Luka 14 - Fana Ngbangɔ 1987

Yezo asara zo mɛ ngã asusu na lo

¹ Ĩ ti na mbanga lá ti wɔngɔ tɛrɛ ko, Yezo anɔ ka tɛ mbanga gbia tɛ Afarizeo so tɛngɔ ye. Ko azi mɛ ndo so ndo ko so ndoba lo toka toka.

² Zo kɔli kɔi mɛ ngã asusu na lo, alo so gbɛlɛ Yezo.

³ La Yezo ahũnda awa hangɔ ndia nga na Afarizeo ya: “Ndia tɛ e aye ya, asara zo na lá ti wɔngɔ tɛre, bere ta ndia tɛ e aye ma?”

⁴ Ko ta ala ye ndo gbinyangɔ tɛnɛ ma. La Yezo agbɔ̃ ti wa ngã ko, asara lo, apa hɛ̃ lo ya, lo gwe.

⁵ So pɛni, Yezo apa hɛ̃ la ya: “So popo tɛ ĩ, zo mɛ se nyi lo, bere bagara tɛ lo ati na ya dú ti ngu, bɛ na lá ti wɔngɔ tɛrɛ ko, lo kɛ̃ hãngɔ lo bo na ngoi ni ko na? Mbi da bɛ mbi ya, ta zo ni da ma.”

⁶ Ko ala ha ndo gbinyangɔ tɛnɛ na ndo tɛnɛ ko lo hũnda na la gba.

Gingɔ nzɔ̃ ndo na lá ti kota yenga

⁷ Yezo ahũ ndo ya, azi mɛ aili la so tɛngɔ tɛ ndosara ndo ti li ni ya, ani du da. La lo to matɔ hɛ̃ la zu ya:

⁸ “Ngoi mɛ se zo aili mɔ ya, mɔ ga, mɔ tɛ yenga ti mungbingɔ tɛ zo na ya lo ko, ta mɔ nɔ mɔ sara ndo ti li ni, wa mɔ du da ma. Se mɔ li nga so, hĩngama hĩngama aili nga zo mɛ aɔ mɔ,

⁹ ko zo mɛ aili ĩ zu sɛ na gangɔ pangɔ hɛ̃ mɔ ya: ‘Lo, mɔ zia ndo olo hɛ̃ fɔ̃ mɔ.’ Ko kamɛnɛ agbɔ mɔ, mɔ lo, mɔ nɔ mɔ du ka ndani gbɔ.

¹⁰ Kanda na ngoi ko la aili mɔ ya, mɔ ga, mɔ tɛ yenga ti mungbingɔ tɛ zo na ya lo ko, nɔ mɔ du ka ndani gbɔ. Wa na ngoi ko la zo mɛ aili mɔ, aga apa hɛ̃ mɔ ya: ‘Kwa, ga mɔ du ge uzu, ge ndo mɛ nzɔ̃ni buai’ ko, na lo ni, mɔ na dungɔ na ndima na lɛ azi zu mɛ ĩ na la ĩ dunga so tɛngɔ ye.

¹¹ Ta sanga ma, zo zu ko la ndoyakɛ tɛrɛ lo ko, Nzapa na zungɔ na lo. Wa zo zu ko la ndobi tɛrɛ lo ko, Nzapa na yangɔ lo.”

¹² So pɛni, Yezo apa hɛ̃ zo mɛ aili lo ya: “Ngoi mɛ se mɔ ili azi ya, ala ga atɛ ye ka tɛ mɔ na kɔmbitɛ, bere na ndɔ ko, ta mɔ ili akwa mɔ, na ayata mɔ, na asongo mɔ, nga na awa nwa mɛ so tɔ̃nda mɔ ma. Ta mɔ li nga so ma, so ala ili nga mɔ lá kɔi ya, mɔ ga mɔ tɛ ye ka tɛ ani. Ko adu nga ma ala diri hɛ̃ mɔ na ye mɛ ndo ala tɛ ka tɛ mɔ.

¹³ Kanda ngoi ko la mɔ tɔ tɛ ti kota yenga ko, ili awa yɛlɛ, na awa pɛnɔ, na awa zɛ̃ nga na awa ziba.

¹⁴ Mɔ na dungɔ na dengɔ bɛ, ta sanga ma, ye mɛ mɔ hɛ̃ la atɛ ko, ta ala lengbi ti diringɔ na ni hɛ̃ mɔ ma. Nzapa adiri na ni gbanda hɛ̃ mɔ, na ngoi mɛ gbanda lo so azi mɛ ndo awa lingɔ nzɔ̃ ye.”

Matɔ ti tɛ ti kota yenga

¹⁵ Mbanga zo kɔi na popo tɛ azi mɛ na Yezo ndotɛ ye, ĩ ma tɛnɛ mɛ Yezo ĩ tɛnɛ ko, apa hɛ̃ Yezo ya: “Dengɔ bɛ ati na zo ko gbanda atɛ ye ka Kɔdɔrɔ Gbia tɛ Nzapa!”

¹⁶ La Yezo ato matɔ hɛ̃ lo ya: “Mbanga kɔli kɔi atɔ ndo tɛ ti kota yenga, ko lo ili azi ma wo ma na lo ni.

¹⁷ Ngoi ti kota yenga ni ĩ lengbi ko, lo to wa kwa tɛ lo ya, lo nɔ, lo pa hɛ̃ azi mɛ aili la ya: ‘Ĩ ga, ta sanga ma, na olo ko, alɛkɛ ye kwɛ zu awe.’

