Luka 18 - Fana Ngbangɔ 1987

Matɔ tɛ we muã na wa fangɔ ngbanga

¹ So pɛni, Yezo ato matɔ so fangɔ na la ya, ale ala ndosambela ngoi zu, ale ta ala ndonzɛ̃ nga bɛ gbɔ ma.

² Matɔ ni lo mɛ: “Mbanga wa fangɔ ngbanga ndodu ndo na ya kɔdɔrɔ kɔi. Ta lo ndokpɛ ndo Nzapa ma, ta lo ndotɔndɔ nga ndo zo kɔi ma.

³ Ko we muã kɔi ndodu nga ndo so ya kɔdɔrɔ ni ko, lo ndonɔ ndo ngoi zu ka tɛ wa fangɔ ngbanga ya, lo fa ngbanga tɛ ni. Lo ndopa ndo hɛ̃ lo ya: ‘Fa ngbanga mɔ bi li wa kɛ̃ngɔ mbi.’

⁴ Ko aɔ ngoi yɔngɔrɔni, ta wa fangɔ ngbanga aye ndo fangɔ ngbanga ni ma. So pɛni, wa fangɔ ngbanga apa ka ya bɛ lo ya: ‘Biani, ta mbi ndokpɛ Nzapa ma, ta mbi ndotɔndɔ nga zo kɔi ma.

⁵ Wa omɛ we muã olo ndogia mbi ko, mbi na fangɔ ngbanga bingɔ li fɔ̃ lo. Ta so ma ko, lo bo na babangɔ gangɔ ge tɛ mbi, ko mbi na nzɛ̃ngɔ sĩ na lo tɛ lo!’ ”

⁶ La Gbia Yezo apa nga ya: “Ĩ ma tɛnɛ mɛ siɔ wa fangɔ ngbanga ko atɛnɛ la!

⁷ Azi mɛ Nzapa asara la akpa azi tɛ lo, ko bi na la, ala ndodɛrɛ kɔngɔ hɛ̃ lo ko, lo fa gbanda ngbanga tɛ la. Ta lo ndanga nga gbanda tɛrɛ lo na zangɔ la ma.

⁸ Mbi pa hɛ̃ ĩ ya, lo fa gbanda ngbanga tɛ la hiɔ. Wa ngoi ko gbanda mbi Nyi Zo mbi ga ko, mbi tã gbanda azi mɛ aye lo tɛ Nzapa ge lɛ sese nga?”

Matɔ tɛ Farizeo na wa sɔrɔngɔ lapo

⁹ Yezo ato matɔ na lo tɛ azi mɛ ndoda bɛ la ya, ani abɛta azi ka lɛ Nzapa, ko ala so ndosamana na azi mɛ ndɛ̃.

¹⁰ Matɔ ni lo mɛ: “Akɔli sɛ anɔ ndo ka ya kota da Nzapa so sambelangɔ Nzapa. Kɔi Farizeo, omɛ ndɛ̃ wa sɔrɔngɔ lapo.

¹¹ Farizeo alo ka katɛ, asambela Nzapa ya: ‘Oo Nzapa, mbi hɛ̃ mɔ sia kɔli na lo ko la ta mbi nga ma azi mɛ ndɛ̃ mɛ awa nzĩ, na asiɔ azi, nga na awa kɔmbɛ ma. Mbi hɛ̃ nga mɔ sia kɔli na lo ko la ta mbi nga ma wa sɔrɔngɔ lapo olo ma.

¹² Na ya pɔsɔ kɔi ko, mbi ndokɛ̃ tɛngɔ ye fani sɛ so sambelangɔ mɔ. Na ya ye sui kɔi zu mɛ mbi ndolua ko, mbi ndohɛ̃ mɔ kɔi.’

