Luka 11 - Fana Ngbangɔ 1987

Yezo aha ava lo na sambela

¹ Mbanga la kɔi, Yezo so ndosambela na mbanga ndo kɔi. Lo ĩ kɔ nda sambela tɛ lo ko, mbanga va lo kɔi apa hɛ̃ lo ya: “Gbia, ha e na sambela nga ma se ko ndo Yoanɛ aha na ava lo.”

² La Yezo apa hɛ̃ lo ya: “Na ngoi ti sambelangɔ ko, ĩ pa ya: ‘To e, Azi atɔndɔ bɛ ili mɔ mɛ santo ma ke! Mɔ ga bɛ mɔ lɛ gbia ndo azi zu ma ke!

³ Hɛ̃ e tɛ mɛ alengbi ti sĩngɔ ya e lá kɔi kɔi.

⁴ Ka lɛ mɔ ndo siɔ ye tɛ e, Ta sanga ma, e ndoka lɛ e ndo asiɔ ye mɛ azi ndoli tɛrɛ e. Ta mɔ ye ya, Satana atara bɛ e ma.’ ”

⁵ Yezo apa nga hɛ̃ la ya: “E mu nga ma ya, zo kɔi so popo tɛ ĩ na fɔ̃ lo da. Ko ĩ ti na bɛ bi ko, fɔ̃ lo ni ko anɔ, ata lo ka da tɛ lo, apa hɛ̃ lo ya: ‘Nyi bua, zɛ̃ mbi na mapa ta.

⁶ Mbanga fɔ̃ mbi kɔi alo ka fɔnɔ asi ka tɛ mbi, ko ta mbi na ye ti tɛngɔ bɛ yakere ya, mbi hɛ̃ lo, lo tɛ ma.’

⁷ La fɔ̃ lo ni ko adu ka ya da, agbinya hɛ̃ lo ya: ‘Zia giangɔ mbi oo! Mbi to fɛrɛ nyɔ ngise gã na kɛrɛrɛ, mbi e na aya mbi e se nga tise wɛ oo! Ta mbi lengbi ti longɔ ndozu hɛ̃ngɔ mɔ mapa ma oo!’ ”

⁸ Yezo apa nga hɛ̃ la ya: “Mbi pa hɛ̃ ĩ ya, bere ta fɔ̃ lo ni ko na longɔ ndozu hɛ̃ngɔ lo mapa ma, na lo mɛ ya, lo du fɔ̃ lo. Kanda fɔ̃ lo ni ko nga bo na longɔ ndozu, hɛ̃ngɔ lo aye zu mɛ lo na gwɛ̃ ni, na lo mɛ ya, fɔ̃ lo na babangɔ bo yɔngɔ ye ti lo.

⁹ Wa mbi pa hɛ̃ ĩ ya, ĩ yɔ ye, wa Nzapa ahɛ̃ ĩ, ĩ gi ye, ko ĩ lua ni, ĩ gɔngɔ nyɔ ngise, wa Nzapa azi ni hɛ̃ ĩ.

¹⁰ Ta sanga ma, zo zu ko la ayɔ ye ko, Nzapa ahɛ̃ ni hɛ̃ lo, zo zu ko la agi ye ko, lo lua ni, ko zo zu ko la agɔngɔ nyɔ ngise ko, Nzapa azi ni hɛ̃ lo.

¹¹ To nyingambi mɛ so popo tɛ ĩ, se nyi lo ayɔ susu ti lo, ko lo gbɔ̃ ngbɔ, lo hɛ̃ lo na?

¹² Bere se nyi lo ayɔ para kɔndɔ ti lo, ko lo gbɔ̃ kpakete, lo hɛ̃ lo na? Ta zo ni da ma.

¹³ Singa na ĩ mɛ asiɔ azi, ĩ ndohɛ̃ anzɔ̃ ye hɛ̃ aya ĩ, o singa na To ĩ mɛ ka yayu ma! Lo na hɛ̃ngɔ Tɔrɔ Santo hɛ̃ azi ko la ahũnda lo ya, lo hɛ̃ ani!”

Yezo akɛ̃ ya ta nguru tɛ ni alo ka tɛ Satana ma

¹⁴ Mbanga lá kɔi ko, Yezo so ndotoma siɔ tɔrɔ na ya tɛrɛ kɔli kɔi mɛ siɔ tɔrɔ ni abi lo buburu. Siɔ tɔrɔ ni ĩ si wɛ ko, buburu ko ato nda tɛnɛngɔ tɛnɛ, ko azi butu butu abema sĩ.

