Luka 22 - Fana Ngbangɔ 1987

Agbia agbe lingo ti hongɔ Yezo

¹ Yenga ti Lipandasi tɛ Ayuda mɛ andoili ya, yenga ti mapa mɛ ta yɔrɔ ti susungɔ na ni da ma angbã ndo yakere ati.

² Agbia tɛ awa lungɔ Nzapa na ye, na awa hangɔ ndia ndogi ndo kɔdɛ ti hongɔ Yezo, ko ala ndokpɛ ndo mbɛtɔ tɛ azi.

Yudasi alɛkɛ tɛrɛ lo so kangɔ Yezo hɛ agbia

³ Ava Yezo ndo sui kɔi ndoni se, ko Satana ali bɛ mbanga kɔi mɛ andoili lo ya, Yudasi lskariɔtɛ.

⁴ Yudasi anɔ ka tɛ agbia tɛ awa lungɔ Nzapa na ye, na agbia tɛ awa batangɔ kota da Nzapa, apa hɛ̃ la se mɛ lo lengbi ti kangɔ na Yezo hɛ̃ la.

⁵ Bɛ la ade ma wo ma na lo ni, la ala ko kapa ya, ani na hɛ̃ngɔ lo faranga.

⁶ Yudasi aye da, la lo to nda gingɔ nzɔ̃ ngoi ya, ni ka Yezo na se kɔdɛ mɛ ya, ta azi ahĩnga ma.

Yezo ato ava lo so tɔngɔ tɛ ti yenga ti Lipandasi

⁷ Abi ti yenga ti mapa mɛ ta yɔrɔ ti susungɔ na ni da ma alengbi. Bi kɔi na popo tɛ abi ni ko, adu bi mɛ andolu na aya ngasã ngbaga so tɛngɔ na yenga ti Lipandasi tɛ Ayuda.

⁸ La Yezo ato Petro na Yoanɛ na kwa ya: “ĩ nɔ, ĩ tɔ hɛ̃ e tɛ ti yenga ti Lipandasi.”

⁹ La ala hũnda lo ya: “Ndo mɛ mɔ ye ya, e tɔ tɛ ni da wa?”

¹⁰ Lo pa hɛ̃ la ya: “Ĩ ma mbi, na ngoi mɛ ĩ si ka ya kɔdɔrɔ ko, ĩ na tengbingɔ na kɔli kɔi mɛ ayɔ ta ngu. Ĩ nɔ pɛ lo, ĩ li ya da ko la lo na lingɔ da.

¹¹ Ĩ pa hɛ̃ nvɛ̃ da ni ya, wa hangɔ lo tɛ Nzapa apa ya, mɔ fa ya da mɛ ni na ava ni, ani na tɛngɔ yenga da.

¹² Lo na fangɔ ĩ na kota ya da kɔi mɛ ka ndozu, aye zu da. Ko ndo mɛ ĩ tɔ na tɛ ti yenga ti Lipandasi da la.”

¹³ Ava Yezo anɔ atã aye ko zu nga ma se ko fɛrɛ lo pa na ni hɛ̃ la. La ala tɔ tɛ ti yenga so ndo ko.

Tɛ tɛ Gbia

¹⁴ Ngoi ti tɛngɔ tɛ ĩ lengbi ko, Yezo na ava lo adu ka tɛrɛ mɛsa ya ani tɛ ye.

¹⁵ Lo pa hɛ̃ la ya: “Mbi separa ndo ma wo ma ya, mbi na ĩ e tɛ yenga ti Lipandasi olo uzu ti mbi hũngɔ pɛnɔ!

¹⁶ Ta sanga ma, mbi pa hɛ̃ ĩ ya, ato na olo ko, ta mbi ti tɛ yenga ni bɛ gbɔ ma, nga ka gbanda Nzapa afa nda yenga ni yango ka Kɔdɔrɔ Gbia tɛ lo.”

¹⁷ Yezo ĩ tɛnɛ so wɛ ko, lo mu kangu mɛ vinɔ da, lo hɛ̃ sia kɔli hɛ̃ Nzapa, lo pa hɛ̃ ava lo ya: “Vinɔ olo ko, ĩ mu, ko zo kɔi kɔi anyɔ, ahɛ̃ fɔ̃ lo.

¹⁸ Ta sanga ma, mbi pa hɛ̃ ĩ ya, ato na olo ko, ta mbi ti nyɔ vinɔ ma, nga ka ngoi ti lengɔ gbia tɛ Nzapa alengbi wadila.”

¹⁹ So pɛni, lo mu mapa, lo ĩ hɛ̃ sia kɔli hɛ̃ Nzapa wɛ ko, lo kongbi ya ni, lo kangbi na ava lo, lo pa hɛ̃ la ya: “Mapa olo ĩ tɛ ko, adu tɛrɛ mbi [mɛ mbi ka so ĩ. Ale ĩ li so, so dangɔ bɛ ĩ na mbi.”

