Luka 21 - Fana Ngbangɔ 1987

We muã mɛ wa yɛlɛ alu Nzapa na faranga

¹ Ngoi mɛ Yezo so ya kota da Nzapa ko, lo baba ndo so gunda lo, ko lo hũ awa nwa so ndosa faranga ka ya asandugu ti lungɔ Nzapa na ye.

² Lo hũ nga we muã kɔi mɛ wa yɛlɛ, asa tɛ lo faranga osɛ gɛgɛre.

³ La Yezo apa ya: “Mbi pa hɛ̃ ĩ ti bɛta tɛnɛ ya, we muã mɛ wa yɛlɛ ahɛ̃ faranga aɔ tɛ azi mɛ ndɛ̃ zu.

⁴ Ta sanga ma, faranga mɛ azi mɛ ndɛ̃ asa so lungɔ na Nzapa ko, adu omɛ ta ala na gwɛ̃ ni ma. Kanda tɛ we muã mɛ wa yɛlɛ ko, lo hɛ̃ kɔtɛ faranga tɛ lo ti tɛngɔ na ye.”

Yezo apa lo ti kota da Nzapa mɛ azi na karangɔ lupu lupu

⁵ Ambanga azi ndotɛnɛ ndo tɛnɛ ti kota da Nzapa, ala ndonɛ ndo ya, kota da Nzapa ni adɛ̃ sĩ, na lo ti anzɔ̃nzɔ̃ atɛ̃nɛ mɛ afua na ni, nga na lo ti aye mɛ alɛkɛ tɛrɛ ni so lungɔ na Nzapa. La Yezo apa hɛ̃ la ya:

⁶ “Da Nzapa olo ĩ ndohũ, mbanga lá kɔi gbanda ko, azi akara gbanda ni zu asa tise, ko ta le tɛ́nɛ kɔi angbã gbanda ndo fɔ̃ lo ma.”

Asiɔ lo mɛ na singɔ uzu ti sese wɛngɔ

⁷ Azi ni ko ahũnda Yezo ya: “Wa hangɔ lo tɛ Nzapa, da Nzapa ni akara gbanda lá wa? Lo mɛ gbanda afa ya, ngoi ti da Nzapa ni karangɔ alengbi we nɛ?”

⁸ Yezo agbinya hɛ̃ la ya: “Ale ĩ du na kpengba lɛ, so azi ahanda ĩ. Ta sanga ma, azi gba aga gbanda na ili mbi, ko zo kɔi kɔi na popo tɛ la apa gbanda ya, ni Mɛsia. Ngoi alengbi wɛ! Kanda ta ĩ gwe ndali la ma.

⁹ Ngoi mɛ gbanda ĩ ma pa ti to mɛ azi ndotiri, nga na pa tɛ azi mɛ ndotɔmbɔkɔ ko, ta ĩ du na mbɛtɔ ma, ale alo ni ko asi uzu hĩ. Kanda ta nda sese awɛ gbanda bo so hiɔ na ngoi ni ko ma.”

¹⁰ Yezo apa nga ya: “Azi ti mbanga kɔdɔrɔ na afɔ̃ la ti kɔdɔrɔ mɛ ndɛ̃ atiri gbanda to, ambanga agbia abi gbanda to tɛrɛ afɔ̃ la.

¹¹ Sese ayingi gbanda kpengbani, ko na ndo ndɛ̃ ndɛ̃ ndɛ̃ ko, gwɛ̃ aya gbanda, nga agbɔ̃nɔ nga gbanda azi. Aye mɛ ndosa mbɛtɔ bɛ zo, nga na akukuna ye asi gbanda ka lɛ ndozu.

¹² “Kanda uzu ti aye ko zu singɔ ko, agbɔ̃nɔ ĩ gbanda, ahɛ̃ ĩ pɛnɔ, anɔ na ĩ ka ya da sambela ya, afa ngbanga tɛ ĩ, asa nga ĩ bɔlɔkɔ. Anɔ na ĩ gbanda na lo tɛ mbi ka gbɛlɛ agbia, asi nga na ĩ gbanda ka gbɛlɛ akɛtɛ agbia ti sese olo.

¹³ Ko adu ngoi mɛ gbanda ĩ du atemwɛ ti pangɔ tɛnɛ tɛ mbi hɛ̃ azi la.

¹⁴ Ta ĩ pia ĩ kpã bɛ ĩ ngbũ na se kɔdɛ mɛ ĩ na bɛrɛngɔ na nyɔ ĩ ka gbɛlɛ awa vɔ̃ngɔ to terɛ ĩ ma.

¹⁵ Ta sanga ma, na ngoi ni gbanda ko, mbi nvɛni na fangɔ ĩ na tɛnɛ mɛ ĩ lengbi ti tɛnɛngɔ. Mbi sa nga gbanda ndara bɛ ĩ, ko ta mbanga wa kɛ̃ngɔ ĩ kɔi aɔ gbanda ĩ na tɛnɛ, bere akɛ̃ nga gbanda ya, ta tɛnɛ tɛ ĩ adu bɛta tɛnɛ ma.

¹⁶ Bɛ nga ato ĩ na ata ĩ mɛ adú ĩ, na ayata ĩ, na asongo ĩ, nga na akwa ĩ ko, ala ka ĩ gbanda hɛ̃ azi mɛ ndɛ̃, ko akpɔ azi gba so popo tɛ ĩ.

¹⁷ Bɛ azi zu akɛ̃ gbanda ĩ ka ka ka na lo tɛ mbi.

