Luka 12 - Fana Ngbangɔ 1987

Ĩ du na kpengba lɛ na ndo awa poroso

¹ Na ngoi ko ndo ko, azi agbe hingo hingo, ko ala so ndodɔrɔngbi gɛrɛ la. La Yezo apa tɛnɛ uzu hɛ̃ ava lo ya: “Ĩ du na kpengba lɛ na ndo yɔrɔ ti susungɔ na mapa tɛ Afarizeo, alengbi ya ĩ́ bata li ĩ na lo ti poroso tɛ la.

² Alo zu mɛ azi ndohɔndɛ ko, asi gbanda yango. Alo zu mɛ na gbe mbingo ko, azi ahĩnga gbanda ni.

³ Nda mɛ atɛnɛ zu ko la ĩ na tenɛngɔ na gbe mbingo, na singɔ gbanda yango la. Atɛnɛ ko nga la ĩ na tɛnɛngɔ na papata na gu ma afɔ̃ ĩ ka ya da ko, adɛrɛ gbanda ni na kɔngɔ ka be kɔdɔrɔ.”

Bo Nzapa kɔi la e lengbi ti kpɛngɔ lo

⁴ “Akwa mbi, mbi pa hɛ̃ ĩ ya, azi ko la ndoho ngbonga tɛrɛ zo, ko so pɛni, ta ala lengbi ti lingɔ ye mɛ ndɛ̃ ma ko, ta ĩ kpɛ mbɛtɔ tɛ la ma.

⁵ Mbi na fangɔ ĩ na zo mɛ ale ĩ kpɛ mbɛtɔ tɛ lo: ĩ́ kpɛ mbɛtɔ tɛ Nzapa ko la, na pɛ hongɔ zo ko, lo na nguru ti bingɔ zo ni ka lifɛlo. Biani, mbi pa hɛ̃ ĩ ya, zo mɛ ale ĩ ndokpɛ mbɛtɔ tɛ lo la!

⁶ “Andomu pata sɛ, avɔ̃ na aya hũ okɔ̃, kanda ta bɛ Nzapa ndoli na nyi hũ kɔi ma.

⁷ Ko abɛ nga kwa li ĩ ko, Nzapa ndodikɔ le ni kɔi kɔi. Wa ta ĩ du na mbɛtɔ ma: ĩ du ngbondoni ĩ ɔ aya hũ.”

Yengɔ lo tɛ Yezo na gbɛlɛ azi

⁸ “Mbi pa hɛ̃ ĩ ya: zo zu ko la apa gbanda na gbɛlɛ azi ya, ni zo tɛ mbi ko, mbi Nyi Zo, mbi pa nga gbanda na gbɛlɛ aangelo tɛ Nzapa ya, zo ni ko lo zo tɛ mbi.

⁹ Kanda zo ko gbanda abɛrɛ na gbɛlɛ azi ya, ta ni hĩnga mbi ma ko, mbi Nyi Zo, mbi bere nga gbanda na gbɛlɛ aangelo tɛ Nzapa ya, ta mbi hĩnga zo ni ko ma.

¹⁰ “Zo zu ko gbanda la atɛnɛ tɛnɛ siɔni na ili mbi Nyi Zo ko, Nzapa aka gbanda lɛ lo ndo siɔ ye tɛ zo ni ko. Kanda zo ko gbanda la atɛnɛ tɛnɛ siɔni na ili Tɔrɔ Santo ko, ta Nzapa aka gbanda lɛ lo ndo siɔ ye tɛ zo ni ko ma.

¹¹ “Na ngoi ko gbanda agbɔ̃nɔ ĩ, agwe na ĩ ka ya da sambela, bere ka ndo tɛ awa fangɔ ngbanga, bere ka gbɛlɛ agbia tɛ leta ya, afa ngbanga tɛ ĩ ko, ta bɛ ĩ angbã ngbũ na lo ti se kɔdɛ mɛ ĩ na bɛrɛngɔ na nyɔ ĩ, bere na lo ti tɛnɛ mɛ ĩ na tɛnɛngɔ ma.

¹² Ta sanga ma, na ngoi ni gbanda ko, Tɔrɔ Santo afa ĩ gbanda na tɛnɛ mɛ ĩ lengbi ti tɛnɛngɔ.”

Matɔ tɛ wa nwa mɛ lo wa buba

¹³ Mbanga zo so popo tɛ azi butu butu apa hɛ̃ Yezo ya: “Wa hangɔ lo tɛ Nzapa, pa hɛ̃ nyita mbi ya, lo kangbi ndũ ye mɛ ndo to e azia hɛ̃ e, ko lo hɛ̃ mbi tɛ mbi.”