²⁰ Ala ĩ tɛ ni wɛ ko, lo mu nga kangu mɛ vinɔ da, lo ĩ hɛ̃ sia kɔli hɛ̃ Nzapa wɛ ko, lo hɛ̃ ni hɛ̃ ava lo, lo pa hɛ̃ la ya: “Kangu ti vinɔ olo ndofa fana ngbanga mɛ Nzapa na azi agbe na lege ti mɛnɛ tɛrɛ mbi.]

²¹ “Wa ĩ́ hĩnga ya, wa kangɔ mbi lo ndo mɛ, e na lo e ndotɛ ye ndoni kɔi.

²² Biani, mbi Nyi Zo mbi na kpingɔ nga ma se mɛ Nzapa ahɛ̃ na nyɔ lo, kanda siɔ lo na tingɔ na wa kangɔ mbi.”

²³ Ava lo ĩ ma so ko, ala so ndohũndangbi tɛrɛ la ya, wa kangɔ lo ni na?

Zo mɛ aɔ afɔ̃ lo zu

²⁴ Ava Yezo ato nda bimbingɔ tɛnɛ kpengbani, ala pa ya: “So popo tɛ e ko, zo mɛ azi ndomu lo ya, lo ngbondoni, lo ɔ e zu na?”

²⁵ La Yezo apa hɛ̃ la ya: “Na ya du tɛ azi ko, agbia kɔdɔrɔ ndole gbia na ndo azi ti kɔdɔrɔ tɛ la, ko awa gbe nyɔ agbia ndosepara ya, azi aili ani ya, ani anzɔ̃ azi.

²⁶ Ko na popo tɛ ĩ ko, ta seni la ma. So popo tɛ ĩ, zo ko la aɔ afɔ̃ lo zu ko, ale lo du nga ma wa ndangbani, ko ale zo ko ndohɛ̃ nyɔ hɛ̃ afɔ̃ lo adu nga ma zo mɛ ndoli kwa hɛ̃ la.

²⁷ Na zo mɛ ndotɛ ye, na zo mɛ ndoli kwa ti tɔngɔ tɛ ko, zo mɛ aɔ fɔ̃ lo na? Wa tɛngɔ ye la aɔ zo mɛ ndoli kwa ti tɔngɔ tɛ! Wa mbi na popo tɛ ĩ nga ma zo mɛ ndoli kwa hɛ̃ afɔ̃ lo.

²⁸ “Na ya pɛnɔ mɛ mbi hũ ko, ĩ la ĩ gbe bɛ ĩ, ĩ ngbã ndoni kɔi na mbi.

²⁹ Se ko la To mbi alɛkɛ na ndo akpã mbi gbia da ko, se mɛ nga mbi lɛkɛ na ndo mbi kpã ĩ agbia da la.

³⁰ Mbi na ĩ e tɛ gbanda, e nyɔ nga ndoni kɔi ka Kɔdɔrɔ Gbia tɛ mbi, ko ĩ dunga nga gbanda na ndo angɛndɛ gbia, so fangɔ ngbanga tɛ azi ti ya ale sui kɔi ndoni sɛ mɛ so Izrayɛlɛ.”

Yezo apa ya Petro na bɛrɛngɔ lo tɛ ni

³¹ Yezo apa hɛ̃ Petro ya: “Simɔ, Simɔ! Ma mbi! Satana ahũnda Nzapa ya, Nzapa ahɛ̃ ni lege, ko ni pɛ ĩ nga ma se mɛ andopɛ na lɔsɔ ya, sã ni agwe katɛ.

³² Ko mbi sambela na lo tɛ mɔ ya, ta mɔ dɔ lo yengɔ lo tɛ Nzapa mɔ zia ma. Wa na ngoi ko la mɔ diri ge tɛ mbi ko, sa nguru bɛ afɔ̃ mɔ, wadila ala kpengba.”

³³ La Petro apa hɛ̃ lo ya: “Gbia, mbi ye bo ya, e na mɔ e li bɔlɔkɔ, bere e kpili ndoni kɔi.”

³⁴ Yezo agbinya hɛ̃ lo ya: “Petro, mbi pa hɛ̃ mɔ ya, na bi olo, uzu ti kɔndɔ tongɔ mbela ko, mɔ na bɛrɛngɔ fani ta ya, ta mɔ hĩnga mbi ma.”