¹⁵ Ambanga apa ya: “Belzebulɛ mɛ gbia tɛ asiɔ tɔrɔ la ahɛ̃ lo nguru ti tomangɔ na asiɔ tɔrɔ ni ko!”

¹⁶ Ko ambanga mɛ ndɛ̃ agi kɔdɛ ya, ani gbɔ̃ nda Yezo. La ala hũnda lo ya, lo li ye ti kpɛnɛ kɔi mɛ afa ya, Nzapa la ahɛ̃ lo nguru ti lingɔ na ye ni ko.

¹⁷ Kanda Yezo ahĩnga dangɔ bɛ tɛ la. La lo pa hɛ̃ la ya: “Sese tɛ gbia ko la azi ni ndotiri to da na popo tɛ la ko, anɔ ngbĩi ko, azi ti sese ni agundu, da akara, asa na ndo fɔ̃ lo.

¹⁸ Se azi tɛ Satana atiri to na popo tɛ la nvɛni ko, ta Satana alengbi ti ngbãngɔ na lɛngɔ gbia ma. Ĩ ndopa ya, mbi ndotoma asiɔ tɔrɔ, na lo mɛ ya, Belzebulɛ la ahɛ̃ mbi nguru ti tomangɔ na la.

¹⁹ Se adu ya, mbi ndotoma asiɔ tɔrɔ na ya tɛrɛ azi na nguru tɛ Belzebulɛ ko, wa zo mɛ ahɛ̃ ava ĩ nguru ti tomangɔ na asiɔ tɔrɔ na ya tɛrɛ azi na? Ava ĩ nvɛni afa ya, ngbanga ati na ĩ.

²⁰ Ti bɛta tɛnɛ ko, mbi ndotoma asiɔ tɔrɔ na nguru tɛ Nzapa, ko oko afa ya, Nzapa ndole gbia ndo ĩ.

²¹ “Zo mɛ wa nguru, lo nga na aye tɛ lo ti tiringɔ na to, ko ngoi ko la lo ndobata da tɛ lo ko, aye tɛ lo zu na dungɔ na seni.

²² Wa se zo mɛ aɔ lo na nguru, aga atiri lo na to, anwɔ lo ko, zo ni ko alɔ aye ti to tɛ lo mɛ lo ndokpã bɛ lo ndo ni. Ko zo ni ko alɔ aye ti to ni, akangbi na azi.

²³ “Zo ko la ta mbi na lo e ndodu ndoni kɔi ma ko, wa kɛ̃ngɔ mbi la. Zo ko la ta ndoza mbi ya, mbi e na lo e bombi azi ma ko, wa gundungɔ ya azi la.”

Siɔ tɔrɔ adiri ali na ndo mɛ lo lo da lo si

²⁴ “Ngoi ko la siɔ tɔrɔ alo ka ya tɛrɛ zo asi ko, lo ngbɛ̃ngbɛ̃nɛ na kuru ndo, ya ni gi ndo, ni wɔ tɛrɛ ni da. Se ta lo lua ndo ni ma ko, lo pa ka ya bɛ lo ya: ‘Mbi na diringɔ ka ya da tɛ mbi mɛ ndo mbi lo da mbi si!’

²⁵ Wa na ngoi ko la lo diri kai ko, lo tã ayɔ ya da ni, alɛkɛ ni nzɔ̃ni.

²⁶ Lo ĩ hũ so ko, lo nɔ lo lɔ asiɔ tɔrɔ mɛ ndɛ̃ mbara mbara mɛ ala siɔni buai aɔ lo, lo ga na la, ko lo na la adunga ka ya da ni. Na lo ni ko, du tɛ kɔli ko ati gbɛ̃ aɔ ti uzu.”

Bɛta dengɔ bɛ

²⁷ Yezo ĩ kɔ nda tɛnɛ so ko, zo wali kɔi adu ka popo tɛ azi butu butu apa hɛ̃ lo ya: “Dengɔ bɛ ati na zo wali ko ndo ame ngɔ tɛ mɔ, adú mɔ, aã nga mɔ!”

²⁸ La Yezo agbinya tɛ lo ya: “Dengɔ bɛ ati na azi ko la ndoma tɛnɛ tɛ Nzapa, ndoma nga nyɔ lo.”

Azi abũnda Yezo ya lo li ye ti kpɛnɛ

²⁹ Ngoi mɛ azi butu butu ĩ bombi tɛrɛ la so tɔ̃nda Yezo ko, lo pa ya: “Azi ti ngoi mɛ adu asiɔ azi. Ala ndohũnda mbi ya, mbi li ye ti kpɛnɛ mɛ afa ya, mbi lua nguru ti lingɔ na ni ka tɛ Nzapa. Kanda ta mbi na lingɔ ye ti kpɛnɛ kɔi ma, angbã bo ye ti kpɛnɛ mɛ ndo Nzapa ali na Yonasi mɛ ndo wa pangɔ nyɔ Nzapa.

