Luka 13 - Fana Ngbangɔ 1987

Ale ĩ gbinya bɛ ĩ so ĩ kpili

¹ Na ngoi ko ndo ko, ambanga azi aga apa hɛ̃ Yezo lo tɛ lɔ awa Galilea mɛ ndo Pilato ahɛ̃ nyɔ, akpɔ la, na ngoi mɛ ndo azi ni ko so ndolu Nzapa na ye.

² Yezo agbinya hɛ̃ la ya: “Ĩ da bɛ ĩ ya, se akpɔ awa Galilea ni ko gi tɛrɛ oko ko, afa ya, siɔ ye tɛ la aɔ ndo tɛ awa Galilea mɛ ndɛ̃ zu?

³ Mbi pa hɛ̃ ĩ ya, ta seni la ma. Kanda se ta ĩ gbinya bɛ ĩ ma ko, ĩ na kpilingɔ zu nga ma se tɛ la.

⁴ Ko azi sui kɔi ndoni miambe ko ndo la da ti Siloe mɛ ganguruni akara asa ndo la, akpɔ nga la ko, ĩ da bɛ ĩ ya, siɔ ye tɛ la aɔ ndo tɛ awa Yeruzalɛmɛ mɛ ndɛ̃ zu?

⁵ Mbi pa hɛ̃ ĩ ya, ta seni la ma. Kanda se ta ĩ gbinya bɛ ĩ ma ko, ĩ na kpilingɔ zu nga ma se tɛ la.”

Kɛkɛ ti figie mɛ ta ndole ma

⁶ So pɛni, Yezo ato matɔ hɛ̃ la ya: “Mbanga kɔli kɔi alu ndo kɛkɛ ka yaka vinɔ tɛ lo, ili kɛkɛ ni la figie. Lo nɔ ka yaka ni ya, ni kɔ le ni ko, ta lo lua ma.

⁷ La lo pa hɛ̃ wa kwa ti yaka vinɔ ni ya: ‘Ba, aɔ na olo buru ta, mbi ndoga so kɔngɔ le figie, ko ta mbi ndohũ ni ma. Dɛ ni mɔ bi tise! Kɛkɛ olo ndomu ndo sanga sanga ya nɛ?’

⁸ La wa kwa ti yaka vinɔ agbinya hɛ̃ lo ya: ‘Gbia, zia e ba ni na buru olo hĩ. Mbi na gɛ̃ngɔ du na gu gɛrɛ ni kɛrɛrɛ, ko mbi sa sese ti goga da.

⁹ Mbi na lingɔ so, bere wa ale na buru ti pɛni. Ta so ma ko, mɔ hɛ̃ nyɔ, ko adɛ ni abi tise.’ ”

Yezo asara zo wali kɔi na lá ti wɔngɔ tɛrɛ

¹⁰ Mbanga lá ti wɔngɔ tɛrɛ ko, Yezo so ndoha azi na lo tɛ Nzapa ka ya da sambela.

¹¹ Zo wali kɔi mɛ tɛrɛ lo ndosɔ ndo so ndo ko, lo na siɔ tɔrɔ ya tɛrɛ lo, ko siɔ tɔrɔ ni ala ya tɛrɛ lo buru sui kɔi ndoni miambe. Siɔ tɔrɔ ni aba ngɔngɔ lo ngwɛ̃, ko ta lo lengbi ti lonzingɔ tɛrɛ lo ma.

¹² Yezo ĩ hũ lo ko, aili lo, apa hɛ̃ lo ya: “Zo wali, nga tɛ mɔ awɛ.”

¹³ Yezo akpã ti lo na ndo zo wali ko, la zo wali ko alonzi tɛrɛ lo kpɔngbɔrɔ bo na ngoi ni ko, ato nda gondangɔ Nzapa.