Yezo apa lo ti aye mɛ na singɔ na lo

³⁵ Yezo ahũnda ava lo ya: “Ngoi ko ndo mbi to ĩ na kwa ko, ta ĩ mu ndo faranga, na bozo, na pɔrɔ ma. Ko ye mɛ ndo azanga ĩ nɛ?” Ala gbinya hɛ̃ lo ya: “Ta ye kɔi azanga ndo e ma.”

³⁶ La Yezo apa hɛ̃ la ya: “Na olo ko, zo ko la na bozo ngenza tɛ lo da ko, ale lo mu ni, ko zo ko la na bozo tɛ lo da ko, ale lo mu nga ni. Wa zo ko la ta na zabe ma ko, ale lo ka kota bɔngɔ tɛ lo na faranga, ko lo mu faranga ni, lo vɔ̃ na zabe.

³⁷ Ta sanga ma, mbi pa hɛ̃ ĩ ya, ale tɛnɛ mɛ asu ka ya Buku tɛ Nzapa ati na Seni na ndo mbi. Tɛnɛ ni lo mɛ: ‘Akpã nga ndo lo na li nɔ tɛ asiɔ azi.’ Biani, tɛnɛ mɛ asu na lo tɛ mbi na tingɔ na seni.”

³⁸ La ava lo apa hɛ̃ lo ya: “Gbia, ba zabe se lo mɛ.” La lo gbinya hɛ̃ la ya: “Alengbi.”

Yezo asambela ka ndo hɔtɔ ti Olivie

³⁹ Yezo alo so ya kɔdɔrɔ, amu lege so nɔngɔ ka ndo hɔtɔ ti Olivie, nga ma se mɛ lo ndoli na ni ngoi zu. Ava lo amu nga lege, anɔ ndali lo.

⁴⁰ Ngoi mɛ lo ĩ si ka ndo hɔtɔ we ko, lo pa hɛ̃ ava lo ya: “Ĩ sambela, so Satana atara bɛ ĩ.”

⁴¹ Lo ĩ tɛnɛ so we ko, lo zia la so ndo ko, lo nɔ ka uzu yakere. Popo tɛ lo na la ĩ ti ya gɛrɛ nga ma ge tɛ sui kɔ̃ ko, lo kuku, lo sambela ya:

⁴² “Baba, se alengbi ko, mɔ hã mbi na ya pɛnɔ olo mɛ mbi na hũngɔ, mɔ zi. Wa ta mɔ li nga ma se mɛ bɛ mbi aye ma, kanda li nga ma se mɛ bɛ mɔ aye.” [

⁴³ Lo ĩ tɛnɛ so wɛ ko, angelo alo ka ndozu, asi gbɛlɛ lo, asa nguru tɛrɛ lo.

⁴⁴ Yezo ama ndo vundu sĩ, ko lo ti sambela na nguru ti tɛrɛ lo zu. So asi tɛrɛ lo, ko so ni atɔ̃nɔ tise nga ma mɛnɛ.]

⁴⁵ Lo ĩ sambela wɛ ko, lo lo ndozu, lo diri ka tɔ̃nda ava lo, ko lo tã la so ndolangana na vundu.

⁴⁶ Lo pa hɛ̃ la ya: “Ale ĩ du lɛ ĩ ngɛ̃, ĩ longa ndozu, ĩ sambela Nzapa, so Satana atara bɛ ĩ, ko ĩ ti.”

Aturugu agbɔ̃ Yezo

⁴⁷ Ngoi mɛ Yezo ade na tɛnɛngɔ tɛnɛ hɛ̃ ava lo ko, azi butu butu apia asi. Yudasi mɛ ndo va lo la adɛ li nɔ tɛ azi ni, aga na la. Yudasi ai tɛrɛ lo ka gunda Yezo ya ni bɔmbɔ lo.

⁴⁸ La Yezo apa hɛ̃ lo ya: “Yudasi, mɔ bɔmbɔ mbi Nyi Zo so kangɔ mbi hɛ̃ awa kɛ̃ngɔ mbi?”

⁴⁹ Ava Yezo mɛ ndo ana lo anɔ ka ndo hɔtɔ ĩ hũ ya, ló na singɔ ko, ala hũnda lo ya: “Gbia, é tiri to ni na zabe?”

⁵⁰ Ko mbanga va lo kɔi, amu zabe, afa na ma wa kwa tɛ kota gbia tɛ awa lungɔ Nzapa na ye, adu ndo ma lo ti kɔti.

⁵¹ La Yezo apa hɛ̃ va lo ni ko ya: “Zia so, alengbi.” So pɛni, Yezo abɔrɔ ma kɔli ko, asara ni, ati na seni.

⁵² Agbia tɛ awa lungɔ Nzapa na ye, na agbia tɛ awa batangɔ kota da Nzapa, nga na akangba ti kɔdɔrɔ ndo la aga so gbɔ̃ngɔ Yezo. La lo pa hɛ̃ la ya: “Ĩ ga na azabe, na akende so gbɔ̃ngɔ mbi, ma bere mbi wa nzĩ.

