yezo akpi

³³ Ĩ ti na bɛ kɔmbitɛ ko, mbingo avũ kpi kpi kpi, amu lɛ sese zu, ko aninga ngbĩi ati na saa ota ti pɛ bɛ kɔmbitɛ.

³⁴ Ĩ ti na saa ota ko, Yezo ade kɔngɔ kpengbani ya: “Eloi, Eloi, lɛma sabakatani?” Alengbi ya: “Nzapa tɛ mbi, Nzapa tɛ mbi, mɔ dɔ mbi mɔ zia ya nɛ?”

³⁵ 36 Ambanga azi na popo tɛ azi mɛ ndo so ndo ko ĩ ma so ko, ala pa ya: “Ĩ ma hĩ, lo ndoili Elia!”

³⁶ Mbanga zo kɔi akpɛ, amu nzunzu, ado na kpekpe kana, agwa na li kɛkɛ, aye ka ndozu hɛ̃ Yezo ya lo sũ. Ko zo ko apa ya: “Ĩ ku, e ba hĩ, bere Elia na gangɔ hãngɔ lo ka ndo krusi, zungɔ na ni!”

³⁷ 38 Yezo adɛ kɔngɔ kpengbani, la lo kpi.

³⁸ Ma bɔngɔ lau mɛ ndo amu afa na ya kota da Nzapa, ato ka ndozu asungbi kpoa, azu ka tise.

³⁹ 40 Mbanga wa Roma mɛ gbia tɛ aturugu alo ndo so gbɛlɛ Yezo. Lo ĩ hũ se mɛ Yezo adɛ na kɔngɔ, nga na se mɛ lo kpi na ni ko, lo pa ya: “Kɔli olo ndo Nyi Nzapa biani!”

⁴⁰ Awe nga ndo so ndo ko, ala longa ka yɔngɔrɔni so ndoba Yezo. Na popo tɛ la ko, ambanga awe mɛ ndo nga da lo mɛ: Maria wa Magadala, na Salome, na Maria ta Zaki kɛtɛ, lo mɛ nga ta Yozɛ.

⁴¹ Ala na Yezo ndoɔ ndo ndoni kɔi, na ngoi mɛ ndo lo ka Galilea, ko ala ndoza ndo lo. Ambanga awe mɛ ndɛ̃ sĩ mɛ ndo nga so ndo ko, ala na Yezo agwe ndo ka Yeruzalɛmɛ kɔi.

Mbanga kɔli kɔi ahɔ kinda tɛ Yezo

⁴² Ati ndo na ndɔ, ko nga ma adu ndo ngoi mɛ Ayuda ndolɛkɛ na tɛrɛ la na lo ti lá ti wɔngɔ tɛrɛ ko,

⁴³ Yozɛfu mɛ wa Arimatea aga. Lo ndo beta zo, lo nga na li nɔ tɛ awa fangɔ ngbanga, lo ndolɛndɛrɛ ndo nga lá ti gangɔ tɛ Nzapa so lɛngɔ gbia na ndo azi. Lo gbe be lo, lo nɔ ka tɛ Pilato, lo hũnda lo ya, se lo ye ko, ni mu kinda tɛ Yezo, ni nɔ ni hɔ.

⁴⁴ Pilato ĩ ma ya, Yezo akpi wɛ ko, lo bema, ko lo to kwa pɛ gbia tɛ aturugu. Lo ĩ ga ko, Pilato ahũnda lo ya: “Yezo akpi fɛrɛ gã?”

⁴⁵ Lo ĩ ma tɛnɛ tɛ gbia tɛ aturugu ya, Yezo akpi fɛrɛ gã ko, lo hɛ̃ lege hɛ̃ Yozɛfu ya, lo mu kinda tɛ Yezo, lo nɔ lo hɔ.

⁴⁶ La Yozɛfu anɔ avɔ̃ fana bɔngɔ ti hɔngɔ na kinda, anɔ ahã kinda tɛ Yezo ka ndo krusi, azu na ni. Lo gana kinda ni na ma bɔngɔ, lo nɔ lo kpa ka ya du sɛndɛ mɛ agɛ̃ na tɛrɛ tɛnɛ. So pɛni, lo bilingi kota tɛnɛ, lo vĩ na nyɔ du sɛndɛ ni.

⁴⁷ Maria wa Magadala, na Maria mɛ ta Yozɛ so ndoba ndo mɛ akpã na kinda tɛ Yezo da.