Marko 14 - Fana Ngbangɔ 1987

Agbia agbe lingo ti liongɔ Yezo

¹ Angbã ndo bi sɛ ya, yenga ti Lipandasi tɛ Ayuda, nga na yenga mɛ andoili ya, yenga ti mapa mɛ ta yɔrɔ ti susungɔ na ni da ma ati. Ko agbia tɛ awa lungɔ Nzapa na ye, na awa hangɔ ndia ndogi ndo kɔdɛ ya, ani gbɔ̃ Yezo na gbe mbingo, ani ho lo.

² Ala mangbi ka popo tɛ la ya: “Ale ta e gbɔ̃ lo na ngoi ti yenga ma. Se e li so ko, azi atɔmbɔkɔ.”

Mbanga wali kɔi akĩkĩ yɔmbɔ na li Yezo

³ Yezo ndo ka kɔdɔrɔ mɛ ili ni la Betania, ka ya da tɛ Simɔ mɛ ndo ndiba tɛ lo awe. Na ngoi mɛ lo so ndotɛ ye ko, wali kɔi ali ya da ni ko na mbenda na ti lo. Alɛkɛ ndo mbenda ni ko na tɛ́nɛ mɛ ili ni la albatrɛ. Ko yɔmbɔ asĩ ta ni ko mɛkɛ̃. Yɔmbɔ ni ko adu yɔmbɔ mɛ alɛkɛ na ngu kɛkɛ mɛ ili ni la nardɛ. Yɔmbɔ ni ko ndoti faranga sĩ. Wali ko ako nyɔ mbenda ni, akĩkĩ yɔmbɔ na li Yezo.

⁴ Ambanga azi mɛ aga so ndo ko ĩ hũ so ko, ngɔnzɔ agbɔ̃ la, ko ala so ndotɛnɛ so popo tɛ la ya: “Nda gbɛ̃ngɔ yɔmbɔ ni nɛ?

⁵ Ale amu yɔmbɔ ni avɔ̃ na faranga mɛ aɔ ngbangbo ta, ko amu faranga ni, akangbi na awa yɛlɛ!” Ko ala tiri ló hɛ̃ wali ni ko sĩ.

⁶ La Yezo apa hɛ̃ la ya: “Ĩ zia giangɔ bɛ lo. Nda mɛ ĩ ndohɛ̃ lo pɛnɔ nɛ? Ye mɛ lo li tɛrɛ mbi ko, adu nzɔ̃ni.

⁷ Ta sanga ma, ĩ na awa yɛlɛ na dungɔ ngoi zu ndoni kɔi. Ko ngoi zu, ĩ lengbi ti hɛ̃ngɔ la ye mɛ bɛ ĩ aye. Kanda tɛ mbi ko, ta mbi na ngbãngɔ so tɔ̃nda ĩ ngoi zu ma.

⁸ Wali olo ali ye mɛ alengbi, adu nga ma lo pia lo kĩkĩ yɔmbɔ tɛrɛ mbi uzu ti ala hɔngɔ kinda tɛ mbi.

⁹ Mbi pa hɛ̃ ĩ ti beta tɛnɛ ya, na ndo kwe zu mɛ gbanda azi apa Nzɔ̃ Pa tɛ Nzapa da ge le sese ko, apa nga gbanda pa ti ye mɛ zo wali olo ali, ko ta bɛ azi ali nga gbanda na lo ma.”

Yudasi aye kangɔ Yezo hɛ agbia

¹⁰ Ava Yezo adu sui kɔi ndoni sɛ. Ko mbanga kɔi so popo tɛ la, ili lo la Yudasi Iskariɔtɛ. Lo nɔ lo pa hɛ̃ agbia tɛ awa lungɔ Nzapa na ye ya, ni ye kangɔ Yezo hɛ̃ la.

¹¹ Ala ĩ ma so ko, bɛ la ade ma wo ma, la ala ko kapa hɛ̃ lo ya, ani na hɛ̃ngɔ lo faranga. La Yudasi ato nda gingɔ nzɔ̃ ngoi ya, ni ka Yezo hɛ̃ la.