¹⁸ Ko nyɔ azi ni ko zu ase kɔi, ala kɛ̃ nɔngɔ ka kota yenga ni. Zo ti uzu apa hɛ̃ wa kwa tɛ gbia ya: ‘Mbi vɔ̃ yaka, ko ale mbi nɔ, mbi ba ni. Mbi gbɔ̃ gɛrɛ mɔ, ta mbi na gangɔ ma!’

¹⁹ Zo ti sɛ apa hɛ̃ lo ya: ‘Mbi vɔ̃ abagara sui kɔi, ala na ya kpu tɛ la sɛ sɛ, ko mbi ye ya, mbi nɔ mbi tara ala na kwa. Mbi gbɔ̃ gɛrɛ mɔ, ta mbi na gangɔ ma.’

²⁰ Zo ti ta apa hɛ̃ lo ya: ‘Mbi du na wali fanani, nda mɛ ta mbi lengbi ti nɔngɔ kai ma la. Mbi gbɔ̃ gɛrɛ mɔ, ta mbi na gangɔ ma.’

²¹ Wa kwa ko adiri ka tɛ gbia tɛ lo, apa tɛnɛ ko kwɛ zu hɛ̃ lo. Gbia ĩ ma so ko, ngɔnzɔ agbɔ̃ lo, lo pa hɛ̃ wa kwa tɛ lo ya: ‘Nɔ hiɔ ka ndo kota lege nga na nyi lege mɛ aɔ na ya kɔdɔrɔ, ko mɔ mu awa yɛlɛ na awa pɛnɔ, na awa ziba nga na awa zɛ̃, mɔ ga na la ge.’

²² Ĩ ninga yakere ko, wa kwa adiri aga, apa hɛ̃ gbia ya: ‘Gbia, mbi li ye zu na se nyɔ mɔ, kanda ndo adɛ bo dɛngɔ.’

²³ La gbia apa hɛ̃ wa kwa tɛ lo ya: ‘Nɔ ka ta lege mɛ aɔ na le yaka, nɔ nga ti tɛrɛ gbágbá, mɔ hɛ̃ nyɔ hɛ̃ azi, ala ga ge ya da tɛ mbi, wadila ya da ni asĩ.

²⁴ Mbi pa hɛ̃ ĩ ya, azi ko ndo aili la ya, ala ga atɛ ye ko, ta zo kɔi na popo tɛ la atɛ gbanda ye tɛ mbi ma!’ ”

Se mɛ zo alengbi ti tingɔ va Yezo

²⁵ Yezo na azi butu butu ndogwe ndo so lege, ko lo gi tɛrɛ lo, lo pa hɛ̃ la ya:

²⁶ “Zo ko la aye gangɔ ge tɛ mbi ya, ni ti va mbi ko, ale bɛ lo akɛ̃ to lo na ta lo, na ya lo, na aya lo, nga na ayata lo ti kɔli na ti wali, ko ale bɛ lo akɛ̃ nga tɛrɛ lo nvɛni.

²⁷ Ale zo ayɔ krusi tɛ lo so fangɔ ya, ni ye hũngɔ pɛnɔ, ko lo ga nga ya, e na ni e ɔ ndoni kɔi. Ta so ma ko, ta lo lengbi ti tingɔ va mbi ma.

²⁸ So popo tɛ ĩ, se mbanga zo aye wangɔ da mɛ ganguruni ko, ale lo du tise uzu, lo binga bɛ lo ya, faranga ti wangɔ na da ni alengbi ti dungɔ kɛ̃. Lo na bingangɔ bɛ lo nga so, so bangɔ ya, bere ni na faranga gba so onzingɔ na kwa ti da ni.

²⁹ Ta so ma, se lo pia lo kpã gu gɛrɛ da ni, wa so pɛni, se ta lo onzi ma ko, azi zu ko la ahũ da ni ko, ae lo.

³⁰ Ala na pangɔ ya: ‘Zo olo ato ndo nda wangɔ da, ko lo ha onzingɔ kwa ni gba!’

³¹ Se tɛ agbia nga la: se gbia kɔi aye gwengɔ tiringɔ fɔ̃ lo gbia mɛ ndɛ̃ na to ko, ale lo du tise uzu, lo binga bɛ lo, so bangɔ ya, se ni mu aturugu koto sui kɔi, ni tiri na fɔ̃ ni gbia mɛ aturugu tɛ lo koto sui se ko, ni nwɔ lo nga?

³² Ngoi mɛ lo de ka yɔngɔrɔni, se lo hũ ka lɛ lo ya, ta alengbi ma ko, lo to azi ka tɛ fɔ̃ lo gbia ni ko ya, ani mangbi.”

³³ Yezo apa nga ya: “Se mɛ nga se ta ĩ dɔ aye tɛ ĩ kwɛ zu ĩ zia ma ko, ta zo kɔi na popo tɛ ĩ na tingɔ va mbi ma la.”

Hĩngɔ mɛ sɔngɔ ni awɛ

³⁴ Yezo apa ya: “Hĩngɔ adu nzɔ̃ ye. Wa se sɔngɔ ti hĩngɔ awɛ ko, kɔdɛ mɛ ali, ko hĩngɔ ni ati sɔ sia? Ta kɔdɛ ni da ma.

³⁵ Ta hĩngɔ ni ti dɛ nzɔ̃ni ya, alɛkɛ na sese, alɛkɛ na goga, ko asu nga na tɛ ma, kanda na sangɔ ni gegi. Zo ko la ma lo adu da ko, ale lo ma!”