¹⁸ Kanda ta siɔ lo kɔi na singɔ na ĩ ma.

¹⁹ Ale ĩ gbe bo bɛ ĩ, wa se mɛ gbanda ĩ so la.”

Yezo apa ya kɔdɔrɔ ti Yeruzalɛmɛ na gbĩngɔ

²⁰ “Ngoi ko gbanda ĩ hũ aturugu aka Yeruzalɛmɛ kɛrɛrɛ ko, ĩ hĩnga gbanda na ngoi ni ko ya, angbã yakere azi agbɛ̃ ni.

²¹ Na ngoi ko gbanda ko, azi mɛ ka sese ti Yudea akpɛlɛ gbanda agwe ka ndo hɔtɔ, azi mɛ so ya Yeruzalɛmɛ akpɛlɛ nga gbanda agwe yɔngɔrɔni, azi mɛ gbanda ka gbe yaka ko, ta ala lo gbanda kai, adiri ge Yeruzalɛmɛ ma.

²² Ta sanga ma, adu ngoi mɛ gbanda Nzapa ahɛ̃ azi pɛnɔ ya, atɛnɛ mɛ asu na ya Buku tɛ lo ati na seni.

²³ Awe mɛ ata ngɔ, na awe mɛ ndoã aya la, ahũ gbanda pɛnɔ na ngoi ni ko sĩ! Ta sanga ma, azi ti sese ti Yudea ahũ gbanda kota pɛnɔ, ko Nzapa ade nga gbanda ngɔnzɔ tɛ lo ndo la.

²⁴ Akpɔ gbanda ambanga na zabe, agbɔ̃nɔ gbanda ambanga agwe na la, ko ala ti ambɛ ka kɔdɔrɔ tɛ azi ti lɛ sese zu. Apaganɔ ako gbanda ndo awa Yeruzalɛmɛ ngbĩi nga ka bi mɛ Nzapa ako hɛ̃ la alengbi.”

Gangɔ tɛ Nyi Zo

²⁵ “Akukuna ye asi gbanda ka lɛ lá, ka lɛ nzɛ̃, nga ka lɛ atongolo. Azi ahũ gbanda kota pɛnɔ ge le sese. Bɛ la angbã gbanda ngbũ na lo ti gɔ̃ngɔ ti kota ngu nga na ti mɔpo.

²⁶ Ngoi mɛ gbanda azi ada bɛ la na aye mɛ na singɔ ge lɛ sese zu ko, tɛrɛ la adɔ gbanda za za za. Ta sanga ma, aye ti nguru mɛ ka lɛ ndozu ayingi gbanda.

²⁷ Wa azi ahũ gbanda mbi Nyi Zo, mbi na gangɔ na ya da baba na nguru nga na kota ndima.

²⁸ Ngoi ko gbanda la aye ni ko ato nda singɔ ko, ĩ ya tɛrɛ ĩ ndozu, ĩ du na kpengba bɛ, ta sanga ma, Nzapa adoli so tɔ̃ngɔ ĩ na ya pɛnɔ.”

Nda matɔ ti kɛkɛ mɛ ili ni la figie

²⁹ So pɛni, Yezo ato matɔ hɛ̃ la ya: “Ĩ ba kɛkɛ ti figie, nga na akɛkɛ mɛ ndɛ̃ zu hĩ.

³⁰ Na ngoi ko la ĩ hũ afana kugbe ato nda tɔ̃ngɔ ka li ni ko, ĩ hĩnga ya, zongo adoli ti singɔ.

³¹ Se mɛ nga gbanda ĩ hũ aye olo asi ko, ale ĩ hĩnga ya, lo Lɛngɔ Gbia tɛ Nzapa adoli wɛ la.

³² Mbi pa hɛ̃ ĩ ti bɛta tɛnɛ ya, uzu ya azi ko la ade lɛ la ngɛ̃ na olo akpili ko, ala na hũngɔ aye ni ko zu.

³³ Ndozu na sese awe gbanda, kanda ta tɛnɛ tɛ mbi awɛ gbanda bɛ gbɔ ma.”

Ale ĩ du na kpengba lɛ na ndo gangɔ tɛ mbi

³⁴ “Ĩ du na kpengba lɛ ya, ta ĩ hɛ̃ tɛrɛ ĩ na tɛngɔ yenga ma, ta ĩ nyɔ nga kana agbɔ̃ ĩ ma. Ta ĩ du na sɔngɔ bɛ na lo ti du ti lɛ sese olo ma, so kɔdɛ tɛ ĩ ati yenge yenge, ko lá ti gangɔ tɛ mbi abuta ĩ.

³⁵ Ta sanga ma, lá ni ko abuta gbanda azi zu mɛ ge lɛ sese zu, nga ma se mɛ andosa na gbándà ndo asusu ka gbe ngu.

³⁶ Ta ĩ́ langa langɔ ma! Ale ĩ ndosambela ngoi zu, wadila ĩ lua nguru ti songɔ na ya alo zu mɛ na gangɔ, ko ĩ lua nga nguru ti singɔ gbɛlɛ mbi Nyi Zo.”

³⁷ Na lá, Yezo ndoha ndo azi na lo tɛ Nzapa ka ya kota da Nzapa. Ko ada na bi ko, lo gwe lo la ka ndo hɔtɔ mɛ ili ni la Olivie.

³⁸ Ko azi zu ndosi ndo na nda perere nvɛni, aga ka ya kota da Nzapa so mangɔ tɛnɛ tɛ lo.