¹⁴ Yezo agbinya hɛ̃ lo ya: “Kwa, ta akpã mbi ya, mbi fa ngbanga ti atɛnɛ tɛ ĩ, bere mbi kangbi ye tɛ ĩ ma.”

¹⁵ So pɛni, Yezo apa hɛ̃ azi zu ya: “Ĩ bata li ĩ nzɔ̃ni na lo ti dungɔ na gwɛ̃ ye zu, ta sanga ma, bɛ se zo adu na ye sĩ ko, ta du tɛ lo adu na lo ti aye tɛ lo ma.”

¹⁶ La lo to matɔ hɛ̃ la ya: “Mbanga kɔli kɔi ndo wa nwa, lo ndo na yaka tɛ lo, ko yaka ni ndohɛ̃ ndo lo tɛ ma wo ma.

¹⁷ Lo binga bɛ lo, lo pa ka ya bɛ lo ya: ‘Ye mɛ mbi lengbi ti lingɔ nɛ? Ta mbi na ndo ti batangɔ na tɛ tɛ mbi zu da ma.’

¹⁸ La lo pa nga ka ya bɛ lo ya: ‘Ye mɛ mbi na lingɔ lo mɛ: mbi na karangɔ gɔ tɛ mbi, wangɔ omɛ kotani buai, ko mbi bo tɛ tɛ mbi zu, nga na aye tɛ mbi mɛ ndɛ̃ zu ka ya ni.

¹⁹ So pɛni, mbi na tɛnɛngɔ ka ya bɛ mbi ya, nyi bua, mɔ na ye ma wo ma, ko aye ni alengbi ti lingɔ buru gba. Wɔ tɛrɛ mɔ, mɔ tɛ, mɔ nyɔ, mɔ saba.’

²⁰ La Nzapa apa hɛ̃ lo ya: ‘Wa buba mɛ! Mɔ kpi ndɛ na bi olo mɛ. Wa aye olo kwɛ zu mɛ mɔ bata na lo tɛ mɔ ko, na ngbãngɔ ti na?’ ”

²¹ Yezo apa nga ya: “Se tɛ zo mɛ ndobo nwa na lo tɛ lo nvɛni, kanda ka lɛ Nzapa ko, ta zo ni ko adu wa nwa ma la.”

Ale e ndokpã bɛ e ndo Nzapa

²² So pɛni, Yezo apa hɛ̃ ava lo ya: “Na lo ni ko, mbi pa hɛ̃ ĩ ya, na lo ti du tɛ ĩ ko, ta bɛ ĩ asɔ na lo ti tɛ mɛ ĩ na gwɛ̃ ti tɛngɔ ma. Na lo ti tɛrɛ ĩ ko, ta bɛ ĩ asɔ na lo ti bɔngɔ mɛ ĩ na gwɛ̃ ti yungɔ ma.

²³ Ta sanga ma, du tɛ zo adu ngbondoni aɔ tɛ, tɛrɛ zo adu nga ngbondoni aɔ bɔngɔ.

²⁴ Ĩ ba akpakpo hĩ: ta ala ndolu tɛ ma, ta ala ndokɔ nga tɛ ma, ta ala na ndo ti batangɔ na tɛ ma, ta ala nga na gɔ ma, ko Nzapa ndoka la na tɛ! Singa na akpakpo o singa na ĩ mɛ ĩ ɔ la ma!

²⁵ Ta zo kɔi so popo tɛ ĩ alengbi ti sangɔ mbanga bi na ndo bi tɛ lo, na lo ti bɛ lo mɛ angbã ngbũ ma!

²⁶ Se ta ĩ du na nguru ti lingɔ ye mɛ yakere ma ko, nda mɛ ĩ ndokpã bɛ ĩ ngbũ na ndo atanga ye mɛ ndɛ̃ nɛ?

²⁷ Ĩ ba se mɛ akasa pandara ti ya ndo ndoko na ni hĩ: ta ala ndoli kwa ma, ta ala ndolɛkɛ nga bɔngɔ ya ani yu ma. Ko mbi pa hɛ̃ ĩ ya, abɛ nga Salomɔ mɛ ndo na nwa sĩ ko, ta lo lua ndo bɔngɔ mɛ adɛ̃ alengbi na mbanga kasa pandara ko kɔi ma.

²⁸ Singa na asa mɛ da na lá olo ka ya ndo, ko na nda ko, asa ni ka ya wá azɔ ko, Nzapa ndoli ya, ala ndodu na nzere mɛ nzɔ̃ni, o singa na ĩ ma! Lo na yungɔ ĩ na bɔngɔ. Ĩ du azi mɛ ta ĩ ye lo tɛ lo kpa ma!

²⁹ Wa ngoi zu ko, ta bɛ ĩ asɔ so gingɔ tɛ ti tɛngɔ, bere ye ti nyɔngɔ ma.