¹³ Wa sɔrɔngɔ lapo alo tɛ lo ndozu ka yɔngɔrɔni, ta lo tara ndo bɛ yangɔ lɛ lo ndozu ma. Ko lo ba li bɛ lo so fangɔ ya, ni li siɔni, lo pa ya: ‘Oo Nzapa, ma vundu tɛ mbi mɛ wa lingɔ siɔ ye.’ ”

¹⁴ La Yezo apa nga ya: “Mbi pa hɛ̃ ĩ ya, Nzapa amu ndo wa sɔrɔngɔ lapo ya lo bɛta zo, na ngoi mɛ ndo wa sɔrɔngɔ lapo adiri ka ndo tɛ lo. Kanda ta Nzapa amu ndo Farizeo ya lo bɛta zo ma. Ta sanga ma, zo zu ko la ndomu tɛrɛ lo ya, ni ɔ azi zu ko, Nzapa na zungɔ na lo. Wa zo zu ko la ta ndomu tɛrɛ lo ya, ni ɔ azi zu ma ko, Nzapa na yangɔ lo.”

Yezo asunu apɛsɛ ayangambi

¹⁵ Azi aga na apɛsɛ ayangambi hɛ̃ Yezo ya, lo kpa ti lo ndo la so sunungɔ la. Ava Yezo ĩ hũ azi ni ko, ala bela la.

¹⁶ La Yezo aili ayangambi ni ka gunda lo, apa hɛ̃ ava lo ya: “Ale ĩ zia ayangambi aga ge tɛ mbi! Ta ĩ gbanzi la ma, ta sanga ma, Kɔdɔrɔ Gbia tɛ Nzapa adu na lo tɛ azi mɛ bɛ la nga ma bɛ ayangambi.

¹⁷ Mbi pa hɛ̃ ĩ ti bɛta tɛnɛ ya, zo ko la ta aye lo ti lo lɛngɔ gbia tɛ Nzapa nga ma se tɛ nyingambi ma ko, ta zo ni alengbi gbanda ti singɔ ka Kɔdɔrɔ Gbia tɛ Nzapa bɛ gbɔ ma.”

Wa nwa kɔi ahũnda Yezo na ndo

¹⁸ Mbanga wa Yuda mɛ gbia ahũnda Yezo na ndo ya: “Nzɔ̃ wa hangɔ lo tɛ Nzapa, ye mɛ ale mbi li, wa mbi lua du ti kaka nɛ?”

¹⁹ La Yezo agbinya hɛ̃ lo ya: “Nda mɛ mɔ ili mbi ya, nzɔ̃ zo nɛ? Ta nzɔ̃ zo da ma, bo Nzapa kɔi la nzɔ̃ni.

²⁰ Mɔ hĩnga ya, ndia apa ya: ‘Ta mɔ ti kɔmbɛ ma, ta mɔ ho zo ma, ta mɔ nzĩ ye ma, ta mɔ pa nvɛnɛ na ili zo ma, tɔndɔ to mɔ na ta mɔ.’ ”

²¹ La kɔli ko agbinya hɛ̃ Yezo ya: “Ato na ngoi ko ndo mbi de nyingambi, ngbĩi asi na lá olo mɛ ko, mbi ndotɔndɔ andia ni ko zu.”

²² Yezo ĩ ma so ko, apa hɛ̃ kɔli ko ya: “Ta mɔ dɛ mɔ li ye kɔi ma. Ba ye ni lo mɛ: gwe mɔ ka aye tɛ mɔ zu na ngere, ko mɔ mu faranga ni, mɔ kangbi na awa yɛlɛ. So pɛni, mɔ diri mɔ ga, e na mɔ e ɔ ndoni kɔi. Wa gbanda ko, mɔ lua nwa ka yayu.”

²³ Ko ngoi mɛ kɔli ko ĩ ma so ko, vundu agbɔ̃ lo sĩ, ta sanga ma, lo ndo na nwa sĩ.

²⁴ Yezo ĩ hũ ya, vundu agbɔ̃ kɔli ko ma wo ma ko, lo pa ya: “Adu kpengbani ya, awa nwa asi ka Kɔdɔrɔ Gbia tɛ Nzapa!

²⁵ Adu kpengbani ya, mbarata ali ti lɛ do súa, ko ati du kpengbani buai ya, wa nwa asi ka Kɔdɔrɔ Gbia tɛ Nzapa.”