Yezo na ava lo atɛ yenga ti Lipandasi

¹² Kɔzo bi ti yenga ti mapa mɛ ta yɔrɔ ti susungɔ na ni da ma alengbi. Ko adu bi mɛ andolu na aya ngasã ngbaga ya, atɛ na lá yenga ti Lipandasi. Ava Yezo ahũnda lo ya: “Ndo mɛ mɔ ye ya, e nɔ e tɔ hɛ̃ mɔ tɛ ti yenga da wa?”

¹³ La Yezo ahã ava lo sɛ, apa hɛ̃ la ya: “Ĩ nɔ ka le kɔdɔrɔ, ĩ na tengbingɔ na kɔli kɔi mɛ ayɔ ta ngu, ko ĩ nɔ pɛ lo.

¹⁴ Da ko lo li da ko, ĩ li nga, ko ĩ pa hɛ̃ nvɛ̃ da ni ya, wa hangɔ lo tɛ Nzapa apa ya, mɔ fa ya da mɛ ni na ava ni, ani na tɛngɔ yenga da.

¹⁵ Lo na fangɔ ĩ na kota ya da kɔi mɛ ka ndozu. Alɛkɛ aye kwe zu nzɔ̃ni ka ya da ni. Ndo mɛ ĩ na tɔngɔ na tɛ da hɛ̃ e la.”

¹⁶ Ava Yezo ahã nɔ, anɔ ka le kɔdɔrɔ, ko ala tã aye ko zu nga ma se ko ferɛ lo pa na ni hɛ̃ la. La ala tɔ tɛ ti yenga so ndo ko.

¹⁷ Ndɔ ĩ de ko, Yezo na ava lo sui kɔi ndoni sɛ aga ka ndo mɛ alɛkɛ hɛ̃ la.

¹⁸ Ngoi mɛ ala so ndotɛ ye ko, Yezo apa hɛ̃ la ya: “Mbi pa hɛ̃ ĩ ti beta tɛnɛ ya, zo kɔi na popo tɛ ĩ na kangɔ mbi hɛ̃ awa kɛ̃ngɔ mbi. Mbi na lo e ndotɛ ye na olo mɛ na ya sɛmbɛ kɔi.”

¹⁹ Ava lo ĩ ma so ko, vundu agbɔ̃ la sĩ, ko zo kɔi kɔi ahũnda lo ya: “Adu mbi? Adu mbi?”

²⁰ La Yezo agbinya hɛ̃ la ya: “Adu zo kɔi na popo tɛ ĩ sui kɔi ndoni sɛ, lo la mbi na lo e ndotɛ ye na olo na ya sɛmbɛ kɔi.

²¹ Biani, mbi Nyi Zo, mbi na kpingɔ nga ma se mɛ Buku tɛ Nzapa apa na ni na lo tɛ mbi. Kanda siɔ lo na tingɔ na wa kangɔ mbi! Nzɔ̃ni ale ta adú ndo lo ma.”

Tɛ tɛ Gbia

²² Ngoi mɛ ala so ndotɛ ye ko, Yezo amu mapa, lo ĩ hɛ̃ sia kɔli hɛ̃ Nzapa we ko, lo kongbi ya ni, lo kangbi na ava lo, lo pa hɛ̃ la ya: “ĩ mu mapa olo ĩ tɛ, tɛrɛ mbi la.”

²³ So pɛni, lo mu kangu mɛ vinɔ ya ni, lo ĩ hɛ̃ sia kɔli hɛ̃ Nzapa we ko, lo hɛ̃ ni hɛ̃ ava lo, ala zu anyɔ ni.

²⁴ Lo pa hɛ̃ la ya: “Vinɔ olo adu mɛnɛ tɛrɛ mbi mɛ asa so azi gba. Mɛnɛ ni afa ngbanga mɛ Nzapa na azi agbe.

²⁵ Mbi pa hɛ̃ ĩ ti beta tɛnɛ ya, ta mbi ti nyɔ vinɔ fani mɛ ndɛ̃ ma, nga ka lá mɛ mbi na nyɔngɔ fana vinɔ ka Kɔdɔrɔ Gbia tɛ Nzapa, wadila.”

²⁶ La Yezo na ava lo aye abia ti yenga, so pɛni, ala gwe ka ndo hɔtɔ ti Olivie.