³⁰ Aye ni ko zu ko, adu apaganɔ ti lɛ sese olo la ndogi ni ngoi zu. Kanda tɛ ĩ ko, ĩ na To ĩ mɛ ahĩnga ya, ĩ na gwɛ̃ ti aye ni ko.

³¹ Kanda ale ĩ kpa bɛ ĩ na ndo lo Lɛngɔ Gbia tɛ Nzapa, wadila Nzapa ahɛ̃ nga ĩ atanga aye mɛ ndɛ̃.”

Ale ĩ ndobo nwa tɛ ĩ ka yayu

³² “Aya mbi, ta mbɛtɔ agbɔ̃ ĩ ma! Ta sanga ma, bɛ To ĩ Nzapa aye, la ĩ ti azi ti Kɔdɔrɔ Gbia tɛ lo.

³³ Ale ĩ vɔ̃ aye tɛ ĩ na faranga, ko ĩ mu faranga ni, ĩ hɛ̃ awa yɛlɛ. Ale ĩ du na bozo faranga mɛ ta ndogbɛ̃ ma, ĩ bo nwa tɛ ĩ ka yayu. Kai ko, ta nwa ni alengbi ti gerengɔ bɛ gbɔ ma, ta awa nzĩ alengbi ti singɔ ndo ni ma, ta akangi alengbi nga ti tɛngɔ ni ma.

³⁴ Ta sanga ma, ndo ko la ĩ ndokpã na nwa tɛ ĩ da ko, ndo mɛ nga ĩ ndokpã bɛ ĩ da la.”

Ale awa kwa alɛkɛ tɛrɛ la so kungɔ gbia tɛ la

³⁵ “Ale ĩ lɛkɛ tɛrɛ ĩ so lingɔ kwa, ko ĩ zɔ nga amɔinda tɛ ĩ.

³⁶ Ĩ du nga ma awa kwa mɛ ndoku gbia tɛ la mɛ agwe yenga ti dungbingɔ. Ala ndoku lo ya, bo na ngoi ko la lo lo kai lo ga, lo gɔngɔ nyɔ ngise ko, ani zi hɛ̃ lo.

³⁷ Dengɔ be ati na awa kwa ko la, na ngoi ko la se gbia tɛ la aga ko, ata la lɛ la ngɛ̃! Mbi pa hɛ̃ ĩ ti bɛta tɛnɛ ya, gbia tɛ la na lɛkɛngɔ tɛrɛ lo so hɛ̃ngɔ la ndo ya, ala dunga tɛrɛ mɛsa ti tɛ, ko ni ga, ni hɛ̃ la tɛ ti tɛngɔ.

³⁸ Se lo diri lo ga na bɛ bi, bere na ngoi mɛ bɛ bi aɔ we, lo tã la lɛ la ngɛ̃ ko, dengɔ bɛ ati na la.

³⁹ Ale ĩ ma nda tɛnɛ olo kpa: se adu ya, nvɛ̃ da ahĩnga ngoi mɛ wa nzĩ ndoga na ni ko, ale lo ngba lɛ lo ngɛ̃, ko ale ta lo zia wa nzĩ ali ya da tɛ lo ma.

⁴⁰ Ale ĩ lɛkɛ nga tɛrɛ ĩ, ta sanga ma, mbi Nyi Zo mbi ga gbanda na ngoi mɛ ta ĩ hĩnga ma.”

Nzɔ̃ wa kwa na siɔ wa kwa

⁴¹ La Petro ahũnda Yezo ya: “Gbia, mɔ to matɔ ni ko bo hɛ̃ e, bere mɔ to ni hɛ̃ azi zu?”

⁴² Gbia Yezo agbinya ya: “Nzɔ̃ wa kwa mɛ lo nga wa kɔdɛ adu na? Adu wa kwa ko la gbia tɛ lo na ziangɔ lo ya, lo bata da, ko lo hɛ̃ nga tɛ hɛ̃ awa kwa mɛ ndɛ̃ na ngoi mɛ alengbi.

⁴³ Dengɔ bɛ ati na wa kwa ko la, na ngoi mɛ se gbia tɛ lo aga ko, atã lo na tɛrɛ lingɔ kwa ni ko!

⁴⁴ Mbi pa hɛ̃ ĩ ti bɛta tɛnɛ ya, gbia ko na kpãngɔ lo ya, lo bata aye tɛ ni zu.

