Luka 17 - Fana Ngbangɔ 1987

Ta ĩ fa zo na lege ti lingɔ siɔ ye ma

¹ Yezo apa hɛ̃ ava lo ya: “Alo mɛ ndoto zo ya, lo li siɔ ye ndosi ngoi zu. Kanda siɔ lo ati na zo ko la afa fɔ̃ lo na lege ti lingɔ siɔ ye.

² Ko nzɔ̃ni ale agbe kota tɛ́nɛ na gɔ̃ zo ni ko, abi lo ya kota ngu, aɔ ndo omɛ lo fa lege ti lingɔ siɔ ye na zo kɔi so popo tɛ ayangambi olo mɛ.

³ Wa ĩ bata li ĩ nzɔ̃ni! “Se nyita mɔ ali siɔ ye ko, bela lo. Wa se lo gbinya bɛ lo ko, ka lɛ mɔ ndo siɔ ye tɛ lo.

⁴ Se lo li siɔ ye tɛrɛ mɔ fani mbara mbara na la kɔi, so pɛni, lo ga ka tɛ mɔ fani mbara mbara so pangɔ hɛ̃ mɔ ya, ni li mɔ siɔni ko, ka lɛ mɔ ndo siɔ ye tɛ lo.”

Lo yengɔ lo tɛ Nzapa

⁵ Awa pangɔ kwa tɛ Gbia Yezo apa hɛ̃ lo ya: “Gbia, za e, ko e ti e ye lo tɛ Nzapa aɔ ti uzu.”

⁶ Gbia Yezo agbinya hɛ̃ la ya: “Abɛ se lo yengɔ tɛ ĩ adu yakere nga ma le tɛ mɛ ili ni la mutardɛ ko, ĩ lengbi ti pangɔ hɛ̃ kɛkɛ olo ya: ‘Hã ndo mɛ, mɔ gwe mɔ lo ka ya ngu’, ko kɛkɛ olo ama nyɔ ĩ.”

Kwa mɛ ale wa kwa alengbi ti lingɔ

⁷ “E mu nga ma ya, zo kɔi so popo tɛ ĩ na wa kwa mɛ ndosɛ̃ yaka hɛ̃ lo, bere ndobata angasã ngbaga hɛ̃ lo. Wa na ngoi ko la lo hũ wa kwa ni alo ka yaka so ndoga ko, lo lengbi ti pangɔ hɛ̃ wa kwa ni ya: ‘Ga hiɔ mɔ tɛ ye’?

⁸ Ipɔ, ta lo na pangɔ so ma, kanda lo na pangɔ hɛ̃ wa kwa ni ya: ‘Tɔ tɛ hɛ̃ mbi, mɔ hã bɔngɔ tɛrɛ mɔ, mɔ yu omɛ ndɛ̃, ko mɔ hɛ̃ mbi tɛ mbi tɛ, mbi nyɔ, wa so pɛni mɔ tɛ, mɔ nyɔ nga.’

⁹ Ta lo lengbi ti hɛ̃ngɔ sia kɔli hɛ̃ wa kwa tɛ lo na lo ko la wa kwa tɛ lo ali kwa na se nyɔ lo ma.

¹⁰ Ko se tɛ ĩ nga la, ngoi ko la ĩ li kwa zu na se nyɔ mɛ Nzapa ahɛ̃ ĩ ko, ĩ pa bo ya: ‘E du awa kwa gɛgɛrɛ, e li bo kwa tɛ e.’ ”

Yezo asara awa ndiba sui kɔi

¹¹ Ngoi mɛ Yezo so ndogwe ka Yeruzalɛmɛ ko, lo ɔ ti ndo maka ti sese ti Samaria na ti Galilea.

¹² Ngoi mɛ lo so ndoli na ya kɔdɔrɔ kɔi ko, awa ndiba sui kɔi aga so ngorongɔ lo. Ala longa ka yɔngɔrɔni,

¹³ ko ala so ndodɛrɛ kɔngɔ ya: “Yezo, wa hangɔ lo tɛ Nzapa, ma vundu tɛ e!”

¹⁴ Yezo ĩ hũ la ko, apa hɛ̃ la ya: “ĩ nɔ, í fa tɛrɛ ĩ na awa lungɔ Nzapa na ye!” Ngoi mɛ ala so ndogwe kai ko, ndiba mɛ tɛrɛ la awe.

¹⁵ Ko wa ndiba kɔi so popo tɛ la ĩ hũ ya, ndiba tɛ ni awe ko, lo diri, ko lo so ndogonda Nzapa na kɔngɔ.

¹⁶ Lo ĩ ga ĩ tã Yezo ko, lo kuku gbɛlɛ lo, lo tolo le lo tise kpɔke, lo hɛ̃ Yezo sia kɔli. Kɔli ni ko ndo wa Samaria.

¹⁷ La Yezo ahũnda lo ya: “Awa ndiba fɛrɛ sui kɔi la mbi sara la, ta seni la ma? Wa ambanga mɛ ndɛ̃ gumbaya wa?