⁵³ Mbi na ĩ e ndodu ndo ngoi zu ka ya kota da Nzapa, ko ta ĩ tara ndo gbɔ̃ngɔ mbi ma. Kanda na olo ko, Nzapa azi lege hɛ̃ ĩ na Satana mɛ gbia ti mbingo ya, ĩ li ye mɛ ĩ ye lingɔ.”

Petro abɛrɛ ya ta ni bĩnga Yezo ma

⁵⁴ Aturugu ĩ gbɔ̃ Yezo, ĩ gwe na lo ko, ala nɔ na lo ka ya da tɛ kota gbia tɛ awa lungɔ Nzapa na ye. Petro autɛ ndo la, kanda lo tɛ lo ndo ka ndani yɔngɔrɔni.

⁵⁵ Azi ato ndo wá so ya ngbo. Petro anɔ, adu so popo tɛ azi mɛ adunga, aka wá ni kɛrɛrɛ.

⁵⁶ Ko wa kwa kɔi ti wali ahũ Petro so tɛrɛ wá, aba Petro toka toka, apa ya: “Kɔli olo va Yezo!”

⁵⁷ La Petro abɛrɛ ya: “Zo wali, ta mbi hĩnga lo ma.”

⁵⁸ Ĩ ninga so pɛni yakere ko, kɔli kɔi ahũ Petro, apa hɛ̃ lo ya: “Mɔ kɔli olo ko, mɔ nga mbanga va Yezo!” La Petro agbinya hɛ̃ kɔli ko ya: “Ipɔ, ta mbi va lo ma.”

⁵⁹ Ĩ ɔ so pɛni nga ma ge tɛ saa kɔi ko, mbanga zo mɛ ndɛ̃ atɛnɛ kpengbani ya: “Ti biani, kɔli olo va Yezo, na lo mɛ ya, lo wa Galilea.”

⁶⁰ La Petro agbinya hɛ̃ lo ya: “Tɛnɛ mɛ mɔ separa tɛnɛngɔ ko, ta mbi hĩnga ma.” Bo na ngoi ko la Petro adɛ na tɛnɛngɔ tɛnɛ ko, kɔndɔ ato mbela kɔkɔlia kɔɔɔ!

⁶¹ Gbia Yezo asana tɛrɛ lo, aba Petro toka toka. Petro ĩ hũ so ko, bɛ lo ada na tɛnɛ mɛ Gbia Yezo atɛnɛ hɛ̃ lo ya: “Na bi olo, uzu ti kɔndɔ tongɔ mbela ko, mɔ na bɛrɛngɔ fani ta ya, ta mɔ hĩnga mbi ma.”

⁶² La Petro alo ka ya ngbo, asi, ato to sinyɛ sinyɛ.

Azi aguru Yezo asɔ̃ nga lo

⁶³ Awa batangɔ Yezo abuba lo, asɔ̃ nga lo.

⁶⁴ Ala gbe le lo na bɔngɔ, ala hũnda lo ya: “Di zo mɛ asɔ̃ mɔ!”

⁶⁵ Ala guru nga lo ma wo ma.

Anɔ na Yezo ka gbɛlɛ awa fangɔ ngbanga

⁶⁶ Ngoi mɛ nda ĩ de ko, Ayuda mɛ akangba ti kɔdɔrɔ, na agbia tɛ awa lungɔ Nzapa na ye, nga na awa hangɔ ndia abombi tɛrɛ la. Ala mu Yezo anɔ na lo ka gbɛlɛ awa fangɔ ngbanga.

⁶⁷ Ala hũnda lo ya: “Se mɔ du Mɛsia ko, mɔ pa hɛ̃ e.” Yezo agbinya hɛ̃ la ya: “Se mbi pa hɛ̃ ĩ ya, mbi Mɛsia ko, ta ĩ na yengɔ ma.

⁶⁸ Wa se mbi hũnda nga ĩ na ndo ko, ta ĩ nga na gbinyangɔ hɛ̃ mbi ma.

⁶⁹ Kanda ato bo na olo mɛ ko, mbi Nyi Zo, mbi na dungɔ ka ndo kɔti ti Nzapa mɛ wa nguru.”

⁷⁰ La ala zu apa ya: “Alengbi ya, mɔ Nyi Nzapa?” Yezo agbinya hɛ̃ la ya: “Tɛnɛ ni la ĩ tɛnɛ, mbi Nyi Nzapa.”

⁷¹ La ala pa ya: “Ta e ti e ma atemwɛ ma! E nvɛni e ma tɛnɛ ti nyɔ lo wɛ!”