³⁰ Ta sanga ma, se ko ndo Nzapa afa azi ti Ninivɛ na ye ti ndo Yonasi ko, se mɛ nga lo fa azi ti ngoi olo na ye ti ndo mbi Nyi Zo la.

³¹ Na lá ti fangɔ ngbanga gbanda ko, gbia wali mɛ ndo ale gbia ka sese ti mbongo, alo gbanda so gbɛlɛ azi ti ngoi mɛ, avɔ̃ to tɛrɛ la. Ta sanga ma, lo lo ndo ka nda sese gbɔ, lo ga so mangɔ tɛnɛ mɛ ndo Salomɔ atɛnɛ na ndara. Ko so ndo mɛ ko, mbanga zo mɛ aɔ Salomɔ da!

³² Na lá ti fangɔ ngbanga gbanda ko, azi ti Ninivɛ alonga nga gbanda so gbɛlɛ azi ti ngoi mɛ, avɔ̃ to tɛrɛ la. Ta sanga ma, ngoi mɛ ndo azi ti Ninivɛ ĩ ma Yonasi ĩ pa tɛnɛ tɛ Nzapa hɛ̃ la ko, ala gbinya bɛ la. Ko so ndo mɛ ko, mbanga zo mɛ aɔ Yonasi da!”

Lɛ zo adu mɔinda mɛ zo ndoba na ndo

³³ “Ta zo ndozɔ mɔinda ya, ni hɔndɛ ni, bere ni kpa ni na gbe ta ma. Kanda andozɔ ni ya, akpã na ndo mɛsa, wa azi mɛ ndoli ya da, ahũ ndo yango.

³⁴ Lɛ mɔ adu nga ma mɔinda mɛ mɔ ndoba na ndo. Se lɛ mɔ adu nzɔ̃ni ko, tɛrɛ mɔ kwɛ zu adu na ya vuru ndo. Wa se lɛ mɔ adu siɔni ko, tɛrɛ mɔ adu na ya mbingo.

³⁵ Na lo ni ko, bata li mɔ ya, ta vuru ndo mɛ mɔ na ni ati mbingo ma.

³⁶ Se tɛrɛ mɔ kwɛ zu adu na ya vuru ndo, ta nyi ndo mɛ angbã ya mbingo adu da ma ko, afa ya, tɛrɛ mɔ kwɛ zu na dungɔ na ya vuru ndo, nga ma se ko mɔinda ndoza, ko mɔ ndohũ na ndo ngbɛ̃.”

Yezo abela Afarizeo nga na awa hangɔ ndia

³⁷ Yezo ĩ kɔ nda tɛnɛngɔ tɛnɛ ko, mbanga Farizeo kɔi apa hɛ̃ lo ya, lo ga lo tɛ ye ka tɛ ni. Yezo anɔ ali ka ya da tɛ Farizeo ni ko, adu na tɛrɛ mɛsa, ato nda tɛngɔ ye.

³⁸ Farizeo ko ĩ hũ ya, na se li ye tɛ akotara ani, ta Yezo akpo ti lo uzu ti lo tɛngɔ ye ma ko, lo bema.

³⁹ La Gbia Yezo apa hɛ̃ lo ya: “Ba se ye mɛ ĩ Afarizeo ĩ ndoli la: ĩ ndokpo koko kangu nga na koko sɛmbɛ tɛ ĩ, kanda ka ya bɛ ĩ ko, ĩ na gwɛ̃ ti nzĩngɔ ye sĩ, ĩ na zugbu sĩ.

⁴⁰ Ĩ du azi mɛ ta ĩ na kɔdɛ ma! Nzapa mɛ wa lɛkɛngɔ koko ye ko, lo nga la lo lɛkɛ ya bɛ zo.

⁴¹ Ale ĩ ndohɛ̃ ye ti ya kangu nga na ye ti ya sɛmbɛ tɛ ĩ hɛ̃ awa yɛlɛ, wadila aye zu ati vuruni hɛ̃ ĩ.