Yezo apa ya Petro na bɛrɛngɔ lo tɛ ni

²⁷ Ngoi mɛ ala ĩ si ka ndo hɔtɔ ko, Yezo apa hɛ̃ ava lo ya: “Ĩ zu na dɔngɔ mbi ziangɔ, ta sanga ma, Buku tɛ Nzapa apa ya: ‘Mbi ho gbanda wa batangɔ angasã ngbaga, ko angasã ngbaga ni na ngbãngɔ wawa.’

²⁸ Wa na ngoi mɛ mbi na songɔ na pɛ kwa ko, mbi na ɔngɔ uzu tɛ ĩ, gwongɔ ka Galilea.”

²⁹ Petro apa hɛ̃ lo ya: “Bɛ se ala mɛ ndɛ̃ zu adɔ mɔ azia ko, ta mbi na dɔngɔ tɛ mbi mɔ ziangɔ ma!”

³⁰ Yezo agbinya hɛ̃ lo ya: “Mbi pa hɛ̃ mɔ ti beta tɛnɛ ya, ndɛ na bi olo mɛ, uzu ti kɔndɔ tongɔ mbela ti fani sɛ ko, mɔ bɛrɛ ndɛ fani ta ya, ta mɔ hĩnga mbi ma.”

³¹ Ko Petro agbinya hɛ̃ lo kpengbani buai ya: “Bɛ se adu ya, aho mbi na mɔ ndoni kɔi ko, ta mbi na bɛrɛngɔ lo tɛ mɔ bɛ gbɔ ma.” Ko ava Yezo mɛ ndɛ̃ zu apa nga bo so.

Yezo asambela Nzapa ka Gɛtɛsemane

³² Na ngoi mɛ Yezo na ava lo ĩ si nga na mbanga ndo kɔi mɛ ili ni la Gɛtɛsemane ko, lo pa hɛ̃ ava lo ya: “Ĩ dunga so ndo mɛ, mbi nɔ so sambelangɔ Nzapa.”

³³ La lo mu Petro, na Zaki, na Yoanɛ, ala ɔ ndoni kɔi. Sasambe na vundu ato nda gbɔ̃ngɔ lo.

³⁴ Ko lo pa hɛ̃ la ya: “Vundu ti kwa mɛ mbi na kpingɔ agbɔ̃ mbi. Wa ĩ ngba so ndo mɛ, ta ĩ la langɔ ma.”

³⁵ La Yezo anɔ ka uzu yakere, ase tise na ya lo, avɔrɔ To lo ya: “Baba, se alengbi ko, ta mɔ ye ya, pɛnɔ olo asi na mbi ma.

³⁶ Oo Baba, mɔ lengbi ti lingɔ ye zu, wa hã mbi na ya pɛnɔ olo mɛ mbi na hũngɔ mɔ zi. Wa ta mɔ li nga ma se mɛ bɛ mbi aye ma, kanda li nga ma se mɛ bɛ mɔ aye.”

³⁷ Lo ĩ sambela we ko, lo diri ka tɔ̃nda ava lo mɛ fɛrɛ ta, ko lo tã la alangana. Lo pa hɛ̃ Petro ya: “Simɔ, mɔ la? Ta mɔ du nga bɛ lɛ mɔ ngɛ̃ na pɛ ngoi yakere mɔ ba ndo ma?

³⁸ Ale ĩ du lɛ ĩ ngɛ̃, ĩ sambela Nzapa, so Satana atara bɛ ĩ, ko ĩ ti. Bɛ zo ndoye lingɔ nzɔ̃ ye, kanda tɛrɛ lo adu woni.”

³⁹ Lo diri lo nɔ, ko lo sambela To lo bo na ngĩ lɛ tɛnɛ ko kɔi.

⁴⁰ So pɛni, lo diri ka tɔ̃nda ava lo, ko lo tã la alangana. Ala ha dungɔ lɛ la ngɛ̃ ti langɔ gba, ala gi nga tɛnɛ ti tɛnɛngɔ hɛ̃ lo gba.

⁴¹ Lo diri lo ɔ so sambelangɔ, ko lo ĩ ga ti fani ta ko, lo pa hɛ̃ la ya: “Ĩ de bo ĩ langana? Ĩ ndowɔ tɛre ĩ? Adu so! Ngoi alengbi wɛ. Ĩ ba zo kɔi na kangɔ mbi Nyi Zo hɛ̃ awa lingɔ siɔ ye.