¹⁴ Gbia ti ya da sambela ĩ hũ so ko, ngɔnzɔ agbɔ̃ lo na lo ko la Yezo asara zo na lá ti wɔngɔ tɛrɛ. La gbia ni ko apa hɛ̃ azi butu butu mɛ aga so ndo ko ya: “Bi ti lingɔ na kwa adu mana. Ale ĩ ndoga na ya bi ni ko, wa asara ĩ. Kanda ta ĩ ga na lá ti wɔngɔ tɛrɛ ma!”

¹⁵ Gbia Yezo ĩ ma so ko, agbinya hɛ̃ lo ya: “I du awa poroso! So popo tɛ ĩ ko, zo kɔi kɔi ndozara bagara tɛ lo, bere punda tɛ lo ya, ni nɔ na lo, lo nyɔ ngu na lá ti wɔngɔ tɛrɛ. Ta seni la ma?

¹⁶ Ko zo wali olo ko, lo tara Abrahama, Satana amu buru sui kɔi ndoni miambe akuni na lo gbɔkɔrɔ, ko ta alengbi ya, mbi zi lo na gbe ti Satana na lá ti wɔngɔ tɛrɛ ma?”

¹⁷ Tɛnɛ mɛ Yezo agbinya abi kamɛnɛ sĩ na le awa kɛ̃ngɔ lo, ko azi butu butu asaba ndo sĩ na lo ti akwa ti ndima mɛ ndo Yezo ndoli.

Matɔ ti ale tɛ mɛ ili ni la mutardɛ

¹⁸ Yezo apa ya: “Lo Lɛngɔ Gbia tɛ Nzapa akpa nga ma nɛ? Ye mɛ mbi lengbi ti mungɔ hangɔ na lo Lɛngɔ Gbia tɛ Nzapa nɛ?

¹⁹ Lo Lɛngɔ Gbia tɛ Nzapa akpa nga ma ale tɛ mɛ andoili ya mutardɛ mɛ zo amu, alu ka yaka tɛ lo. Ngoi mɛ mutardɛ ni ĩ ko ko, amai, ati kɛkɛ, ko ahũ aga awa da tɛ la na ya kati ni.”

Matɔ ti yɔrɔ mɛ ndosusu na mapa

²⁰ Yezo apa nga ya: “Ye mɛ mbi lengbi ti mungɔ, hangɔ na lo Lɛngɔ Gbia tɛ Nzapa nɛ?

²¹ Lo Lɛngɔ Gbia tɛ Nzapa akpa nga ma yɔrɔ ti susungɔ na mapa mɛ wali amu aalingbi na kilo ti farinɛ sui sɛ ndoni okɔ̃, ngbĩi nga ka pɔpɔtɔ mapa ni asusu.”

Nyɔ ngise mɛ pitoto

²² Na gwengɔ tɛ Yezo ka Yeruzalɛmɛ ko, lo ɔ ti ndo akota kɔdɔrɔ, nga ti ndo anzina kɔdɔrɔ, ko lo ha azi na lo tɛ Nzapa.

²³ Zo kɔi ahũnda lo ya: “Wa hangɔ lo tɛ Nzapa, azi mɛ gbanda Nzapa aso la ko, ala du gbanda yakere?” La Yezo apa hɛ̃ azi ya:

²⁴ “Ale ĩ li kpengbani, ĩ li ti nyɔ ngise mɛ pitoto. Ta sanga ma, mbi pa hɛ̃ ĩ ya, azi ma wo ma agi gbanda kɔdɛ ya, ani li ti nyɔ ngise ni ko, ko ala ha gbanda gba.

²⁵ “Ngoi mɛ gbanda nvɛ̃ da alo, ato nyɔ ngise na kɛrɛre ko, ĩ ngbã gbanda gegi, ĩ gɔngɔ nyɔ ngise, ĩ pa hɛ̃ lo ya: ‘Gbia, zi nyɔ ngise hɛ̃ e!’ Ko lo gbinya gbanda hɛ̃ ĩ ya: ‘Ta mbi hĩnga ndo mɛ ĩ lo da ĩ ga ma.’