⁴² “Siɔ lo ati na ĩ Afarizeo! Ĩ ndoha nyɔ ye sui kɔi ti lɛ tɛ ndɛ̃ ndɛ̃ ndɛ̃ ti yaka tɛ ĩ, ĩ hɛ̃ Nzapa. Abɛ nga aye mɛ ĩ ndosa na ya ngu ti tɛ tɛ ĩ ko, ĩ ndohã nga nyɔ ni, ĩ hɛ̃ Nzapa. Kanda ĩ ndodɔ lingɔ ye na seni, ĩ ndodɔ nga yengɔ Nzapa, ĩ zia. Adu ye mɛ ale ĩ li, ko ta bɛ ĩ ali na tanga ni ma la.

⁴³ “Siɔ lo ati na ĩ Afarizeo! Ĩ ndoye dungɔ na ndo ngɛndɛ mɛ na gbɛlɛ azi zu ka ya da sambela, ko ĩ ndoye nga fɔnɔngɔ ka lɛ kɔdɔrɔ ya, abala ĩ, atɔndɔ nga ĩ.

⁴⁴ Siɔ lo ati na ĩ Afarizeo! Ĩ du nga ma asɛndɛ mɛ ta azi ndohũ ni ma, asɛndɛ mɛ ta azi ndohĩnga ya, adu sende ma, la ala aɔ ti ndo ni!”

⁴⁵ La mbanga wa hangɔ ndia kɔi apa hɛ̃ lo ya: “Wa hangɔ lo tɛ Nzapa, tɛnɛ ko mɔ tɛnɛ so ko, alengbi ya, mɔ guru nga e la.”

⁴⁶ Yezo agbinya hɛ̃ lo ya: “Siɔ lo ati nga na ĩ awa hangɔ ndia! Ye mɛ ĩ ndopa ya, ale azi ali ko, adu nga ma kumba mɛ ndonɛ ndororo. Ĩ ndokpã ni na ndo ngɔngɔ la ya, ala yɔ. Ko ta ĩ ndomu bɛ li ti ĩ kɔi ya, ĩ za la na yɔngɔ kumba ni ma.

⁴⁷ Siɔ lo ati na ĩ! Akotara ĩ akpɔ ndo awa pangɔ nyɔ Nzapa, ko ĩ ndolɛkɛ sɛndɛ tɛ la ya, ati nzɔ̃ni.

⁴⁸ Oko la ĩ ndoli nga so ko, ĩ ndofa ya, ĩ ye lo ti ye mɛ ndo akotara ĩ ali. Ta sanga ma, ala kpɔ ndo awa pangɔ nyɔ Nzapa, ko ĩ ndolɛkɛ tɛ ĩ asɛndɛ tɛ la ya, ati nzɔ̃ni!

⁴⁹ Nda mɛ ndo Nzapa mɛ wa ndara apa ya: ‘Mbi Nzapa, mbi na tongɔ awa pangɔ nyɔ mbi nga na awa pangɔ kwa tɛ mbi ka tɛ la. Ala na kpɔngɔ ambanga na popo tɛ la, ko ala na hɛ̃ngɔ ambanga mɛ ndɛ̃ pɛnɔ.’

⁵⁰ Na lo ni ko, Nzapa ahɛ̃ gbanda etumbu hɛ̃ azi ti ngoi olo na lo tɛ awa pangɔ nyɔ lo mɛ ndo azi akpɔ la, ato na ngoi ko ndo lo li na sese.

⁵¹ Ato nda kpɔngɔ la ndo na ndo Abɛlɛ, anɔ ngbĩi asi na ngoi mɛ aho na Zakaria. Aho lo ka ya kota da Nzapa na popo mɛsa ti lungɔ Nzapa na ye, na ndo mɛ santo. Mbi pa hɛ̃ ĩ ti biani ya, Nzapa ahɛ̃ gbanda etumbu hɛ̃ azi ti ngoi olo na lo ti kpɔngɔ mɛ ndo ala kpɔ na azi tɛ lo!

⁵² “Siɔ lo ati na ĩ awa hangɔ ndia! Ĩ mu nyi kɛrɛrɛ ti zingɔ na nyɔ ngise ti hĩngangɔ na nda tɛnɛ tɛ Nzapa. Ta ĩ nvɛni ĩ ndoli ka ya da ni ko ma, ko ĩ ndogbanzi azi mɛ asepara lingɔ kai.”

⁵³ Ngoi mɛ Yezo ĩ lo so ndo ko ĩ ɔ ko, siɔ ngɔnzɔ agbɔ̃ awa hangɔ ndia na Afarizeo hɛ̃ lo, ko ala to nda hũndangɔ lo na atɛnɛ kɔndɛ kɔndɛ.

⁵⁴ Ala ye ndo ya ani gbɔ̃ nda lo, nda mɛ ndo ala ndogi nyɔ lo ya, lo tɛnɛ siɔ tɛnɛ hĩ wadila.