⁴⁵ Kanda se wa kwa ko apa ka ya bɛ lo ya, ta gbia tɛ ni na gangɔ hiɔ ma, ko se lo to nda sɔ̃ngɔ afɔ̃ lo awa kwa ti kɔli nga na ti wali, tɛngɔ ye ɔngɔ nyɔ kpɔ̃ ni, nyɔngɔ kana gbɔ̃ngɔ lo ko,

⁴⁶ gbia tɛ lo na gangɔ na lá mɛ ta lo hĩnga ma, nga na saa mɛ ta lo kpa bɛ lo da ma. Lo na hɛ̃ngɔ siɔ etumbu hɛ̃ wa kwa ni ko. Kanda ye ko la gbia ko na lingɔ na awa kwa mɛ akɛ̃ mangɔ nyɔ lo ko, ye mɛ nga lo na lingɔ na wa kwa ko la.

⁴⁷ “Wa kwa ko la ahĩnga ye mɛ gbia tɛ lo ndoye, kanda ta lo ndolɛkɛ tɛrɛ lo ma, ta lo ndoli nga ye mɛ gbia tɛ lo ndoye ma ko, na sɔ̃ngɔ lo na fimbo ma wo ma.

⁴⁸ Kanda wa kwa ko la ta ahĩnga ye mɛ gbia tɛ lo ndoye ma, ko lo ndoli ye mɛ alengbi ti sɔ̃ngɔ lo na lo ni ko, na sɔ̃ngɔ lo na fimbo yakere. Zo ko la ahɛ̃ lo ye gba ko, na hũndangɔ lo na ye gba. Zo ko la azia ye ma wo ma na ti lo ko, na hũndangɔ nga lo na ye ma wo ma.”

Azi na kɛngbingɔ na lo tɛ Yezo

⁴⁹ “Mbi ga ya mbi bi wá ge lɛ sese, ko mbi ye ya wá ni ati za lau lau!

⁵⁰ Ale mbi mu batisimɔ ti pɛnɔ, ko mbi na dungɔ na vundu ngbĩi nga ka mbi mu batisimɔ ni ko.

⁵¹ Ĩ ndoda bɛ ĩ ya, mbi ga ge lɛ sese olo ya, mbi tongbi songɔ na popo tɛ azi? Ipɔ, mbi pa hɛ̃ ĩ ya, ta mbi ga so tongbingɔ songo na popo tɛ azi ma, kanda mbi ga so kangbingɔ popo tɛ azi.

⁵² Ato na olo, na ya nda se wa ko la azi da okɔ̃ ko, popo tɛ la na kangbingɔ, azi ota na dungɔ mbage, azi sɛ adu nga mbage.

⁵³ Bɛ kɔli na kɛ̃ngɔ nyi lo ti kɔli, bɛ nyi kɔli nga na kɛ̃ngɔ to lo. Bɛ wali na kɛ̃ngɔ nyi lo ti wali, bɛ nyi wali nga na kɛ̃ngɔ ta lo. Bɛ ta kɔli na kɛ̃ngɔ ya nyi lo, ko bɛ ya nyi lo nga na kɛ̃ngɔ lo.”

Se mɛ azi ndohĩnga na ngoi ti aye mɛ na lingɔ

⁵⁴ Yezo apa nga ndo hɛ̃ azi ko butu butu ya: “Ngoi mɛ ĩ hũ ngu aga ndozu ku ku ku ka tɔ ko, ĩ nɛ ya: ‘Ngu na ningɔ,’ ko ngu ni ndoni nga biani.

⁵⁵ Wa ngoi ko la ĩ ma yá ato nda yangɔ ka mbongo ko, ĩ nɛ ya: ‘Ndo na gbingɔ,’ ko ndo ni ndogbi nga biani.

⁵⁶ Ĩ awa poroso mɛ! Ĩ hĩnga bo kambisangɔ nda aye ti lɛ sese na ti lɛ ndozu, wa ta ĩ hĩnga nda aye ti ngoi olo ma ya:

Ĩ na awa kĩngɔ ĩ, ĩ́ lɛkɛ popo tɛ ĩ

⁵⁷ “Ale ĩ nvɛni ĩ ndohĩnga se nzɔ̃ du mɛ ĩ lengbi ti dungɔ.

⁵⁸ Se zo avɔ̃ to tɛrɛ mɔ, ko ĩ na lo ĩ bombi lege kɔi ĩ ndogwe ka tɛ awa fangɔ ngbanga ko, li kpengbani, ĩ na lo ĩ lɛkɛ popo tɛ ĩ na ngoi mɛ ĩ dɛ so lege. Ta so ma ko, lo na singɔ na mɔ ka gbɛlɛ wa fangɔ ngbanga, ko ala hɛ̃ mɔ hɛ̃ turugu, ko turugu abi mɔ bɔlɔkɔ.

⁵⁹ Mbi pa hɛ̃ mɔ ya, ta mɔ na longɔ kai singɔ ma, nga ka mɔ futa tanga mɛnya mɛ angbã kwɛ wadila.”