⁴² Ĩ longa, é gwe! Ĩ ba zo mɛ aka mbi aga wɛ.”

Aturugu agbɔ̃ Yezo

⁴³ Ngoi mɛ Yezo ade na tɛnɛngɔ tɛnɛ hɛ̃ ava lo ko, Yudasi apia asi. Lo du mbanga va Yezo na popo tɛ ava lo sui kɔi ndoni sɛ. Lo ga ndoni kɔi na azi butu butu mɛ aga na azabe, nga na akende so ti la. Agbia tɛ awa lungɔ Nzapa na ye, na awa hangɔ ndia, nga na akangba ti kɔdɔrɔ la ato azi ni ko.

⁴⁴ Yudasi mɛ ndo wa kangɔ Yezo afa ndo azi ko butu butu na se kɔdɛ mɛ lo na lingɔ, wa awa kɛ̃ngɔ Yezo ahĩnga zo mɛ ala ga so gbɔ̃ngɔ lo. Kɔdɛ ni lo mɛ: lo pa ndo hɛ̃ la ya, zo ko la ni na bɔmbɔngɔ lo ko, zo mɛ ala ga so gbɔ̃ngɔ lo la, ko ale ala gbɔ̃ lo, abata lo nzɔ̃ni, agwe na lo.

⁴⁵ Bo na ngoi mɛ Yudasi ĩ ga ko, lo nɔ ka tɛ Yezo, lo pa hɛ̃ lo ya: “Wa hangɔ lo tɛ Nzapa!” Lo bɔmbɔ Yezo.

⁴⁶ Azi ko ĩ hũ so ko, ala gbɔ̃ Yezo.

⁴⁷ Na popo tɛ azi mɛ ana Yezo aga ko, zo kɔi aha zabe tɛ lo, afa na ma mbanga wa kwa tɛ kota gbia tɛ awa lungɔ Nzapa na ye.

⁴⁸ Yezo apa hɛ̃ azi mɛ aga so gbɔ̃ngɔ lo ya: “Ĩ ga na azabe, na akende so gbɔ̃ngɔ mbi, ma bere mbi wa nzĩ.

⁴⁹ Lá kɔi kɔi, mbi ndo so popo tɛ ĩ, mbi ndoha ĩ na tenɛ tɛ Nzapa na ya da Nzapa, ko ta ĩ gbɔ̃ ndo mbi ma. Wa ale ĩ gbɔ̃ mbi, wadila tɛnɛ mɛ Buku tɛ Nzapa atɛnɛ, ati na seni.”

⁵⁰ La ava lo zu akpɛlɛ, adɔ lo azia.

⁵¹ Pandara kɔi ayu bo ma bɔngɔ kɔi, anɔ pɛ Yezo. Azi asepara nga gbɔ̃ngɔ lo,

⁵² ko lo zi ma bɔngɔ ni ati, lo kpɛ ndumbu.

Anɔ na Yezo ka gbɛlɛ awa fangɔ ngbanga

⁵³ Kota gbia tɛ awa lungɔ Nzapa na ye, na agbia tɛ awa lungɔ Nzapa na ye, na akangba ti kɔdɔrɔ, nga na awa hangɔ ndia kwe zu abombi tɛrɛ la ndoni kɔi. Ngoi mɛ ĩ gbɔ̃ Yezo ko, amu lo, anɔ na lo ka gbɛlɛ la.

⁵⁴ Petro autɛ ndo la, kanda lo tɛ lo ndo ka ndani yɔngɔrɔni. Lo nɔ, lo li ka ya ngbo tɛ kota gbia tɛ awa lungɔ Nzapa na ye. Lo ĩ si kai ko, lo du tise, lo kpɛ wá ndoni kɔi na awa batangɔ ya ngbo.

⁵⁵ Agbia tɛ awa lungɔ Nzapa na ye, na awa fangɔ ngbanga zu agi kɔdɛ ya, ani vɔ̃ to tɛrɛ Yezo, wa aho lo, ko ta ala lua lo na tɛnɛ kɔi ma.

⁵⁶ Azi gba akara ló na tɛrɛ lo, kanda ta nyɔ la ase kɔi ma.

⁵⁷ Ambanga azi alonga ndozu, akara ló tɛrɛ Yezo ya:

⁵⁸ “E ma ndo lo so ndotɛnɛ ya, ni na karangɔ kota da Nzapa mɛ ndo azi awa, ko na ya bi ta ko, ni na wangɔ omɛ ndɛ̃ mɛ ta azi na wangɔ ni ma.”