²⁶ Azi mɛ ndo ndoma lo ahũnda lo ya: “Wa zo mɛ na songɔ na?”

²⁷ Yezo agbinya hɛ̃ la ya: “Ye ko la ta zo alengbi ti lingɔ ma ko, Nzapa alengbi ti lingɔ ni.”

²⁸ La Petro ahũnda lo ya: “Ma mbi, wa omɛ e zia ada tɛ e, e na mɔ e ndoɔ ndoni kɔi mɛ?”

²⁹ Yezo agbinya hɛ̃ la ya: “Mbi pa hɛ̃ ĩ ti bɛta tɛnɛ ya, se zo azia da tɛ lo, na ya lo, na ayata lo, na awa dúngɔ lo, bere nga aya lo na lo ti lo Lɛngɔ Gbia tɛ Nzapa ko,

³⁰ lo lua gbanda ye aɔ ndo omɛ lo na ni na olo mɛ, ko gbanda ngbĩi ko, lo lua du ti kaka.”

Yezo apa ti fani ta ya ni na kpingɔ ko ni so

³¹ Yezo amu ava lo sui kɔi ndoni sɛ, ala ɔ. La lo pa hɛ̃ la ya: “Ĩ ma mbi, gwengɔ e ka Yeruzalɛmɛ lo mɛ. Kai ko, alo zu mɛ ndo awa pangɔ nyɔ Nzapa asu na lo tɛ mbi Nyi Zo na tingɔ na seni.

³² Na kangɔ mbi hɛ̃ apaganɔ, ko ala na bubangɔ mbi, gurungɔ mbi, kukungɔ solo na tɛrɛ mbi.

³³ Ala na sɔ̃ngɔ mbi na fimbo, ala nga na hongɔ mbi, wa na pɛ bi ta ko, mbi so.”

³⁴ Ko ta ava lo ama ndo nda tɛnɛ ni ko bɛ yakere ma, ta ala hĩnga ndo nda ni ma, ta ala hĩnga nga ndo tɛnɛ mɛ Yezo atɛnɛ ma.

Yezo asara lɛ wa ziba

³⁵ Ngoi mɛ Yezo ĩ doli na kɔdɔrɔ ti Yeriko ko, lo hũ wa ziba kɔi adu so tɛrɛ lege, so ndoyɔ ndo na ti azi.

³⁶ Wa ziba ko ama azi butu butu so ndoɔ gburu gburu, la lo hũnda ya: “Ye ko nɛ oo?”

³⁷ Azi apa hɛ̃ lo ya, Yezo wa Nazarɛtɛ la aɔ la.

³⁸ Lo ĩ ma so ko, lo de kɔngɔ ya: “Yezo Tara Davidi, ma vundu tɛ mbi!”

³⁹ Azi mɛ ndo ndodɔ nɔ ka gbɛlɛ Yezo abela wa ziba ko ya, lo du kpɔ. Lo ĩ ma so ko, lo ti dɛ kɔngɔ kpengbani ya: “Tara Davidi, ma vundu tɛ mbi oo!”

⁴⁰ Yezo ĩ ma so ko, adɔ alo, ahɛ̃ nyɔ ya, aga na wa ziba ko hɛ̃ ni. Ngoi mɛ anɔ na wa ziba ko ka gbɛlɛ Yezo ko, Yezo ahũnda lo ya:

⁴¹ “Ye mɛ mɔ ye ya, mbi li hɛ̃ mɔ nɛ?” Wa ziba agbinya hɛ̃ lo ya: “Wa hangɔ lo tɛ Nzapa, mbi ye ya mɔ sara lɛ mbi, ko mbi hũ ndo fani mɛ ndɛ̃.”

⁴² La Yezo apa hɛ̃ lo ya: “Yengɔ mɛ mɔ ye na lo tɛ mbi la asara mɔ.”

⁴³ Bo na ngoi ni ko la wa ziba ahũ ndo, la lo na Yezo aɔ ndoni kɔi, ko lo gonda Nzapa. Azi ko zu butu butu ĩ hũ so ko, ala gonda nga Nzapa.