²⁶ Ko ĩ pa gbanda hɛ̃ lo ya: ‘E na mɔ e tɛ ndo ndoni kɔi, e nyɔ nga ndo ndoni kɔi, mɔ ha ndo azi na lo tɛ Nzapa so bɛ lege ti kɔdɔrɔ tɛ e.’

²⁷ Ko lo ti pa gbanda hɛ̃ ĩ fani mɛ ndɛ̃ ya: ‘Ta mbi hĩnga ndo mɛ ĩ lo da ĩ ga ma. Ĩ ɔ le mbi, ĩ zu ĩ du awa lingɔ siɔ ye!’

²⁸ Ĩ hũ gbanda Abrahama, na Izaki, na Yakobo nga na awa pangɔ nyɔ Nzapa ka Kɔdɔrɔ Gbia tɛ Nzapa, ko asa ĩ gbanda gegi. Kai ko, ĩ to gbanda to, ĩ dema nga gbanda tɛrɛ ĩ.

²⁹ Azi alo gbanda ka tɔ, alo ka do, alo ka banga, alo ka mbongo aga atɛ tɛ ka Kɔdɔrɔ Gbia tɛ Nzapa.

³⁰ Na ngoi ni ko gbanda ko, ambanga azi mɛ awa gesi na popo tɛ afɔ̃ la na olo, ati gbanda awa li ni, ko ambanga mɛ ndɛ̃ mɛ awa li ni na olo, ati gbanda awa gesi.”

Yezo abela awa Yeruzalɛmɛ

³¹ Bo na ngoi ko la ambanga Afarizeo anɔ ka tɔ̃nda lo, apa hɛ̃ lo ya: “Lo ndo mɛ mɔ ɔ, mɔ gwe ka ndo mɛ ndɛ̃, ta sanga ma, Erodɛ aye ya aho mɔ.”

³² Yezo agbinya hɛ̃ la ya: “Ĩ nɔ ĩ pa hɛ̃ Erodɛ mɛ baba ta poroso ya: ‘Na lá olo mɛ ko, mbi ndotoma asiɔ tɔrɔ na ya tɛrɛ azi, mbi ndosara ngã na tɛrɛ azi. Ndã ko, mbi li nga bo so, wa mbandasi ko, mbi kɔ nda kwa tɛ mbi.’

³³ Kanda ale mbi ɔ na nyɔ fɔnɔ tɛ mbi na lá olo mɛ, ndã nga na mbandasi. Ta sanga ma, ta alengbi ya, aho wa pangɔ nyɔ Nzapa ka ndo mɛ ndɛ̃ ma, ale aho lo bo ge Yeruzalɛmɛ.

³⁴ “I awa Yeruzalɛmɛ, ĩ la ĩ ndokpɔ awa pangɔ nyɔ Nzapa, ĩ nga la ĩ ndomu tɛ́nɛ ĩ boroka na azi mɛ Nzapa ato la ka tɛ ĩ, ĩ ho! Mbi ye ndo fani sĩni ya, mbi bombi ĩ ndoni kɔi so tɔ̃nda mbi, nga ma se mɛ ta kɔndɔ ndobombi na aya lo na gbe kpange ti lo, ko ĩ kɛ̃ ndo.

³⁵ Wa ĩ ma la! Nzapa na dɔngɔ kɔdɔrɔ tɛ ĩ nda ngbo li ngbo ziangɔ. Mbi pa hɛ̃ ĩ ya, ato na olo, ta ĩ na hũngɔ gbanda mbi ma, nga ka ngoi mɛ ĩ na hũngɔ mbi fani mɛ ndɛ̃, ko ĩ na nɛngɔ ya: ‘Gbia Nzapa asunu bɛ zo ko la tɛrɛ gangɔ na ili lo ma ke!’ ”