⁵⁹ Ko abɛ nga na ndo tɛnɛ ko ti karangɔ da ko, ta nyɔ la ase nga kɔi ma.

⁶⁰ Kota gbia tɛ awa lungɔ Nzapa na ye alo ndozu na gbɛlɛ azi kwe zu, ahũnda Yezo ya: “Ta mɔ lengbi ti gbinyangɔ tɛnɛ bɛ kɔi ma? To mɛ azi olo ndovɔ̃ tɛrɛ mɔ nɛ?”

⁶¹ Yezo akai ti ti ti, ta lo gbinya tɛnɛ kɔi ma. Lɔ kota gbia ko ati hũnda lo ya: “Mɔ Mɛsia Nyi Nzapa mɛ e ndovɔrɔ lo?”

⁶² Yezo agbinya hɛ̃ lo ya: “Seni la, mbi Nyi lo. Ko ĩ na hũngɔ mbi Nyi Zo, dungɔ na ndo kɔti ti Nzapa mɛ wa nguru. Ĩ na hũngɔ nga mbi na gangɔ na ya da baba ka lɛ ndozu.”

⁶³ Kota gbia ko ĩ ma so ko, ngɔnzɔ agbɔ̃ lo, lo suru bɔngɔ tɛ lo nvɛni, lo pa ya: “Ta e ti e ma atemwɛ ma!

⁶⁴ Ĩ ma, lo guru Nzapa wɛ. Wa ĩ da bɛ ĩ ya nɛ?” Ala zu agbinya hɛ̃ lo ya: “Ngbanga ati na lo, ale aho lo!”

⁶⁵ Ambanga azi akuku solo tɛrɛ Yezo, agbe lɛ lo na bɔngɔ, asɔ̃nɔ lo na gɔbɔ, ahũnda lo ya: “Di zo mɛ asɔ̃ mɔ!” So pɛni, awa batangɔ ya ngbo tɛ kota gbia tɛ awa lungɔ Nzapa na ye, amu Yezo, aba ma lo.

Petro abɛrɛ ya ta ni binga Yezo ma

⁶⁶ Ngoi mɛ wali kɔi mɛ wa kwa tɛ kota gbia tɛ awa lungɔ Nzapa na ye ĩ ga ko, ata Petro ade ka gbɛni na ya ngbo.

⁶⁷ Lo hũ Petro so ndokpɛ wá, lo ba lo toka toka, lo pa hɛ̃ lo ya: “Mɔ ndoɔ nga ndo ndoni kɔi na Yezo mɛ wa Nazarɛtɛ.”

⁶⁸ La Petro abɛrɛ ya: “Ta mbi hĩnga nda tɛnɛ ko mɔ ndotɛnɛ ma.” So pɛni, lo lo so ya ngbo, lo nɔ, lo dɔ, lo lo ka nyɔ ni. Ko kɔndɔ ato mbela kɔkɔlia kɔɔɔ!

⁶⁹ Wali ko ati hũ Petro, ato nda pangɔ hɛ̃ azi ko so ndo ko ya: “Kɔli olo lo mbanga va Yezo.”

⁷⁰ Ko Petro abɛrɛ fani mɛ ndɛ̃. So pɛni yakere ko, azi mɛ so ndo ko apa nga hɛ̃ Petro ya: “Mɔ zo tɛ la biani, na lo mɛ ya, mɔ wa Galilea.”

⁷¹ La Petro apa hɛ̃ la ya: “Se mbi pa nvɛnɛ ko, ale Nzapa ahɛ̃ mbi etumbu! Sereka, zo ko ĩ ndotɛnɛ tɛnɛ tɛ lo ko, ta mbi hĩnga lo ma.”

⁷² Bo na ngoi ko la kɔndɔ ato mbela ti fani sɛ. Ko Petro ada bɛ Io na tɛnɛ mɛ Yezo atɛnɛ hɛ̃ lo ya: “Uzu ti kɔndɔ tongɔ mbela ti fani sɛ ko, mɔ na bɛrɛngɔ fani ta ya, ta mɔ hĩnga mbi ma.” La Petro ato nda tongɔ to.