¹⁸ Ta zo kɔi ada bɛ lo ya, ni diri, ni ga, ni hɛ̃ sia kɔli hɛ̃ Nzapa ma, wenge bo mɔ wa ndɛ̃ olo mɛ?”

¹⁹ La Yezo apa hɛ̃ lo ya: “Lo ndozu, mɔ gwe, yengɔ mɛ mɔ ye na lo tɛ mbi la asara mɔ.”

Gangɔ tɛ Nzapa so lɛngɔ gbia

²⁰ Afarizeo ahũnda Yezo ya: “Nzapa aga gbanda so lɛngɔ gbia lá wa?” La Yezo agbinya hɛ̃ la ya: “Ta gangɔ tɛ Nzapa so lɛngɔ gbia na dungɔ na se kɔdɛ mɛ ya, azi ahũ ni na lɛ la ma.

²¹ Ta azi apa gbanda ya, ĩ ba lo lo ge, bere ĩ ba lo la kai ma. Ta sanga ma, ale ĩ hĩnga ya, Nzapa ndole gbia na olo so popo tɛ ĩ.”

²² So pɛni, lo pa hɛ̃ ava lo ya: “Mbanga lá kɔi gbanda ko, ĩ separa gbanda hũngɔ mbi Nyi Zo bo na pɛ nyi ngoi, kanda la ĩ hũ gbanda mbi ma.

²³ Apa gbanda hɛ̃ ĩ ya, ĩ ba lo lo ge, bere ĩ ba lo la kai. Ko ta ĩ nɔ kai ma, ta í kpɛlɛ nga í nɔ pɛ azi ni ko ma.

²⁴ Se ko la bekpa ndotaima nzɛrrr, ko avuru na lɛ ndozu kwɛ zu ngbɛ ko, se mɛ nga gbanda mbi Nyi Zo mbi ga na ni la.

²⁵ Kanda uzu ale mbi hũ pɛnɔ gba, ale azi ti ngoi olo akɛ̃ mbi liĩ wadila.

²⁶ Ye ko ndo asi na ngoi tɛ Noa ko, se mɛ nga na singa na ngoi ti gangɔ tɛ mbi Nyi Zo la.

²⁷ Na ngoi ko ndo ko, azi ndotɛ, ndonyɔ, ndoko due, bere ndoto nga aya la ti awe ka due. Ala ĩ li ndo so ngbĩi ĩ si na lá ko ndo Noa ali ya kota masua ko, ngu asĩ ndo, agbɔ lɛ sese, akpɔ azi zu.

²⁸ Gangɔ tɛ mbi adu nga gbanda nga ma ngoi mɛ ndo Lɔtɔ ade lɛ lo ngɛ̃. Na ngoi ko ndo ko, azi ndotɛ, ndonyɔ ndo. Ala ndovɔ̃ ndo aye, ndoka nga aye na ngere, ala ndolu ndo yaka, ndowa da.

²⁹ Ko ĩ ti na ngoi mɛ ndo Lɔtɔ ĩ lo so Sɔdɔmɛ ĩ ɔ ko, Nzapa ato ndo wá mɛ ndoza lau lau, alo ka ndozu akpɔ azi zu.

³⁰ Ko ngoi mɛ gbanda mbi Nyi Zo, mbi ga na ni ko, seni nga’ gbanda la.

³¹ “Na lá ko gbanda ko, ta zo alo gbanda ka gegi, ali ya da ya, ni lɔ aye tɛ ni ma. Se tɛ zo mɛ nga gbanda ka yaka la: ta lo lo gbanda ka yaka, lo diri ka ya da ma.

³² Wa ĩ da bɛ ĩ na lo mɛ ndo asi na ya Lɔtɔ. Lo sana ndo tɛrɛ lo so bangɔ ndo ka gesi, ko lo kpi ndo!

³³ Zo ko la aye batangɔ du tɛ lo ko, tɔrɔ tɛrɛ lo na kpingɔ. Wa zo ko la aka tɛrɛ lo na lo tɛ mbi ko, tɔrɔ tɛrɛ lo na songɔ.

³⁴ Mbi pa hɛ̃ ĩ ya, na lá ni ko gbanda ko, na popo tɛ azi se mɛ gbanda asereka so ndo tange kɔi ko, aangelo amu gbanda kɔi, azia kɔi.

³⁵ Na popo tɛ awe sɛ mɛ gbanda so ndogu nzo ko, aangelo amu gbanda kɔi, azia kɔi. [

³⁶ Na popo tɛ kɔli sɛ mɛ adu gbanda ka yaka ko, aangelo amu gbanda kɔi, azia kɔi.]”

³⁷ La ava lo ahũnda lo ya: “Gbia, aye ni ko asi gbanda so wa?” Lo gbinya hɛ̃ la na matɔ ya: “Ndo ko gbanda kinda ase da ko, ndo mɛ nga gbanda angwalo abombi tɛrɛ la da la.”